قهرني

انا بالعاده مش كتير صحبه مع كرة القدم, ولكن كأس العالم و مباريات منتخبنا الوطني هاد شي ما في نقاش اكيد, استغربت من اللي صار بعد فوز الاردن على السعوديه و فكرتهم اخدو الكأس, وتفاجأت بالرغم من فرحتي اكيد بما تلى فوز الاردن على سوريا, مش لكرهي للفريق السوري ولكن اشي طبيعي انّا نشجع منتخبنا الوطني و نفرح لفوزه, و لكن زياده كانت التعابير عن الفرحه, من باب انّه لسا ما اخدنا الكأس و من باب انهم دائما بس نفرح كتير و يبدعو بصيرو يلعبو بشكل غريب بعدها :( فمنعا من تكرار هالشي, نوع من التشاؤم من اعاده الاحداث يعني ....

بالليل و احنّا بنقلب بين القنوات شفنا منظر من مسلسل ولا عمرنا سمعنا عنّه على قناة الدنيا السورية و لكن طبيعي نضل 5 دقايق نتابعه - مش عارفه ليش هالعاده فينا - المهم التهينا و خلص المسلسل و بدا برنامج اسمه " الكورة بملعبك" للاعلامي الكبير اللي بصراحه اول مرّه بشوفو و ما عرفت شو اسمه ولكن اليوم بحبشت لاعرف اسمه و طلع "لطفي الاسطوري"...السيد "لطفي" اخد الموضوع كتير جدّي ان كان بالمقدّمه المبتذله اللي حكاها و ان كان باسلوب الحوار و طريقة اجراء الاتصالات التلفونيه و بقراءة المسجات, الشب او العمو مش عارفه, نسي انه لازم يكون حيادي باللي بطرحه انه يكون دبلوماسي بانتقاء كلماته و موضوعي بكل شي بحكيه, حتى ولو كان ما بعبّر عن رأيه الشخصي, انت كمحاور و كمذيع المفروض تكون حيادي, بتأسف لخسارة فريقك ولكن ما بتهاجم الفريق التاني اكيد.

المذيع المتألق, هاجم و بشكل واضح و بكلمات رنّانه المنتخب الاردني وحكا ان الحظ هو اللي وصلّه لهون و بما معناه ان لعيبة المنتخب الاردني ما بعرفو يلعبو وانهم كانو مغمورين لولا قبل كم سنه اجا المدرب الجوهري, وان المنتخب السوري "اهدى" الفوز للمنتخب الاردني اللي ما بستحقّه على طبق من ذهب" و وصلت فيه الجرأة انه يطلب عأساس انه بحكي بلسان الشعب, طلب من رئيس اتحاد كرة القدم السوري الاستقاله مثل ما رئيس اتحاد كرة القدم السعودي استقال و لمّا رئيس الاتحاد عصّب عليه و رفض السؤال و بيّن انه برأيه ان مش الشعب اللي طلب هيك طلب و هزّئه بشكل مش دبلوماسي و احمرّ و اخضرّ لمّا اعترض المذيع على ان المدرّب ما راح يستمر مع الفريق و بينّله ان هاد قرار المدرب ومن ساعة توقيع العقد بينهم, و اتصل برئيسة تحرير جريدة رياضيه و التاني هزّئته و حكتله بما معناه انه لا يزاود على وطنيه حد, وان كل الشعب و منهم اللعيبه ما حد بقدر يقلل من وطنيتهم.

و عند قراءة المسجات اللي اجت وحكا عن الاتصالات اللي وصلته واللي كلها ان الشعب بدو ينجلط و قلبه يوقف و انه واحد من المتابعين حكاله انه صار "يتفشش" بولاده" الضيف برضه ما سكت وحكا ان الحلول هي انّا نفكر مش مين يستقيل و مين نلوم و انه يا ريت نحاول نبعد عن العواطف بتفكيرنا ونعرف كيف نحل المشكله للمستقبل, الضيف كان رائع جدا بردوده , و بعد ما صار يقارن المذيع بعدد الهجمات و الضربات الركنيه و ال.... بين الفريقين, حكاله الضيف بس الاردن جابت 3 جوال بمرمى سوريا وهو اللي صار

المشكله بس جابو رأي الشعب الكل برقص و مبسوط و بحكو انهم ما بلومو حد غير تغيير المدرب باخر فتره, و الكل بدبك و رافع العلم و بغنو و بعبرو عن فرحتهم ورضاهم عن لعب اللعيبه و ما شفت حد بدو ينجلط ولا حد بتفشش بحد.

اليوم وانا بدّور على اسم الاخ عرفت سبب انه محموق لهدرجه, كل التعليقات اللي بتخصّ اسمه بتطالبه بالاستقاله لان من وجهة نظرهم هو السبب بهالخسارة لانه اوهم الشعب و اللعيبه بقوّتهم وجاهزيتهم و لانه طلع الاخ شانن حرب على المدرب القديم و هو السبب بانه تغير بوقت كتير قريب من هالمباريات.

بغض النظر عن اللي صار و فرحتي بفوز الاردن هلأ اكتر ومواساتي التامه لكل المشجعين السوريين و اقتناعي بانها كره يوم معك ويوم مع غيرك....بس قد ما قهرني المذيع باسلوبه و طريقته الغير احترافيه على قد ما انفش قلبي باللي معلقينه العالم اليوم

بالاخر بحب احكي للمذيع القذّ يا ريت ترجع تشوف المباراه مرّه تانيه و شغّل عاليوتيوب اغنيه و اسمع كلماتها و طبقها منيح...الاغنيه لمتعب الصقّار وهو بحكيلك " لد لد شيف انّه...كيف اخذ الطابه منه"

هلأ عرفت ليش بسموه عرس وطني

لانهم بضلّو يزمرو :)