فيلم رعب

الي فتره الذاكره عندي ضاربه, اذا ما كتبت اللي بدي اياه على الريمايندر عالموبايل خلص بروح, الكل حكالي ان نقص فيتامين B12 هو اللي بعمل هيك رحت عالدكتوره و كتبتلي فحص - مع انها حكتلي انه ما اله دخل بالذاكره و ناس بحكو ان اله دخل بالذاكره مش عارفه , امبارح رحت عملت الفحص, وانا هناك اجت عيله من اب وام و بنت عمرها تقريبا 5 سنوات و ولد عمره 3 سنوات , الام والولد والبنت بدهم يعملولهم فحص.

دخلو العيله قبلي بس انا بما انه دوري بعدهم فقاعده بمكان شايفتهم منه, العيله كلها دخلت و الاولاد متوترين من قبل ما يدخلو غرفه الفحص, والاب اقترح انهم يعملو فحص للام قبل الاولاد علشان بس يعملو فحص لواحد من الاولاد تمسكه وتطلع فيه بره الغرفه, انا مسكت حالي بالعافيه, انه خليك انت بره انت والاولاد لتعمل الام الفحص, بعدين واحد واحد بتدخلوه, لكن ضليت ساكته, مش الكل بحب الناس الفضوليين :)

عملو فحص للام , الاولاد شافو الابره من هون بدا البكى النئنئه, خلصت الام مسك الاب الولد و يا دوب نيمه عالتخت علشان تسحب الممرضه الدم, انفجر الولد بالبكا, و بدا يفعفط واجريه تضرب التخت, ويصرخ وبس حطت الابره صار يصرخ, دور راما دور راما, انه دور اخته, مسكين ما لقى طريقه يخلص منها غير انه يزكرهم باخته, اتطلعت عالبنت اللي واقفه تطلع عالمنظر, ما بتبكي المسكينه, بترج و بتطلع اصوات غريبه , كأنها بتتنفس بصوت عالي و بترج و خلصو من الولد الاب مسك البنت و نيمها عالتخت, الام استلمت الولد و حطتله لزيقه و قعدت تسكته, البنت صارت تصرخ "بديش بابا بدي ماما...ماما تعالي بدي اياكييييييييي" و صار هاد يبكي ماما بدي اياكي, والبنت تبكي ماما بدي اياكي, خلصو كل شي و الاب اخد البنت يلبسها جاكيتها, الام بتحكيلهم "هلأ بابا بدو ياخدنا عند تيتا" والمفروض انه مشوار كتيير راح يبسطهم الولد بحكيلها وهو ببكي طبعا " بديييييييييييييييس بدي اللّوح عالبييييييت" اللّوح يعني اروّح

يا الله شو انقهرت عليهم, يعني يفكرو شوي الاب والام بدل ما يخلّو الاولاد ياكلو هالرعبه, خصوصا البنت جد منظرها وهي بتطلع عاخوها و هو ببكي ومنظر الابره اشي جد بخوف, انا اساسا رايحه ومتردده, انا شخصيا بكره الابر و بخاف منهم, وما بنكر ان منظر الاولاد كان فيلم رعب الي كمان, بس برضه شجعني اني اخد الابره وانا ساكته ولا نفس :( مع ان ايد الممرضه طلعت مش خفيفه بالمره و لهلأ ايدي في دائره اللوان احمر واخضر و بنفسجي محل الابره و كتيييييييير بتوجعني, الله يعينهم للصغار ابصر شو صار فيهم :(