Things I Like To Whisper About

Would You Hear Me Whispering

سلسله عرسان - الحلقه السادسه



فليحنا لليوم اجا عالشغل, عن طريق موظفه عنا صاحب زوجها بشتغل باداره حساسه بالاردن, بديش اجيب سيره حد انام ببيت خالتي, مش علشان جبن او اشي زي هيك لا سمح الله, بس انا متعوده انام بتختي :$

المهم اجت الموظفه واجا فليح معها, انا كان عمري وقتها 27 و هو عمره 39 و غير انه كبير شكله عمو و اقصر مني , يعني انا من الاشياء اللي ممكن ارفض الفليح علشانها غير الطول هو بس يكون عمو, بشكله و بطريقه لبسه و بطريقه تمشيطته, يعني حسيته زوج خالتي جاي يزورني :(

المهم انا بس شفته حكيت انسي يا بنت, خلص الموضوع منتهي, طبعا قعدنا و صاحبتي المسكينه اللي دايما بغلبها بقصصي هاي بتصير تعمل قهوه و تلطف الجو, بتعرفني دفشه بهيك مواقف.
بس لاني كنت مرتاحه انه لأ تصرفت بطبيعتي عالاخر, وما كنت مهتمه او متوتره او حامله هم بالمره.

اللي لفت نظرنا انا وصاحبتي ان عيله الفليح نفس عيله بنت عنا, فسألناه من باب فتح مواضيع جديده بدل ما نضل صافنين و تسود فتره الهدوء الممله بهيك مواقف, حكا انه ما بعرفها وممكن تشابه اسماء مش اكتر, حكينا, وسألني و سألته, طلع عنده بيت و ساكن فيه لحاله والبيت فوق بيت اهله, انا حكيت ممكن بحكم العمر بده استقلاليته ,وخلّصنا و تسهّل فليح.

طبعا وكالعاده اجت الموظفه, خير شو صار , شو رأيك, شو حكيتو, وهالقصص,حكيتلها بصراحه هو شب - لازم احكي شب شو اعمل - هو ما شاء الله عنه شكله محترم و مؤدب و...و... بس بصراحه تفكيري ما اجا عتفكيره - هاي كلمتي الدائمه اذا ما عجبني فليح منعا للاحراج- و بصراحه شكله ما في نصيب.

تاني يوم بتناديني البنت اللي عيلتها نفس عيلته, بتحكيلي انا بصراحه مش عارفه شو احكي, بس اخوي امبارح اجا شافك.....حكيتلها لحظه لحظه...اخوكي!!!! بتحكيلي اه بس هو انحرج يحكيلك انو اخوي, بحكيلها كيف انحرج ومن ايش ينحرج وبعدين انا سألته سؤال صريح و واضح انه شو بتقربيله حكالي ما بعرفها , هون انا انقهرت و صار الرفض عندي مضاعف, يعني من هلأ بلشنا بالكزب واللف والدوران , بتحكيلي البنت ما تاخدي الموضوع بحساسيه, يعني مش محرز الموضوع توقفي عنده , حكيتلها انا بصراحه بالنسبه الي كل شي ما بنحكى فيه الصح محرز وكتير كمان.

حكيتلها انه ما في نصيب, وصارت تترجاني, طيب بس اسبوع فكري, والله اخوي اكل راسي كل شوي بيتصل حكيتي معها...حكيتي معها, حكيتلها ليش اسبوع والجواب موجود, يعني هالمواضيع مش حلو المطمطه فيها, ما اقتنعت والله يخليكي اخوي صعب و بنق كتير, انا بعقلي صرت احمد ربي انها بتحكي صفات تانيه بالفليح ما حد بستحمل يتعايش معها, اذا اخته واللي متزوجه وعايشه بعيد عنه اكل راسها, انا بكره شو بده يعمل فيي؟؟ حكيتلها الله يخليكي خلص انت بدكيش تجاوبيه حره, بس جوابي عندك وعند الموظفه اللي دلته علي.


بعد كم يوم بنادوني موظفين بالمكتب اللي جنب مكتبي ان في تلفون الي عندهم, الو مين معي, طلع فليح :( بحكيلي اه شو قررتي؟ حكيتله انا جاوبت اختك, وانّي مش بمكتبي و ما بقدر احكي, وانا اسفه كتير ومضطره اني انهي المكالمه.
بعد ساعه تلفون مكتبي برن, الو مين فليح :"( بحكيلي بس حابب اعرف سبب الرفض, حكيتله الله خلقنا انفس و قلوب وافكار منها من أتلف ومنها من اختلف, واحنا للاسف مش جاي افكارنا على بعض, بحكيلي لا انا بحكيلك ليش!!! لانك حسيتيني كبير!!!
حكيتله ما بنكر هالشي بصراحه, يعني فرق العمر مش قليل, بحكيلي وانتي مفكره حالك صغيره, انا صرت اضحك ما بعرف ليش, حكيتله طيب شو بدك هلأ؟؟؟
بحكيلي ولا اشي بس بدي نضل اصدقاء, حكيتله طيب اهلا وسهلا فيك وفرصه سعيده, بحكيلي لأ بدي تاخدي تلفوني بركي احتجتي اشي مستقبلا - هون هو بده يزكرني بشغله الحساس- حكيتله طيب هات الرقم, نقلني اياه وانا طبعا ما كتبته, قام حكالي عيديلي اياه, سكتت انا, بحكيلي بدي انقلك اياه وهالمره اكتبيه, وباخر المكالمه بحكيلي يعني ما بتعرفي بركي احتجتيني بيوم بضلي متل اخوكي الصغير , ما صدقت اسكر الخط و حششت :)

انا مش من طبيعتي طوله البال بصراحه, وبكبس الواحد بسرعه على رأي اخوي, بس هاد بدي اخلص منه, لانه شكله ما بده يحل الابس يخلص كل اللي بده يحكيه, فانا اعطيته الفرصه و خلصت منه.

اشي اخير.... هلأ المعظم بس يقرأ سلسله العرسان بفكر ان ما بيجيني او بيجي للي كتبو عن الموضوع غير فليحين البلد بس , لا مش كلهم بكونو عاهات ومعقدين ومتخلفين, في هيك وفي هيك, وفي ناس فعلا ارواحنا ما بتنطبق على بعض مع انه بكون ممتاز بكل اشي, ان كان من ناحيتي او من ناحيته هو, يعني اكتر من شخص يجو اكتر من زياره ويكون الموضوع خلص راح يتم وباخر لحظه ربنا بكشف اشي , وهاد كله بالنسبه الي تقادير ربنا واستجابته لاستخارتي, و الموضوع اولا واخرا ان تم او لم يتم او تم وفشل باي مرحله كله تقادير رب العالمين.



ملاحظه: اي تشابه بالاسماء او بالاحداث فهو من محض الصدفه البحته, والاحداث جميعها من وحل الواقع

الحلقات السابقه


24 التعليقات :

"الأرواح جنود مجندة فما تعارف منها ائتلف و ما تناكر منها اختلف"

الله يعينكم يا البنات على قصة هالزيجة

 

والله يا همسه هاد لزقه :)
تعرفي مشكله انه لما بيشوفوا انه البنت بتطول عن الزواج شوي بيصير الشب اللي ييجي يمن عليها انه فكر فيها لانه شب والشب ما بعيبه عمر ولا اشي بيفكروا حالهم لساتهم على ايام سي السيد

 

طيب حكيتيله ما فيه نصيب ليش مصر يعرف السبب ... و يعطيكي الرقم و و تكتبيه ؟ جد مفكر انه اذا بنت ما بدها واحد يعني يكون خطيبها .. انه ممكن تحكي معه بعدين تلفون و تحكيله مثلا تعال عازمك على قهوة - طبعا مش قصدي انه انتي راح تعملي عيك ..

واخته ليش ما كانت واضحة من الأول؟ و ليش ما هيه اللي حكت معك و جابته .. أكيد بكون الوضع افضل و مريح أكثر للطرفين مع انه مش شرط تتغير النتيجة

و شو هالانسان اللي بموقع حساس و ما بحكي انها هاي أخته ؟ ممكن الواحد يكون مضطر يخبي اشي معين أو يكذب بشغله بسيطه .. بس انه يحكي عن أخته ما بعرفها هاي أكيد الشب - انتي هيك بتحكي عنه - عنده مشكله بكيف بشوف حاله و بشوف الناس

 

Ahmad

الله بعين, اكيد الشباب في عندهم قصص برضه, يعني الطرفين مش مريح الموضوع بالنسبه الهم.

سوزان

ما بعرف ليش الناس بفكرو البنت بس يجيها عريس بتمسكه بايديها و اسنانها ومستحيييييييل ترفضه, يعني مره اجا عريس عن طريق عمتي, لولا انها عرفت ان الشب بده يرجع واحنا حكيناله ما في نصيب بدهاش تصدق ان ممكن البنت بتحكي لعريس لأ :(
معك حق, لانه كتير شباب بعرفهم اعمارهم كبيره بالاربعينات و بدورو على عروس بالطعشات او باوائل العشرينات ازا بدهم يتنازلو, بنسو كيف ممكن الحياه تمشي بهيك فجوه بينهم بس المهم هو شب و حقّه

إمجد

حابب يعمل سسبنس الشب شكله :)
موضوع التلفونات هاد والصداقه والحكي الفاضي للاسف بمشي مع بنات, شو اصدقاء ما اصدقاء..كيف حالك انت!

لهلأ مش فاهمه هالحركه, ما الها معنى ولا سبب!!
انا مش مع انه الواحد يخبي اي شي او يكزب باي شي بهيك موضوع, علشان يكون الوضع واضح من اولها, وبأي موضوع كمان.

 

صباااح الورد :)
همسة بجد بجد ضحكت على أخوك الصغيير :)
أول مرة بعرف إلي أكبر منك ب 10 سنوات بكون أصغر منك ........... و إنه شو مفكرة حالك صغيرة ...لا تعال أضربني كفين ,,,, هاهاهاه

بتعرفي أنا قربت أنخنق من هيك مواضيع !!!

 

بصراحة انا ضد فكرت اضل اشوف بنات الناس كل ما انزل اجازة قبلها بفترة ببلغ اهلي يشوفولي عروس و بس اصل بسالهم و من قبل ما روح بكون عارف وين رايح فعشاين هيك بكون مختصر كتير روحات و بالنهاية بروح من غير ما شوف حد ممكن يكون مماطله مني ما بعرف بصراحة و طبعا ضل رغبات الاهل بدنا نفرح فيك و كبرت و خلص وقتها ما علينا - الغريب اكتشفت انو البنات بشوفو عرسان اكتر من الشباب جديدية هاي قال انا بحكى مو حلو الواحد يدخل بيوت كتيرة - بعدين يا عمو اذا بدك اتدوري ع حد كامل فالكمال لله طبعا حتكي لا ما بدوري ع كامل ( مين كامل هذا) بس ما في حد ما بكزب ما في حد ما عنده عادة سيئة بس تكون امور عنده كتير حلوة فالواحد بدور ع الحسنات عشان يعجبو الشي لكن اذا بدور ع السيئات ما راح يعجبو شي - على العموم ان شاء بيجيكي فليح فالح يكون و متل ما بدك و مبروك مقدام ( فال خير متل ما بحكو) (----)

 

رزان
يا صباح ومسا الفل :)
انا برضه ما بعرف ليش حششت عليها كمان, انو اي يلا عاد صغير مين والناس نايمين!!!
ان شاء الله عن قريب ربنا ببعتلك ابن الحلال اللي بستاهلك.

اهلا (---)

المفروض قبل ما تروح يكون عندكم معلومات كامله و اهم التفاصيل اللي بتهمك, بس موضوع ان الام تيجي بدون الشب انا مثلا ما بحبها :$
اذا بتماطل المفروض اذا ما تروح عند الناس ولا والدتك تروح الا بس تكون ناوي 100%

يا "عمو" انا متأكده ان ما في انسان خالي من العيوب, يعني انا من وجهه نظر الناس ممكن اكون مش كامله- وركزلي على كلمه ممكن :) - فكيف اطلب الكمال بناس تانيين, بس في اساسيات لازم تتواجد بالشخص وهاد اللي بطلبه مش اكتر.

 

بالله واحد متلي اجازتي ما باخدها كامله يا دوب اسبوعين كيف بالله بدي ادور و اروح شوف - في امور بنعملها مش بايدنا و غير هيك انت ما فهمتى شو بقصد انا قصدي اني حاب ارتبط لكن موضوع اللى مو سهل و ضغط الاهل - بعدين ليش اركز ع كلمة ممكن ما فهمت يعنى بالغلب انت كامله

 

اهااا هلأ فهمت...انا بس بديت اكتب هالسلسله اكتشفت ان الاهل مرات فعلا بضغطو عالشب بموضوع الزواج, هاد اشي جديد بالنسبه الي.
اكيد بس يكون في ظروف بكون في الها استثناءات.

و ركزلي هاي كانت محاوله تخفيف دم...بس واضح انها كانت محاوله فاشله :$

 

بالعكس دمك خفيف اصلا لو مو خفيف و كلامك حلو ما بتابع مدونتك

 

اذا مش فاشله طلعت D:
شكرا

 

الحكى اللى بطلع منك ما بطلع من فاشلين بطلع من فهمانين

 

ههههههههه

ذكرتيني بفليح اجى خطبني وبرضو كان من جهة أمنيه بس شو طوشني
شغلي شغلي شغلي وبالاخير طلع حابب عزوبيتو أكتر:)

وبالنسبه للي عمره 39 وبدو صغيره احب احكيلك انو بالعكس بيدوش البنت لما ما بدها -برضو صارت معي-ما تفكري هو كمان بيكون عارف حالو مو صغير

بس فليحك شكله موسوس ومفهمينه انو ما في منو-مقطوع شكله بالعربي-
لازم اكمل سلسلتي شكلو بس تا تخلص حالة الزهق!!!

 

شكلي عم بغازل صح (----)

 

(---)
شكرا كتير عالكلام اللي برفع المعنويات :)

مياسي

حبّته العافيه والله, وليش جاي؟؟؟ مكسور عليه حكي كاين :)
عنّا بالشغل في شباب ودارسين والمفروض فهمانين و معمّرين و بدهم بنات باول العشرينات للزواج, للاسف في ناس تفكيرهم هيك, انه حقّه اول فرحته على رأيهم

ان شاء الله عن قريب بتخلص,يلااا بسرعه ارجعي اشتقنا لمدوناتك الحلوه

صحيح ...بتعرفي اني بس امبارح شفت مدونتك عن طبريا o_O كيف ما انتبهتلها من قبل!!!

 

(---)
لااا مش غزل.. دعم معنوي :)
اخر الاسبوع و اليوم من امبارح مش راضي يخلص, فبدها دعم معنوي ليكمل الواحد هاليوم :)
شكرا

 

همسه

بدري:) صارلها شي أسبوع وعملت وحده جديده كمان:)

 

بتعرفي ..
موضوع إنه العريس يحكي لأمه إنه شوفيلي عروس و بس آجي أنا بروح معكم هاي برضو بتنرفزني ...
كمان في شغلة الناس ما بتتقبل إنه إزا البنت عمرها 24 أو 25 و ما فوق فلازم إنها تعد قبل ال10 قبل ما ترفض ..
ليه عشان ما يفوتهاش القطر (زي ما بقولوا إخوانا المصريين :))...... و زي إنه إحمدي ربك إلي بيجيكي ناس أعمارهم 27 و 29 ..لأني طبعاً أرفض فوق التلاتين .....
و إنه فش إشي مهم بحياة البنت إلا إزا تزوجت !!!!!!!!!!!! ....
حكيت كتييير صح ... بس هاي الأيام الموضوع هاد بالزات منرفزني .... !!!!!!!!!!!!!!!!!!!!!!!!!

 

ميسو
ما انا لما شفت البوست الجديد انتبهت :$
رزان

انا شخصيا ما بحبه برضه, بس اكتر من شب حكو ان اجازتهم قصيره ولازم تكون والدتهم حاطع عينها على كم من بنت ليشوفوها.

احكي وفشّي قلبك :)

 

الله يقطعلنا هالقصة والله ارتفع ضغطتنا يا صبايا !! وآخرتها !!!
بس هاد فليحك من الآخر شكلوا تحفة فنية و أخته اتحف منه !!!
ولكم انا جديد صرت 23 و ماما عقولتك "ماكله راسي" انو هيك هي الدنيا ولا شو ؟؟!! يووووووووووه

 

maroo
لااا ليش يقطعها :$
مره دعيت ربنا انه ما يجي عرسان عالبيت اذا ما في نصيب, شهر كامل ما حد اجا, اكتئبت :( حكيت لا يا رب يجو مش مشكله, تاني اسبوع اجا فليح جديد :)

23!! لسا بكيييييييير عالزّن....شو يحكو اهلي هههههههههه :$

 

خير ان شاء الله وين هالغيبة - عسى المانع خير ما تعودنا ع قطعات كبيرة (----)

 

(---)
الحمد لله ما في اشي شكرا عالسؤال, بتعرف موسم اعراس فاا ما شاء الله كل يوم عرس ,عقبالك :)

 

شكرا و عقبالك انت كمان