ديرو بالكم

قبل سنه صاحبتي عملت حادث سياره, وهي ماشيه فقع العجل و بطلت تقدر تسيطر على السياره و ضربت بشجره و بسور بيت, كان معها بالسياره خواتها التنتين و والدتها, الحمد لله اصاباتهم كانت سطحيه بس شوي قويه, والدتها صار عندها كسر بالكتف, هي ضرب راسها بالستيرنج و كلّه رضوض , اختها انشعرت رجلها و اختها التانيه واللي كانت حامل الحمد لله ما تأثرت كتير.

قبل كم يوم بتصل فيها بتحكيلي باركيلي مش خلص خلصت من القضيه, استغربت انا بحكيلها اي قضيه, بتحكيلي قضيه الحادث, بعد سنه وشهر خلصت القضيه, بالرغم من ان والدتها و خواتها اسقطو حقهم من اول يوم, القضيه ضلت بالمحكمه طول الفتره الماضيه, وكانت كل شهر لازم تروح عالمحكمه تحضر الجلسه , وكان المفروض انها تنحبس من 3 الى 6 شهور ولكن لمّا جابت اوراق من المحافظ ودبرت واسطه تثبت فيها انها عندها اطفال وما بتقدر تتركهم وافق القاضي انه يلغي الحكم.

و بتحكيلي انه هلأ ما بصير تكون هي السبب باي حادث من هون لسنه والا راح يسحبو رخصتها منها و يمنعوها تسوق لسنه.

اول مره بعرف عن هيك شي, انه مع ان الاهل تنازلو انه يضل في قضيه و شغاله, صارت توصيني صاحبتي وتحلفني اني ما اركب اي انسان معي بالسياره حتى اهلي, وهالشي طبعا مستحيل يحصل, بتحكيلي انها هلأ بس تروح مشوار هي وخواتها, هي بتروح بسيارتها و خواتها بروحو بتكسي مع انهم ساكنين بنفس العماره..

الله لا يبلينا بهيك اشي يا رب

و على سيره الله لا يبلينا, الخميس وانا رايحه عالشغل في عمو كبير بتطلع علي وانا جاي من اول الشارع الفاضي, واول ما قربت منه قرر يقطع الشارع, لولا ستر ربنا اني كنت مش مسرعه بالمره , ضربت برسك وزمرتله صار يأشرلي انه اسف .

بحكي لصاحباتي بحكولي انه في موضه جديده صايره بالبلد, انو في ناس برمو حالهم على السياره عاساس انك دعستيهم و بتتورطي فيهم, وبطلبو منك فلوس علشان ما يشكو ولا تاخديهم عالمستشفى, و هدول العالم بختارو السياره و السائق المناسب ليرمو حالهم عليه, و بحبو يختارو البنات اكتر, لانه بالمفهوم العام البنت اجبن من الشب و هبله و فورا بتعطيه اللي بده اياه بس علشان تخلص منه.

جد الله لا يبلينا :$