Things I Like To Whisper About

Would You Hear Me Whispering

اشي بسم البدن



الي فتره مضغوطه بالشغل و المسؤول عن توزيع مواقع الموظفين حس بالموضوع فاجا و بسألني وين حابه تكوني السايكل الجاي انت اختاري, فأخترت اداوم الفتره الماضيه من بداية الشهر بمكان بعيد عن الموقع الرئيسي للشركه, لا مسؤولين ولا لبس معين و خصوصي اني غطيت كل المواقع الا هالموقع و انا بكره يكون في شي ما بعرفه بالشغل, الحلو انه طلع جدا مسلّي و تعرفت على بنات جداد بجننو و كانت فتره كتير حلوه

بالدوام الليلي كنّا نداوم بس انا و شب و مسؤوله , الشب من اوغندا و المسؤوله من نيجيريا, تبادلنا عادات و تقاليد و قصص جد ممتعه, راح احكيلكم بعدين عن تقاليد الزواج باوغندا, سبحان الله كيف كل شعب اله طريقه مختلفه.

وحده من القصص اللي حكالنا اياها الشب بداها باستغرابه من تقاليد الامارات بانه ممنوع الشب يلمس البنت حتى لو كان الظرف يستدعي, حكيتله هاي عند كل المسلمين و شرحتله الموضوع دينيا اولا و كعادات و تقاليد مجتمعيه, حكالي عن قصص لاصحاب اله من بلده تفنشو و روحوهم لبلادهم بس لانهم مثلا مدو ايدهم على كتف بنت وقع منها شي عالارض, بحكيلي انه متدرب اسعافات اوليه و لو شاف حاله قدامه لبنت و بقدر يساعدها ما بقدر يعمل شي.

حكالنا عن موقف قهره , والموقف جد بقهر و بجلط...بحكيلنا انه كان واقف على الدرج المتحرك بالشغل وفي قدامه ست سعوديه هي و زوجها, بحكيلنا ان طرف العبايه علّق بالدرج المتحرك, والدرج ماشي و بسحب العبايه, قام هو تلقائي مسك الست اللي بدها توقع و ضغط عالزر الاحمر ليوّقف الدرج و كردة فعل طبيعيه لتوقيف الدرج معظم اللي عليه وقعو ومن ضمنهم زوج الست, و هو ضلّو ماسك الست لحتى وقّف الدرج و تركها و ركض و وقف على جنب, خايف من تبعات هالتصرف.


قام الزوج و طلع لفوق و وقف جنب مرته و طرااااااااخ بالكف على وجهها و مسك اغراضه و مشي !!!!!!
ال....بلاش يحكي الواحد هاد اللي طلع معه ليعبّر عن سخطه, عديم الاحساس و الذوق و الشرف فكّر انه بهيك رد اعتباره و رجولته اللي ما حد مسّها غيره هو بهالتصرف.

انا انفعلت و انقهرت و شرحتلهم ان هاي حالات نادره و فرديه و مش بالعموم, وان ضرب الستات عنّا مش اشي سهل و بصير بكل بيت, و زي ما هو منتشر بكل مكان ان في رجال ما بفهمو و ضعاف الشخصيه و بثبتو رجولتهم بهالتصرف بكل مكان بالعالم في بالعالم العربي.

بس بيني و بينكم.... عنّا من اشكاله كتير ...انا نطاق علاقاتي مش كبير و مع صبايا بعمري اللي يعتبر مش قديم كتير و بعرف اكتر من وحده من صاحباتي و قريباتي ازواجهم بضربوهم و الكف ابسط شي بمشاكلهم, ما بدي احكي مين نلوم وليش تسكتله و حقّه يربيها و هالخزعبلات...اللي بدي احكي عنه شو شعور الرجل بس يضرب الست؟؟؟ شو شعوره بس يضرب ام اولاده؟؟؟ شو شعوره بس يضرب بني ادم؟؟ شو شعوره وهو بضرب شي ما بقدر يردله الضربه؟؟

انتصار؟؟؟ رجوله؟؟؟شفاء غليل مرض نفسي سادي؟؟؟

17 التعليقات :

ما بعرف عن غيري
انا ممكن استعمل عنف خفيف عشان اقوم او اربي ولد من ولادي


بس الست اللي بدي اتزوجها مستحيل امد ايدي عليها ..
لأنها بكل بساطه
كبيره وناضجه ومش محتاجه تقويم او تربايه
كل المشاكل ممكن تنحل بالنقاش أو حتى الصراخ والعصبيه (كونه الناس بتصنفني كبني آدم عصبي) بس الضرب لأ ..

فما بالك لما يكون قدام الناس ..


عن جد الله ياخذ هيك حيوان ..
لا بفهم ولا عندو ذره كرامه أو احساس ..
:/

 

برأيي انه الضرب بكل اشكاله لا يعبر الا عن ضعف بالشخصية زي ما تفضلتي!
و بغض النظر عن مجتمعنا و عاداته و قيمه و تخلفه بهيك امور بس برضه لازم البني آدم يقدر الظروف و عالأقل يشكر
كلمة شكر بتكفي والله
بالنسبة للي بضرب مرته لو انها اختي اللي انضربت مهما كان السبب ما رح اسكت
الزواج مش نهاية الحياة

 

برأيي انه بهيك كف ما عاد رجال .. الحيوانات بترحم اناثها و ضعفهم فما بينفع نحطه في صنفهم !

الله يكفينا شر هيك مخلوقات و يصلح حال الجميع يارب ..

و يعطيها الف عافية وسبووورة المشغولة :)

 

قبل ست او سبع سنوات شفت موقف شبيه بس ردة الفعل مختلفة، كنت متجه لدرج الكهرباء للنزول وكان في عائلة سعودية من اب وأم وثلاثة اولاد عم تطلع في الجهة والام كانت آخر وحدة وتعثرت وسقطت وفرطوا الاولاد من الضحك وشفت الاب راجع وعلى وجه ابتسامة عريضة وقام مع الاولاد بمساعدتها على النهوض وصار الاولاد ينكتوا على أمهم :). بصراحة اول مرة بحياتي اشوف سعودي يعامل زوجته بهالطريقة علناً.
فيكفي أن نعامل زوجاتنا كما كان رسول الله صلى الله عليه وسلم يعاملهن وسنحصل على بيوت صحية مطمئنة يتربى في كنفها اطفال سويون نفسياً

 

منيح مارمى عليها يمين الطلاق كمان

لا تعليق,,

 

Mr Kooz

هلأ انا مش مع العصبيه و الصراخ برضه...بس بما انها راح تكون عارفه انك عصبي و قابله فبدها تتحمل

الضرب فيه امتهان للكرامه و اذى نفسي اكبر من الاذى الجسدي

الله يهدي العالم و ربنا يهدي كل شخص سيء مع مرته

جد ما في احساس

Ahmad

انا حكيتله انه ببين سبب اللمس و ببين مين بتحركش ومين بس القصد يساعد و لكن للاسف القصص اللي حكاها عن صحابه و كيف تفنشو بتخليه جد ما يتدخل

للاسف اللي بضربو زوجاتهم بكونو شايفين كل ستات الدنيا ما الهم قيمه ومن ضمنهم خواتهم و بحكيلك "خليه يربيها"

عالم ما بتفهم بعيد عنك

 

هديل

نوّرت المدونه باحلى عروس بالدنيا :)

بالزبط...بتصرفه هاد اثبت انه ما عنده ذرة رجوله و فاهم الموضوع غلط

اللهم اميييييييييييييين

الله يعافيكي يا رب....بتعرفي عأساس الشغل مقطّع بعضه و بتسكر الشركه من وراي :)

MTayseer

اهلا و سهلا صديقي :) زمان ما نورتنا

وانا كمان كنت مفكره الكل هيك, ولكن بمجال شغلي شفت اللي بكون جدا لطيف مع زوجته و بناته و واضح من التعامل انهم بحبوه و الموضوع مش بس قدام الناس

واللي مش بس مع بناتهم و زوجاتهم سيئين...لأ معي انا كمان و بطلبو يتعاملو مع شب مش من باب دين لأ من باب ان انت ست و ما تفيدينا باشي

غير اللي بتعاملو معي بفوقيّه فبضطر انسى كل الانظمه و القوانين و اتعامل معهم بطريقه تخليهم يجلسو على طول :)

 

Um Ommar

مش بعيده ...بس اعتقد اللي بتعامل باسلوب الضرب موضوع الطلاق مش حل بالنسبة اله مدام لاقي طريقه يثبت فيها رجولته

 

عزيزتي
انا كان قصدي إنه يتفاخر اكتر وأكتر بعملته الجميله المبدعه اللي خلت العالم بدها تزقفله كمان شوي

هالكزبه اللي حكيتها انا,ف خياله المريض فقط لا غير

 

Um Ommar

قصدك من باب رد الشرف اللي هدرته زوجته...ممكن كتير بصراحه يوصل بتفكيره الفذ لهالشي

 

الزلمة اللي بيلجا الى الضرب انسان لا يملك عقل والحيلة الوحيده اللي بيعرفها هي الضرب
هلا ليه الضرب بيصير عادي لانه الست اصلا تسمح فيه يعني لو اعترضت واصرت ع الاعتذار ع اول كف اكلته كان ما بيسترجي يعملها بس احنا البنت عادي انها تنضرب وتنقتل !

 

إحنا ما عندناش نساوين تطلع الأسنسيرات!
أيوا هيك

و لا كلمة و اللا بالكف يم!!!!!!!!!!

----
:(

 

لا مش عادي عنا البنت تنضرب و تنقتل!! هذا شي بعود للتربية اللي تربتها البنت!! ما عمري شفت ابوي ضرب امي او وحدة من خواتي !! ولا بسمح انه انا او واحد من خواني يضرب وحده من خواتي! و ابوي رجل عادي جدا في مجتمع عربي اردني

 

Sozan

بالزبط....هي دليل ضعف وابدا مش دليل قوه

مرات بس الست تشوف امها بتنضرب و بتسكت بتتوقع انه هاد التصرف الطبيعي وهاي طريقه التعامل الطبيعيه فبتضلها ساكته كانه امر طبيعي

للاسف لسا في ناس بينا بعتبرو الامر عادي

Sheeshany

انت اكيد شفت و سمعت قصص بتجنن كمان بغربتك

اشي بقهر...بعرف و خصوصي بس تكون لاسمح الله بتعرف حد بصير معه هيك :(

 

AHMAD

الحمد لله انت و انا و كتير ناس هالامور مستحيل تصير

لكن انا بعرف و انت اكيد بتعرف ناس بصير عندهم هالحكي


صاحبتي بس زعلت عند بيت اهلها لانه زوجها ضربها, بتسالها صاحبتي التانيه اذا هاي اول مره بضربها, حكتلها اول مره, بالعاده كان كف او دزّه بس ...الكف عندها اشي عادي وساكته عليه فانتقل الاخ للمرحله التانيه

 

أي هيك هيك لكل واحد بنزل بمرته ضرب و مصارعة ....
و هاي الأمور موجودة عنا بكثرة و نفسي اشوف واحد بمحيطي ما بضربش مرته
كلهم عقد نفسية
http://www.youtube.com/watch?v=qv8_B8P1ZsY
انظر للرجولة

alirbidi

 

يا الله شو قهرني الفيديو :(
عاساس انه صاحب دين الاخ و صواتها عورة ...هي تمليعت او تصهونت؟؟؟ بتحكي عادي الست

بكره اللي بمسكو اشي بالدين و بتناسو اشي ويا ريتهم فاهمين الدين صح

بلفلف عالتدوينات القديمه و انتبهت عالتعليق واني مش راده :$