رجعت الشتويه....

اول شي كل سنه وانتو سالمين بمناسبه حلول الشتااااااا
اي نعم انو صايره تصيبنا صدمه مناخيه..من الصيف للشتا فورا ومن الشتا للصيف
ربيع وخريف يوم او يومين .....يعني لازم نغير مناهج المدارس... من كل فصل 4 شهور الى يومين ربيع 5 شهور ونص صيف يومين خريف خمس شهور ونص شتا :)
المهم
مع انا انصدمنا امبارح بالمطر ما شاء الله....مش انو نلبس زي العالم اليوم لااااا ابدا...طبعا امبارح وقت الترويحه بالزبط من الشغل بلشت تشتي...حظنا كتير حلو كالعاده

مش انا نتعلم لا لازم نجرب مره تانيه
امبارح ما ضل حد ما حكى معي...ديري بالك عالطريق...اضوي الضو الخفيف مش العالي طقه وحده يعني :$
وينك..وين وصلتي...لفي حالك منيح...انبسطت بالبدايه بعدين زهقت
انو طيب خلص شو بنت صغيره انا .....والدنيا مش شتا كتير يعني

المهم اليوم الصبح زي العاده اول شي بروح البرنده بستكشف الجو ...اشوف مناسبه الاواعي الل محضرتها قبل بليله ويلا لأ
انخدعت ببصييييص شمس...جد بس بصييص يا دوب
الحمد لله قبل ما اطلع شافتني ماما وحكتلي خديلك جاكيت على ايدك ما تلبسيه....خليه بالسياره..."شكرا حبيبتي مميتوووو"

المهم طبعا شمست الدنيا وان الوضع تمام
فجأه و على وقت الترويحه كالعاده..بدت عال 2:30 الدنيا صارت مغرب ...وبلشت ترشرش و برق ورعد..ايه ايه و رشششششش
فجأه صار نهر الاردن قدام الشغل :$
وانا لابسه بعيد عنكم كندره باليرينا...انو يعني الاناقه مقطعه بعضها...والدنيااا رش و الحمد لله صافه على بعد 5 كم من المبنى
بس قطعت الشارع يا دوب صرت كلي مي...مش مزح حتى الكندره صارت تطلع اصوات لانها معبيه مي صارت...لقيت سياره صاحبتي فتحت الباب و دخلت...انصدمت البنت طبعا...حكيتلها مش نازله بدك توصليني للسياره ما الي :")

وصلتني الله يرضى عليها بعد ما خلتني اوعدها اجبلها شيبس معي بكره ...يلا شيبس شيبس مالمهم اوصل للسياره

وطبعا الدنيا بتخوف...و مش عارفه شو اعمل...غير كأبه الجو
انا هالجو بصراحه بكئبني بزكرني بايام الجامعه ويوم ما كان عندي امتحان ومش دارسه ومش فاهمه اشي...بتعرفوه اكيد هالشعور...انو في اشي من جوا بدو يفقع و بدك تبكي و مش مرتاح ودوخه وغثيان....يعني دمااااااااااااار
و بتطلع عالموبايل انو يرن...انو حد يسأل عني...ابدا
انقهرت بصراحه...ول ولا حد بسأل :"(

وصلت البيت وكنت ماشيه على 10....و المساحات عالعالي و الضو طقه مشعول....وماسكه الستيرنج بايدي التنتين كانه بدو يهرب مني
وبس دخلت البيت بيتطلعو علي اهلي...ايه اجيتي ..هو صار موعدك :$ بالله جد يعني حتى ولا متزكريني...طفله الكراج ما انا...بنت الحارس مهو...وصرت ابرطم واتأفف...بس بحكم اني البنت الوحيده بدا الحكي ويا على امك...ويا روح امك ومن هالحكي ...بصراحه ما قاومت وفردتها على طول :")
بس ما راح انسى انه ما حد سأل عني....ولا حد ...بس يلااا شو بدنا نعمل

فيا جماعه هيني بعلنها .... ضبو الصيفي وطولو الشتوي....ضبو الشراشف و طولو الحرامات.....ضبو الباليرينات وطولو البووووتس..والله بعينكم طولو الصوبات هي في تخفيضات الاسبوع الجاي
لانه رجعت الشتويه :)