Home Sweet Home :)

المصدر

نعم....ايون....صحيح

ويسبر عادت الى ارض الوطن سالمه غانمه - هو اي نعم ما وقعت اي عقد بس برضه غانمه :)

الحمد لله كانت اجازه سعيده, و السفره كانت منيحه وكالعاده تأخرت الطياره ساعه, بس هاد الطبيعي و المفروض تعودنا عليه, تعرفت على بنت اموره كانت تبكي لانها مفارقه اهلها, ومع اني مش من النوع اللي بدخلو بالعالم بسرعه بس حسيت اني لازم اهدّيها شوي وخصوصا ان معها بيبي من بكاها صار هو التاني يبكي, و الحمد لله صارت احسن, هو اي نعم بعتت مسج لاهلها من موبايلي و قامو اتصلو فيها وصارت تبكي من جديد :( بس اجمالا الحمد لله مشيت, ساعدتها بحمل الاغراض مع انو معي هاند باج 17 كيلو, شكلأ هاند باج كانت, و سبحان الله ربنا يسرلي حد يحمل عني الهاند باج, اتمقلب المسكين :)

طبعا من يوم ما وصلت و احنا عالجزيره 24 ساعه, ربنا يقويهم وينصرهم و يحققو مبتغاهم يا رب, شعوب عربيه بترفع الراس, جيل جديد يعيد امجاد الماضي, ان شاء الله سنة 2011 تكون سنه تحرر عالجميع.

نزلت من الطياره لابسه بلوزه شتوي والجاكيت من كتر ما حكولي الدنيا برد, طلعت مش برد و متت شوب, و بعد ما قعدنا و وزعت الهدايا - هو مش مفلسه مفلسه يعني بس هااا قربو يخلصو القرشنات :) - و زي ما بنعمل بالعاده بس يجي حد من السفر, قهوه و شوكلت اللي بنجيبه من السوق الحرّه, صحيح هو الفريرو روشيه و الرافييلو نفسهم اللي بالسوبرماركو و لكن بضل الهم نكهه مختلفه, من الديوتي فري بضلهم :)

المهم لبست بيجاما شتويه و لسا الدنيا شوب, نمنا مش عارفه انام الدنيا برررررررررررررد كمان حرام ما زبط كمان حرام ما زبط, كمان دفنه تحت البيجاما و جرابات يا دوب مشي الحال لحتى ماما جابتلي الاختراع اللطيف هاد

اشي زي المخده مقطع ل 3 اجزاء, بدل ما يكون فيه قطن بكون فيه قمح :) بنحط بالميكرويف 3 دقائق و بصير سخن و بتتدفي عليه, هو زي اختراع "القربه او الئربه " بس مش مي و له له له انفتحت و عبّت الدنيا و بتحتفظ بالدفا وقت اطول - عجبتني بتحتفظ :) - الله يخليلنا بنت عمي اللي اجت من المانيا و عرفتنا على هالاختراع :)

فااا 3 حرامات و الكويلت و 50 قطعه لبس و هالاختراع, هيك بدو الجو حاليا مع الصوبة اللي مشعوله 24 ساعه و التدفئه اللي بتشتغل طول الليل لنعرف نقوم عالفجر و نتوضى

سبحان الله, قبل كم يوم كنت لابسه صيفي و مشغلين الكونديشن بالسياره, تاني يوم رجعت للبرد...... ربنا يسقينا الغيث ولا يحرمنا ....بس ايمتا بدو يجي الصيف!!! :"(

شو بدكم بطولة السيره....المهم الحمد لله على سلامتي و الاردن المنور بوجودكم يوم الخميس نوّر نقطه زياده لا تنكرو :)

لو سمحتي....اسفه...اخر مره...شكرا

النا فتره بنعلم فروحه كيف تطلب بأدب و كيف تعتذر اذا عملت شي غلط و تشكرنا اذا عملنالها اشي, ولكن هالشي بخلينا نمشّيلها اشياء كتير, يعني كلمة لو سمحتي او "امتّي" زي ما هي بتحكيلها تعتبر كرت اخضر لكل شي ضمن المعقول طبعا, يعني بالليل بعد ساعة معينه ممنوع السوائل منعا لخروجها وقت النوم فكلمة "امتّي قطّه" يعني لو سمحتي نقطه مي- مني اخدت هالكلمه :) - فأحنا مضطرين نعطيها بما انها حكت لو سمحتي, و لو كبت صحن الاكل عالارض و حكت "اتّه ...ملّه" يعني اسفه اخر مرّه برضه لازم نسامحها, لنشجعها على استخدام هالكلمات دائما.

يعني بدنا نقدم تنازلات لحتى نحصل على طريقة تعامل معينه منها, بدنا شي لازم نقدم شي مقابله, لازم نغض بصر, لازم نبالغ بفرحتنا باستخدامها الكلمات ولازم نزقف و لازم نحكي "آآآآآآفوووو" .... برافووووو.

وضعنا زي دولة مصغره, فرووحه الشعب و احنا الحكومه, بتغلط بتتعاقب, بتتعامل منيح بتتكافئ, لكن لمّا فكرت بواقعنا احنا كشعب و حكومتنا لقيت ان كل هالحكي ما في منو, مافي غير احنا بنعطي و همه باخدو بدون اي تقديمات بالمقابل , احنا بنموت وهمه بعيشو, احنا بنحترم وهمه بدعسو على كرامتنا, احنا بننحت وهمه بحملونا جميله بالكم دينار اللي بعطونا اياهم, احنا بنزرع و بنحصد و باخدو كل شي و بعطونا باقي اكل السنه الماضيه

هل اللي بنعلّمه للصغار غلط و المفروض نعلمهم يكونو كذابين و نصابين و بس ياكلو حقوق العالم نزقفلهم؟؟؟ ويلا لازم نعاقبه بس يكون مؤدب ؟؟ويلا نعلمه لا يحترمنا ولا يحترم حاله؟؟ ويلا احنا اللي عايشين بعالم اعوج؟؟؟

اللي بعتذر و اللي بستسمح و الماشي صح يستغل و ينحرث عليه و مرات بندعس عراسو و معظم الاحيان يطلق عليه لقب "هبيله" !!!

و اللي بسرق و بشتغل من تحت لتحت و بكذب و بتأمر و بطلع بخطط لئيمه بنحكي عنه ذكي و فتح و بلعبها صح وما بيجي غير واقف..

اللي بعمل شي منيح و اذا لا سمح الله قدر يبين اللي عمله بعد محاولات الطمس اللي بعملوها بحبطوه و بخلوه يندم انه فكر, واللي بعمل غلط بكرموه و بيعطوه جوائز و ممكن يصير سفير النوايا الحسنه للذمة والضمير, بنحكي للحكومه لو سمحتي بضربونا عراسنا, بنحكيلهم شكرا بضربونا كف, بنحكيلهم اسفين بضربونا الكف التاني.... احنا ما بدنا اياهم لا يزقفولنا ولا بدنا يحكولنا برافو ولا بدنا ضحكه رضا...بدنا حقوقنا ناخدها بدون ما ندوق المر, بدنا نعيش وناكل لقمتنا اللي بنستاهلها بعد تعبنا و كدنا, بمنتهى البساطه....بدنا نعيش.

The newest member of our family...Eveleen :)

كان موعد ولادة مرة اخوي ب 1-1-2011 و لكنها باخر شهر من كتر ما تعبت و زهقت كان نفسها تولد باي لحظه, ولمّا قربت نهايه السنه و تحديدا لمّا اتصلت فيها ب 29 -12-2010 حكتلي بما انها صبرت لهلأ وما ضل كم يوم فخلص الافضل عالسنة الجديده , وحكتلي عن البيبي اذا كانت عنيده زي اخوها عبود فأكيد هلأ بتقرر انها تيجي قبل, وسبحان الله تاني يوم اتصل اخوي عال9 الصبح بحكيلي هينا بالمستشفى و اجت اجدد حفيده في عيلتنا "ايفيلين" :)

ما تحكولي ما بزبط " عبد اللطيف" و "ايفيلين" زبطت معنا :)

و على رأي اخوي "بما ان مرته رضيت تكون "ام العبد" فشكرا الها اذا بتخليني اشوف البنت مش انو اسميها " :) و الاسم اجا من تجميع اسماء ماميتها و والدها لمرة اخوي :)

الاشي الجديد اللي عرفته من مرة اخوي التانيه ان في ناس كتير بس يعملو شهادات ميلاد "لبناتهم" بغيرو بتاريخ الميلاد يعني لو مثلا انولدو باخر 12 مثل ايفيلين بكتبوهم باول السنه اللي بعدها, لانه حرام نكبرها سنه كامله و بس تيجي تتزوج - البنت ما صارت شهر لسا - بتكون مواليد 2010 و بتكبر سنه كامله :$

وهالشي عرفته مرة اخوي لما جابت "نور" واكتر من وحده حكتلها انها تعمل هيك, مع انو "نور" بشهر 10 انولدت, حكولها عادي بتكرمي اللي عالكاونتر و بمشيلك اياها !!!

معقول لسا في ناس بفكرو هيك بهالزمن؟؟؟؟

Life Is Good Award Tag

After saying it loud and clear that I love tags, the lovely Rand chosen me to do the "Life is Good Award" tag

The "Life is Good Award" is actually a scanned Hallmark greeting card that comes with some questions to answer

1. If you blog anonymously, are you happy doing this? If you aren’t anonymous, do you wish you started out anonymously, so that you could be anonymous now?

For me I'm blogging anonymously and I'm happy with that and never regretted it :)

2. Describe an incident that shows your inner stubborn side

No one told me that I'm stubborn before ,I'm an easy-going person, unless some body act stupid with me....he/she will lose me for sure

3. What do you see when you really look at yourself in the mirror

I see a lovely little girl with a smiley small eyes looking at me :)

4. What is your favourite summer cold drink?

Fresh Strawberry Slush :) yummy

5. When you take time for yourself, what do you do?

Big bowl of popcorn with a good movie to watch ....this is relaxing for me

6. Is there something that you still want to accomplish in your life?

Hooohooooo....... kteeeer :)

7. When you attended school, were you the class clown, the class overachiever, the shy person, or always ditching?

The funny overachiever :)

Al7amdollelah usually I have many friends around me, I was not a perfect student I used to sing and take my desk as a drum :) but academic excellence has always been my ticket to get out of the troubles

8. If you close your eyes and want to visualize a very poignant moment in your life, what would you see

After all bad situations I faced and still facing al7amdolellah, I decided to empty my memory from all bad memories, and stuck only to the good ones, so I'll remember my brother's wedding,at the end of the wedding and when all the guests left ,my family and my aunt's family stayed there dancing and singing till the morning... since my brothers left home to work out, we rarely gather, it was the first time after 4 years

9.Is it easy for you to share your true self in your blog, or are you more comfortable writing posts about other people and events?

Before start blogging it was very hard for me to express my self and being that open to others, It wasn't easy to me to talk about my life with people, but blogging make it v easy, now no one can stop me inside and outside the internet world, I think after reading my blog u will find that I wrote A LOT about my "real" personal life, and that's why I'm happy that I'm blogging anonymously :)

10. If you had the choice to sit down and read a book or talk on the phone, which would you do and why ?

reading a book for sure, first of all I love second I can't talk on the phone for more than 5 minutes :S

As usual these days I'm late in seeing and doing the tag, so I don't know who did this tag and for whom it passed, I would like to invite u all to do it if u have time,and I would like to mention some of u here, so I would like to pass this award tag to

As usual to Sozan ....I know u r busy but we miss u

to my garabah Rula ....we miss u 7bebti at the blog-sphere

to my liddawee friend Jafar

to our Wednesdays nakshet mo5 Nader

to my Egyptian sweet friend Hiba

to my absent quiet friends Ahmad Hamdan and Ahmad Meri

to Abu Zaina ....because the 10 days r nearly over :)

And again to all of u :)

A note 3 alhamesh

Excuse my English :S ..... no spelling / grammar checking please :D

قهرني

انا بالعاده مش كتير صحبه مع كرة القدم, ولكن كأس العالم و مباريات منتخبنا الوطني هاد شي ما في نقاش اكيد, استغربت من اللي صار بعد فوز الاردن على السعوديه و فكرتهم اخدو الكأس, وتفاجأت بالرغم من فرحتي اكيد بما تلى فوز الاردن على سوريا, مش لكرهي للفريق السوري ولكن اشي طبيعي انّا نشجع منتخبنا الوطني و نفرح لفوزه, و لكن زياده كانت التعابير عن الفرحه, من باب انّه لسا ما اخدنا الكأس و من باب انهم دائما بس نفرح كتير و يبدعو بصيرو يلعبو بشكل غريب بعدها :( فمنعا من تكرار هالشي, نوع من التشاؤم من اعاده الاحداث يعني ....

بالليل و احنّا بنقلب بين القنوات شفنا منظر من مسلسل ولا عمرنا سمعنا عنّه على قناة الدنيا السورية و لكن طبيعي نضل 5 دقايق نتابعه - مش عارفه ليش هالعاده فينا - المهم التهينا و خلص المسلسل و بدا برنامج اسمه " الكورة بملعبك" للاعلامي الكبير اللي بصراحه اول مرّه بشوفو و ما عرفت شو اسمه ولكن اليوم بحبشت لاعرف اسمه و طلع "لطفي الاسطوري"...السيد "لطفي" اخد الموضوع كتير جدّي ان كان بالمقدّمه المبتذله اللي حكاها و ان كان باسلوب الحوار و طريقة اجراء الاتصالات التلفونيه و بقراءة المسجات, الشب او العمو مش عارفه, نسي انه لازم يكون حيادي باللي بطرحه انه يكون دبلوماسي بانتقاء كلماته و موضوعي بكل شي بحكيه, حتى ولو كان ما بعبّر عن رأيه الشخصي, انت كمحاور و كمذيع المفروض تكون حيادي, بتأسف لخسارة فريقك ولكن ما بتهاجم الفريق التاني اكيد.

المذيع المتألق, هاجم و بشكل واضح و بكلمات رنّانه المنتخب الاردني وحكا ان الحظ هو اللي وصلّه لهون و بما معناه ان لعيبة المنتخب الاردني ما بعرفو يلعبو وانهم كانو مغمورين لولا قبل كم سنه اجا المدرب الجوهري, وان المنتخب السوري "اهدى" الفوز للمنتخب الاردني اللي ما بستحقّه على طبق من ذهب" و وصلت فيه الجرأة انه يطلب عأساس انه بحكي بلسان الشعب, طلب من رئيس اتحاد كرة القدم السوري الاستقاله مثل ما رئيس اتحاد كرة القدم السعودي استقال و لمّا رئيس الاتحاد عصّب عليه و رفض السؤال و بيّن انه برأيه ان مش الشعب اللي طلب هيك طلب و هزّئه بشكل مش دبلوماسي و احمرّ و اخضرّ لمّا اعترض المذيع على ان المدرّب ما راح يستمر مع الفريق و بينّله ان هاد قرار المدرب ومن ساعة توقيع العقد بينهم, و اتصل برئيسة تحرير جريدة رياضيه و التاني هزّئته و حكتله بما معناه انه لا يزاود على وطنيه حد, وان كل الشعب و منهم اللعيبه ما حد بقدر يقلل من وطنيتهم.

و عند قراءة المسجات اللي اجت وحكا عن الاتصالات اللي وصلته واللي كلها ان الشعب بدو ينجلط و قلبه يوقف و انه واحد من المتابعين حكاله انه صار "يتفشش" بولاده" الضيف برضه ما سكت وحكا ان الحلول هي انّا نفكر مش مين يستقيل و مين نلوم و انه يا ريت نحاول نبعد عن العواطف بتفكيرنا ونعرف كيف نحل المشكله للمستقبل, الضيف كان رائع جدا بردوده , و بعد ما صار يقارن المذيع بعدد الهجمات و الضربات الركنيه و ال.... بين الفريقين, حكاله الضيف بس الاردن جابت 3 جوال بمرمى سوريا وهو اللي صار

المشكله بس جابو رأي الشعب الكل برقص و مبسوط و بحكو انهم ما بلومو حد غير تغيير المدرب باخر فتره, و الكل بدبك و رافع العلم و بغنو و بعبرو عن فرحتهم ورضاهم عن لعب اللعيبه و ما شفت حد بدو ينجلط ولا حد بتفشش بحد.

اليوم وانا بدّور على اسم الاخ عرفت سبب انه محموق لهدرجه, كل التعليقات اللي بتخصّ اسمه بتطالبه بالاستقاله لان من وجهة نظرهم هو السبب بهالخسارة لانه اوهم الشعب و اللعيبه بقوّتهم وجاهزيتهم و لانه طلع الاخ شانن حرب على المدرب القديم و هو السبب بانه تغير بوقت كتير قريب من هالمباريات.

بغض النظر عن اللي صار و فرحتي بفوز الاردن هلأ اكتر ومواساتي التامه لكل المشجعين السوريين و اقتناعي بانها كره يوم معك ويوم مع غيرك....بس قد ما قهرني المذيع باسلوبه و طريقته الغير احترافيه على قد ما انفش قلبي باللي معلقينه العالم اليوم

بالاخر بحب احكي للمذيع القذّ يا ريت ترجع تشوف المباراه مرّه تانيه و شغّل عاليوتيوب اغنيه و اسمع كلماتها و طبقها منيح...الاغنيه لمتعب الصقّار وهو بحكيلك " لد لد شيف انّه...كيف اخذ الطابه منه"

هلأ عرفت ليش بسموه عرس وطني

لانهم بضلّو يزمرو :)

يوما ما...

هل سأصل الى عنان السماء

لو فتحت يداي على مصرعيهما و قفزت ...

قفزت عاليا لألامس الغيمه هناك

هل ساخترقها ام ستضمني بين ثناياها

يقولون انها ابخره ... رطوبه ...هواء...ماء ...

اقول انها كمنطاد سحري

لو حاولنا ركوبه ستنعم علينا بجولة فوق سفوح النجوم

ماذا لو جعلتها بيتي و ابيت النزول؟؟

ماذا لو فرشتها بما احب؟؟

ماذا لو وضعت بها بيت للدمى ؟؟؟

ماذا لو طليتها بالوان الطيف و اكثرت من الزهور بينها؟؟؟

ماذا سيكون كل ذلك...اهو حلم ام حقيقه؟؟

كيف سأتاكد وانا لم احاول مسبقا؟؟

لا تقل لي تحليل...منطق...علم...

اريد الحقيقه التي يريدها عقلي

سأفرد يداي و اطير

قد يكون لي جناحان وانا لم اكتشف بعد لانني لم اتجرّئ على الطيران مسبقا

سأفرد يداي...لا...سافرد جناحاي و اطير

و احلّق هناك...فوق السحاب

و على السحاب

سأفترش تلك السحابه البيضاء هناك

و لتسر بي حيث شاءت فأنا احب المفاجئات

سأخذ دميتي معي لاسكنها في بيت الدمى هناك

ها انا سأقفز

ساقفز لا تمنعوني

سأجرب...لم لا

حسنا ...حسنا

ها انا اغلق النافذه و اعود الى غرفتي

و سيبقى السؤال....

هل لي جناحان ...

هل كنت سأطير...

هل كنت سأسكن تلك الغيمه

ولكنني اعد نفسي ...

يوما ما

سأفرد جناحاي و اطير الى هناك

اشي تاني عجبني

اقامتي بالامارات بتكون ما بين خواني التنين, واحد بدبي و التاني بالعين -حاسه حالي ويسبر عويس :)- المهم خلال فترة تواجدي بدبي كان اخوي يضطر يروح يومي على ابوظبي يطلع من الصبح يرجع عال 12 بالليل فكنّا انا ومرة اخوي نطلع لحالنا خلال النهار بالتكاسي, التكسي مرتب و نظيف و لا يخلو الامر مرات من بعض الروائح اللي بترجع لطبيعه اكل السواق و اللي بالغالب بكونو هنود :$ لكن اجمالا الوضع منيح.....نسبيا :$

لا يخلو الامر من انهم يبينو انهم مش عاجبهم ان في عرباية بيبي, و القانون الاماراتي بلزم السائق ينزل و يحمل الشنط او العربايات وهو اللي يحطهم بالسياره, بس اكتر شي لفت نظري هو شي بنعاني منه كتييييييييييييييير بالاردن و اللي مكتوب على الورقة اللي ملزّقة بكل تكسي على الكرسي من هيئة الطرق و المواصلات

بالاردن كتير من سواقين التكاسي بنسو / بتناسو يشغلو العداد و بهيك بتضر انك تنحرج و تدفعله اللي هو بتقديره و اللي هو متعود انه ياخده على روايته من اللي بوصلهم بالعاده لهالمكان, و يا بصير طوشه يا بتدفعله وانت ساكت :)

طلع بالامارات اذا سائق نسي يشغل العداد فاااااا " تعتبر الرحلة مجانيه" :) كتير عجبتني هالفكره

مشكلتنا اذا ما في قانون يشكمنا ما بننشكم من نفسنا, يعني طول ما هو ما في قانون يلزم السائق بطريقة تعامل و بشروط و قوانين معينه يتّبعها ما بلتزم باي شي و بالعكس بصير يبع من عنده كمان.

ملاحظه ع الهامش

ما بعرف اذا انتبهتو لعداد Blog For Jordan Day العداد بدا بالعد التنازلي ليوم الكتابه عن و للاردن....ضايل 59 يوم فجهزو حالكم لان الوقت صاير يطير طيييييييييييييييييير :)

اشي تاني

مش عارفه ليش اول مرّه سمعت فيها خبر السماح للاردنيات بالعمل في النوادي الليليه و اللي انا اساسا ما كنت اعرف انه كان ممنوع يشتغلو و هلأ انسمحلهم و مش عارفه شو مناسبة هالقرار بهالوقت , و انه انا عقلي المتواضع فكر انه بدل ما يسكرو هالنوادي من اساسه لا بدهم يخلو العالم تطالب بوجودها لانها مصدر رزق "للاردنيات" و الاردنيين .... بس ما بعرف ليش اول ما قرأت الخبر اجا ببالي هاد المشهد من مسرحية العيال كبرت

اختي حترقص....اختي حترقص :$

فكرة حلوه كتير

من الاشياء اللي بتتغير بحياة الشخص بس يتزوج هو اكتسابة لبعض العادات من الطرف التاني و اللي بتصير تلقائي عاداته هو, في منها السيء و في منها المنيح, مثل حب القراءة مثلا, في ناس بتشجع الطرف التاني للقراءة وفي ناس بتشجعه على اهمال القراءة و البعد عنها ومش عن قصد هالشي, هو بس انه ما بحب القراءة و يومهم ما بكون في وقت مخصص للقراءة.

انا و اخواني عندنا تعلّق رهيب باغراض الماضي و خصوصي الاواعي, يعني اكيد بنحب نتبرع بالاواعي و لكن في اشياء كتيره محطوطه بالخزانه بركي بيوم صحلّنا نلبسها او كنّا نحبها بوقت ما كان موديلها و مش قادرين نستغني عنها و الها سنه او اكتر بالخزانه, مميتي دايما بتعاني منّا بهالخصوص و لكن للاسف ما عرفت تخلصنا تماما من هالموضوع.

تزوجو خواني واحد ضلّت عنده هالعاده و مرته بتعاني منه و واحد "شفي" - على اعتبار انها حاله مرضيه يعني - زوجة اخوي التاني ما بتحب تخلي شي ما بتستخدمه و هالشي يطبق على كل شي مش بس الاواعي, اذا اشترت تنورة جديده القديمه فورا بتنحط للتوزيع, هي هيك طبيعتها من الاردن و بالامارات استمرت, انا بالاردن بس اقرر اعمل غارة عالغرفه لانظفها بالرغم من استمرار الحاله ولكن بطلع بكم كيس للتوزيع, كنّا ننقلهم من مكان لمكان مش عارفين وين نروح فيهم و لمين نعطيهم و مرات نعطيهم لاي حد بنتوقع انه يستخدمها بس مش دايما في احتماليه لاستخدام الاواعي لانه مستحيل كل شي يكون مقاسه صح, و بعدين اندليت على جمعيه صنّاع الحياة و اللي الهم مخزن خصوصي لهيك شي و في منهم شباب و صبايا بوزعو الاواعي بين الصالح للاستخدام و الغير صالح للاستخدام و بوزعوهم حسب المقاسات, وهمه بعرفو ناس محتاجين و شو عندهم ولاد و بوزعو الاواعي, الله يجزيهم كل الخير يا رب.

الاشي اللي عجبني بالامارات هو اني شفت باكتر من مكان فيه تجمع سكّاني زي صندوق كبير مخصص للاواعي زي اللي واضح بالصورة هاي

حسب ما فهمت من اخوي انه هالصندوق تابع لشركه ممكن تعيد تصنيع الاواعي او توزعهم, هالصندوق بدبي شفته و اخوي ساكن بالعين, بحكيلي ان عندهم شي تاني وهو انه في سيارات كبيره تابعه للهلال الاحمر موزعه باكتر من شارع بالعين و الكل بعرف مكانهم, بياخدو الاواعي و همه ماشيين بحطوهم بهالسيارات و بضلهم ماشيين بدون ضروره ان حد يكون موجود او ياخدهم منهم و هالشي سهّل كتير عليهم موضوع التخلص من الاواعي القديمه و همه متأكدين انها ان شاء الله بتوصل لللي بحتاجها عن جد.

اشي تاني شفته بدبي لكن مش بكل مكان هو انهم بحطو سلاّت جنب بعض لتوزيع القمامه حسب نوعها حتى يصير اعادة تدوير الها هالشي مش الكل بتعامل معه لانه لسا عدد قليل اللي اساس بوزعو مهملاتهم بالبيت و بصنفوهم هيك ليسهل كبهم بالمكان المخصص و لكن كفكره و كبدايه كتيييييييييييير حلوه و مع الوقت الناس ببتعود.

يا ريت نبدا نطبق مثل هالافكار بالاردن ليتشجعو الناس على التخلص من الاشياء اللي مش محتاجينها و بطريقه سهله و يسره , و لحتى شوي نحافظ على البيئه اللي عنا, هو اي نعم في مواقع كتيره بتكون سلات القمامه محطوطين بكل مكان وفاضيين و الارض مليانه اوساخ و كياس و قناني و علب عصير و بلاوي زرقه, اي مرات بشوف بامبرز بيبي مرمي بنص الحديقه هيك ولا حتى مسكر زي العالم والناس :$ بس برضه يمكن يمكن يكون في امل لو حد بدا و بعدين الباقي قلدو او استحو عالقليله.

زيارة ع السريع :)

فعلا صدق اللي قال

خير الكلام ما قل و دل

هالصوره صورتها من جريده قبل كم اسبوع و حششت ضحك بس قرأتها

هلأ ما حد بنكر ان صوت اصالة حلو و لكن "بس" و بركز على كلمة "بس" بالغنا

و شفناها كيف بس تحكي دايما بتخبص الدنيا

زي لمّا حكت في لقاء بما معناه ان مش ضروري ان شكل الفنان يكون حلو ليحبوه الناس

و اكبر دليل نبيل شعيل!!!

جد انها ولا حبّه

هاد عاساس انها راضيه عن شكلها تماما و لهيك ولا عملية تجميل عملت

ولا قلبت فجأه زي الهنود

و اما معجزة الجيل فما الي عليه اي تعليق زياده عن المكتوب :)

زيارة خفيفه و اتمنى تكون لطيفه لاتطمن عليكم

مساكم و صباحكم فل و ياسمين :)

تصبحو على خير لاني بعد الصحوه بكير و روحت دبي

و تقضاية وقت بجنن مع ناس بجننو - راح اكتفي بهالقدر لانه لو الوضع كان غير كان كتبت بوست كامل عن الناس اللي تعرفت عليهم وحبيتهم كتير :) - المهم فأنا صايبني السطلان العجيب هلأ

نراكم :)

لا زلت اسير

دائما ما تعودت على تحسس الخطوات امامي و لا انقل الخطوة الا وانا متأكده من صلابة ما تحتها و متانته... حتى التقيتك

معك اصبحت خطواتي قفزات بين احلامي, فكنت اقفز من مكان الى مكان ومن حلم الى حلم بحرية مطلقه و بتلقائية هذه الاحلام, كان سحر احلامي يدفعني, و نبرة صوتك و كلامك الموزون كأليدان اللتان تمسكان بيداي لتساعدني على القفز عاليا لاصل الى الخطوه التاليه باحلامي, كنت كالطفلة الصغيره, فرحه بتلك القفزات ولا اريدها او اريدك ان تتوقف.

هنا سنجلس...هنا سنأكل....هنا سنمشي تحت المطر ... هنا سنتخاصم و هنا سأعاتبك...وهنا ستسمعني احلى الكلام,تسليم واستسلام تام لاحلامي و لكلماتك...كنت اشعر بنسيم الهواء يداعب وجهي وانا اقفز, توقف دماغي عن العمل, تعطيل شامل لجميع الحواس ,حتى اتى اليوم الذي ضعف فيه صوتك و فقد نبرة الثقه , اخفضت الصوت حتى اختفى ,وبعد ان تعودت على القفزات العاليه رميتني لاعلى وافلّت يداي في منتصف الطريق و تركتني لاقع ,لاسقط و اتدحرج حتى وصلت الى بداية طريقي معك, وقفت بسرعه و نفضت غبارك عني ورفعت راسي ومشيت, رجعت لاتحسس الطريق امامي بحذر اكبر, هكذا احب ان ارى نفسي وان يراني الناس قوية لا تتأثر, سرت و لا زلت اسير.

ولكن اجسادنا دائما ما تنهار بعد الاستقرار, دائما ما تظهر اثار الكدمات متأخرا على اجسادنا, يداي لم تعودا قادرة على الامساك بشيء غير الجدار , و قدماي تهتزان من تحتي خوفا من الطريق, اما قلبي فأغلقته ليبقى تركيز عقلي على بصري فقط, صدق من قال ان الزمن يشفي كل الجروح, زادت الاوجاع و اتسعت و تغيرت الوانها ما بين لومك و لوم النفس و لوم الظروف حتى اتى اليوم الذي نسيت فيه انني سقطت ..... فها انا اتحسس الخطوات امامي ولا انقل الخطوة الا وانا متأكده من صلابة ما تحتها و متانته بدون خوف ولا زلت اسير.

كلام بكلام

حكي كتير بمعنى او بدون معنى بس قررت اكتب اي شي بخطر ببالي, في قفزات وفي ترابط ويمكن ما في فاذا راسكم بوجعكم بلاش تقرأو لاني بضمنلك انو حيزيد

افكار و قصص و حكي و مشاعر لخابيط لخابيط

قلب بيدق لضحكه صغيره و قلب بيبكي لصورة بعيده, نور جديد بالحياة بنوّر و وجه بختفي من الصوره الكبيره, دمعة فرح و دمعه حزن, لقاء و فراق بوداع و بدون وداع, صورة كبيره بتزيد الوجوه و فيها و بتختفي وجوه , بداية حياة و نهاية حياه وكل اللي بنضاف واللي بختفي بضل مجهول لوقت ما يصير.

****************************************

تقريبا الكل بعرف اني ما عندي مشكله بعمري, يعني هاي الازمة عند بعض البنات انو ياااااااااااااااويلي تعديت ال 30 و هاليأس و الهم والغم وهالقصص طبعا اللي بكونو جد مغمومين مش اللي بتخوتو عالموضوع, انا و الحمد لله ما عندي مشكله , هلأ همه بحكو ان الشباب شباب القلب, في منو هالحكي يمكن بقصدو القلب اللي مش معبى مأسي وهموم, لانه بنشوف ناس ببداية العشرين و كأنهم بال 70 من هموم ومشاكل الدنيا الله يفرجها عالجميع, بس برضه اعتقد ان العمر هو احساس, يعني احساسي اني عجّزت بغض النظر كم عمري بختلف عن احساسي اني بكل سنة بزيد خبرات و نضوج لعقلي و اكيد ما بحكي عن انو احساسي اني 17 و ابدا بمراهقة متأخره, الاحساس يس بالعقل يعني , و برضه تصرفات, يعني بس انا يصير حكمي عالاشياء بناءا عالعمر بكون عجّزت , بقصد الامور اللي بتقبلها الدين , مثلا لمّا نروح على حديقه وفيها مراجيح شو المانع اني اتمرجح؟؟ وين المشكله و خصوصا اني ما بعمل اشي غلط ولا بتمصوع !! وين المشكله اذا كنت انا و اهلي و في مراجيح و اتمرجح, في ناس بحكولي بهالعمر و بدك اياني اتمرجح...شو يعني و شو دخل!!! او اني بمدينة الملاهي اركب اللعب و اسوق السيارات و الحق اخوي و اضل اضرب سيارته :) وين المشكله وشو المانع اني اكون 33 و العب!!! وفي امثله كتير تقاس على نفس المبدأ

شو سبب الحكي عن الموضوع!!!

قبل كم يوم بحكي قصه مع مرة اخوي جبت سيرة عمري....و نسيت عمري....

هو حيصير 33 ويلا 34 !!!

جد نسيت O_o

و صرت اعدّعلى ايدي.....77....87...97...2007 هي 30 ول 2010 هي 33 اذا حصير 34 و فجأة انصدمت

كيف نسيت !!!!!!

****************************************

الزيارة الماضيه للامارات كتبت موضوع عن علاقة خواني بمرتاتهم وانه العلاقه كتير فيها ملل و فتور صار, السنة لاحظت التغير للعكس :)

الحمد لله العلاقة بينهم كتير ممتازه وخواني و مرتاتهم حكولي بمواقف مختلفة انهم حاسين حالهم كتير مستقرين و كتير مبسوطين و الحمد لله, بوقتها في تعليق اني كشفت اسرار خواني و المعلّق او المعلّقه دعولي بزوج "يكتم سرّي" و لهلأ بس اتذكر هالتعليق برجع لنفس المشاعر السيئه اللي صابتني بس قرأت التعليق

اللي اكتشفته ان كل زواج اله وضعه الخاص و بتختلف الفترة اللي بتستقر فيها العلاقه لتوصل الى احلى مراحلها و ان هالشي بعتمد على الطرفين و الارداة و العمل للوصول لنقطه واحده يجتمعو فيها و يتفقو عليها, هي اكتر من حقوق و واجبات, هي التصرف بنابع محبّة مش واجب, و التفكير بالشخص التاني قبل التفكير بالنفس

****************************************

بس خلاص :)