Things I Like To Whisper About

Would You Hear Me Whispering

مصايب صور الفيس بوك


اذا متذكرين انا حكيت من قبل في بوست " شو بالنسبه ...1 " عن البنات اللي بتركو بروفايلهم عالفيس بوك مشاع للعالم و ما بزبطو الخصوصيه و بنزلو صورهم و بكترو كمان, 100 الف بوز و لقطه و لبسه و مرات تقريبا بدون لبسه :$ كل هاد بصدم و زياده بس اشي جديد عرفته و قهرني و جلطني فوق ما صدمني.

هلأ انا و ممكن معظمنا بوقت الثورة على مصر ضفنا عنّا ناس من مصر ما بنعرفهم بس كنّا نعرف انهم موجودين بميدان التحرير لنتابع اللي بصير و نأيد و ننشر اللي بحكوه وهو اقل شي ممكن نعمله بوقتها, هلأ خلصت الثورة و ان شاء الله ربنا يحققلهم كل مطالبهم و يهدّي بالهم ولكن لسا في اشياء بتصير فحبيت اضل متابعه , قبل كم يوم واحد من الشباب نسميه "س" موجه كلامه لشب تاني مصري خلينا نسميه "ص" , بطلب منه انه يلغي صفحه "ص" عاملها, و "س" عامل ري تويت لكتير من اللي واصله من صحابه برضه بطلبو فيها ان "ص" يلغي هالموقع, رحت لبروفايل "ص" لاشوف شو هالموقع اللي بحكو عنه, شفت انه كاتب انه حيلغي "الفرع المصري" و يخلي اللبناني و المغربي و ان في بعض البنات طلبو منه يلغي صفحاتهم فلغاها, لهلأ انا زيكم مش فاهمه عن شو بحكي

من تويت للتاني وصلت للينك الموقع اللي بحكو عنه , واللي هو ايش !!!
الاخ عامل مدونه و الادراجات فيها عباره عن صور لبنات ماخدهم كلهم من الفيس بوك, وكاتب انه ماخدهم من الفيس بوك , كل بوست اوله كاتب معلومات صاحبه الصور و اللي برضه ناقلها من الفيس بوك و حاطط صور و معلق عليها و طبعا الصور اقل ما ينحكى عنها انها بتخزي :(

الشب رادد على الاعتراضات بان البنات ناشرين صورهم ومش حاطين اي خصوصيه عليها اذا ما عندهم مشكله لو الكل شافهم و كانت الاراء بين مؤيد لوجهة نظره وبين معارض و كحل قرر يلغي "الفرع المصري" حسب تعبيره, انا بيني وبينكم ومع اني مقهورة من هالبنات مش مع عمل هالموقع ولا مع اعطاء هالشب الحق بانه ينقل الصور هيك,و بيني وبينكم مقهورة عموضوع "الفرع المصري" طيب مكل البنات الهم اهل والهم اب وام وممكن يكونو خوات و بنات حد ليش يعني التحديد؟؟؟ مع ان الموضوع مستحيل يطلع منه اي ايجابيه ولكن حسب ما كتب "ص" في بنات طلبو انه يلغي الصور و ضافو الخصوصيه على بروفايلهم, طبعا اللي عرفو وانتبهو و اللي ما عرفو راحت عليهم.....

كنت مع صاحباتي قبل كم يوم وحكيتلهم و للاسف في من صاحباتي رأيهم ان البنات بستاهلو ليش يحطو صورهم!!! انتو شو رأيكم ؟؟؟بحق لهالشب انه يعمل هيك؟؟؟ برأيكم ان البنات بستاهلو ويلا لأ؟؟؟

40 التعليقات :

من وجهة نظري الخاصه انه تصرف هالبني آدم حقير لانه هاي الصور ما اخذ رأيهم وسألهم ان حابوا ان يشاركوا صورهم على البلوج تبعه وبعدين ليش البنت تستاهل انا هاد مش فاهمته بس لانها بنت تستاهل!!
كل واحد حر في الشي اللي بيحطه بس لازم على الانسان الثاني او المطلع انه يراعي الآدب
مع احترامي لصاحباتك بس همه عمله متل اللي بيحكوا انه التحرش بالبنات سببه البنات مش قلة ترباية الشباب !!

 

ويسبر.. يمكن الموضوع بيشبه موضوع حرية اختيار أي ملابس ممكنة.. البنت بتنزل على الشارع بعينة قماش و بعدين المسؤولية على الشباب في المعاكسات

في موضوع المعاكسات و في موضوعك هون.. الشاب أكيد غلطان.. بس كمان ما بننفي المسؤولية على الصبية.. و لو بدرجة 30% ..بغض النظر إنها هي قاصدة وبتعرف شو عاملة ولا لأ.. بس هو غلط

ولو الموضوع مش غلط.. يمكن ربنا أمر الشباب بغض النظر و ما أمر البنات بالرداء المحتشم

 

يعني في بنات عن جد مش فارقة معهم، و هم أساساً بحطو صورهم عشان كل العالم يشوفها، مع ذلك أن ضد انو هالشب يعمل هيك، لانو هاد شو ما كان اسمو ملكية شخصية لهدول البنات... يعني كمثال، لو انتي منزلة بوست عمدونتك اللي انتي عارفة انها مفتوحة لكل الناس، مش من حق أي حدا يعيد نشر أي موضوع إلك بدون ما تعرفي أو بدون ما يطلب منك الإذن، و الصور على نفس المبدأ....
و كمان في نقطة تانية، انو يمكن نسبة 70% من البنات ولا داريين عن حالهم، خصوصاً اللي بعدهم صغار شوي (يعني بمرحلة المراهقة).. بتلاقيها بتنزل صورها بدون ما تفكر بأي أبعاد للموضوع... مين رح يقدر يشوفهم، مين رح ينسخهم، كيف ممكن يستعملو.. ولا شي...
و هدول البنات مع اني بحس انو بدهم قرصة عشان يصحو، بس كمان مو بهاي الطريقة...

 

LOL had sheklo 7der The Social Network w mfaker 7alo marc zockerburg XD

 

خطأ البنات طبعاً....بيستاهلوا

 

ممممم
الشغلة الها عدة جوانب الصراحة
هسه بشكل عام , ممكن البنت تحط صورتها وهي بتتأمل انه كل "الاصدقاء" اللي عندها ما راح يعلقوا او انهم راح يوخذوها اخوية , بغض النظر عن طبيعة الصورة

انا في عندي اكثر من بنت عالفيسبوك , حاطين صورهم وما في مشاكل عندهم , لأنهم بكونو ماليين ايديهم من اللي عندهم

جهة ثانية اللي همه البنات اللي بكونو فاتحين البروفايل وصورهم الخاصة لمرّاق الطريق , يعني اي واحد بقدر يشوف صورهم

في عالم مثالي , المفروض حتى لو البنت حطت صورتها انه ما يصير اشي , بس للأسف احنا مش بعالم مثالي , كثير شباب "ذئاب" بتصيدوا هيك صور وبلاحقوا البنات على صورهم كمان

بالنسبة الي , انا ما بسمح للمدام تحط صورتها بأي شكل من الاشكال عالفيسبوك , وهي منها لحالها اصلا ما بتفكر تعمل هيك , مع انه كل اللي عندها همه صاحباتها وعيلتها

انهم بستاهلوا ؟ الصراحة عندي ضعف من هاي الناحية , فا انا بتخيل انه فش بني ادم بستاهل يصير فيه اي اشي عاطل حتى لو تصرف غلط

الشب ما بحقّله يعمل هيك , يا ستي اعتبري انه البنت غلطت ونشرت صورها , هسه الشب المفروض يكون عنده شوية عقل وما يعمل هيك , يعني ما يستغل غلطة البنت

وآسف على طول الرد , دمتي بخير ان شاء الله

 

طيب
ممم
بتعرفي شغله
حتى انا ما بعرف اعمل اعدادات الخصوصيه
وهو شي غلط بالمناسبه

الأخ عامل أجريجياتور للصور اللي بلا هدوم؟
والله فيه الخير والله
فكرت هالموضه خلصت

ع فكره لازمني قراءة تانية، لاني خربطت بين س وص!

 

أنا والله كثير بستغرب كثير من البنات اللي حاطين صور الهم بأوضاع مش لائقة بالمرة..بتكون بغرفتها وبتتهبل ومصورة حالها وبترجع بتحطها عالملأ..طيب وين أهلها هاي :/
بس من ناحية ثانية اكتشفت انه فيه ناس بسرقوا هاي الصور من البنات..يعني صاحبتها بتصورها..وممكن تتناذل وتنشر الصورة..التلفون بينباع وما بكونوا شاطبين الصور صح أو فيه برنامج بتسترجع هاي الأشياء..وبيوخدوا الصور وبنشروها بحقارة..عشان هيك بطلت أتصور الا وانا لابسة الحجاب ..ومش مع أي حدا..بتعرفيش شو بصير ..وبالنسبة للشب فهو نذل باختصار..يعني نفرض البنت مش سائلة هو شو دخله يرجع ينشر الصور..بده يكون حقير يكون لحاله..واذا بده يربي هالبنات مش هيك الترباية o_O

نيجي للجد..هاتي عنوان الموقع وبلا كثرة حكي ;)

 

هلأ اكيد مو من حق الشب انو يعمل هيك !! لأنو في بنات يمكن يمكن ما بيعرفوا يحطو برايفسي بــــــــــــس كمان في كتير بنات مو فارق معهم وما تستغربي اذا لقيتي في بنت مبسوطة لأنو حاطط صورتها على اعتبار انها حلوة :s

 

يعني انا قانون الغاب هاد هيك سبحان الله ما بقتنع فيه !!
هيي غلطانة انو تركت صورها مشاع ؟ أكيد
هل هو مبرر لاستغلالها ؟ طبعا لأ

يعني بتذكرني بقاعدة انو وحدة مش محجبة او مش لابسة شرعي عادي الشب يتحركش فيها !!!

يعني هيي غلطانة بس كمان الشب اللي بستغل هالشي اخلاقياته عليها علامات استفهام
الكل بيتحاسب على اعماله والشب لا يفكر انو غلط البنت ببرر غلطه

 

صباح الخير اختي ويسبر
منذ قليل كتبت تعليقاً طويلاً عريضاً
لكنه من سوء الحظ لم انسخه
فهو اختفى ببساطة.
ساحاول الكتابة بعد شكرك على هذا الموضوع اليوم لانه موضوع صعب ولكنه شائع..خاصة بين بنات المغرب للاسف.

ذنب من مثل أن يفكر بعض الرجال
بأن لباس المرأة ووضعها للماكياج هو تشجيع لهم على التحرش والمعاكسة.
هذا الموضوع بدوره فيه نقاش حاد،
وكأن الناس تتقاتل من الأول
الدجاجة أم البيضة!!
من جهة البنات يغلطوا مراراً ومراراً بوضعهن صورهن للعالم..
وماشاء الله سوف تجد في بلوجر وحدها مدونات للعالم مليئة بصورهم العائلية والشخصية بادق التفاصيل اليومية.
ولا احد يأخذ شيئاً.
بينما نتخصص نحن العرب في أخذ اغراض الآخرين حتى حياتهم = صورهم!!
ومن ناحية اخرى لا اعرف لما لايتعلم البنات عندنا الحذر والاحتياط واتقاء شر هذه الفئة العفنة..
المريضة.
من حريتي ان انشر صوري
لكن ليس من حق كل من هب ودب اخذها والتلاعب بها..
ليفكر هؤلاء المرضى باخواتهن مثلاُ
لكنه الشئ نفسه مع المعاكسة وماشابه.
الفيس بوك مشروع اجتماعي جيد، لكنهم حولوه لخطر ومصدر ازعاج ومشاكل كثيرة.
ولأنه لن نتغير
فالاحسن بالبنات يحذروا ويخلوا صورهن لانفسهن.

 

لا طبعا مو من حقه ابدا و حتى لو البنات كانوا من الاساس عارضين صورهم, هادا لو كان في بلد اوروبي كان رموه في السجن لانه حتى لو الاشياء مشاعة مو من حقك تاخدها و تنشرها من دون اذن او سؤال لصاحب الموضوع
و بعدين زي ماقلنتي ليش فرع مصري و التاني لا, يعني في بلد افضل من بلد و لا في بنات اشرف من بنات ؟؟

اما بخصوص البنات فاكيد مايستاهلوا, صحيح انه افضلهم لو زبطوا الخصوصية على الفيسبوك بس حتى لو مافي اي شخص يستاهل انه صوره تتاخد

وبعدين الغبي دا مو عارف انه في كما تدين تدان و انه راح يجي اليوم اللي صور اهله و اوضاعهم الخاصة برضه حتنشر؟؟ اسفة بس الله يكسر يده ان شاءالله

 

قليل اصل بمعنى الكلمة
مش ممكن انه نشكي المدونة حتى يتم الغائها؟
للتذكير فقط
هلأ كل اهدافك الساميه كوم و موضوع
"كل واحد ابوه و امه عندهم فيسبوك و هو لأ"
كوم تاني :)

 

Salam Whisper,
He has no right to get peoples picuters with out permission even if these pictures are open. In fact we have to give credit for any piece of information you get of the interent, we all know that. This person should be reported to facebook adminstrators.

 

الشب ما بحقله يلم الصور هيك .. بس كمان مش قادرة احكي انه البنات هاي ما بتستاهل البهدلة اللي هي فيها ...يعني لو ما معها خبر انه بروفايلها مفتوح بقلك اااه ما بتستاهل ابدا ..بس اللي فاتحته عن قصد يبقى ما بقدر ازعل عليها بصراحة...الشب غلطان بكل الاحوال لانه مش المفروض يشهر فيهم و البنات المستقصدين غلطانين كمان ووووو تتحمل نتايج عملتها.
زكرتيني بموقف شفته وقت عيد الاتحاد بابوظبي ..يومها كل الناس بتطلع و بتحتفل و بتسكر الشوارع و بتقلب هيصة .. كنت بالسيارة مع صاحبتي واقفين بالزحمة .. ما لقينالك غير وحدة لابسة خليجي بالسيارة اللي جنبنا بتفتح سقف السيارة و طالعة منه و بتهز انه هز و خلع بضمير ..هاي و احنا بنص الشارع و سيارات و دنية .. شوي انتبهت انه واحد هندي عم بصورها فقال صارت تبهدل و تشرشح في ليش بصور ...طب انه ترقصي بنص الشارع عادي؟!! الهندي غلطان بس هية بتستاهل لو لقت حالها عاليوتيوب.. انا داري ..كل واحد ح يتحاسب ع عملته بالاخر

 

مساء الخير
انا من رأيي أنه لا يحق لهم ذلك ولكن أيضا لا يحق للبنات ان يضعوا صور لهم وكمان بوزات وملابس عرض أزياء وعرض اعراض
سبحان الله مع انو كل ساعه وثانيه بنقول انو اجتماعنا هنا هو تقارب الارواح وتآلفها فليش الصور والاشكال
انا بقول المهم بوح الروح للروح
وتبادل الاراء ونتعلم من بعض
ويمكن أكتر المصايب بتيجي من هالشي
ما بيصير

 

شوفي أنا احساسي إنو هالشب عاملها قرصة إذن للبنات الله أعلم ......عجبتني الحركة لإنها فعلا قرصة إذن لكتيير من الناس اللي بفكروا إنو الصور بده اضلها بس عالفيس بوك ونسيوا إنو ممكن نسخها وتعديلها حتى وتزويرها ......بالله شو استفادوا لو طلع هالشب سرسري وركب صورتهم تركيب ؟!!! يا أخي الناس بتتبع الموضة والدارج بدون ما تفكر واحد بالمية !!!! الأيام صارت بتخوف .....

 

ويسبر

مساء الخير

واله انا تعبت وانا اقول بان ما بنشر على النت حال نشره لا يعتبر خاص ويعتبر ملك العام فهذه الشبكة يمكن لاي متواجد ان يدخل عبر طرق كثيرة وبالتالي على الجميع ان يدرك هذه الحقيقة ويتعامل على اساسها ولا يلوم احد

بعضنا وبحسن النوايا وعدم فهمه للآثار المترتبة على النشر يقوم بنشر ما هو خاص جدا وبعد ذلك يتضايق من طفوليّة وفضول الآخرين

دمتِ بخيّر

 

أنا اول ما اقرأ كلمة شو بالنسبة بالبوست بحس انه في مصايب :)

بس برضو القانون لا يحمي المغفلين ، يعني ما دام الصور موجودين على النت و مفتوحيين للجميع اذا البنات اصلا موافقين و ما عندهم اي مشكلة انه حد يشوفهم و اصلا هم حاطينهم عشان ينشافوا

فالشب ما عمل غير انه جمع هالصور و حطهم بالموقع ممكن اي حد ثاني يعملها

 

Sozan

انا من نفس وجهة نظرك, حاسسته استغلالي جدا و خصوصي تنقايته للصور و التعليقات بتاكد على انه مش منيح ولا نواياه الاصلاح كما بحاول يدّعي بالردود على رفض هالمدونه

انا مش مع ان البنت تحط صورتها عالنت بشكل عام غير موضوع البوزات اللي حاطينها, في كتير مريضين نفسا امثال هالشب بستغلو هاصور لكن هاد ما بعفي الشب من انه غلطان وجدا كمان.

جعفر

في مقياس لحرية الشخصيه بانك لا تتعدى على حرية الاخرين, بالنسبة الي اللبس و تمشي بالشارع مش حرية شخصيه لانك بتأذيني بطريقة لبسك ان كان البنت او حتى الشباب اللي بكونو ماشيين و نص البوكسرات بالشارع, مش منظر و اكيد بأذيني هالمنظر

اما اني ابحبش بالنت على الصور و اتنقل من بروفايل لبروفايل و بعدين احكي الحق عالبنت فلأ, يعني انا اللي بدور و انا اللي بتعدى على حريه العالم بهالطريقه

انا مش مع ان البنت تحط صورها ولكن هاد ما بعطي الحق للشب يعمل هيك, هي مسؤوليه مشتركه بينهم و استغلال من طرف الشب

 

Hanadi

معك حق, حتى احنا اذا اخذنا صورة من موقع لنحطها بالبوست لازم نذكر المصدر اذا كان واضح ملكية الصوره بترجع لمين فما بالك بالصور الشخصيه!!!

المشكله كمان بالفيس بوك انه مرات بغير الخصوصيه فجأه و بصير البروفايل مفتوح للجميع و البنت اساسا ما بتعرف, قبل فترة صار هالشي, وما بنكر ان في بنات مش فارقه معهم وبالعكس بنبسطو على هالانتشار....الدنيا مليانه ناس مرضى نفسيين من الجنسين فلازم ندير بالنا اكتر

Rain

LOOL 2ah w 7ab yjareb elwade3 3alwaqe3 :)

 

Naysan

O_o عن جد!!!
عليهم لوم البنات اكيد....بس ما في حق للشب ينقل الصور هيك , ويلا شو رأيك!!!!

LUNAR

هلأ الشب مش مختار البنات اللي حاطين صور طبيعيه....لأ اللي ماخدين راحتهم 3 شويات بالصور و بطريقة التصوير, يعني هو تقريبا عامله موقع على قليل ادب :$

هلأ انك تحطي هيك صور مأساه وانك تتركي بوفايلك للعالم هيك مأساه اكبر, ولكن زي ما حكيت هي غلطانه بس ما بصير الشب يستغل هالخطأ بهالطريقه هاي

الله يهدي هالبنات بس شو بدنا نحكي, العالم كل ماله بصير اسؤ و مجرد تتعامل شوي مع العالم بتكتشف ان مش الكل منيح ولا الكل بياخد الموضوع اخوي فلازم يوعو شوي

شكرا الك وخود راحتك....انا زي ما حكيت من قبل بحب الردود الطويله لانه بتفتح مجال اكبر لمناقشة الموضوع

 

مياسي

انا ما كنت اعرف كل التفاصيل بس اخوي الخبير مع شوية تجارب زبطت معي :)

ايون هو تقريبا هيك بس كلهم من الفيس بوك ماخدهم ...و ربنا الله مش بلا هدوم بس مختار الصور اللي اقل شي فيها هدوم, صور الحفلات و اللي عالبحر و بوزات البنات الهبله اياها :$

هي هالموضه كانت قديمه!!! اول مره بعرف :)
ص هو اللي عامل الموقع و س اللي عندي بالتويتر اللي بحكيله يلغيه :)

Dreamy Villager

افضل شي....هاي البرامج اللي بترجع الصور عن الموبايلات و الكمبيوترات مأساه يعني ليش الهبل و التوريط من اساسه!!!!
و بعدين انهبلت على عينها ليش بتنشرهم مش فاهمه!!!
وكل هالاشياء ما بتعطي الحق لاي شخص ياخد الصور و ينقلهم هيك

ذكرتيني بنت خالي معلمه واجتها طالبه بتسألها شو بتقربلك فلانه, حكتلها اختي بس ليش بتسألي!!! طلعت رايحه عالفيس بوك ومدوره عاسم بنت خالي ومن الاسم عرفت خواتها و منزلة صورة اختها من هناك وحاططتها عالموبايل :$
تخيلي !!!!

الكل مريض نفسيا الله وكيلك
ههههههههههههههههههههههههههه عنوان الموقع!!! عاساس انا بدي اعمل اله دعاية غير مدفوعة الاجر :)

 

غلطة النسوان طبعا
اصلا همه اصل البلى
v_v

 

loooooooooooool @ rain

 

هو اكيد مش من حقه بس طبعا غلطة البنات

 

Hana

فعلا في بنات ما بعرفو بموضوع البرايفسي او كيف يعملو برايفسي لبروفايلهم ومع هيك ما بصير يحطو صور غريبه عجيبه لان في ناس مرضى زي هالشب بستغلو الموضوع احقر استغلال

هو كاتب ان في بنات شكروه انه حط صورهم :$ مش مستوعبه او بديش اصدق ان في هيك :(

همسة

للاسف في ناس ماشيين على هالمبدأ وكأنهم همه بموقع يحاسبو ويحاكمو و يعاقبو الناس و بنسو مسؤوليتهم بس بتذكرو ينتقدو العالم و يستغلو وضعهم تبريرا لانهم بدهم مصلحتهم و يبينو غلطتهم للعالم

التنين غلطانين اكيد ولكن بعتقد انه غلطة البنت ما بتعطي الحق للشب يستغل هالشي ويغلط غلطه اكبر

 

لاتــي

هاد سؤ حظي انا ان التعليق اختفى....لان وجودك و كلماتك دائما بتسعدني و بتشرفني

انا اللي قهرني انه محدد الجنسيات و كمان قرر يلغي الفرع المصري, كأنه هدول بنات عالم و هدول لأ , منتهى قلّة الادب بصراحه


غلطة البنت مش المفروض تستغل و تتبع بغلطه اكبر من الشب, لو كل واحد حط بباله انها ممكن تكون اخته او بنته و انها اخت و بنت ناس محترمين لما عمل هيك.

فعلا حياتهم = صورهم لانه بتعبّر و بتعطي فكرة شبه كامله عن خلفيه وحياة هالبنت وبرضه في بنات بفتعلو عرض صورة غير حقيقيه لحياتم بهالصور ...برضه مرض نفسي من نوع اخر

كل شي بهالدنيا سلاح ذو حدين والشخص بقرر كيف يستخدمه, بدك تستفيد من الايجابيات و تتقي السلبيات بتقدر بس بدك تكون واعي و منتبه و مش عايش بعالم مثالي بخيالك و بتفكر الناس كلهم كويسين و بفكرو مثلك

انا وجهة نظري خطأ كبير ان البنت تحط صورتها باي شكل على الانترنت

Wafa'

اكيد في عنّا قانون بحاسب لكن في بنات اساسا مش عارفين عن البلوج و بنات مش عارفين حقوقهم, وموضوع الفروع هاد جدا قهرني.... وما هو الادليل انه فعلا مريض نفسيا هالشب

مش من حقه يدور بين البروفايلات ليوصل لصورهم, يعني هو اللي بدو يوصللهم مش همه عارضينهم هيك, وما بستبعد يكون حاطط صور لبنات من اصدقاءه اذا كان من اللي بلملم اي بنات عنده و بضيفهم

سبحان الله, ربنا عادل بكل شي حتى بنوع العقاب....الله يهديه و يرجعه لعقله

 

Gemini Girl

Fe3lan....Allah yostor men elly jay :$

كعكي

فعلا انه هيك....انا كبست على ان البلوج مسيء ولكن ما بعرف اذا في حد تاني اعتبرها هيك وكم واحد لازم يكبس لحتى تعتبر مسيئه ولكن اعتقد انها ما بتلتغى بس بصير في تحذير اول ما تفتحها انه محتوى مسء و ابصر كم واحد ما بكمل و بطلع

اهاااااااااااااااااااااااااااااااااااااا.....هلأ فهمت :)

 

Dr.N

2ahlan ya amar :)

I don't know his facebook account but I reported the blog but as I said before that they don't stop the blog they just put a previous page to the blog telling the readers that this blog may contain not proper stuff

Hb

البنات اللي قصدهم ينشرو صورهم مأساويات ولكن برضه ما بعطي الحق للشب يسرق الصور
يعني همه غلطانين من راسهم لساسهم فانا بدل ما احاول انصحهم اهديهم انتقد هالفعله لا اخد الصور و اساعد بنشرها اكتر :$

لاااااا هاي زودتها....يعني ما انتي بالشارع يا اختي ....اللي دايقها انو صور بس انها عامله زي تلفزيون متنقل مش مشكله, وبعدين هاد اللي شافته الله اعلم اذا في حد صور وهي مش منتبهه و فعلا تلاقي حالها عالهوا فجأه
الخطأ دائما مشترك بين التنين و كل واحد عليه حق

 

Kholood

اهلا وسهلا باحلى تيتا بالدنيا :)
مسا الورد

المسؤوليه عالتنين اكيد وما بصير واحد يستغل اخطاء التاني

احنا والحمد لله مجتمعنا هون ما فيه هالامراض النفسيه و هاد اللي جمعنا و قربنا اكتر ومش بحاجه لوجوه لتكمل الصورة احنا عاملين صور لكل شخص و قابلين فيها تماما :)

Orangee

هي قرصة دان و قويه بس فيها اسائه كبيره ...في اهل و اخوان و خوات لهالبينت , هي غلطت مش ضروري نفضحها هيك
ايواااااااااا لهيك انا مش مع حط الصور عالنت اطلاقا مطلقا....الدنيا ملياااااااااااااااااااااااته مريضين نفسيين حوالينا ليش نعطيهم فرصه لاستغلالنا
جد كتير بتخوف :(

 

Yosef

اهلا وسهلا يوسف....مساء النور
بالزبط هو خلص "انتشر" يعني بطل شخصي.... لكن فضول هالشب مش حاسسته بريء و معذور
خطأ كتير استغلال ظروف الناس, بركي هالبنت بيوم من الايام ربنا هداها , شو بدو يلملم هالصور هاي لانه اذا انتشرت خلص من جهاز لجهاز بتنتقل

الله يهدينا و يهيدهم و يستر على الجميع

W7l

هي مصيبه بصراحه :$
هي شغله بترجع للضمير و للاخلاق, ما اعتقد ان شب باخلاق عاليه و ضميرو صاحي بنقل صور البنات علشان الشباب تتفرج عليها و بستغل هالشي ليجيب ترافيك اكتر لمدونته
في بنات هبل بعيد عنك ولا قصدهم ولا شي و في بنات قصدهم و مبسوطين

مش اي شب بعملها....انا متأكده ان مش اي شب بعملها

 

Rain

نسوان!!!!!!!!!!!!!!!
ما بطيقها هالكلمه :$

هلأ انتي فرحتي مجموعه لا بأس بها من الشباب
ابتداء ب وحل مرورا بنادر و انتهائا بهيثم :$
الله يسامحك

Susu

غلطة البنت و استغلال الشب لهالغلطه باسلوب سيء جدا

 

ma ho el sra7a iza 7kait ra2ye ra7 aza33el shwaiet nas...w ada77ek el nas wala eny aza3elhom :)
5ls arguing is pointless sometimes,5soosy when you argue about something you consider badeehy
so koll wa7d 7orr b ra2io :)

 

Rain

Ana fahmeh wejhet nazarek .... 5alas 5aleha 2enno "elneswan" sabab kul bala zay ma beddek :P

 

يعني ما حتشاركنا بالحمله عالفيس بوك ضد اطلاق العيارات الناريه بالمناسبات

الا اذا نشرت الموضوع عالتويتر فبنسامحك :)

 

لا صدقي .. في هيك واكتر كمان .. اصلا في مجموعة كبيرة رح تلاقيها حاطة صورتها لأنها بدها مدح وهيك يعني
الله يحمينا ويبعدنا ويحمي الناس اللي بنحبهم من هيك قصص ونفسيات

 

Hana

للاسف معك حق....في بنات لسا عايشين بعقول الصف العاشر و المراهقه المتأخره و بس بهمهم الكلام و المديح وما عندهم مشكله بالمره

امين يا رب العالمين....نفسيات مريضه منتشره حوالينا ربنا يجيرنا منها