اطلع من راسي...وشكرا

اليوم بدي احكي و بدي افش قلبي

لمديري مدير مديريه الحاسوب اللي امبارح علمناه كيف يشغل الجهاز و ان الماوس مش ريموت كنترول وما ترفعه و خليه عالماوس باد يا معلم.....اطلع من راسي


للموظف الجديد اللي ما الو اربع شهور و بطالب يصير رئيس قسم و بحكي انا مش جاي اشوف موظفين انا جاي اخد فلووس.....اطلع من راسي


للمدير العام اللي قززني من الصبح طلبات وااحصائيات وتعديلات و ...و........اطلع من راسي

لاخوي اللي عرف عن المدونه واكيد راح يقرأها اللي كل ما شبكت عالنت بيجي بدو يشيك ايميلو او بدو يشوف الفيس بوك....اطلع من راسي

لكل موظف او موظفه بكونو واقفين عند باب الشغل وانا مروحه وبيقعدو يجحرو كاني قاتلتهم امهم او ابوهم و يتطلعو من فوق لتحت....اطلعو من راسي

للموظف اللي بضل يحكيلي" لدّي علي جاي" وبحكي اسمي غلط و يتفلسف و هو وانا عارفين ان الواحد بس يحفظ كم من مصطلح انجليزي بشغله ويضل يكررهم بمكانهم ومش مكانهم ما بعني انو صار يفهمم....اطلع من راسي

لكل واحد بغلط باسمي و بحكيلي ايناس او نسرين بس لانه اسمي فيه سين و نون......اطلعو من راسي


الك انت..اه اه انت اللي بتقرا وما بتعليق ....اطلع من راسي وعلق لو سمحت :)

لخالد السعود.....شكرا على المتابعه والتعليقات :)

لاسكدنيا....شكرا لانه عن طريق مدونتك خطرتلي فكره اني افش قلبي بمدونه خاصه فيي