بس الام اللي بتفهم....

اجت صاحبتي بالشغل تحكيلي عن موظفه عنّا بتحكيلها انها بتحبني كتير لكن انا فجأه بعدت عنها و صرت اتعامل معها بجفاء, وطلبت منها تسألني اذا بدر منها اشي ازعجني, حكيتلها بالعكس انا بتعامل معها بشكل عادي اذا صادفتها, ولكني بتحاشى التعامل معها لانها من الناس اللي بتحكي الكلام بدون تفكير, فبتدجّه دج و دايما بكون الكلام مزعج, وتلافيا لاي مواجهات بحاول اتلاشاها

في يوم من الايام صاحبتي تأخرت عن الدوام وعلى غير عاده ما اتصلت بحد فينا, اتصلنا نتطمن عليها واكتشفنا انها متعرضه لحادث سياره هي و زوجها واولادها , والحمد لله ولا واحد فيهم انصاب غير صاحبتي اللي كانت اصابتها خفيفه بركبتها بس والحمد لله, فورا اتفقنا انا وصاحباتي بالقسم نروح نزورها بعد الدوام.

و اول ما وصلنا اكتشفت وجود هاي الموظفه عندها, عادي سلمت عليها بشكل طبيعي و صرنا نتطمن على صاحبتي و نسأل عن تفاصيل الحادث, من ضمن الحكي بتحكيلنا انها كانت طابخه ورايحه عند اهلها يتغدو مع بعض, قامت البنت حكت ان اكيد هلأ امك بتلوم حالها لانك طابختيلها و رايحه عندها, صاحبتي من اللي بحملو هم بسرعه و بتأثرو بالكلمه وخصوصا بس يكون الموضوع بخص اهلها, انا علشان اخفف الموضوع بحكيلها انها اكيد زعلانه وخايفه عليكي من موضوع الحادث نفسه, وبما انها اتطمن عليكي فهلأ ارتاحت, جاوبت الموظفه لأ هي اكيد هلأ بتلوم حالها وحاسه بالندم ان بنتها عملت حادث وهي رايحه توديلها اكل, حكيتلها الاكل ما اله دخل المهم ان بنتها و زوجها و اولادها بخير كل شي بهون بعدها, جاوبتني " انت ما راح تفهمي الموضوع ...بس الام اللي بتفهم هيك اشي"

ما بنكر اني كان نفسي اكب الشاي اللي بايدي عليها, لكن مسكت حالي وحكيت يا بنت انت ببيت العالم وجاي تزوري مريضه فابلعيها و مشيها.

لمّا اجينا نروّح كانت الدنيا مغرب, طلت نظاراتي علشان البسهم واحنا مروحين علشان بدي اسوق, اتطلعت علي بقرف و بتحكيلي, ليش ما تعملي عمليه ليزك, النظارات شكلهم مش حلو عالبنات, انا زوجي دكتور عيون احكيلي وباخدلك موعد عنده و بخليه يراعيكي...

اتطلعت عليها و ولا كأنها حكت اشي لفيت وجهي و كملت حكي مع صاحبتي, انا كنت بقدر احكيلها كم كلمه بالعظم, خصوصا ان زوجها اللي بتتفشخر فيه سامعبن عمه قصص ومنها هي, لكن الموقف و اني ببت صاحبتي و اني حسيت انه خساره اهز بدني على هيك وحده خلاني اسكت.

عاده ببررو هيك تصرفات بان البنت طيبه ومسكينه, انا ما بعتبر هالتصرف اله اي صله بالطيبه و المسكنه, انت المفروض انسانه كبيره و واعيه وام اولاد وقربتي تصيري جدّه اذا المفروض تكوني واعيه لكل تصرف و كل كلمه بتصدر منك.

بس هاي اخر مره راح اسكت, واذا علّقت مره تانيه تعليق من نعليقاتها الخفيفه الظل هاي, راح تجبرني افش قلبي و اللي يصير يصير -مع اني اشك اكسفها, لاني بكره اكسف حد :$