الحمد لله :)

كيفكم و شو اخباركم

اول شي بحب اشكركم كتير كتير على دعواتكم اللي الحمد لله و بفضل من الله جابت نتيجه :)

الموضوع وما فيه اني وصلت لمرحله فوق الاشباع من القرف من الشغل وجو الشغل, فقررت اقدم على اجازه بدون راتب لمده سنه , و خصوصا بعد ما صحللي اكتر من فرصه شغل بالامارات عند خواني, وصار لازم اروح هناك ليصير الموضوع رسمي, بأختصار بسيط اني قدمت اجازه ب 24\8 وللصدفة الغريبه صاحبتي قدمت برضه بنفس اليوم بدها تسافر على السعوديه فجأه وبدون ما تخبرني طلعت موقعه عقد وانا الشاطره كنت احكيلها كل خطوه بتصير معي...خلينا نمشيها شاطره علشان احفظ ماء وجهي , صاحبتي معها فيتامين واو اجازتها اللي انرفضت فجأه توافق عليها اما ان فراح ناس بعرفو موظفين مسؤولين بالوزاره يشوفو شو صار عليها فحكولهم انهم نسبو عليها موافقه و ضل كم توقيع بما انه في موظفه بدها تيجي بدالي.

الموظفه اجت و دربتها و فرجيتها كل الشغل عأساس خلص بديلتي, يوم ما توافق على اجازه صاحبتي ب 19\9 ضليت يومين مش عارفه انام بالليل و قررت ب 21\9 اروح عالوزاره اشوف شو صار بمعاملتي و اذ بملفي كلّه مختفي :) ولا بأي مكتب و اللي حكو انهم وقعوه من قبل حكو انه ما مرق عليهم و عالاجهزه مبين انه بس واصل ب 31\8 و ما حد ماخد عليه اجراء, و سكرتيرة الامين اللي حكت لصاحبتي انه موقع من الشؤون الاداريه و موجود على مكتب الامين و حاطط عليه ورقه مكتوب عليها للدراسه انكرت كل هالحكي و حكت ما مر عليها و مدير الشؤون الاداريه اللي كان موقع عليه حكالي ما مرق علي :( فجأه الدنيا صارت سوده مش عارفه شو اعمل - عفكرة هاد نفس يوم الجمعه مع الصبايا واللي رحت متأخره عليه لاني نمت نص ساعه قبل لاطلع لاني طول الليل مش نايمه ...وخده بالك حضرتك :) - المهم ما عرفت شو اعمل حاولت اشوف الوزير طلع مش موجود روحت و تاني يوم حكيت لمديري اني طالعه عالوزير واذا ما اخدت حقي بدي اروح عديوان المظالم, انا بدي حقي مش اكتر , وبالشغل صارو يكثفو الطلبات حتى انجز اكبر جزء قبل ما اروح لاني هددت بأني حستقيل بأخر 9 اذا ما صار اشي

المهم اتصلت فيي صاحبتي اللي بتشتغل بالوزاره و كل يوم بتعمل حملة تفتيشيه على ملفي بتحكيلي لقيته سبحان الله بالغرفه اللي فتشتها 50 مرّه عأساس فجأه بيّن و منسب عليه بالرفض من 6\9 :( انا كان فيي عقل و طار, حكيتلها بدي اروح اقابل الوزير حكتلي ان يومها المسا الوزير مسافر و بدو يغيب اسبوع, شو تعملي يا بنت..شو تعملي يا بنت هب شو خطرلي ....اروح عبيت الوزير :) وهاد اللي حصل, اتصلت باخوي وسألته تروح معي حكالي لتوصلي بكون لابس, سألت عن العنوان شخص المفروض بعزني كتير و حكولي انه بزور الوزير ببيته , اعطاني العنوان غلط طبعا , من هون لهون دبرت العنوان و رحت و دقيت الجرس :) حسيت حالي بفيلم " على باب الوزير" الله يسعدها بنته طلعت و اخدت الاستدعا و حكتلي بس يرجع بابا بعطيه اياها, روحت و بس وصلنا البيت حكت لاخوي اني مش مرتاحه وخايفه يطنشوها, رجعنا مره تانيه - الله يرضى عليه يا رب وين ما راح اللي فش قلبي و استحملني :) - وصلنا هناك لقينا ناس جايين بسيارة الوزاره حكولنا بدو 3 ساعات ليجي لانه بأجتماع, روحنا تغدينا و شربنا الشاي و طلعنا مره تانيه, لقينا 50 الف سيارة واقفه رنينا بسأل البنت معالي الوزير موجود حكتلي ما بعرف, سكتت بعدين سألتني انتي اللي جبتي الورقه قبل شوي, حكيتلها اه, 5 دقايق اجت بالاستدعا مكتوب عليه " الله معك...موافق" وموقع من الوزير :))))))

فاااااااااااااااااااااااا يا جماعه ابتداءا من 1\10\2010 انا مجازه :))) و قريبا جدا سأكون بالامارات ان شاء الله

شكرا الكم كلكم و الله يرضى على كل واحد و وحده ساعدوني بالموضوع, ساعدوتني لاخد ابسط شي بالحياه....حقي مش اكتر

عندي اجازات سنويه اخدتها و كل يوم مديري اللي تغير صوته 1500 درجه بترجاني اداوم بس يوم لاعلم الموظفات اللي الهم سنين بشتغلو معي ومش راضي يشغلهم و يعلمهم الشغل, قررت اروح بكره وبعده مش علشانه بس علشان رب العالمين حتى ما اكون ظالمه حد او مقصره بشغلي......بس سبحان مغير الاحوال

الحمد لله رب العالمين اللي ما النا غيرو واللي ما برضى بظلم عبده.....فهلأ بتقدرو تحكو" تقريبا" - لان فرووحه لسا هون - ان ويسبر از باك :)

** اكتشفت ان الكل صار كاتب اكتر من موضوع حتى اللي بغيبو 100 سنه بين كل بوست و بوست كاتبين اكتر من موضوع :$ بس على مين...كله ان شاء الله حينقرأ قريبا جدا

اترككم بخير يا رب :)

ادعولي

كيفكم وشو اخباركم, ان شاء الله تكونو كلكم بخير

كتير اشياء ببالي اكتب عنها, وخصوصي جمعه الصبايا المدونات اللي عملناها يوم الثلاثاء وكانت بتجنن - اشتقتلكم يا صبايا :) - بس ظروف الشغل هالايام مكئبتني تماما, الله يفرجها , ادعولي يا جماعه في اشياء بالشغل بتصير وكأني بشتغل بين عصابات مافيا مش دائرة حكوميه, ان شاء الله بس يوصل الموضوع لنتيجه بخبركم القصّه كلها, بس انتو لاتنسوني من الدعاء ان ربنّا يفرجهّا علي

اصعب شعور هو الشعور بالظلم و انك تحاول تدافع عن حقوقك وتدفع الظلم و لكن كل شي يكون ضدك لمجرد ان العالم اللي بتتعامل معها ما بتخاف ربنا ....حسبي الله ونعم الوكيل و املي بالله كبير انها تنفرج عن قريب

الموضوع عاملّي حاله شبه اكتئاب و ارق, شبه لاني بحاول اقاومه مع انّي ما بعرف انام منيح و بجبر حالي انام و بس اصحى عصلاة الفجر يصير فيي اشي بيغلى من جوا من كتر التفكير وما بقدر ارجع انام :(

هلأ انا بعرف ان بكره, او فعليا اليوم الخميس, و اخوي بدو يجي من السفر يعني فروحه بدها تيجي بعد كم ساعه :)فقررت احكي لا للأكتئاب و نعم للسعاده :) بدي اتوكل على الله بموضوع شغلي و انا متأكده انه ان شاء الله حينصفني و يسرلي اللي بدي اياه

وخصوصا ان نعم رب العالمين بدت اليوم الصبح بالمطر اللي صحينا على صوته, انا ما بحب الشتا بس مطر و جو دافي و رذاذ برشرش على وجوهنا غصب عنّا بدنا نبتسم :) , هو اي نعم الظهر قلبت الدنيا حمرا و بطلنا نعرف نتنفس من الغبره, و اي نعم فجأه حسيت حالي بالكويت و شايفه ال "طوز" اللي كانو يحكو عنّه بنات خالتي, و اي نعم هالجو بكئب اللي مش مكتئب بس انا قررت, لاااااااا للاكتئاب :)

بتمنالكم نهايه اسبوع بتجنن زيكم و تقضوها بكل شي مفيد و ممتع و مفرح الكم ان شاء الله

و برضه....لا تنسوني بالدعاء

ورحل...

بعينان واسعتان استقبل الحياه, بكى قليلا و لكنه بدأ يحملق فيما حوله, كان اول طفل يراه الاطباء و الممرضين يفتح عيناه من الثانيه الاولى حتى انه قد عانا من التهاب شديد بسبب دخول الماء من بطن امه الى عينيه

كان فضوليا بشكل مرح , لم يمل ابواه من اسألته منذ بدأ بتكوين الجمل, ما هذا؟؟ كيف؟؟ لماذا؟؟ لماذا؟؟ لماذا؟؟

ولكنه لم يكن من النوع اللحوح الذي تتمنى ان يختفي من امامك كيف تمنى لتلك العينان الواسعتان ان تختفي من امامك!!

كانت اسألته تدل على فطنه وذكاء, وكان يستوعب كل ما يقال له و يعيده وكأنه يحفره في سجل خاص في عقله الصغير تحت ذلك الرأس ذو الشعر الغزير

دخل المدرسه و احبها و كان يكره ايام العطل, حتى انه كان يوقظ اباه وهو في كامل اناقته بزيه المدرسي حتى يوصله الى المدرسه ليكتشف انه يوم الجمعه فيعود بكل حزن الى غرفته ليبدل ثيابه و يبدأ بقراءه قصصه التي يعشقها

حتى جاء ذلك اليوم المشؤوم, كان يقطع الشارع ليدخل بوابه المدرسه و اذ بشاب طائش يسابق نفسه - حيث لايوجد احد غيره في الشارع - يقذف بذلك الجسد الصغير امتارا في السماء ليسقط على الارض و يغمض عيناه لتفتح عيون الحاضرين واسعه بدلا منه.

لم يصدق والداه الطبيب عندما قال لهم بان فلذه كبدهم قد دخل في غيبوبه غير معلومة النهايه, ولم يصدقا عيناهما عندما وقعت ابصارهم عليه, تلك العيون الواسعه قد اقفلتا من شدّه الانتفاخ, ذلك الشعر الغزير قد قصّ ليتم تقطيب الجروح تحته, ذلك الجسد المفعم بالنشاط ممدد امامهم بلا حراك

استيقظت تلك العينان بعد عدّة اسابيع ولكن بخمول غريب على من عرفهما, ولم يستيقظ غيرهما من ذلك الجسد, اصيب دماغه بتلف و جسده بشلل ولا رجاء لشفاءه, اخذه ابواه الى المنزل و وضعاه في سريره , غرفته باتت غرفة اشباح فلا صوت ولا حركه, ادويه و انبوبة اوكسجين و كرسي متحرك قد حلّو مكان الالعاب والقصص المتراميه هنا وهناك.

لم يعد يوقظ ابواه اللذان جافاهما النوم , ولم يعد يسأل, حتى عيناه الوحيدتان اللتان رجعتا...اُغلقتا والى الابد بعد عام من ذلك اليوم المشؤوم

كل ذلك...حتى يسابق اعمى البصر و البصيره نفسه في ذلك اليوم

Reading Tag :)

انا اعشق التاج - بعرف هاي المرّه المليون اللي بخبركم فيها - بس هالمره التاج دسم كان من اختي و حبيبتي مياسي, تاغ ثقافي بحت

خلينا نبدا

من أرسل الدعوة؟

مياسي

ما هي كتب الطفولة التي بقيت عالقة في ذاكرتك؟

المكتبة الخضراء, مجله لولو الصغيرة, مجلة ماجد،مجلة باسم, و قرأت اللص و الكلاب وانا في الصف الخامس الابتدائي لنجيب محفوظ وبقيت في ذاكرتي الى اليوم.

من أهم الكتاب الذين قرأت لهم؟

غسان كنفاني، نجيب محفوظ، تشارلز ديكنز، فيكتور هوجو، ابراهيم نصر الله, جابرييل جارسيا

من هو الكاتب الذي قررت أن لا تقرأ له مجددا؟

جمال ناجي....بحياتي ما لم اتوقع ان اترك قراءة كتاب بسبب شدّة القرف

اغاثا كريستي....لا تستهويني تلك القصص البوليسيه, انا افلام ما بحضرها فكيف اقرأها :$

من هو الكاتب الذي لم تقرأ له أبدا وتتمنى قراءة كتبه؟

الكثير من الكتّاب لم اقرأ لهم بعد

ما هي قائمة كتبك المفضلة؟

اللص و الكلاب - نجيب محفوظ

شرفة العار - ابراهيم نصر الله

الحب في زمن الكوليرا - جابرييل جارسيا

رجال تحت الشمس,عائد إلى حيفا,ام سعد,العاشق ؛ برقوق نيسان , الاعمى والاطرش - غسان كنفاني

قصة مدينتين, ديفيد كوبرفيلد , اوليفر تويست - تشارلز ديكنز

Pride and prejudice - Jane Austen

اي شيء للرائع غسان كنفاني يستهويني

و اي شي للكاتب تشارلز ديكنز لا استطيع التوقف عن قراءته

الكتب التي تقرؤها حاليا؟

رياض الصالحين للامام النووي, سنين وانا اريد قراءته ولكن لا ادري لما لم اقراءه حتى الان, الحمد لله بدأت فعلا بقراءته منذ ايام

عزازيل للكاتب يوسف زيدان....سمعت عنه الكثير اتمنى بأن يكون بقدر الوصف, بدأت في قراءته منذ اشهر ثم اشتريت شرفة العار لابراهيم نصر الله و لم اقاوم عدم قراءته, فتوقفت عن قراءة عزازيل انذاك

في صحراء قاحلة أي الكتب تحمل معك؟

سوف اقتبس رد مياسي "القرآن الكريم لأني ما زلت أكتشف في هذه الكتاب أشياء جديدة في كل مرة" غير انه الوحيد الذي سيؤنس وحدتي

إرسال الدعوة إلى أربع مدونين:

أشرف محيي الدين

نيسانة المدونين

'Wafa

ثائر جبر

واللي بحب يعرّفنا اكتر على الكتب اللي بقرأها يخبرنا برضه :)

هو انا مقلتلكوش!!!

متزكرين مرّه بالتعليقات حكيت ان سبب غيابي كان انه عندي امتحان تحليل نظم و كنت بدرس فيه

قررو انهم يعطو علاوة للمبرمج و علاوة لمحلل النظم للدارسين كمبيوتر بالوزرارت الحكوميه, علاوة المبرمج اخدتها بحكم سنوات الخبرة مش بحكم شغلي مع اني بشتغل مبرمجه , و محلل النظم كان لازم يكون الي خبره 7 سنوات, انا كان الي خبرة سبع سنوات الا شهرين و اكتشفت انهم اللي كان الهم اكثر من 6 سنوات قدمو اعتراض و اعطوهم , لكن مديري العزيز ما بلغّني....الله يسهّل عليه شو بدي احكي, المهم فالمفروض اقدم امتحان لاخذها, 30 نيرة زياده عالراتب :)

الامتحان شبه تعجيزي خصوصا انهم ما بدهم ايانا ناخد الفلوس, مادة الامتحان هي مادة تحليل نظم و هندسة برمجيات اللي بتدرسو السنه بالجامعات وانا الي 1000 سنة متخرجه, المهم انا قدمت الامتحان مرتين و للاسف ما زبط الوضع خصوصا اني كنت اخد من النت الماده, هالمره جبت كتب وهات يا نحت و يوم الاربعاء قبل العيد اتصلو فيي من شؤون الموظفين من الوزارة و حكولي اني نجحت :)))

يعني اخدت علاوة محلل نظم و صار من ضمن مسماي الوظيفي اني محللة نظم

طبعا مجال شغلي و من يوم تعييني قبل 10 سنوات تقريبا, هو تحليل نظم و برمجه و صرت محلله اكثر من 10 نظم و مبرمجيتهم عالاوراكل, و لمّا اجا الموضوع عالعلاوه حكو لاااااا لازم تقدمو امتحانات

الحمد لله انا الوحيده اللي نجحت من 15 موظف \موظفه من وزارتي , ما بعرف بالنسبة للوزرارات التانيه كم العدد, و من ثالث وحده بتنجح من الوزارة خلال 3 سنوات من يوم ما بدو موضوع الامتحان

ياااااااااااااااااي....زيادتي السنويه بطلت 3 دنانير....صارت....صارت.....6 دنانييييييييييييييييييييييير يااااااااااااااااااااهووووووو

اللي فرّحني بصراحه, اني كنت مفكرة حالي خلص مخي سكّر وما في مجال لاستيعاب اشي جديد, و بديت الغي قكرة دراسة الماستر لهاد السبب, بس هلأ بما انو لسا فيي امل ان شاء الله الخطه الخمسينيه القادمه هي دراسة الماستر :)

تحت خصلات شعرها....

"فتاة في قمّه الاخلاق لا تحاول معها, حالة ميؤوس منها" , هذا اول ما يقال عند وصفها بين زملاءها بالجامعه عندما يلتفت احد الشبّان الى جمالها الخارق, حاول الجميع ان يتعرف عليها و لكنها صدتهم جميعا و بكل هدوء.

لملمت كتبها و همّت بالخروج من قاعه الصف, احسّت بنظراته و بخطواته السريعه نحوها, خرجت مسرعه بين زحام الطلاب و الطالبات و تاهت بينهم.

ترى ما الذي يريده مني ذلك الشاب؟؟ عادة ما يكتفي الشاب بأهمالي له و لمحاولاته من ثالث يوم" تسائلت بينها وبين نفسها وهي تجلس مع صديقاتها في مقعدهم المقدّس, هكذا يطلقون على ذلك المقعد المتكسر الاطراف, والذي تظهر مساميره وكأنها ابت ان تستلم له و تغوص في داخله, ها قد مر سنتان منذ اجتمعو اول مرّه عليه, كان ملقى هناك لا احد يجلس عليه, وكان باقي الطلاب يفضلون الجلوس على الارض بدلا من الجلوس عليه, "ها هو هناك...اتراه يبحث عني؟؟" حاولت ان تحني راسها للامام و تغطي وجهها بخصلات شعرها لعلّه لا يراها, و هذا ما حصل وهذا ما كان يحصل على مدى الشهر الماضي.

بنفس الشغف ظل يراقبها و بنفس الفضول بقيت تختبئ خلف خصلات شعرها و زميلاتها, و في يوم من الايام اختفى, و بقي على هذا الحال اسبوع, لم يظهر و لم يحضر اي محاضره, لم تلمحه بين اصحابه و لا بأي مكان كان يتواجد به, فتشت عنه عيونها من تحت خصلات شعرها.

و فجأه ظهر, انتظرت ان يبحث عنها, ان يحاول ان يتعقبها بنظراته, لكن دون جدوى, يا الهي اتراني اصبحت خفيّة وراء خصلات شعري تلك, تبا لك من خصلات, رفعت رأسها بعنف و هزته لرفع الخصلات التي على وجهها علّه يراها....لكن دون جدوى

انهت يومها و عادت الى المنزل و في رأسها الاف الاسئله و الاجابات, ما الذي حصل؟؟؟ هل معقول انه نسيني في اسبوع, ام هل معقول انه تعب من جفائها فذهب الى غيرها, لا ...لا غدا ستحاول مرّة اخرى ان تنظر اليه و تظهر امامه دون خصلات شعرها تلك, اه كم اكرهك يا شعري

و فعلا في اليوم التالي و لحظه دخولها البوابة الرئيسية للجامعه بحثت عنه حيث اعتاد ان يقف مع زملائه, "ها هو" تلاقت عيناهما لثواني و اكمل حديثه مع صديقه وكأنه لم يراها, بدأت بالسير بأتجاههم و مرّت امامه مباشره, لم يحصل شيء, انزعجت و بدأ الم غريب في داخلها لم تشعر به من قبل " ما هذا!!!...لماذا اشعر بالانزعاج!! سوف انسى الموضوع وكأنه لم يحصل" و دخلت الى القاعه و جاء المحاضر و بدأ بشرح الماده, ما هي الا لحظات واذ بصديقتها تهز لها كتفها تخبرها بأنتهاء المحاضره.."يا الهي..ايعقل ان مرّت الساعه بهذه السرعه, حتى انني لم اكتب كلمه, حتى انني لم اسمع شيء لاكتبه"

سيطر التفكير بذلك الشاب على جميع افكارها " سأحاول لاخر مرّه" هذه المرّه تعمدت ان تتحدث بصوت مسموع مع صديقاتها لعلّه ينتبه, لم يلتفت,و تكررت المحاولات اخذت تضحك و تتكلم بصوت عالي , و استمرت بذلك لعلّه ينظر, ولكن لا حياة لمن تنادي, وفي يوم قررت ان تبدأ هي بالحديث معه , ذهبت اليه و بحجّة أنها تريد ان تستعير منه الملحق الذي وزّعه المحاضر في محاضرة اليوم لتصويره, تصرف بلا مبالاه تامه و اعتذر بأنه اعاره الى زميل له و ودعّها و مشا بعيدا

اشتعلت النار داخلها, "اتراه يظنني قبيحه؟؟ لا وكيف ذلك وهو الذي استمر بملاحقتي لاسابيع!!!" و ظلت تفكر و تفكر حتى توصلت الى نتيجه وهي ان تذهب و تصارحه و تسأله عن سبب تغيّره, ذهبت اليه وهو يقف بين زملائه وطلبت ان تتكلم معه منفردا, نظر نظرة الى اصدقائه و حاول ان يخفي ابتسامه لم تفهم معناها الّا لاحقا

سألته عن سبب ملاحقته لها , انكر , فحاولت ان تذكره بسرد المواقف التي حصلت, وهو يقف امامها و رويدا رويدا تظهر ابتسامه على وجهه ثم التفت الى اصدقائه و رفع اليهم بأبهامه وصرخ " قلت لكم لا يوجد في قاموسي كلمة "يأس"" و اخذ زملائه يضحكون بأعلى اصواتهم و يطلقون القاب " أسد"..."زلمة"...."استاذ"..."كينج"...

الان فقط فهمت ما الذي يحصل, دارت بها الدنيا لم تعد ترى امامها, حاولت ان تتماسك حتى تصل الى دورة المياه الخاصه بالطالبات, فتحت اول باب و دخلت, انهارت ...بكت...احسّت بأنها تختنق...مضى على وجودها بالداخل ساعتان و هي تحاول ان تلملم ما بقي لديها من قوّة لتبلغ بها البيت, نظرت الى نفسها بالمرآة, غسلت وجهها,محاولة اخفاء اثار الجروح بداخلها... ارخت خصلات شعرها.... و خرجت....

بس بالافلام...

ليش دايما بالافلام و المسلسلات البنت بس تدايق من شي و تزعل, بتدخل غرفتها و بتسكر الباب و بتتركى عالباب و بعدين ايهيء ايهيء و بترمي حالها عالتخت !!!

يعني انا البنت الوحيده وانو يعني عايشة الدور بموضوع الدلال عالاخر, و الي غرفتي الخاصه و عمري بحياتي ما عملت عالمنظر, ارمي حالي عالتخت !!! ليش خير؟؟؟؟ جد لو بعملها كان كرهت حالي

اشي تاني, غرفتي عفكره مش معبيّه دباديب ولا مخده عشكل قلب O_o اي نعم بحبهم و عندي زاويه بالغرفه حاطه فيها دبدوب كبير جبلي اياها اخوي على عيد ميلادي وانا بالاول اعدادي و عندي كمان سلحفاة بتجنن هدية من مرة اخوي محطوطه عالتسريحه, بس ما في غيرهم, ابدا ابدا ما في عالتخت شي و لا عمري حطيت شي, عندي لعب السيندي و الباربي بس محطوطين بكرتونه بالمخزن مش مرميين على كل زاويه من زوايا الغرفه, ونفس الشي سياراتنا, فيها معطّر فيها لمسه بنّاتيه اه بس برضه ما فيها 100 دبدوب

وليش غرفة بنت اذا لازم تكون كل الحيطان صوري و صور الفنانين وصور اطافيل؟؟ عندي بالغرفه صورة عائليه ببرواز صغير عالتسريحه ما في غيرها, بحب صور الصغار بس اكتر من سكرين سيفر للكمبيوتر و الموبايل ما في مكان الهم

غرفنا و سياراتنا حلوة و مرتبه و كل شي بمكانه و انيقه و مزينه "بالعقل"....

لكن هالاشياء اللي بجيبوها بالافلام.....كلها حكي افلام مش اكتر :)

و اذا في حد من البناويت بعمل هيك او بتعرفو حد بعمل هيك احكولي...ليكون انا الغير عن العالم :$

لا أوحش الله منك يا رمضان

راح اشتاق للصيام و للقيام

راح اشتاق لصلاة التراويح

راح اشتاق لصلاة القيام و التهجد

راح اشتاق للمسجد

راح اشتاق لصوت الامام

راح اشتاق لخفّه دم و هدوء الشيخ

راح اشتاق لخالتو الحجه العراقيه اللي كتير صدف اني اوقف جنبها بالصلاه و بين كل ركعتين تحط الها و للي حواليها هاي جين

راح اشتاق لزوجة الامام وبناته السوريين اللي قضينا شهر بجنن مع بعض

راح اشتاق لخالتو الحجّه اللي كل ما تشوفني لازم تبوسني و تضمني و تدعيلي و دعوتها الدائمه...الله يبيض بختكم يالبنات :)

راح اشتاق للابتسامات اللي كانت موجوده على وجوه " بعض" المصليات و حتى اللي كانو بس يجحرو مش عارفه ليش برضه حاشتاقلهم

راح اشتاق لأحلى شعور نعس بالحياه :)

راح اشتاق لتحضير الفطور و لقعدتنا كلنا مع بعض بنفس الوقت

راح اشتاق لريحة رمضان

راح اشتاق لنسمات الصبح و احنا مروحين من صلاة الفجر

راح اشتاق للروحة للمسجد اللي حتقتصر على صلاة الجمعه

و مع هيك بكرة اخر يوم رمضان ....في تراويح اليوم....وفي تهجد ان شاء الله ...فلا تنسونا من الدعاء :)

ولا تنسو الستّه البيض :)

انا و صاحباتي كل سنة بعد الدوام بأسبع بنبدا صيام كلنا مع بعض فبنضل بنفس الجو

اللهم بلغنا رمضان القادم....لا أوحش الله منك يا رمضان :(

الجمعه العيد.... كل عام وانتو بالف خير, والله يعيده علينا و عليكم بالخير

كل معمولة او حبّه شوكلت او فنجان قهوه كولو و اشربو حبّه عني :)

و توصو بالقهوه لو سمحتو :)

و الشوكلت لا تاكلوها...خبولي اياها, الي 14 سنه تقريبا كل سنه انا بجمع الشوكلت اللي باخدها بالعيد و بلفها بلفّه حلوه و بنت خالي اللي بعمري تقريبا برضه بتجمعلي اللي بتاخده و بتلفه بلفه حلوه و بنتبادله بالعيد :) فاااااااا السنة بدي اجمعلها من كل مكان

القلوب

كلنا بننولد بقلوب بيضاء صافيه قلبا وقالبا, و منختلف بمدّة احتفاظنا بهالقلب الابيض, او قدرتنا على ارجاعه ابيض مرّة تانيه, مع مرور السنين و مرور الاشخاص بحياتنا, مع تجاربنا و مأاسينا و افرحانا و احزانّا و اخطائنا ببدا هالقلب يتلون, ببدا الموضوع بنترات سوداء مع جروح بسيطه مثل شكّة الدبوس, بتوجعنا بوقتها و ممكن تنزف بسيط وممكن لأ ولكنها اكيد بتشكّل نقطه ضعف في المنطقه لكن بضل القلب محافظ على صفاته من النقاء و البياض يطغى عليه.

بتمشي السنين و بدخل بحياتنا ناس, بارادتنا او بأرادة الظروف, و بتبدا هالنترات تصير بقع و تنتشر بأكتر من منطقة, اذا كنّا من سعيدي الحظ بيدخل بحياتنا الاشخاص الصح, ناس اثرو ايجابا على طريقه تفكيرنا و حياتنا و بفترة معرفتهم بتطيب الجروح و بترجع تصير بيضا مع الوقت

المشكله بس نضل نتعامل مع الناس الخطأ و تصير البقع الصغيره تتلاقى لتشكل بقع اكبر, و نوصل لمرحلة يصير قلبنا مدمي و نصير كل ليله نطوله و نمسحه و نظفه و نلفه و نخبية بعلبه بعيده عنّا و عن الناس, لابدنا احنا نستخدمه لانّا جربنا حالنا و لقينا انّا بنضرّه اكتر ما نفيده, ولا بدنا حد تاني يأثر عليه بحكم انّا ما عم نتعامل الا مع الناس الاسؤ.

بعدين بيجي ناس جديده بوهمونا بأنهم غير, مرات بنساعدهم بأنهم يوهمونا و مرات النترات البيضا البقيانه بقلوبنا بتقنعنا انهم غير, بنطول هالعلبه وبنعطيهم اياها و بنوصيهم انهم يديرو بالهم عليه و ينظفوه و يداووه و يخبوه بالعلبه, مع الوقت بنكتشف انّا غلطنا بحكمنا, بنطلب قلوبنا وبرجعو القلب و هو بنزف و بعتذرو انهم بغمرة الحياة نسيوه برّه العلبه و انهم مرّه وقعوه و نسيو يلفوه, برجع اسؤ من قبل, بنرجع بنلفه و بنلعن اليوم اللي خلينا شوية هالابيض تقنهعنا ان لسا في ناس كويسين, وهيك لننسى بيوم ان في النا قلب كان ابيض و كان يتحرك وكان نقي...

مش معقووووووووول...

بتتزكرو هاد الكاريكاتير لابو محجوب

جد تحشيش صح

هي كل كاريكاتيراته بجننو و عالوجع بكونو

بس اللي صدمنا اليوم

ان اجا لأخوي هدية من امريكا

ما رضي يحكيلنا من مين

علشان ما يخرّب سمعة اللي جبله اياها

و الهديه مش نوع من المزحات

الهدّيه...هدّية جد يعني

واللي طلعت

جرافة " شبه" جينز

و

عليها

.

.

.

عليها

.

.

.

أرانب مش بس ارنب :)))

اول ما شفتها تزكرت الكاريكاتير

شكرا اله للي جابها و شكرا انه تزكر اخوي

و انا بعرف ان اذواق الناس مختلفة

الموضوع مش مسخره على الهديه

بس عمري ما توقعت اشوف كرافه " جرافه" و عليها ارنب :)

فاااااااا

اللي نفسه فيها يحكيلي

لكن بسرعه الله يخليكم قبل ما نتصرف فيها :)

International

قبل كم يوم كنّا معزومين عالفطور عند قرايبنا و كالعاده واحنا مروحين بالليل انا و اخوي بنعمل Round - على رأيه - بنعملها انا واياه من فترة لفترة هيك لتغيير الجو والنفسيه, هو بسوق و بستلم ال DJ :) ,و انا بفتح الشباك و بخلي الهوا ينعشني, بنشتري اشي نشربه و بالعاده بنشتري Orio blazered او Orio pleasure - مش متزكره اعتقد هيك اسمو المهم انو شراب سخن زاكي فيه اوريو بدخل المحل و بحكيلهم بدي من هداك :) - من عند Crema Cream و بنلفلف بكل مكان, من الصويفيه لعبدون للرابيه, ساعه لفلفه و بنحكي فيها بأي شي, عني او عن شغلي قصصي , او عنه و عن شغله وقصصه, هالمره الحكي كان عن موضوع العنصريه, وانا صغيره و عقلي ما شاء الله عليه مش صغير الا شوي ,كنت كل يوم و التاني اتقاتل انا وبنت على اردني و فلسطيني :) اه بحكيلكم كان عقلي ما شاء الله علي اشي احسد عليه, و بعد ما كبرت حاولت الاقي سبب لكل هالطوش ما لقيت

قبل فتره اجتمعت مع صاحباتي حكولي نفس الشي عن بناتهم, صاحبة سلطيه و صاحبة خليليه, بعد التدقيق و التمحيص اكتشفنا ان المدرسة هي اللي بتزرع مثل هيك افكار بعقول الصغار و خصوصا انه لا كان ببيتنا و لا حاليا ببيوت صاحباتي اي نوع من هالعنصرية او الحكي عنها, من الحكي انه كان في يوم تخريج الروضه بالمدرسة و صارو المعلمات يتقاتلو على ان عدد الفقرات اللي فيها اغاني وطنيه فلسطينيه اكبر من عدد الفقرات اللي فيها اغاني وطنيه اردنيه و هالحكي قدام الطالبات اللي تلقائي تشكل عندهم افكار غريبه, يعني لو هالمعلمتين تناقشولهم بغرفة المعلمين - بغض النظر عن موضوع النقاش اللي ما بدي احكي فيه - كان ما كونو نواة لافكار قادمه في عقول هالبنات

و هالموضوع نقلنا انا و اخوي لنوع العنصرية الموجوده عنّا - مهو لازم يكون في عنّا عنصريه ولو - فأكتشفنا انّا ما شاء الله موحدين الامّه بعيلتنا :)

انا بابا من يافا و ماميتي من نابلس, يعني خبُز و جُبنه - بضم الحروف- و اخوي الوحيد اللي بحكي يافاوي بالبيت, و كل ما ماما تعلّق على كلامه بحكيلها " ماما بعد الهُسُهسه ما في كلام يتعلق عليه :) " المهم

اخوي الكبير متزوج بلغاريه, يعني عبود مميتو بلغاريه, اخوي التاني متزوج أربداويه , يعني فروحه ماميتها أربداويه :)

عمتي متزوجه رمثاوي , عمي متزوج اندونيسية و بنته - بنت عمي - متزوجه الماني,خالي متزوج مصريه وخالي التاني متزوج مغربيه, بنت خالي متزوجه ليبي , و اختها متزوجه اريتيري و اختهم متزوجه امريكي, اخوهم متزوج أربداويه, و اخوهم التاني فلبينيه و اخوهم الثالث متزوج امريكيه :)

يا سلاااااااااام....جد موحدين الامم بعيلتنا طلعنا :)

فأنا مضطرة ان عنصريتي تكون انترناشونال لظروف عائلتنا الكريمه :)