Things I Like To Whisper About

Would You Hear Me Whispering

اطلع من راسي .....وشكرا 3

مقفله ومسكره معي فبدي احكي وافش غلّي



اول شي لكل اللي بكرهوني و بحسسوني انهم بكرهوني اطلعو من راسي و ما بهمني اصلاطن :"(



لمديري اللي بحكيلي الحمد لله على السلامه اول يوم دوام بعد 3 اسابيع اجازه كأني قاتلتله قتيل وبجحر فيي لانه ما كان موافق عالاجازه واخدتها خاوا عنه مع اني اخر فتره داومت ورجلي مجبصنه علشان ما اخلي شغل معلّق...اطلع من راسي



و برضه لمديري اللي على اساس انو مسكين مريض و مش قادر يداوم بس بداوم اخلاصا منه للشغل و اخد 3 ايام مرضي و علشان ربنا يكشفه يحكي معي عالتلفون المباشر واحد يحكيلي انا من شركه الباطون والمفروض ان مديري حاكي معاه علشان الصبّه اليوم....اطلع من راسي و بعنف وبسررررررررعه


للموظف اللي مخلي الاجهزه عنده من 3 اسابيع يعني من يوم ما سافرت وال مش عارف يزبطهم وهو اللي بتفلسف وببرطم بالانجليزي وهو ما بفهم اشي و اليوم بس فتحت الجهاز عرفت وين المشكله و حليتها ....اطلع من راسي اه هو نفسه اللي كتبت عنه في اطلع من راسي الجزء الاول


للزلمه اللي كان قاعد جنبي بالطياره هو ومرته و الطياراه بتهز ومطبات هوائيه و الواحد دايخ و بدو يستفرغ وهو نازل غر غر غر غرر ومرته تحكيلي خلص مش قادره دايخه وهو ابدا...اطلع من راسي و روح وقف بالزاويه وارفع ايد وارفع رجل يلااا بسرعه قبل ما الخمك كف اعملك سبعه صغار



للموظفه بمطار دبي...شكرا مع انهم حذروني ان ازا بنت و اماراتيه انسي الموضوع بتقعدي سنه واقفه و الوزن ما يزيد عن 32 ب 0,0000005 جرام وايلا بتخليكي تفتحي الشنطه و تشيلي منها اشياء او بتدفعي بدل وزن بالعكس الله يسعدها خلتني احط الهاند باج كمان وما حكت اشي :)



للشرطه بالمطار بالاردن...شكرا كتير كتير عالمساعده بحمل الشنط :) اول مره بتصير معي وعاده بتشعتل بحمل الشنط بس هالمره ساعدوني



اه اه صحيح واللي بدو لاب توب زي اللاب توب السوني فايو تاعي الجديد ....اطلع من راسي واشتري انت :)


شغله اخيره....لكل واحد ما بصدق الكابتن يحكي بدينا مرحله الهبوط ونرجو عدم استخدام الاجهزه الخلويه و بتبدى تسمع اصوات الموبايلات و تي تي تيييييت تي تي تن والمسجات و بتبدى اليسا "بتمون عا قلبي انا بتمون" و نغمات و رنات
يعني وين بالزبط ما فهمتو الزلمه وهو بحكيلكم مااااااااااااااااااااا تشغلو موبايلاتكم و المضيفات بحكوها بكل لغات العالم بركي تحسووووو بس ابدا....اطلعووو من راسي



لاخواني و مرتاتهم ....شكرا لانهم خلو هالتلات اسابيع من احلى الايام بحياتي


لفرح وعبود....الله يسعدكم و يحماكم و شكرا يا رب انك رزقتنا بهيك ابن اخ و بنت اخ بجننو








فرووووووحه

17 التعليقات :

شكلك عصبية او الظروف بتخليكي عصبية، بس هيك ما بينفع، ديري بالك

 

محمد
لاااااا بالعكس مش عصبيه بالمره
بس مرات بكون بدي احكي اشي هيك تفشش
فبكتبه هون
حتى وانا بكتب بصير اضحك عاللي كتبته :) بس ما بلغيه وبخليه
شكرا عالتعليق :)

 

ويسبر ...
عنجد
من كتر ما انا زهقان وقرفان ومحبط .. ومن كثر ما المزاج السيء مدوام وعلى سفتات عندي.
بدي أحكيلك :



اطلعي انت من راسي !

 

آه .. كأني قليل حيا !

حمدلله على السلامة..
ويخليلك اياهم : عبود وفرح.
ومع هيك اطلعي من راسي

 

حتى انت يا خالد :"(
شكلك من اللي بكرهوني :"(

هههههه
لااا بعيد عنك, والله يسلمك
وحاضر ولا يهمك طالعه :)

 

هو فكرتك انك تفشي غلك بالبلوج مبتكرة شوي يعني احسن من ما تفشيه بالناس (زي كنت انا بعمل!!!) صحيح هلأ انتبهت انك كنتي مسافرة الحمدلله على السلامة

 

شو شايف صارت سلسلة اطلع من راسي ... بلكي بعد اكم سنه اصدرتيهم بمجموعة بمجلد ... عجبتني الي بدو لاب توب زي لابتوبي شو شكلو فيه ناس بدهم يتسلبطو عليكي ... ولا المسكين المريض الي بحكي معو تبع الباطون ... حمدالله على السلامة وسامحيه المسكين وخليه ينزل رجلو وايدو وينزل من الطيارة حرام اكيد اتادب

 

اسمعي ويسبر أنا بدي أحكي لكل الحياه اطلعي من راسي!!!

لأنو جد جد وضعي زينون من الاخر

ومع هيك ألف الحمدلله عالسلامه ياروحي

الأردن نورت يا همسه:)

 

محمد
الله يسلمك
لااا بلاها فشه الخلق بالناس لان الناس من غير واسطه مش طايقه حالها,جربها كتير بتتحسن نفسيتك بس تكتب

ammar
الله يسلمك
لااااا ما حد بقدر يتسلبط علي....ما بتعرفني مش قليله انا :)
وبالنسبه للشب اللي بالزاويه...خليه شوي مش حاسه انه فهم غلطته منيح لسا

مياسييييييي
الله يسلمك يا قمر الاردن منوره بوجودك
يلااا الزنون منيح برضه....ان شاء الله بتتحسن احوالك وبتصير فايبر اوبتكس من الاخر...شو دخل ما بعرف بس هيك طلعت معي :)

وشو بالنسبه للبرد :$

 

هو معك حق الناس متى كانت طايقة حالها، انا كثير فكرت اكتب بس باخر لحظة ببطل مش عارف ليش

 

محمد
جرب ما بتخسر و اولا و اخرا المدونه الك انت وبتعبر فيها عن اللي بدك اياه بدون اي انتقاد او توجيه او مراقبه وهاد احلى اشي....والافضل ما حد بعرفك شخصيا يعرف عنها علشان تاخد راحتك :)

 

الحمدلله ع سلامتك

والله يحميهم عبود وفروحه ماشاءالله عنجد عسولين يخلليلكم ياهم

Ro$e

 

Ro$e
الله يسلمك يا رب :)

 

O_o kayneh 7a6a swar wlad 5wanee
inshallah tkoon ma bte3raf-hom :S

LOOOL 3a2sas 2eesh.... mafe 3'erkom Jordanian fel el2emarat :D

 

la dont worry ba3rafsh 7ada ana.. lessa jdeed 3l balad:P
bs yemken ba3raf a5ooke:P sho esmo ho?:S

ana d7kt 3ala
"شكرا مع انهم حذروني ان ازا بنت و اماراتيه انسي الموضوع بتقعدي سنه واقفه و الوزن ما يزيد عن 32 ب 0,0000005 جرام وايلا بتخليكي تفتحي الشنطه و تشيلي منها اشياء او بتدفعي بدل وزن بالعكس الله يسعدها خلتني احط الهاند باج كمان وما حكت اشي"
bema enhom 7akoolek e3rafe enno fesh menno hal 7ake.. bs el nas hewayet.ha etnaked 3ala b3dha..

ana lama ejat el visit visa 7akole MA TRO7.. bedhom Yo7roto 3alek shahar o ye7kolak allah ma3ak!! tab3an el work visa halla2 ma3e.. o had el shahar ma sht3'lt shee abadan.. bel3ax modeere 7akale men awal youm had el shahar enta free roo7 et3arraf 3l balad bs bedde mennak Report 3n el network o wad3 el PC'S!!
7akole la tenzal t3ayed fe jordan.. barrrd!!! awal marra ma ana raye7 3l jordan!!
7akole la t3ayed fe UAE r7 tegraf 7alak!! 7ayartoone wain a3ayed fel barrrd wella fel garaf?!!
7akole hon ma 7ada bet3arraf 3ala 7ada s7abak mesh fadyeenlak !!
kol jom3a bnejteme3 o bnet3'adda sawa o bnetla3!!
sho a7ke la a7ke.. 7akeet kteer ka2enne?! Lol!

 

هههههههههههههه
واضح انو لازم تكتبلك بوست اطلع من راسي تفش قلبك فيه :)

هيك في عالم بتفكر حالها انها ادرى منك بمصلحتك و هي احق تقرر عنك حياتك

كل العالم خنقشاريه هههههههه :)