خدمه الجمهور

امبارح اجت عنا زوجه قريب النا متوفي - الله يرحمه- و احنا قاعدين بتحكيلي انها اكتشفت ان دفتر العائله تبعهم بده تجديد و هاي اول مره بدها تجدده بعد ما توفى زوجها
فالله يرضى عليكي بدي تسأليلي شو الاوراق اللي اخدهم معي للتجديد, لان في فرع للاحوال جنب بيت اختي وانا ناويه اروح انام عندها فبركي اخدت معي الوراق و جددت هناك.

اليوم دورت بالنت على رقم الاحوال, و من الخيارات الموجوده عالمقسم ازا بدك تحكي مع خدمه الجمهور اكبس 4
حكيت لحالي ممتااااز هيك باخد المعلومه صح 100% بدل ما يطلعلي حد زهقان وما بعرف بالقوانين

انا ما صدقت تحكي الرقم وفورا ضغطت على 4
الموظف: الوو
انا: يعطيك العافيه, لو سمحت بدي اسال, في دفتر عائله لشخص متوفي و ما معه بالدفتر غير زوجته و هلأ بدها تجديده لاول مره بعد ما توفى فشو الاوراق اللي لازم تجيبها ارملته علشان تجدد الدفتر- يعني ما خليت اشي مش واضح ,متوفي, ارملته.

الموظف: لازم تجيب دفتر العائله القديم و صورتين شخصيتين
انا: بس
الموظف: بس
انا: طيب مش ضروري تجيب شهاده الوفاه.
الموظف: اه طبعا لازم تجيب شهاده الوفاه
انا: O_o طبعا لازم!!!!!!!
لو سمحت انا بحكيلك اني ما بعرف شو الاوراق المطلوبه فلو سمحت تعيدلي كل الاوراق المطلوبه لتجديد دفتر عائله لاول مره لشخص توفى وهلأ بده يصير باسم زوجته.
الموظف بعد ثواني من السكوت بعرف ان بعقله فش قلبه بحكي كتير : لازم تجيب دفتر العائله القديم و صورتين شخصيتين.
انا وبعد ثواني اكتر بستنى يحكي شهاده الوفاه و طبعا ما حكاها: و شهاده الوفاه.
الموظف : اه يا اختي حكيتلك لازم شهاده الوفاه.
انا وبعد ثواني من السؤال ليش يل ربي ما عندي قوى خارقه اطلّع الموظف من التلفون و افش قلبي فيه: عفوا بس في حد غيرك بشتغل بخدمه الجمهور.
الموظف: لأ ليش.
انا : لاااا ولااا اشي شكرا كتير كتير الك.

يحيى الذكاء.....يعيش التطور.....نعم للتكنولوجيا
تعيش خدمه الجمهور