اشي بسم البدن

الي فتره مضغوطه بالشغل و المسؤول عن توزيع مواقع الموظفين حس بالموضوع فاجا و بسألني وين حابه تكوني السايكل الجاي انت اختاري, فأخترت اداوم الفتره الماضيه من بداية الشهر بمكان بعيد عن الموقع الرئيسي للشركه, لا مسؤولين ولا لبس معين و خصوصي اني غطيت كل المواقع الا هالموقع و انا بكره يكون في شي ما بعرفه بالشغل, الحلو انه طلع جدا مسلّي و تعرفت على بنات جداد بجننو و كانت فتره كتير حلوه

بالدوام الليلي كنّا نداوم بس انا و شب و مسؤوله , الشب من اوغندا و المسؤوله من نيجيريا, تبادلنا عادات و تقاليد و قصص جد ممتعه, راح احكيلكم بعدين عن تقاليد الزواج باوغندا, سبحان الله كيف كل شعب اله طريقه مختلفه.

وحده من القصص اللي حكالنا اياها الشب بداها باستغرابه من تقاليد الامارات بانه ممنوع الشب يلمس البنت حتى لو كان الظرف يستدعي, حكيتله هاي عند كل المسلمين و شرحتله الموضوع دينيا اولا و كعادات و تقاليد مجتمعيه, حكالي عن قصص لاصحاب اله من بلده تفنشو و روحوهم لبلادهم بس لانهم مثلا مدو ايدهم على كتف بنت وقع منها شي عالارض, بحكيلي انه متدرب اسعافات اوليه و لو شاف حاله قدامه لبنت و بقدر يساعدها ما بقدر يعمل شي.

حكالنا عن موقف قهره , والموقف جد بقهر و بجلط...بحكيلنا انه كان واقف على الدرج المتحرك بالشغل وفي قدامه ست سعوديه هي و زوجها, بحكيلنا ان طرف العبايه علّق بالدرج المتحرك, والدرج ماشي و بسحب العبايه, قام هو تلقائي مسك الست اللي بدها توقع و ضغط عالزر الاحمر ليوّقف الدرج و كردة فعل طبيعيه لتوقيف الدرج معظم اللي عليه وقعو ومن ضمنهم زوج الست, و هو ضلّو ماسك الست لحتى وقّف الدرج و تركها و ركض و وقف على جنب, خايف من تبعات هالتصرف.

قام الزوج و طلع لفوق و وقف جنب مرته و طرااااااااخ بالكف على وجهها و مسك اغراضه و مشي !!!!!!

ال....بلاش يحكي الواحد هاد اللي طلع معه ليعبّر عن سخطه, عديم الاحساس و الذوق و الشرف فكّر انه بهيك رد اعتباره و رجولته اللي ما حد مسّها غيره هو بهالتصرف.

انا انفعلت و انقهرت و شرحتلهم ان هاي حالات نادره و فرديه و مش بالعموم, وان ضرب الستات عنّا مش اشي سهل و بصير بكل بيت, و زي ما هو منتشر بكل مكان ان في رجال ما بفهمو و ضعاف الشخصيه و بثبتو رجولتهم بهالتصرف بكل مكان بالعالم في بالعالم العربي.

بس بيني و بينكم.... عنّا من اشكاله كتير ...انا نطاق علاقاتي مش كبير و مع صبايا بعمري اللي يعتبر مش قديم كتير و بعرف اكتر من وحده من صاحباتي و قريباتي ازواجهم بضربوهم و الكف ابسط شي بمشاكلهم, ما بدي احكي مين نلوم وليش تسكتله و حقّه يربيها و هالخزعبلات...اللي بدي احكي عنه شو شعور الرجل بس يضرب الست؟؟؟ شو شعوره بس يضرب ام اولاده؟؟؟ شو شعوره بس يضرب بني ادم؟؟ شو شعوره وهو بضرب شي ما بقدر يردله الضربه؟؟

انتصار؟؟؟ رجوله؟؟؟شفاء غليل مرض نفسي سادي؟؟؟