الأمان بالله

كل شهر تقريبا...او بالاصح كل راتب بنطلع انا وصاحباتي بنتغدى بره

بنكون مستلمين الراتب جديد فبندفع واحنا مبسوطين ومرتاحين ان لسا ضايل معنا فلوس بس هالمره بسبب سوء الاحوال الجويه تأجلت الطلعه لنص الشهر.
المهم ...المشكله الوحيده اللي بتواجهني هي ان ما الاقي مصف للسياره وطبعا كلنا بنعرف ان اخر فتره الشوارع بالاردن صارت كراج سيارات كبير فيا دوب تقدر تسوق بالشارع مش تصف.

علشان هيك بس الاقي كراج بالاجره للسياره ما بتردد اصفها فيه, لانه هيك باكل وانا مرتاحه
المهم اخر مره صفيتها بكراج اسمه الامان,اول ما نزلت من السياره اجا الشب ر كض علي انه لو سمحتي الدفع هلأ مش بس ترجعي
بحكيله مش المفروض بالساعه الصفه, كيف بدي ادفع هلأ بركي طولت اكتر من ساعه ؟؟؟
بحكيلي لأ ما بهم قديش ضليتي صافه هو دينار على الصفه مهما كانت مدتها!!!
اعطيته الدينار و اعطاني ورقه عليها اسم الكراج علشان احطها دليل اني دافعه.
مسكت الورقه وحطيتها جوا السياره بمكان مكشوف , رحنا تغدينا و تحلينا و تحدثنا و انا مرتاحه ان كله تمام سيارتي بكراج الامــــــــان في احسن من هيك.

الحمد لله طلعت لقيت السياره مكانها وكل شي تمام... بس مسكت الورقه بدي اكبها لقيت ان مكتوب اشي على الجهه التانيه من الورقه
شوفو شو مكتوب




يا سلااااام....طيب ليش احنا بندفع فلوس اساسا مش علشان نكون متطمنين ان سياراتنا راح تكون بأماااااااااااااااااااااااااااااااااااااااااااااااااان و ما في حد و ولا اشي راح يصيبها؟؟؟؟؟

بحكي لاخوي القصه عجبني تعليقه كتير
بحكيلي هاد مش كراج الامان.....هاد كراج الامان بالله :)