احلى عيد بحياتي :)

من اول العيد وانا مبسوطه ومش عارفه ليش, من زمان فقدت المعنى الحقيقي للعيد وصار العيد بالنسبه الي واجبات وزيارات و تضييف و التزام و مجاملات...

العيد هاد غير, انا عزيت الموضوع للطقس, الطقس بنقدر نحكي ربيعي اكتر منه خريفي, يعني الشمس طالعه و الدنيا بترشرش و نسمه هوا عليله معبيه الدنيا :)

لكن ولله الحمد في احداث كتيره صارت هالعيد خلته من احلى الاعياد اللي مرت علي من فتره, ومع ان مزاجي ما كان مزبوط عالاخر اله فتره, لكن اليوم كتير انعدل و لله الحمد :)

بتعرفو بخطبه صلاه العيد دائما وابدا بحكو عن صله الرحم و عن زياره الناس لبعضها وعن عقوبه قاطع الارحام .
خالي وخالتي الهم مقاطعين بعض 17 سنه!!! وطبعا على اشي مش محرز لدرجه ان ما حد متزكر شو السبب الاساسي لهالمقاطعه, خالي حج يمكن 5 مرات و رجل ملتزم دينيا و اجتماعيا وبكل شي , حتى انه هو اللي بصحي امام المسجد على بعض الصلوات لانه من اللي بروحو عالمسجد قبل النداء, وخالتي برضه حجه كبيره و ملتزمه , التنين من المثقفين والمتعلمين بالرغم من كبر عمرهم, المختصر انهم مش جاهلين و بعرفو معنى مقاطعتهم لبعض منيح و بعرفو عواقبها وخصوصا الدينيه.

كل اللي بالعيله حاول يصلح ولكن للاسف بدون فائده, و اكتر من مره توصل انه بدها تصير مقاطعات تانيه بالعيله من موضوع الاصلاح, و قبل 10 سنين تقريبا اقتنعت خالتي و راحت تصالح خالي و مع المعاتبات و تدخل شخص معين باضافه كم من كلمه خربت الموضوع وزادت الطين بله - الله يسامحه بس لو انه ما اتدخل - المهم امبارح كنا قاعدين بالبيت فجأه رن التلفون, انا رديت طلع ابن خالي ,حكى مع ماما و حكالها ان في ضيف عزيز جاي يزورنا و بابا بدو كل خواته يجتمعو عنده, كلنا بنفس الوقت حكينا اسم خالتي اللي مقاطعها, بحكيلنا اه هيها عنا و بابا بدو الكل يجتمع عنا, خالي ساكن قريب علينا و كانت عنا بنت خالتي وزوجها جايين يعيدو علينا فورا قمنا و بخمس دقايق كنا هناك, ياااااااااااااااااااااااااا الله شو انبسطت :)
والله في اشي بوجه خالي متغير, كأنه منور , ضحكه على وجهه اول مره بشوفها , الحمد لله يا رب والله كنت خايفه يصير لحد منهم اشي لا سمح الله وهمه مش متصالحين, الموضوع باختصار ان ابن خالي الله يجزيه كل الخير - اللي للاسف قبل بيوم كنا نحكي عليه وعلى تصرفاته اللي مش راكزه , يا رب سامحنا :$ - ابن خالي اله من اول رمضان شغال زن ونق على الطرفين و بقرب وجهات النظر ومش حاكي لحد بالعيله وهاد الصح , هو اللي جمعهم :)

يا رب اي تنين اخوان , خوات, صحاب اي تنين بالدنيا في بينهم مقاطعه او مشكله الله يصلح الامور بينهم و يهدي بالهم يا رب.

الاشي التاني اللي خلى العيد احلى , ان بالجمعه الكبيره واحنا عند خالي اجت وحده من بنات خالتي متحجبه :) يا الله شو انبسطت انصدمت لاني ما كنت احس ان الحجاب ببالها و فرحت من قلبي والله, وما شاء الله بجنن عليها الحجاب, وبسألها ان شو رأي زوجها بتحكيلي انه هو اللي شجعها, استغربت بصراحه لان زوجها ما بحسه ملتزم دينيا و خصوصا انه ما بصلي, وانا كتير كتير كتير بنقهر بس اشوف شب او بنت وخصوصا اللي اخلاقهم عاليه و بتحسهم نظاف من جوا وما يكونو ملتزمين بالصلاه, انا ما بحكم على حد بس بفكر وبحكي ان امر الصلاه واضح تماما بالقرأن فليش ما بلتزمو , وبعرف انه مش نوع من الكفر لانهم بكونو بعرفو ان الصلاه واجبه بس نوع من الكسل, المهم الخبر الثالث اللي خلاني ما امسك حالي و ابكي من الفرحه ان زوجها من اول رمضان وهو ملتزم بالصلاه :)

الله يتقبل منا جميعا و يهدينا جميعا لكل خير ربنا بحب انا نمشي فيه واليه, و يبعدنا عن اي شي بكرهنا نعمله او بكره يلاقينا فيه :)