اخيييييييييرا رجع

يا مدارس يا مدارس

شو اكلتو ملبس خالص

والملبس بالكبايه

اشكرك يا معلمتنا

عنظافة مدرستنا

مدرستنا حلوه خالص

اجا البابور البابور

اجا خالي من اسطنبول

حاكاني تركي تركي

خلّى عويناتي تبكي

الدنيا برد الدنيا برد...ست ساميه بتقطف ورد

الدنيا شوب الدنيا شوب...ست هند بتقطف شوك

من الصبح وانا بنشد هالانشوده اللي تعلمتها بالصف الثاني "ب" بتعرفوها؟؟؟...بالبدايه اهلي استنغشوني بعدين قلقو خصوصي انو اليوم كان يوم السطلان العالمي عندي شكلها من التأثيرات الجانبيه للدوا لاني لساتني بريضه :(

المهم

شو هو اللي رجع؟؟؟

التوقيت الصيفي :)

انا بكررررررررررره التوقيت الشتوي و بعشق التوقيت الصيفي, بحب النهار الطويل اللي بتعملي فيه 100 شغله و لسا ما اذن المغرب توقيت الربيع و توقيت الرحلات و الطلعات.

المفروض بكره نروح رحله لان الجو بجنن و لكن اهلي مترددين, مميتي بتحكيلي بدك تروحي رحله بهالحلق اللي عليكي :$ هو بني وبينكم الدكتوره اليوم بس حكتلي لوزك "معملين" وقع الكلمه و المصطلح علينا كان قوي, بحكيلها ملتهبين قصدك بتحكيلي لا الوضع اكبر "معملين" و ال بدها تعطيني ابره, وانتو بتعرفو موقفي من الابر :( وبعد صد و رد اعطتني دوا قوي و لغت موضوع الابره :)

ان شاء الله اصبح منيحه و نروح لاني بدي اشم ريحة الربيع....نيسان اجا يا جماعه و المناظر اللي بتجنن و الجو المنعش رجع كل سنة و انتو سالمين, ضبو الشتوي و طلعو الربيعي و خلولكم كم من جاكيت وشال لليل :)

كل ربيع وانتو بالف خير

ان شاء الله يكون موسم خير عالجميع

وان شاء الله تنبسطو بهالربيع لانه زي ما بحكو

الدنيا ربيع ...والجو بديع...قفلي على كل المواضيع :)

هالاغنيه هديه ل ‏‏"طب ‏... عوجهو‏" ‏:‏)‏ و لهديل طبعا :)

ملاحظه ع الهامش

ست ساميه معلمتي بالصف الاول "أ" و كنت احبها كتييييير, بتجنن كانت الله يسهل عليها ويجزيها كل الخير

و ست هند معلمتي بالصف الثاني "ب" و بكككككككككككككككرها كنت الله يسهل على هديك الايام :$

اطلع من راسي ....و شكرا 5

مقهورة كتير وفي اشياء كتير جالطتني هاليومين و بدي احكي و افش قلبي و تذكرت اني كنت عامله سلسلة فشّة قلب بالمدونه و زمان ما شعبرت براحتي فيها

للست اللي اجت عند مرة عمي اللي بالعدّه و جاي تحكيلها و تلومها لانها طلعت من البيت و ال بنتها المصونه للجارة متدينه كتير و عليها واجب التبليغ بانه ما لصير مرة عمي تطلع من البيت, واللي طلعت لحتى تعمل وكالة لابنها الكبير ليتصرف بالاملاك و المحل و السيارة و اللي اتصلت بدار الافتاء لتسألهم بصير اطلع او لأ وحكولها اه, و بعدين من ضمن الحكي تحكيلنا الجاره عن عرس بنتها - المفتيه- بعد كم يوم و انه حيكون مختلط!!!! و العروس محجبه!!!! و انا ما صدقت و وقفت على هالموضوع بما انهم الجماعه بحكو شو حرام وشو مش حرام و بترد بتحكيلي مهي اتفقت هي والعريس شو بدي اعمل انا.... اطلعي من راسيييييييي

للست ذاتها اللي كل ما حكت كلمه عن قريبتها تحكي لمرة عمي " تأخذينيش مهي ارمله" ومرة عمي تنئز على كلمة ارمله و على كلمة متأخذنيش.....اطلعي من راسييييييييييييي

للاخت اللي طول القعده تحكيلي حبيبتي و بطريقه بتنرفزني وانا اضل اقنع حالي "اسكتي يا بنت انت جاي هون لله" و ضلت تضرب على عصبي بطريقة حوارها واضطرتني اهاجمها و كل اللي بالجلسه يهاجموها لانهم طلعو واقفين على دقره.....اطلعي من راسيييييييييي

للحرارة اللي مش راضيه تروح و اللي خلتني انام من الساعه 10 للساعه 10:30 و اصحى كأني نايمه من امبارح و شوي اشوب و شوي ابرد ومش عارفه تنزل بالباندول..............اطلعي من راسييييي بدي اناااااااااااااام....بريضه انا :(

لكل اللي هنوني بعيد ميلادي و كتبولي هون و بمدوناتهم و عالفيس بوك و بعتولي مسجات و بعتولي ايميلات...... شكرا كتير لتواجدكم معي

لللي علّق التعليق اللي جلطني و شاكه انه سبب مرضتي - حره انا القهر بعمل فلوزه و حراره - و لسا بستنى التوضيح لكن بما انو المعلق بمون علي بالتعليق فانا بمون عليه اني احكيله......اطلع من راسيييييييييييييي

للمدونه اللي مش راضيه تضلها على التنسيق اللي بعمله قبل النشر....اطلعي من راسي :$

وبس ....خلص فشيت قلبي :)

الاجزاء السابقة

اطلع من راسي و شكرا 1

2

3

4

اختلافنا لا يعني خلافنا

في هالايام اكيد في كل جلسه بين اي اشخاص و حتى بين الشخص و نفسه التفكير مستمر في الاحداث اللي صارت يوم 25 الشهر , المشاعر ما بين الفرحه بشباب 24 اذار و بين الصدمه و الغضب من اللي صار و الحزن على الشهيد و المصابين ربنا يرحمه و يشافيهم ويعافيهم يا رب.

وهالشي طبعا صار ببيتنا كتير خصوصي مع الزيارات العائليه اللي كترت للسلام على بابا وماما اللي رجعو من السفر, اخر زيارة كانت لبيت خالتي و بنت خالتي هي و زوجها, زوج بنت خالتي ما شاء الله عليه اخلاق و شخصيه و طيبه , ملامحه فيها شوية قساوة و نظرته حاده و بتخوف, من اللي بتشوفهم بتحكي ولا بدي اتعرف عليه و بس تتعامل معه بتحبه و بدخل قلبك على طول.

زوج بنت خالتي من الكرك و بنت خالتي من نابلس, التوضيح هاد اله سبب, وهو اني بدي اوضح انه ابدا مش عنصري ولا عنده هالافكار المفسده الهدامه اللي "بعض" اللي حوالينا بنادي فيها هاليومين, ولكنه ضد المعتصمين و بشدّه, و اطلق عليهم مسمى "مخربين" طبعا الحوار اشتد بيني انا و بابا كطرف مؤيد و بين زوج بنت خالتي كطرف ضد المعتصمين ومع اللي صار ضدهم, الصوت علي و المناقشات قويت , الطرفين ما كانو بالموقع و كل اللي بنحكيه سمعنا و قرأنا, هلأ هو مش شايف ولا فيديو من اليوتيوب و مش قارئ ولا لحد من الشباب اللي كانو معتصمين و انا استغليت هالشي و صرت احكيله عن الاحداث اللي صارت و كيف ان الكل اجتمع على نفس الاحداث و الفيديوهات بتأكد هالشي, و تقريبا حكيتله اللي صار مع صديقنا ناصر بالحذافير لاني حفظتها قد ما قرأتها للناس, هو اعتراضه على موقع الاعتصام و على موضوع الملكيه الدستوريه, و ردينا عليه بان الموقع لازم يكون حيوي وان الشباب ما نزلو عن الرصيف بتأكيد الجميع الا بس صار في رمي حجارة وبابا حكاله " وين بدك اياهم يعتصمو.....بالصحرا؟؟؟؟؟ " و اصريت افرجيه الفيديوهات ولكن بنت خالتي حكتلي ما تحاولي لانه ومع المشاهد اللي بجيبوها عن ليبيا فهو مؤيد لمعمر القذافي و ضد الثوار!!!!!!!!!!!! انا انصدمت وقتها و نقلبت الموجه للحديث عن ليبيا , و من وجهة نظره بالنسبة لليبيا ان الشعب ما بصير يقوم بثورة على الحاكم , وصار حوار على هالموضوع مطول و انتهى ,و انتقلنا لمواضيع تانيه و ضحكنا على قصصه بالشغل وحكالنا عن قصه سرقه سيارته و شربنا القهوه و احنا بنضحك على ابنهم الصغير كيف برقص و بغني وكملنا السهره بنفس الروح اللي استقبلناهم فيها.

اللي صار مش تصرف فردي او خارق للطبيعه, اللي صار هو الطبيعي اللي المفروض يصير, اي نعم احتد الحوار ولكنه ما كان جارح ولا كان مبالغ فيه, كل واحد فينا بين وجهة نظره و اعطا ادله و حاول يقنع الطرف التاني بكل عقلانيه , وعدم اقتناع الطرف التاني ما خرّب العلاقات و لا خلّى حد فينا يطلق احكام عالتاني و مش بس نوع من انواع الذوق والاخلاق, لأ , النفوس ما تأثرت ولا صار في نقاط بالقلوب ولا بالعقول.

الطبيعي انّا نسمع بعض و انّا نختلف , كل شخص اله مرجعياته واله طريقة تفكير خاصه فيه ولكن اختلافنا هاد ما بصير ابدا انه يعني خلافنا مع بعض, و الطبيعي ان الاختلاف لا يفسد للود قضيه.

Happy Birthday To Meeeeee :)

اليوم و في تمام الساعه 4 الفجر صار عمري 34 سنة :)

الاحتفالات بدت من 3 ايام بمفاجأة بتجنن مثل صاحبتها حبيبتي سوزان ا هي و بنوتتها لولو القمر بمناسبة عيد ميلادي :)

و بنفس اليوم ولاجل الصدف بنت خالتي من الكويت كاتبتلي عالفيس بوك كل عام وانت بخير ....

بعديها وقبل عيد ميلادي بساعتين وصلتني مسج معايده اسعدتني كتير كتير و بعديها و عالساعه 11:30 وصلني اتصال من بابا اللي نايم بغرفته :) رحت و بسته هو وماما طلعت ماما بدها تبعتلي مسج فبابا حب يسبقها فرن :)

و عال 12 بالزبط بعتتلي مميتي مسج خلتني ابكي و رديت عليها بمسج و عالفجر باستني :) و بعد بشوي اخوي من الامارات بعتلي مسجه بتجنن , حبيبي سهران المسكين

الصبح صحيت على كمشة مسجات من صاحباتي بالشغل و بعديها اتصال من اخوي التاني و اول ما حكيت الو احلى صوت بسمعه بحياتي بغني " هيبي تو يو...هيبي تو يو" فروووحه و فرحة قلبي بتغنيلي و بدت تسهب و تنتقل من موضوع للتاني وحكيت مع اخوي و مرته و صحصحت و انا بضحك من قلبي عالقصص اللي حكتلي اياهم مرة اخوي.

وبس فتحت النت لقيت تعليقات بتعايدني من احلى صديقات و اصدقاء غير الايميلات و اللي على الفيس بوك و من التعليقات اكتشفت ان صديقنا الرائع يوسف كاتب بمدونته كلمات اسعدتني اكثر و اكثر و جد فاجأتني خصوصا انو احداث قبل بيوم خلت الواحد يكتئب و استبعدت اني انا اكتب او حد يكتب عني اليوم :$

انا جدا جدا محظوظه بتعرفي على الجميع في هالعالم الافتراضي و الحمد لله اللي خطرلي فكرة عمل هالمدونه ومع انه عملتلي شوية مشاكل في فتره و فكرت اسكرها و لكن الحمد لله اني ما عملت هالشي ....شكرا لتواجدكم في حياتي و شكرا لكلماتكم الاكثر من رائعه بحقي و بتمنى اني اكون ضيفه خفيفة الظل في حياتكم في هالعالم الافتراضي اللي بجمعنا

وتفضلو عالكيكه - فرندز دعاية غير مدفوعة الاجر - واللي العمو الكاتب عليها هابي "ساب الشقّه و قعد بئوضه وحده " :)

________________

بعرف ان القلوب انغمت و اكتئبت بعد اليوم المأساوي اللي عشناه امبارح ولكني على يقين بقدرة هالاصوات الحرّة ومهما حاول الناس اسكاتها انها تعلى و توصل و راح تغيّر و تحسّن و ان شاء الله راح يقضى على الفساد و ان الناس اللي مستوعبين الحريه بطريقه خاطئه و القلة اللي بنادو بالعنصريه راح يصحو و اذا ما بدهم يصحو يضلهم نايمين و بعيد عن المواطنين اللي ما حد بقدر يزاود على حبهم لوطنهم و مليكهم ولا على مواطنتهم و لكن هو يوم و حبيت اذكر تفاصيله لحتى يكون ذكرى جميله ان شاء الله لمّا نحتفل بيوم حرّية الرأي و تطبيق الديمقراطيه الصحيحه الصحّية في وطنا الحبيب

ماذا يعني "اصلاح"

في بلدنا بلد الحريات و الديمقراطيه اللي بنباهي فيها كل الشعوب اللي حوالينا و اللي جديد اكتشفت ان الدراسات اثبتت العكس ولكنني مصرّه انا بلد الامن و الامان و بلد الحريات , بلد "الخلاف لا يفسد للود قضيه" ....مع ان المناظر و المناظرات اللي بنسمعها هالايام بتدل على العكس ولكن بدي اضلي متفائله و اقول انهم "قلّة قليله" اللي بنادو بهالشي

انا امبارح الاربعاء 24-3 صادف تواجدي في منطقه قريبه من دوار الداخليه من الساعه 11 الصبح للساعه 2 بعد الظهر و شفت و مريت من جنب المعتصمين على دوار الداخليه واللي كانو معتصمين بكل احترام و بدون تسكير شوارع, البطئ بحركة السير ان السائقين همه اللي ببطئو لحتى يتفرجو و يصورو الشباب ا"الاردني" الحر , و في اكتر من لقاء بينو هالشباب انهم "لا ينتمون الى اي فئه حزبيه" و ان المحرك الوحيد الهم هو "حب الوطن و القائد" شباب بينو اول شي دعمهم و ثقتهم اللامحدوده بمليك الوطن و محاوله لفت نظره الى شكاوي الشارع الاردني.

شباب اختصرو مطالبهم بجملة "الشعب يريد اصلاح النظام" اي مواطن بحب بلده بحب انه يقضى على الفساد والفاسدين, بحب و بطالب بمعاقبة الفاسدين لحتى يصيرو عبره لمن لا يعتبر, عبره لكل شخص تسول له نفسه بسرقه الوطن و المواطنين, المطالبه بمعيشه طيبه كريمه يعيشها هالمواطن,ما في اله حقوق مسروقه يشتغل بالمطالبه فيها وهالشي يخليه يتفرغ للقيام بواجبه لتنميه وطنه, وهاد كله بمفهومي كمواطنه اردنيه بتحب وطنها الاردن و قائده يطبق معنى الاصلاح.

من جهة تانيه قطع الكهرباء عن المتظاهرين و الاعتداء عليهم ان كان بالنظر او بالكلام او للاسف بالاعتداء الجسدي عليهم و تحت نظر الامن وتحت مسمى "لبو نداء الوطن" فهاد هو الفساد, اقناع هالناس و اقتناعهم بانهم بلبو نداء الوطن بانهم يعتدو على مجموعه بتطالب بحقوقها بكل احترام و بدون اي شوشره و تحت نداء "سلميه" فهو هاد الظلم اللي الشباب موجوده على دوار الداخليه بتطالب بتغييره.

مين فينا ما زهق من السناريوهات القديمه الحديثه عن فساد "البعض" في مجلس النواب ,عن الاختيار الخاطئ المبنى على طرق غير منطقيه من انتخاب هالفئه , اخطاءهم البين واضحه و ظاهره للعيان ان كان بالتصريح او السرقه العلنيه او اللي بصير من تحت الطاولات!!! مين ما زهق من انّه يشوف ولاد بلده و اولاده جوعانين !!!! مين فينا ما زهق من الطبقيه الواضحه اللي صرنا نعيش فيها!!!! مين فينا ما زهق من عدم تكافئ الفرص بينه وبين اهل بلده!!! مين فينا ما زهق انه ما فيه حتى يحكي كلمة عتب او لوم لشخصيه مهمه من هالبلد بتفكر حالها افضل واحسن من باقي الناس لمجرد انه في رقم من 6 خانات واكبر في البنوك بدعم كلمته او لمجرد انه بشتغل مع ناس بتودينا على بيوت خالاتنا او وراء الشمس حسب التعابير المستخدمه لتدّعم و تعزز الخوف في نفوسنا وتخلي الكلام ينحشر بحناجرنا!!!!

مواطنتنا و حبنا اللا متناهي للوطن و مليكه بتحتم علينا بنطل نخاف و نحكي لحتى صوتنا يوصل, نطلب بمطالب لحتى يصير اردنا الغالي الوطن اللي بنحب نعيش فيه و بنعشقة.

يفرحون ...فيقتلون الفرح

اطلاق العيارات الناريه في المناسبات مشكله قديمه حديثه في مجتمعنا - ربنا يخلصنا منها عن قريب - ظاهره غريبه للتعبير عن الفرح مع انها ما بتتناسب مع اي من معاني الفرح, كيف ممكن للبارود و المسدسات اللي نوجدو للقتل تصير طريقه للفرح!!

الفرح يعني السعاده و هداة البال و القلب اللي بوسع كل الناس , فرحة بمولود جديد او فرحه بنجاح او فرحه بزواج و بدايه حياه للاسف مرات كتير بتقلب لنهاية حياه و لمأساة و لحرقة قلب, بسبب قلّة عقل و تفكير سطحي من شخص او اشخاص بفكرو ان بالطلق يكون التعبير عن الفرحه و طريقه للمجامله, و طريقه لاثبات انهم رجال ولاد رجال!!! و بنقلب الفرح الى ترح...

سمعنا قصص كتير عن كم واحد مات وكم واحد تيتم و كم واحده ترملت وكم اهل فقدو فلذات اكبادهم بس لان هالشخص عبّر عن فرحته باسؤ طريقه ممكن يعبر فيها عن الفرح, اشخاص قدرهم انهم يتواجدو بالمكان الخطأ, خطائهم انهم اجو يشاركو هالناس بفرحتهم او ممكن قدرهم يكونو بالشارع او عالسطوح او قاعدين بين اهلهم و فجأه وبدون اي سبب وبدون سابق انذار وقعو و ماتو, ناس فرحو فقتلو الفرحه بقلوب ناس كتار, كم عريس انسجن بليلة عرسه !!!! و كم عريس توفى ليلة عرسه بطلقه من هالطلقات!!!! كم اب انسجن و انكسرت فرحته وفرحة غيره بنجاح ابنه!!! اخر ضحيه سمعنا عنها و انحرقت قلوبنا كلنا و اولنا قلب والدها و والدتها هي الطفلة "جود" ,قبل اسبوع توفت جود بعد اسبوع من تواجدها بالمستشفى في غيبوبه نتيجه اصابتها بطلقه مجهولة المصدر, بلحظه غباء من شخص الله اعلم عرف نتيجتها ويلا لأ انطفت الفرحه بعيون ملاك مبسوطه بعيد ميلادها و انطفت الفرحه بقلوب اهل كل اللي ببالهم يشترو اواعي جديده لملاكهم, و بقيت جود ملاك ولكن في عالم تاني

ما بننكر ان الوعي زاد بين الناس بخطورة هالظاهره اللي فجأه صارت من ضمن عاداتنا و تقاليدنا !!!! وبعد البحث عن الموضوع عرفت ان في قوانين سنّت وفي فتاوى واضحه تم افتاؤها بحرمه هالشي , ويكفينا حديث رسولنا الكريم صلى الله عليه وسلم "لا يحل لمسلم أن يروّع مسلما" ليبين رأي الدين بهالظاهره,وفي جمعيات تخصص جهودها للتخلص من هالظاهره منها "جمعية مكافحة إطلاق الأعيرة النارية في مدينة السلط" واللي بحاولو بزيدو وعي الناس بخصوص الموضوع, هذا بالاضافه الى المجهودات الفرديه كتصوير فيديوهات و عمل صفحات على الفيس بوك ابرزها صفحة "صرعتونا" و اللي بتداوم على لفت نظر المجتمع اللي لسا مش منتبه لخطورة هالظاهره.

لكن وللاسف لسا في ناس بينا مش مقدرة خطورة الموضوع, من باب انعدام حس المسؤوليه او انعدام التفكير المنطقي او كلاهما , وهالشي بدفع كل شخص بينا انه يقوم بواجب التوعيه بخصوص هالموضوع بين الفئه اللي عايش بينها, لازم يتم تطبيق حقيقي للعقاب و اتخاذ اقسى العقوبات على مرتكبي هالجرائم حتى يكونو عبره لمن لا يعتبر, و لابد من تكثيف الجهود من جميع الجهات لمحاولة التخلص من هذه الظاهره حتى نحمي نفسنا و نحمي غيرنا .

If I Were - Tag

I'v been tagged yaaaaaaaay :D

Thank u SimSim :*

If I were a month, I’d be March

If I were a day of the week, I’d be Saturday

If I were a time of day, I’d be 20:00

If I were a planet, I’d be Saturn

If I were an animal, I'd be Dolphin

If I were a kind of weather, I’d be SPRING

If I were a musical instrument, I’d be Oud -3oood

If I were a colour, I’d be Blue

If I were an element, I’d be Mercury

If I were a car, I’d be BMW

If I were a food, I’d be Pizza

If I were a place, I’d be Beach

If I were a material, I’d be Silk

If I were a taste, I’d be Sweet

If I were a scent, I'd be Cocoa butter

If I were an item of clothing, I’d be a Scarf

If I were a facial expression, I’d be a Shy

If I were a pair of shoes, I wouldn`t O_o

If I were a song, I’d be b3dak 3ala bali-Fairouz and careless whisper-George Michael :)

If I were a body part, I’d be a Heart

If I were an emotion, I’d be Optimism

If I were a fruit, I’d be Berries

If I were a sound, I'd be Sound of the waves

If I were a direction, I’d be Right

If I were a piece of furniture, I’d be a Chandelier

If I were a liquid, I’d be Latte

If I were a gemstone, I'd be Sapphire

If I were a tree, I’d be a Eucalyptus

If I were a tool, I’d be a Polygraph ;)

Update....Update

I forgot one :(

If I were a flower......I'd be Narcissus :)

I will tag...

Naysan

Kholoud

LioneSS

KiKi

Noura - Smile ....We miss u kteer la2eno :)

ORANGEE 6ab3an :)

And whoever like to give it a try :)

We Are Against Celebratory Gunfire - logo

شكرا لصديقنا المدون احمد المحروق اللي صمملنا اللوجو و بوقت خيالي

شاركونا بالكتابه عن رفضنا لاطلاق الاعيرة الناريه تعبيرا للفرح

شاركونا برفض قتل الابرياء

شاركونا الاربعاء القادم 23/3 بالكتابه وفاءا ل "جود" و جميع الابرياء اللي ماتو بسبب هالاعيره النارية و تعبيرا عن رفضنا التام لاطلاق الاعيرة الناريه

و اللي بحب يستخدم اللوجو او يحطه في مدونته فاتفضلو تم اخذ الموافقه من المصمم :)

تحديث

تم بناء صفحة على الفيس بوك

Happy 20th Birthday To Ali :) + Suggestion

مع انّا ما بنعرف صديقنا يوسف على ارض الواقع

و معرفتنا فيه تقتصر على عالمنا الافتراضي هاد

لكنه دخل عقولنا

و من بعدها دخل هو و ابنه علي قلوبنا بدون اي استئذان

كل عام و علي بالف خير

العمر كله يا رب

و ربنا يخليلكم اياه هو و اخوانه و يخليكم الهم

______________________

مش عارفه اذا الكل بعرف قصّه جود - الله يرحمها - الطفله اللي كانو اهلها ماخدينها يشترولها اواعي علشان عيد ميلادها السنه و همه ماشيين بالشارع اجت طلقه براس جود مش معروف من وين و بعد 10 ايام قضتها بالغيبوبه توفت

هاد اقتراح صديقنا يوسف كتبه في تعليقه على مدونة رين عموضوع وفاة جود

"

واتمنى عليكم جميعا

اولا ان نقرأ الفاتحة لروحها الطاهرة

ثانيا ان نجعل من وفاتها حالة عامة ونبدأ بعمل مشترك وجماعي لنكتب جميعا وبصوت عالي ضد عادة اطلاق الاعيرة النارية في الهواء في المناسبات واقترح عليكم ان نجعل من يوم الاربعاء القادم 23/3 بمناسبة مرور اسبوع على رحيلها يوم وفاء لها ولكل من اصيب او توفي بحالات مشابهة نخصص كل مدوناتنا للكتابة عن الموضوع ويكون لدينا وقت كافي للتحضير لذلك"

حبيت انشر الاقتراح علشان اذا في حد بحب يشارك بالكتابه عن الموضوع يوم الاربعاء القادم 23/3

مصايب صور الفيس بوك

اذا متذكرين انا حكيت من قبل في بوست " شو بالنسبه ...1 " عن البنات اللي بتركو بروفايلهم عالفيس بوك مشاع للعالم و ما بزبطو الخصوصيه و بنزلو صورهم و بكترو كمان, 100 الف بوز و لقطه و لبسه و مرات تقريبا بدون لبسه :$ كل هاد بصدم و زياده بس اشي جديد عرفته و قهرني و جلطني فوق ما صدمني.

هلأ انا و ممكن معظمنا بوقت الثورة على مصر ضفنا عنّا ناس من مصر ما بنعرفهم بس كنّا نعرف انهم موجودين بميدان التحرير لنتابع اللي بصير و نأيد و ننشر اللي بحكوه وهو اقل شي ممكن نعمله بوقتها, هلأ خلصت الثورة و ان شاء الله ربنا يحققلهم كل مطالبهم و يهدّي بالهم ولكن لسا في اشياء بتصير فحبيت اضل متابعه , قبل كم يوم واحد من الشباب نسميه "س" موجه كلامه لشب تاني مصري خلينا نسميه "ص" , بطلب منه انه يلغي صفحه "ص" عاملها, و "س" عامل ري تويت لكتير من اللي واصله من صحابه برضه بطلبو فيها ان "ص" يلغي هالموقع, رحت لبروفايل "ص" لاشوف شو هالموقع اللي بحكو عنه, شفت انه كاتب انه حيلغي "الفرع المصري" و يخلي اللبناني و المغربي و ان في بعض البنات طلبو منه يلغي صفحاتهم فلغاها, لهلأ انا زيكم مش فاهمه عن شو بحكي

من تويت للتاني وصلت للينك الموقع اللي بحكو عنه , واللي هو ايش !!!

الاخ عامل مدونه و الادراجات فيها عباره عن صور لبنات ماخدهم كلهم من الفيس بوك, وكاتب انه ماخدهم من الفيس بوك , كل بوست اوله كاتب معلومات صاحبه الصور و اللي برضه ناقلها من الفيس بوك و حاطط صور و معلق عليها و طبعا الصور اقل ما ينحكى عنها انها بتخزي :(

الشب رادد على الاعتراضات بان البنات ناشرين صورهم ومش حاطين اي خصوصيه عليها اذا ما عندهم مشكله لو الكل شافهم و كانت الاراء بين مؤيد لوجهة نظره وبين معارض و كحل قرر يلغي "الفرع المصري" حسب تعبيره, انا بيني وبينكم ومع اني مقهورة من هالبنات مش مع عمل هالموقع ولا مع اعطاء هالشب الحق بانه ينقل الصور هيك,و بيني وبينكم مقهورة عموضوع "الفرع المصري" طيب مكل البنات الهم اهل والهم اب وام وممكن يكونو خوات و بنات حد ليش يعني التحديد؟؟؟ مع ان الموضوع مستحيل يطلع منه اي ايجابيه ولكن حسب ما كتب "ص" في بنات طلبو انه يلغي الصور و ضافو الخصوصيه على بروفايلهم, طبعا اللي عرفو وانتبهو و اللي ما عرفو راحت عليهم.....

كنت مع صاحباتي قبل كم يوم وحكيتلهم و للاسف في من صاحباتي رأيهم ان البنات بستاهلو ليش يحطو صورهم!!! انتو شو رأيكم ؟؟؟بحق لهالشب انه يعمل هيك؟؟؟ برأيكم ان البنات بستاهلو ويلا لأ؟؟؟

انا اكره الحيوانات :(

علاقتي السيئه مع الحيوانات بدت من زماااااان, انا بكره - بخاف :( - من كل الحيوانات الطائر و الزاحف واللي بمشي على 4 واللي بمشي على 2 - قرد كنجر وفي مقولة تانيه كنغر - كل شي ,وبعد تفكير متعمق توصلت انها كلها عقد طفوله مبنيه على قصص واقعيه

البسس

وانا صغيره لما كان عمري 5 سنوات - بصف تمهيدي كعكه بايدي - كنا بزياره لبيت عمتي و كان في بسه والده بحديقتهم و بسس صغار بوقتها كنت شايفتهم بجننو :( كل واحد من خواني و اولاد وبنات عمتي يمسك وحده منهم ويلاعبها وانا مش مسترجيه,بعدين تشجعت ومديت ايدي امسك وحده وعينك ما تشوف النور.... البسه الام نئحت عليها امومتها بهاللحظه و نطت عايدي و خمشتني ودم وحاله والبنت الوحيده ودلع وقلبتها دراما ومن يومها وانا والبسس بينا عداء وللاسف همه عارفين فبطلو يخافو مني :(

‏ الكلاب

يوم جمعه وكنا رايحين نتغدى بالتلال السبعه وكنت زغنونه, مش عارفه شو طلب مني بابا لاجيبله اياه من السياره يا دوب بطلع من الباب ويلا كلب واقف, بابا كان حاكيلي اني المفروض ما احسس الكلب اني خايفه واني اضل واقفه مكاني وانه جبان وهالحكي بس على مين ,انا شفته من هون وبديت اركض من هون والكلب ما صدق وراي عطول, وبابا يصرخ علي اوقف وصاحب الكلب يصرخ عكلبه ليوقف ولا انا ولا الكلب وقفنا و الحلو اني طلعت عالشارع وسيارات ربنا ستر والكلب سمع صاحبه ورجعله وانا اكلت بهدله يومها :( بكرههم ما بطيقهم وبخااااف.... كيف بدي اخفي الخوف ؟؟ :(

الغنم او على رأي فروحه "الغلمه"

هاي ايام الصف الثالث, كنت رايحه عالدكان اللي جنب بيتنا اشتري اشي زاكي , وانا طالعه من الدكان بعرفش من وين اجت الغنمه وماشيه باتجاهي, انا صرت ارجع ريفيرس فجأه صرت بين سياره صافه والحيط وانا ارجع و الغلمه جاي علي ,السياره مش صافه مستقيم فصارب بالاخر زي مثلث انا بطلت اقدر ارجع واعطيها الصوت العجيب :( انتبه العمو اللي بالدكان واجا زاحها وانا عيط والعالم التمو وانا صرت اركض عالبيت :(

وهاي كانت اخر تعاملاتي مع هالكائنات المتوحشه , واكيد بعد 50 سنه من كره هالكائنات بس تجيب بسه عالبيت وحتى لو كانت بيضه وكلبوزه ونظيفه برأيك وتحاول تقنعني مش اني المسها لأ اني اتواجد انا و اياها بنفس الغرفه فأكيييييد لا والف لا <<<< هالكلام موجه لابن خالتي اللي اجا هو ابنه يختبرو تحسن علاقتي بالبسس :(

كل شي و اله وقته

المصدر

كل سنة بس اهلي يتسهلو على الامارات بضل انا واخوي لحالنا و اخوي بستغل الفرصه لينطلق و دائما بضل لحالي, انا بيني و بينكم ما عندي مشكلة اطلاقا, التلفزيون و النت بكونو عاملين عجئه ويادوب ملحقه ولكن مشكلتي باني بحمل همّه وخصوصي بس يتأخر الوقت كتير و بكون تاني يوم عندي دوام و مش عارفه انام فبصير حكي كتير عالموضوع و بتوعّد اني احكي لاهلي كنوع من التخلص من المسؤوليه و لكن لما نحكي مع اهلي ما بحكيلهم اولا لان من صغري انا و اخواني متعودين ان الفساد على بعض كتير غلط :) لهيك دائما بوقع اللوم باي ضربه بننضربها من بعض على حفّة التخت :) و ثانيا اني مش ضروري اقلقهم و همه هناك و خصوصي ماما...

السنه كتير اشياء غير...اولا اني معطله و هاد شي مسعدني كتير و الحمد لله و تاني شي ان اخوي تغير, عنده التزام مش طبيعي فيي اولا و في البيت, يعني باليوم بتصل اكتر من مره يتطمن علي, بساعدني و بسألني شو بدك دائما , تقريبا يوميا بنطلع مع بعض اذا مش عند ناس عازمينا عالغدا بس درايف نلفلف بالشارع مع كاسة نسكافيه من عند مش عارفه شو اسمه عالدوار الثامن او سحلب من عند كريما كريم, و غير التزامه بانه ما يتأخر على البيت بس يطلع مع صحابه :)

كتير بنلح على الشباب و بنقر فوق روسهم و ما بنتوقع انها ممكن تكون مرحله طبيعيه من حياته و بتمشي بحالها , ما بننكر انها مرات بتطول عند البعض و بتزيد عن حدها ولكن بالاغلب في نقطه هو لحاله بصحى فيها و بعيد ترتيب اولوياته بالحياه بالطريقة الصح.

بالعاده اخوي بستلم الدي جيه و يا بنضل ساكتين وكل واحد بعالمه يا بنضل نحكي قصص و نضحك ونقطّع بعض 100 مره بتداخل القصص و المواقف,قبل كم يوم كنّا بالدرايف الشبه يومي تبعنا و بالعاده ببدا عال 10 بالليل , بحكي لاخوي عن حبي الكبير للمشي بالليل, ان مرات بكون الواحد مفرفطه روحه و بدو يطلع, مشي نص ساعه لساعه بغير مزاجه, بس تمشي مع انسان بتحبه ولو حتى ما حكيتو شي بس هيك شعوركم انكم مع بعض بكفي, بحكيلي "بتعرفي انا شو بحب, بتخيل اني بتمشّى عالشط " -طبعا هو بحكي وانا بتخيل حالي بالموقع مع صاحب الظل الطويل المجهول - و كمّل انه" بكون عالشط و بعدين بروح على جسر فوق البحر و الدنيا غروب" - انا بعقلي يا سلااااااااااااااام بجنن هالمنظر - و كمّل " و اطول سيجارة و ادخنها بس بشرط اكون لحالي وما حد معي" انا زي اللي حد شحط بريك بتخيلاتي, لحالك!!!! طب ليش لحالك!!! حسيت زي الحد مسك محايه و محاني من الصوره :( ما استلطفت تخيلاته :$

لكن برجع و بحكي.....اتركوهم يجربو و بعد فتره لحالهم برجعو للطريق الصحيح :)

مسائكم فل و ياسمين و نرجس اللي بتحبه مميتي :)

عذرا اردنّي الغالي...#B4JO

عذرا يا وطني فان نفسي مملوءة بالاحزان

عذرا فكلماتي تأبى الانطلاق و الجريان

لم يعنيني تقّولهم عن اصلي وامرهم لي بمغادرة المكان

ولا تشكيكهم بحبي و وفائي و اتهامي بالخُذلان

يكفيني عزاءا انك تعلم بان حبي و عشقي لك دائمان

فانت بقلبي و عقلي و في الوجدان

وانني لاغنّيك و انشدك باجمل الالحان

لكن عذرا... فان كياني في غير كيان

عذرا لانني قد قسّمت جنبات القلب ما بين البلدان

بلاد العرب تستباح بلا استئذان

و الكلاب المسعورة في كل مكان

هم ليسو بالاغراب هم من العربان

بل هم الغربان تنعق في سماء الاوطان

عذرا لانني لن اتشدق بنعمة الامن والامان

و بانني انام قريرة العين بكل اطمئنان

عذرا فلن افرح بالاهل و الخلان

فكيف افرح و اخ عربي قد يموت الان

فاسمح لي يا وطني ان اكون اليوم من كل مكان

فأنا الاردنية الفلسطينية المصرية وهكذا الى تطوان

_______________________

عالم وهمي

دائما ما تتعلق بالاسماء, تبني لها ملامح و وجوه و تعشقها اكثر, وتبدأ في بناء القصص و الحكايات, تحلم و تحلم, همسات و لفتات, كلمات و احاديث كلها محض خيال تبنيها و تتفنن في البنيان.

تحبك القصص كما تريد و تحل العقد بطريقتها, تمر الايام و تتعلق اكثر و اكثر, تلاحق الاسم في كل مكان و تلاحق اخر تحديثاته و اخباره, و تبدأ بتحليل كل حرف و كل كلمه و تبني عليها الاف الجمل, تفرح و تحزن و تسهر و تحلم كلما قرأت جديده,تحاول استفزاز كلماته و استعطافها احيانا.

ستدور الايام و سيختفي كما بدأ.....مجرد اسم مرّ عبر احرفها, اسم جديد من بين اسماء كثيره عبرت شاشتها.

الاغنية ما الها دخل بالموضوع لكني كتير بحبها :)

مسائكم فل و ياسمين

و جمعتكم مباركه ان شاء الله

انبسطو بالعطله و المش معطل -يا حرام- .....انبسطو بالدوام :)

باقي يوم

اه ...بس باقي يوم ليوم التدوين للاردن و حضرتنا ابياااااااااااااااااااااااااض ولااااا اشي :( مش عارفه اركز يا جماعه, مش عارفه اكتب شي, بس املي كبير بكره و قبل اخر لحظه بنقطتين تنطلق الحروف....كل الحق على اخوي :(

ليش عليه الحق!!! هلأ بحكيلكم بس احكيلكم القصه من اولها

من يوم ما سافرو اهلي الله يسهل عليهم وبما اني عاطله عن العمل فاختكم بالله صايره تطبخ والحمد لله و بشهادة اخوي الله يرضى عليه الاكل بطلع بشهّي و الدليل صينيه الباستا اللي اكلوها على قعده وحده هو و صاحبه وانا برّه :) .....اه صايره لانو بالعاده او بالطبيعي ما بطبخ ولا الي دخل, بساعد بالسلطه بالتحريك بحط البهارات بعد سؤال مميتي 50 مرّه عن الكميه ولكن طبيخ طبيخ لحالي و مميتي موجوده ما حصلت, سامعه اللي بحكي نياطه و مميتي مدلعيتني و الخ الخ وسامعه اللي بحكي هي كم عمرها!!! 33 و 11 شهر و كم يوم, اه ولهلأ ما بطبخ :)

المهم من يوم ما تسهلو اهلي طبخت فاصوليا بيضا - حب اللولو على رأي مميتي- و عملت باستا و عملت ستيك جاج مع توابعه من صوص وسلطات وبطاطا مقليه , اليوم بدي اطبخ ,بعد 5 ساعات طبيخ منهم 3 ساعات لاقرر شو اطبخ بين كتاب الطبخ و التدوير عالنت و بين جاج ويلا لحمه قررت اطبخ جاج بالكاري و ساعتين وانا بطبخ و انا خلص بنظف الغاز بعد نهاية المعركه بتصل اخوي بحكيلي انو عازمني نتغدى برّه.....

طبعا شو عملت!!!!!

كرد فعل طبيعي للوضع

و بعد 5 ساعات شغل.....

ضبيت الاكل بالثلاجه و جهزّت حالي :)

اخدني عمطعم ياباني بعبدون اسمه نوديجيا Noodasia

انا اول مره بروح عليه, الاكل كان بجنن, اخوي طلب شرمبز و انا طلبت جاج وشوربة ذره لانو ما الي بالسي فود و هالقصص انا, ما راح احكيلكم عن الاكل قديش زاكي خلي الصور هي اللي تحكي :)

و بعدين اخوي بحكيلي شو رأيك نطبشها ونتحلّى....مجتش عالمليون ,و طلبنا قهوه و الحلو كان اوريو تشيز كيك يم يم من الاخر :)

المهم نرجع للموضوع الاصلي - كتيرة حكي انا بعرف - الموضوع انو واحنا قاعدين بنتغدى شفت كشك للشرطه و قاعدين يا حرام 3 فيه و الدنيا هوا بطيّر بره بتحدثو و بضحكو وبراقبو الدوار , حكيت لاخوي خلينا نروح نسألهم كم من سؤال عن شو بحبو بشغلهم و شو بكرهو و اطرف حادث صار معهم وهيك كم سؤال و اصورهم فيديو و بزبطه و بيكون فكرة جديده و حلوه و مبتكره.....من اول القعده لاخرها و اخوي بحكيلي انتي اكيد بتتخوتي وانا والله كنت احكي جد :$ و لمّا اجينا نروّح مسك اخوي ايدي و بحكيلي يا الله شو برد و صار يركض عالسياره و ما خلاني احكي معهم....لهلأ بحكيلي انتي اكيد بتتخوتي O_O

فها شفتو ليش الحق على اخوي

هو السبب ان ما عندي اشي جاهز لهلأ

ان شاء الله تكونو انتو صرتو مقررين عن شو بدكم تكتبو....واللي لسا ما كتب يكتب ماشي, حدور بعد بكره عالمدونات لاصلح الواجب و اللي باخد علامه كامله اله طبق كعك متوّصى عليه من مخبز من مخابز خميس مشيط :)

مشتاق و مضنيني الفراق

اشتقت للاطافيل

ارجعنا مرّه تانيه للتلفونات اللي ما بتفش القلب

و للحكي عالنت اللي بقهر اكتر ما ببسط

اليوم حكو معي اهلي من الامارات و ما حكيت مع فروحه

حبيبتي مريضه :(

اشتقتلهم كلهم كتير كتير كتير

اشتقت لبابا وماما

اشتقت لاخواني و مرتاتهم

و اشتقت لحبايب قلبي كلهم

كتير بقهر انّا نسمع عن حركاتهم و تطوراتهم سمع

اول ضحكه

و اول صوت

و اول كلمه

و اول خطوه

كلّه بروح علينا

الله يجمعنا على خير

كعك....كعيييييييييييييييييييك :)

بما ان الكل صار يخون و ينعزم عند الناس فااااااااااااااااا احزرو احزرو مين اكل كعك عند مين اليوم!!!!! :))))

ومين اكل اشياءات زاكيه وشرب عصير و قهوه مع مين اليوم؟!؟!؟!؟!؟

نا ننا نا نااااااااااااا

الموضوع كله مغامره من اول انطلاقه للفكره, ابتداءا من "امي مساقره وحعمل حفله"...مرورا بالاتصال للسؤال عن بيت للايجار وبس عرفت اني كنت نايمه ندمت انها ما حكت من ال 8 الصبح...وصولا الى محاولة "الاندلال" على الموقع قبل بيومين واتصالات نص الليل ...المتكرر...3 مرات بعد دعوات اني اتوه و ارد اتصل و هذا اللي حصل...ديرو بالكم من دعواتها :$ ومن ثم الوصول في الموعد المحدد....مغامره الكراج و المغامره الكبرى الممر......"تفضلي يختي" :)

بعرف انو في اشياء مش مفهومه بس للتوثيق كتبتهم :)

المهم المهم يس يس يس كعك واشياءات زاكيه, اخيييييييييييييييييييييييييييييييييييييرا اكلت من الكعك و حكيت تلفون مع عموره ما شاء الله عليه حبيبي واللي وعدني يقشرلي البيض :)

مين سمير!!!!!

طبعا واكيد زي ما كلكم متأكدين....كل اللي بالشركه و بس احكي الكل فانا بعني "الكل" بمووووووووووووووووووووووووووووتي منها قصدي عليها :) تعرفت على الكل يمكن بس ضل شخص كان نفسي اشوفه للاسف ما حصلي الشرف ويلا كان وضعي زنون :)

وما الكم علي يمين ولا جبنا سيرة حد, ولا انو حتى صرنا نكتب نوت عالدفتر لحتى ما ننسى حد...ابدا ابدا ولاااااااااااااا جبنا سيرة حد, و كالعاده و الطبيعي معي هالايام اكتشفنا معارف مشتركه, صديقات و قرايب الي , الدنيا زغنونه يا جماعه بشكل غريب, و ايش كمان ايش كمان اه صاحبيتات ام عمر اللي بالمكتب جد ما شاء الله بجننو كتييييييييييييير حبيتهم و غير انو وجودي زاد الرزق و الشغل عالشركه , التلفون ما وقف رن :$

حكينا مع بعض كأنو بنعرف بعض من زمااااااااااااااان ضحكنا و حكينا بادق التفاصيل بكل بساطه :)

ام عمر.....انا بكرهك :")

فقط انت

فقط انت......

من يشعر بوصولي

تلتفت تبحث عني فتراني

يعجز اللسان عن الكلام و تتلاقى العيون...

هي ثواني في منظومة الوقت ولكنها تتعدى جميع المواقيت عندنا

يتوقف الوقت كما توقف و اختفى كل شئ حولنا

تنطق عيونك بالاف كلمات الحب لترد عليها عيوني بالالف كلمات الشوق

تختفي الاصوات ولا اسمع غير صوت نبض قلبي يهز جسدي

تتلاقى ايدينا بالسلام و تطبع قبله على جبيني

ينطق لسانك بعبارات التهنئه

اشعر بحرقه تسري في حنجرتي وبدموعي تتحرك باتجاه عيوني

اكتم الدموع و الكلمات معا

ابتسم و اومئ برأسي

يأتي من يوقظنا

" اطمئن...ابنتك ستكون بايدي امينه ان شاء الله"

اسحب يدي من يدك بعد ان اقبلها

و امسك بيده و اسير وسط الجموع

_________________

ملاحظتين ع الهامش

**بابا وماما مسافرين و اشتقتلهم كتييير كتييير كتييييييير :(

**باقي 7 ايام ليوم التدوين للاردن و لهلأ مش لاقيه موضوع اكتب عنه :$