Things I Like To Whisper About

Would You Hear Me Whispering

ممّيتو عندها امتحان




ماما السنة ان شاء الله بتصير 60 سنة , العمر كله يا رب , و الها فترة حابة تتعلم تشتغل عالكمبيوتر, وخصوصا عالنت, مع انو خواني الهم سنين متغربين, لكن مع الاحفاد الموضوع صار جدا طارئ, بدها ايميل علشان اول ما يوصلو صور و فيديوهات الاحفاد تشوفهم وما تستناني لمّا ارجع من الشغل, و بدها بأي وقت تشبك على Skype علشان تحكي معهم و تشوفهم و برضه ما تعتمد على وجودي او وجود اخوي.

انا بيني و بين التدريس عداء كبير, جربت التدريس و لقيتو مش مجالي اطلاقا مطلقا, وماما والحمد لله عارفه هالشي عني, فجأة اجت تحكيلنا انها سجلت بدورة لتعليم مهارات الحاسوب, هي شبه ICDL للمبتدئين, و يا حرام هي بدت الدورة من هون و كل اجهزة البيت ضربت, الاوفس على جهازها هي وبابا اللي بلعبو عليه freecell ضرب , و الشاشة بالجهاز التاني ضرب, و اللاب توب كان فيه مشكله, وحتى بعد ما تصلح, بما انه مش زي الكمبيوتر اللي بتتدرب عليه بالدورة فمش مقتنعه تتدرب عليه.

امبارح سمعت ماما بتحكي لاخوي عندي واجب ولازم احلّه وبدي تساعدني, وفعلا قعد اخوي و بدا يدرسها, وانا كان عندي مشوار, رحت عالمشوار رجعت لقيت ماما بتشتغل عالكمبيوتر, لابسة النظارات و مدققه و بتتطلع عالكتاب و عالشاشة و معجوئه عالاخر, واخوي نايم عتختي جنبها, سألتها "شو خلصتي دراسة " وانا محششه ضحك, لانه هاد كان سؤالها كل ما شافت حد فينا طالع من الغرفة بالامتحانات, بتحكيلي لأ و ما حليت الواجب , ما قدرت اقاوم عبطتها و بستها و قعدت جنبها, درّستها و حلينا الواجب مع بعض.

الفاظ جديده بسمعها من ماما "يييي علينا ما ظللتها" "مش فاهمه" " وين اروح" او كلمة" نسيت" مع ضحكه خجل لمّا اسألها عن شي تعلمناه قبل دقيقتين, الله يخليلي اياه يا رب وما يحرمني منها ولا يحرم حد من امه وابوه, صحي اخوي بسأله شو صار بحكيلي , انا مش اني ما بحب التدريس , بس طلعت من اللي بصيبهم حالات اغماء بس يدرسو العالم :) بحكيلي حسيت انا اللي بدرس و نزل علي النعس العجيب و سطلت و نمت.

اليوم اتصلت في مميتو وانا بالشغل علشان اشوف شو عملت بالواجب, حبيبتي مبسوطه و بتحكيلي اللي بتدربنا سألتني سؤال وفورا عرفت الجواب و حكتلي " والله انك عسل يا خالتو", وسألتها في حد درسك حكتلها اه بنتي, حكتلها سلام خاص لبنتك


و انا بكتب هالبوست ماما قاعده بتعمل Presentation عال PowerPoint و طبعا مليان صور لاحلى الاحفاد :)

الله يخليلنا اياهم فوق روسنا يا رب



تحديثات

البوست هاد مجهزته من الخميس بس ما صار مجال انشره..

صورة النرجس لاني كتييير بحب النرجس و ريحته ولان ماما بتحبة و انا بحبه لانه بزكرني بماما, وهالحكي من قبل ما احضر ساندي بل عفكرة :)

كل عام وانتم الى الله اقرب بمناسبة يوم المولد النبوي

الدنيا برّه شتا و رعد و برق ...الحمد لله عالمطر

اليوم كتب كتاب وحده بحبها كتير كتير و هالمدونة هي اللي عرفتني عليها....الف مبروك يا قمر و عقبال الفرحة الكبيرة :)

33 التعليقات :

الله يخليلك اياها يا رب وما يحرمكم من بعض
ومبروك لصاحبتك كمان

 

الله يخلي أمهاتنا جميعا النا !
و انا بشوفو اشي كتير حلو انو الكبار في العمر "يواكبوا" التطور خصوصي لهيك ظروف
....
شولقصة كتير ناس هالاسبوعين هدول يا جاهة يا كتب كتاب !
والله شكلو الأهالي "خللوها" هالايام بعد ما سمعوا الاغنية!

 

ذكرتني بأمي الله يرحمها ،كانت تروح على مدرسية محو الأمية ،المدرس يقول كل يوم دخل حسن ،دخل حسن ،وهما مش مستوعبين ،قالت له أمي طيب دخل حسن يعني ما بده يطلع ،الله يخليلك أمك ديري بالك على كل لحضة ترى ما بيتعوض

 

الله يوفق الماما

 

ماشاءالله والدتك فعلا بتستحق كل التقدير والحب على اللي بتبذله بتعلم الكمبيوتر عشان تشوف اولادها واحفادها. الله يحفظها ويعطيها الصحه.ـ

 

this post is toooo cute, enshallh emmik gets an A bel exam ;-)

and I have a bouquest of yellow narjis looking at me in one of my vases it's true they smell very nice

 

الله يخليلك امك يا رب
الجو برا كتير حلو وبنفع للكزدرة هههههههه
اذا بدك ايا مساعدة بصيانة الاجهزة او شي انا موجودة وحاضرة P:
وكل عام وانتي بخير بمناسبة ذكرى المولد النبوي الشريف ينعاد علينا وعليكو
تحياتي..

 

مساء الخير ويسبر

بصراحة لا أعرف من أين أبدأ، فأنا معجب كثيرا بتلك الأم التي تتحدى عقارب الزمن وسنين العمر، وأعجبني أيضا طريقتك في الكلام عنها، فعلى ما يبدو أنك بارة بأمك كثيرا، الله يخليلك ياها يا رب، كثيرا ما أمشي في المولات وأسمع بعض الفتيات اللواتي يتحدثن مع أمهاتهن بطريقة غريبة خالية من أدنى أنواع الأحترام، حتى أنني اعتقد في بعض الأحيان بأنها تمشي مع خادمتها وليس والدتها، الله يهدي الجميع
سأدعوهم إلى مدونة ويسبر حتى يتعلموا بر الوالدين
كل الاحترام لك ولوالدتك

 

good luck on her exam. it can be very hard on people to learn when they get older, so I can imagine what trouble she had faced

 

شكلي انا كمان السنة عندي دورة مكثّفة للوالدين في عمّان انشالله ربنا يقدّرني و اعلّمهم زي ما علّموني كل شي بهالحياة
كتير حلو منّك حبّك و تقديرك لأهلك، شيء عم نفتقدو هاي الأيّام! الشاطر صار اللي بدّو يثور على "عقلياتهم المتحجّرة". الله يخلّيكم لبعض يا رب

 

LUNAR.

امين يا رب, ويخليلك اهلك وحبايبك
الله يبارك فيك :)

Sh3rawi

اللهم امين
الله يعينهم مش سهل خصوصا بهالعمر, بس والله اني اشوف المحاولة و النجاح كتير اشي بسعد :)

اه شفت هي الاهالي بدو يخففوها عالشباب
الله يتممها عالجميع يا رب, عقبالك لكن بعد التخرج ان شاء الله :)

Hamede

الله يرحمها و يتقبلها يا رب

من كلامك واضح انك كنت قريب منها و انها كانت ترضى عليك كتير, شو بدنا بالحياة غير رضاهم من بعد رضا الله

 

Sonnet

امين يا رب
شكرا جزيلا, واهلا وسهلا :)

Jaraad

امين يا رب, شكرا جزيلا :)
الله يخليلنا اياهم

Melicieuse

Thanks inshallah :D

Ah sa7 it's the narjis time these days, I'll buy a bouquet for mama soon, thanks for the idea :D

 

NewRise7

امين يا رب و يخليلك اهلك يا رب :)

انتي يمكن بتمزحي بس هاد اللي صار, رحنا تمشينا و صلينا المغرب و روحنا ...كتير حلو المشي تحت الشتا و السنة ما عملتها وفكرت خلص راحت علي, بس سبحان الله هيها شتت فكانت فرصه :)


وانت وجميع اهلك بالف خير :)

نادر احمد

مساء النور نادر :)
ممكن بحكم اني البنت الوحيدة بالبيت فانا قريبة كتير من ماما, فهي ماما و اختي و صاحبتي :)

هالشي من علامات الساعة والله اعلم, الله يهديهم لانهم بكونو بفترة عمرية مش مقدرين حد اجمالا :$

شكرا شكرا نادر عالكلام اللطيف :)

Tha2ir

Thanks :D
yeah it is, I feel that they can't focus, and remembering all this new stuff is too hard for them

Qwaider

والله لازم خصوصا بعد ما اجت ميرا القمر, ما بتعرف كيف بكونو مبسوطين على اي صورة او اي فيديو للاحفاد, من ايميل لايميل بنكون هاريين الفيديوهات واحنا بنعيد و بنزيد فيهم

الله يقدرك يا رب ويقدرنا نردلهم ولو جزء بسيط
امين يا رب و يخليلك حبايبك كلهم :)

 

ماشاء الله عليها اللهم صلي على سيدنا محمد
عاد بتعرفي الايام هاي صار الي بعرفش يشتغل على الكمبيوتر بكون أمي
امي يعني لا قراءه ولا كتابه مش امي الي هي متل امك
بس بدك تسمعي مني؟ لا تعلموها الحجه عليه لاني انا مرات بعاني من الي عندي كمان
اذا استلمو لعبة ببل شوتر ! انسى الموضوع ولا ممكن يتركوه للجهاز
او لعبة جديده بعرفش شو هيه بتيجي زي كشاكيش ملونه لازم تصفي كل 3 جنب بعض مشان يفقعو ويعطوكي عليهم نقاط
بس بجيمع الاحوال يعني بقوللها شدي حيلك يا حجه ... القصه مش صعبه
:)

 

يسألوني دائما لماذا أنت لست معجب بالغرب وتطوره

الغرب لديه تكنولوجيا وليس حضارة

الحضارة في إحترام الكبير و قيمة الأسرة وترابطها

لقد دمعت عيناي يا ويسبر و أنا اقرأ مدونتك الجميلة بل والرائعة
فلقد تذكرت والدتي العزيزة التي تقبع خلف بحار و محيطات بعيدا عني فلقد أشتقت لها كثيرا

أدام الله لك والدتك و أباك و كل من تحبي بكل الصحة والعافية

ودعوة بالتوفيق في الإمتحان من الطرف الثاني للكرة الأرضية لوالدتك الغالية على قلوبنا جميعا

أكرر شكري الكبير لك على هذه المدونة الرقيقة و الرائعة

 

Anas

اللهم صلي على سيدنا محمد
شكرا انس :)
هاد اللي بتحكيه ماما, بابا بالشغل اخد دورة و بعرف يشتغل, و اذا ما بحضر الجزيرة عالتلفزيون بكون عالنت بحضر شاهد على العصر او عاليوتيوب بشوف حيوانات :) و ما بحب اللاب توب فبكون عالجهاز واخوي بكون واقف مستني و انا ما برضى اعطيه اللاب توب :)

اه حلوين هاللعب, كل الموظفين عنا بالشغل بلعبوها...فساد اداري شو بدك تحكي :)

ان شاء الله ما بتكون صعبه كتير

سراج الماضي

القيم الاسرية عندهم معدومة, وحالات نادرة اللي بكون فيها تماسك اسري

اسفة جدا على الدمعة و على تذكيرك بالمسافات اللي بتفصلكم

الحمد لله الانترنت هالايام بتقرب البعيد و التلفونات صارت اسهل من قبل
ان شاء الله عن قريب بتجتمع مع الاهل و
الاحبة

الله يخليلك اهلك و كل احبابك

 

Shu 7elo hal post :)
allah yse3dik w ynajji7 ur mum b el emt7anat :*
3njd d7ekt mn albi b 2a5er eleil :D elsa3a 3na srt 12:25 w ana ele 10 mins 2arye ur post w ana 3 fekra mn el nas ele byo`3ma 3alihm lma bedasro :)))

 

Shaima

Ameen ya rab w yes3edek 2ente w kull elly bet7ebehom :D

3ala 6ool inshallah elde7keh ma tfar2ek
LOOOL zay 2a5oy :D

 

على سيرة المطر نحنا عنا غبرة :(
الله يخليلك الماما
بجد امهاتنا غير شكل قبل فترة كمان ماما طلبت انو حدا يعلمها على الكمبيوتر بالفعل بلشت معها بس خلقها ضيق ما تحملت كتير و كل فترة بترجع تقولي طيب علميني بس بسرعة
ماما معلمة عربي و عندها شغل و طباعة بس هلا زهئت و استسهلت اني انا اللي اطبعلها و مع هيك بترجع مرات و بتحكيلي شو رايك نكمل
عقبالك يا ويسبر و نفرح فيكي يا رب

سلميلي على المطر و قوليلوا يميل عنا شوي
و الله روحنا نشفت

 

Jafra

غبرة :$ مهو انت بدولة ما فيها غير فصلين, صيف وهوا او صيف كتير

امين يا رب, ويخليلك كل حبايبك يا رب :)

بابا اللي خلقة ديق, بس يسألني عن شي بالموبايل بكتئب :$ لانه لازم ادلّه و الموبايل بايده وشوي شوي و مش بطيء :$ و بعدين بزعل وبحكيلي خلص بطلت بدي اعرف

الله يسعدك عقبالك انت بالاول :)
الله يسلمك يوصل, اليوم مشيت تحت المطر
و يا الله شو انبسطت
مش اني بقاهر فيكي لا سمح الله... بس بحكيلك شو عملت :)

 

:)

انا امي شطوره:) لحالها اتعلمت بس لا يخلو الامر مرات:)

يمكن لانها بالسن اصغر
46 سنه الله يطول بعمرها

وبدي احكي للصبيه اللي اتكتب كتابها مبروك:)
عداد الايام خلص اخيرا وعقبال عند كل مشتهي:)

تتهني يا رب

 

مياسي

الله يخليلك اياها يا رب...كل ما كان السن اصغر كل ما كان اسهل ..اعتقد هيك
بس برضه ما شاء الله عليها خالتو انها تتعلم لحالها بصراحه انجاز :)

امين يا رب ...والله يهنيها ويسعدها :)

 

يا حبيبتي يا آنتي.. واللهي انها بتجنين برافو عليها.. الله يحميها وينجحها ديماً :) ويخليكم لبعض.. أنا ماما أخيراً صارت تعرف تسوي
sign in
على ماسنجر الهوتميل وتسوي
video call
وبتحكي مع خواتي وولادهم صوت وصورة
ولما تخلص بتعمل
sign out
أحياناً الماوس لما تعلق بتنادينا..ياولاد تعو شوفوا لي مو شغاله :)

 

عن جد ما أزكاها مامتك هههههه وانه عندها رغبة تتعلم !! أبوي تعلم الكمبيوتر وهو بهالعمر بس لانه أصلا مدرس لغة عربية يعني تعليمه كان سهل وسريع بس امي الله يبارك فيها ويطول بعمرها مش متعلمة فما عندها رغبة بالمرة مع انه حاولنا معها يعني لسة بتعتمد علينا

الله يطول بعمرهم ونخدمهم لو شوي مقابل ما تعبناهم وغلبناهم

 

Rula A.

بتجنن حبيبتي ..صح :)
امين يا رب و يحميلك عمو وخالتو و كل اللي بتحبيهم يا رب :)

ماما هيك بدها تصير تشبك مسنجر وما تنادينا ...بتحكيلنا بديش جميلتكم مع انه والله ما فيها جميله :$

ماما بس يطلع مسج على الكمبيوتر, بكون ما اله معنى زي بدك تخزن او ان الانتي فيروس عمل update
بتناديني و بتحكيلي ابصر شو عملت :)
بتجنن حبيبتي, مع انها بتعرف انجليزي بس بتحكيلي بخاف اكون فهمت المسج غلط :)

 

SimSim

سمعت انه صارت معظم المدارس يدخلو العلامات عالنت, وهاد شي شجع الكبار يتعلمو

لا لازم تعلمو خالتو علشان تصير تحكي مع اخوانك :)

الله يخليلك اياهم كلهم يا رب
امين يا رب

 

قرأت مقال قبل فترة عن أكبر طالبة في العالم وهي في التسعين ، فقلت في نفسي ربما هذا حكر على الاجانب وهأنت تعدين لي الامل بان امتنا مازالت معطائه الله يخليلك امك شي بيرفع الراس

 

كتير أعجبني عالموضوع :):):)
ذكرني بإمي الله يخليلي إياها... تقريباً نفس القصة.. ما كان عندها أي اهتمام بالكمبيوتر أو النت، بس بعد ما انا اتزوجت و تركت الإمارات و اجيت عالأردن، بطّلت توفّي معنا الحكي عالتلفون، كنت احكي معها عالمسنجر دائماً بس بوجود أخوي، عشان يفتحلها الكمبيوتر و المسنجر و هاي القصص... بعد فترة صممت إمي انو لازم تتعلم أساسيات الكمبيوتر عشان تقدر تحكي معي بدون (جميلة) حدا... و فعلاً تعلمت و صار عندها إيميل، خصوصاً بعد ما ربنا رزقني ببنوتتي، و صارت صورها و أخبارها و فيديوهاتها أهم مني :) و هلأ كمان صارت تفوت عمدونتي و تشوف المواضيع الجديدة :) كنوع من الدعم إلي ...
الله يخليلي اياها يا رب...
شكراً عالموضوع، و الله يوفق امك بالامتحانات :)

 

Enigma

امين يا رب و يخليلك اهلك و حبايبك :)

شكرا و اهلا وسهلا فيك دائما :)

Mre H

امين يا رب الله يخليلنا اياهم فوق روسنا على طول

و يخليلك بنتك وعائلتك يا رب
مع الاحفاد بنتسو الاولاد و بصير حب من نوع جديد :)

و بتزور مدونتك كمان!!!
حلو كتير ما شاء الله عليها:)
الله يخليلك اياها

 

صباح الخير ويسبر

فعلا في هذا الادراج تذكرت كيف يكون الحافز محركا لعمل أمور عديدة

محبة والدتك لأحفادها تطبيقا للمثل الذي يقول ما أعز من الولد إلى ولد الولد كان الاساس في تلك الانطلاقة الرائعة من والدتك الرائعة التي أرفع القبعة لها احتراما على رغبتها في غزو التكنولوجيا

أتمنى لها كل التوفيق وأحييكي على تفانيكي ومحبتك لوالديكي بهذا الشكل الرائع الذي أصبح عملة نادرة عند كثير من الابناء

تحية

 

صباح النور ... حاليا صار مساء النور :)

عنّا تطبيق عملي لهالمثل , من يوم ما اجو الاحفاد الحمد لله تغيرت حياتنا كلنا :)

شكرا اشرف

 

allah y5aleelek emmek o em el kol ya rab... btw.. zakarteene fe emme:(

 

Allah y7mahom w y5alelna 2yahom

Sorry for that :(
inshallah betshofha 3an 2areeeb :)