Things I Like To Whisper About

Would You Hear Me Whispering

2008

لما قرأت مدونه خالد السعود عن عام 2008 و احداثها وانه كان عام صعب
فكرت انا ايش صار معي ب 2008
حسيت انه كان صعب علي انا كمان....اكيد الاحداث بغزه بتفرض جو من الاحباط و المراره
بس حكيت لحالي ركزي شوي و اتزكري الاحداث بالزبط
انا 2007 كان جدا سيء معي و بنهايه 2007 قدرت وبصعوبه اوصل للصفر
ومع بدايه 2008 بديت من الصفر
حاولت اقسم الاحداث ب 2008 على حياتي الشخصيه...على الشغل...على الانجازات اللي عملتها

حياتي
حياتي الشخصيه بدت من الصفر و تحسنت مع الوقت تحسن بطيء بس الشكر لله ومن ثم لاهلي و للي حوالي اللي ضلهم يدعموني لاوصلت لمرحله انه راح تأثير الأزمه اللي مريت فيها نهائيا...ما بقدر احكي انها اختفت بس تأثيرها صار اشي عابر وما يأثر على يومي

علاقتي باهلي صارت كتير قويه واقوى من قبل...قربي من ماما زاد اكتر واكتر وتعلقي فيهم زاد اكتر واكتر

فرح وعبود....ب 2008 صرت عمه والحمد لله لاحلى طفلين بالعالم وهاد لحاله اشي بيخللي سنه 2008 من احلى السنين

مريت بتجربه غريبه علي بسنه 2008 تعلمت منها اني ابطل اثق بالناس
وما اتوقع انو ازا انا صادقه بكل شي ان اللي قدامي بتعامل معي بصدق برضه
واني لازم اتروى شوي بس اتعامل مع الناس قبل ما اخليهم جزء من حياتي...لانه مش كل الناس بتستاهل انها تكون جزء من حياتك

اشي تاني حلو صار معي ب 2008 اني طول عمري نفسي اعمل اعمال تطوعيه والحمد لله ربنا يسرلي اني اشترك مع جمعيه صناع الحياه واني اصير اعطي دروس في مركز الايتام ....تجربه جدا رائعه
انا شخصيا بكره التدريس..اول ما تخرجت تعينت مدرسه في كليه و حسيت وقتها ان حياتي انتهت
تحضير وامتحانات وشغل بالكليه وشغل بالبيت...ما حبيتها هالتجربه يمكن لانها مرهقه..يمكن لاني كنت اتعامل مع كبار ما بعرف
بس تدريس الايتام اله متعه مش طبيعيه
كنت اروح من الشغل و فورا اروح عندهم ,يومين بالاسبوع بس كانو احلى يومين بالنسبه الي
ما كنت احس بالارهاق ولا التعب والوقت يمشي بسرعه واروّح عالبيت و انا مبسوطه ويضل مزاجي متعدل من هالساعه ونص اللي قضيتها معهم.....

شغلي

تعب كتير وسمات بدن كتير ويأس واحباط ومشاكل بس الحمد لله ما راح خساره
تقدمت بشغلي كتير وخبرتي زادت....اثبتت نفسي و جدارتي واستحقاقي لمركزي بالشغل
تعرفت على ناس جداد
بعدت عن ناس و قربت من ناس
واحلى شي بشغلي همه صاحباتي,وساعه القهوه الصبح,والحكي عن كل شي صار معنا قبل بيوم بهالساعه والضحك والقصص
الحمد لله بعد سنين من الشغل علاقتنا صارت اقوى من صحبه ,انا ما عندي خوات بس بشغلي صار عندي خوات

ب سنه 2008 كسرت رجلي :( وخلصت 2008 و بدت 2009 ورجلي مجبصنه وماما مش عندي من غير شر :"(

فالحمد لله اجمالا سنه 2008 ما كانت سيئه جدا الي

اخر سنه 2008 كانت صعبه عالكل.... مأساه غزه.
الله يفرجها عليهم ويشفي مرضاهم و يتقبل شهدائهم...ويرزقني الشهاده يا رب

وبتمنالكم وبتمنى لنفسي ان كل احلامنا و امنياتنا وخططنا تتحقق بسنه 2009 وتكون سنه خير علينا كلنا




11 التعليقات :

inshalla 2009 will be better kman.
and God bless Gazzah

 

كل عام وانت بخير وأنشالله 2009 أحسن وأحسن ..

 

سنتك حافله نوعا ما
أنا عن نفسي و لا إلي نفس أكتب عن أي شي!!!

جد مش جاي ع بالي و مزاجي بالمره مش مساعد؛ في أفكار بس ما بعرف شو مالني؟؟

يمكن ما تصدقي بس اللي صار بغزة كثير مأثر علي و مخلي مالي نفس بأي شي

ع كل؛ سلامات يا مجبّر:) ومنيح اللي طلعتي من أزمتك بسرعه؛ وكيف بدك تروحي ع دبي و انتي مجبصنه صح؟

أتمنالك سنه أحسن ان شالله

 

Gemini girl
ameen for that
and i wish u happy and better 2009 too
thanks

خالد السعود
وانت بخير
وان شاء الله سنه خير عالجميع

مياسي

فعلا اشي بقهر والواحد مش عارف يعيش حياته منيح مع هالوضع
حسبي الله ونعم الوكيل

سافرت وانا رجلي مجبصنه ,حجزت الكرسي قبل ما اسافر علشان ما اتغلب والحمد لله مشيت على خير :)

وان شاء الله هالسنه تكون سنه خير على اهل فلسطين وعالجميع

 

سنه خير يا رب وسعاده وكلها حب وسلام لك وللامه الاسلاميه والعربيه جمعاء ..

باستثناء القلوب النجسه

تحياتي

 

معظم التدوينات كنت أقرأهم وما أعلق
مش عارفه ليييييييييييييييييييش

يعني هاي التدوينه متزكراها بالحرف


هيه وكزا وحده قبلها

ومتزكره ري أكشني كإني بقرأها هلأ \
أنداري عن الطرم

 

انا كتيييير بنبسط بس يوصل تعليقات عاشياء قديمه
اولا ان لسا في حد بقرأهم وثانيا انا برجع اقراهم

الي فتره بمشي شهر شهر و بعيد قراءة التدوينات القديمه وكتير مستمتعه لاني ناسيه كتير منهم :)

 

بتعرفي شغله

إنتي ما تغيرتي بشلم من أول يوم تدوين لهلأ

نفس الأفكارات ونفس الري أكشنات ونفسسسسسس كل شي

اللهم صارت صياغتك للرد تختلف

ههههههههههههه

البكتيريا كاينه منتشره كتير,, عجبني حواراتكم الهبله هههههههههههه\

-----------

أنا بكل المدونات متابعه قديمه للمنشورات ساكته\

بس إستفزني شسمو وخلاني أطلع عن طوري هههههههههه

 

ما تخليني اتهور واشكر شسمو هلا على اول حركه منيحه بعملها بحياته :)

قط البكتيريا اعتزل ﺍﻟﺘﺪﻭين و اعتزلنا :$

كانت ايام حلوه كتير
قبل كم يوم نادر عاد نشر تدوينه قديمه عالفيسبوك و لما رحت قرات تعليقاتنا و طوشنا حششت ضحك هههههه

 

هاتي اللنك أرجع اجدد الطوشه :)

 

http://osbo3yatjaber.blogspot.com/2013/01/blog-post_9.html?m=1

يلااا خدي راحتك :)