فهششتُها :)

الي فترة مش طايقة النت :$ مش عارفة شو مالي,في ببالي اشياء كتيرة اكتبها, بس مش قادرة ارتب افكاري, و مش عار فة ليش كله نكد اللي بخطر ببالي, حتى المدونات اللي بحب اقرأهم بقرأ جزء منهم و ببدا اعلق و فجأه بصير اشي يبعدني عن النت و بالشغل ضغط كتير ما بقدر اشبك الا دقائق برضه ما بلحق اقرأ اشي, بس الحمد لله رجعلي مود النت و اكيد ان شاء الله حقرأ كل شي جديد و اعلق عن قريب :)

ان شاء الله تكونو كلكم بألف خير و كل اموركم تمام التمام, و بتمنالكم بكرة اخر يوم بالاسبوع يكون بجنن, بالنسبة الي الخميس كأنه جزء من العطله, و بتمنالكم نهاية اسبوع زي ما بدكم واحسن كمان :)

اليوم اخوي فرجاني هالفيديو, قمّة التحشيش, والتحشيش بالمعنيين المحشش من الحشيش و المحشش من الضحك :)

اتركم مع الفيديو :)

زهرتي يا زهرتي

بحب كل فترة وفترة اغير ديكور المكتب ليصير في تجديد نفسيه شوي, من يوم ما سافرت صاحبتي اللي كانت معي بالمكتب و انا مش جاي ابالي اعمل اشي جديد, مع ان اللي اجت مكانها صاحبتي برضه بس في اشي ناقص, الاشي الوحيد اللي بعمله هو تنظيف المكتب و اجيب نوع جديد من المعطر و اغير الالعاب المحطوطين على طاولة الكمبيوتر, انا من محبين تجميع الالعاب من كندر سيربريز :$ بعرف ان عمري 150 سنه بس بحبهم شو اعمل, جديد حسيت اني لازم اعمل شي, فاشتريت زريعه واللي هي عبارة عن وردة اسمها حسب ما روى البياع "عرف الديك" سبحان الله شكلها بجنن وكأنها صناعيه و لونها كتير حلو, وفيها اشي زي المخمل, جبتها و حطيتها بالمكتب و كل يوم بسقيها مع انها باخر موجة شوب حسيت انها تضررت بس ان شاء الله ما يصيرلها اشي, كنت حابه اشتري سمك بس بصراحه خفت من المسؤوليه وخصوصا اني بعطل يومين, و بخاف تموت و ما راح اسامح حالي بصراحه :$

المهم من يوم ما جبت الزريعه وانا كل ما اسقيها الصبح لازم اصير اغنيلها :$ جد مش عارفة كيف خطرتلي الاغنيه مع انها اشي من زمااااااااااااااااااااااااااااااااااااااااان , بس فجأه رجعت :)

مشاهدات من يومي....2

المشهد الاول

قبل اسبوع تقريبا رحت عملت فحص دم , ما بعرف شو الاجراءات بالزبط, مع اني رحت اكتر من مرة بس ما شاء الله الذاكرة عندي مشطوبه, و انا واقفه بدي اعطى الورق للمرضه اللي قاعده بالاستقبال, في بنت عمرها 15 او 16 اعتقد هي وامها طالعين من الغرفة اللي بياخدو فيها العينات, البنت رافعه عن ايدها و حاطه قطنه وثانيه ايدها وبتشد عالقطنه و الدم معبي القطنه و معبي ايديها و بنقط عالارض, كل القاعدين بالغرفه انصدمو, انا صرت ادور بشنطتي على بلاستر طبي بالعاده بكون معي, الاخت اللي قاعدة عالاستقبال صارت تصرخ عالبنت وتحكيلها " يا حبيبتي ..شوفي كيف الدم بنقط عالارض و احنا هلأ بنمشي عليه و بنروح عالبيت بنمشي ببيوتنا, هاي نجاسه!!!" الكل مصدوم باللي حكته الممرضه, و البنت مش عارفه شو تعمل بحالها و طلعت من الغرفة وللاسف ما لحقت اعطيها البلاستر ولا احكي اشي للمرضه اللي ما بتستحي ولا بتحس بشلن, انقهرت من حالي اكتر اني ضليت ساكته :( او عالقليله قمت مسحت للبنت ايديها و حطيتلها قطنه او فاينه جديده.

اللي دايما بقهرني ان هالعالم اللي زي هالممرضه بحكو عأساس انهم بحكو بالدين, بمسكو بجزء و بتركو كل الاجزاء, نسيو ان الدين المعامله, نسيو انه "لا يؤمن أحدكم حتى يحب لأخيه ما يحب لنفسه" - جد بهزني هالحديث - تخيلو لا يؤمن... لا رحمة ولا شفقه ولا احساس, وبس بطبقو اللي بتناسب مع ظرفهم بهاللحظه, لانه ممكن لو همه كانو بموقف تاني ما يطبق هالجزء برضه.

المشهد التاني

رحت عالصالون وانا هناك اجت وحده هي و ابنها, الام شكلها صغيرة بالعمر والولد عمره تقريبا 4 سنوات,, الولد امور و لبسه بجنن, قعدت الام تستنى تيجي وحده من الكوافيرات تشوف شو بدها ...شوي الولد مصرّ الكوافيرة تاكل من مصاصته :$ و يهديك يرضيك يرضى انها ما بدها و يبكي و يشد على حاله , الام حكتله

"Enough Saif you will drop it on the floor...don't be a naughty boy now "

وبالاكسنت الامريكيه الصح :) الولد قعد عجنب و هو زعلان, شوي بدو شيبس, وصار يبكي و يصرخ

"Ok I'll give you some but you have to promise me to set and be a good boy mashee"

قعد شوي وبعدين مسك موبايل الكوافيره عن الطاوله وبدا يلعب فيه, الكوافيره المسكينه انصدمت و بدها تاخده منه صار يهرب ويضحك وهي تلحق وراه, والام طبعا شو اتطلعت عليه نظره عتب و حكتله " هيك مامي...شو عيب..نوتي بوي سيف "

انا بهاي اللحظه بصراحه ولأول مره حسيت اني مش طايقه طفل :$ جد مش طايقته ومش طايقه اضحك بوجهه وهو بعمل حركات من ورا المرايه

الام بدها تصبغ شعرها, الولد صار يتزانخ هب وقّع الصبغه عالارض, الكوافيرة المسكينه طبعا بدها رضى الزبون, حكتلها بسيطه و مسحت اللي وقع و راحت جابت وحده جديده, قامت الام و نتشت الولد, نتشت لانه فجأه صار بأيدها ومرفوع عن الارض, حكتله

" walak ya 7awan ro7 2ngale3 w 2og3od honak w bedeesh 2asma3 nafasak "

انا نزل علي الضحك و الكوافيره اللي معي مش قادرة تمسك حالها و حاولنا ما نبين حفاظا على مشاعر هالمسكين

بس ليش التمثيل و الأنزعه هاي من اولها احكيلو كلمتين بالعقل و بكل هدوء و خليه يقعد وياكل اكلاته وخلصت خلصنا :)

مشاهدات من يومي ...1

6 Secrets Tag :)

انا من الناس اللي بحبو ال Tag بصراحه :) و بتزكر اول مره SimSim حطت اسمي لاعمل Tag شو انبسطت من كل قلبي :)) و قبلها كان في واحد لقيته وانا ببحبش في مدونة مياسي و من غير ما ينحط اسمي جربته :) وبرضه في واحد لقيته بمدونة Sharifo وبرضه جربته لحالي :)

هلأ نيجي لهاد ال Tag اللي وصلني من الانسة كيّاله , ما بتتخيلو قديش عصرت مخي عصر لاكتب 6 اسرار عني :$ مش لانه ما في اسرار بس بدور على اسرار ممكن تنتشر عالهوا :) غير اني كتبت قبل 25 اشي و قبلها 7 اشياء ...فشكله ما ضل كتير, خلينا نبدا

1. انا من يوم ما بديت التدوين وعندي هواية البحبشه في المدونات اللي بحب اتابعها, بمسكها من اول بوست و كل يوم بقرأ شوي لاوصل لاخر بوست, ما بعلق بس بهيك بتعرف اكتر على المدون او المدونه, مش فضول, بس بدي ما يروح علي اشي من كتاباتهم الرائعه, فاللي الو زمان بدوّن وقبل ما اتعرف على مدونته يتأكد اني بحبشت فيها :)

2. اشي اليوم اكتشفته, انا كنت افكر حالي بحب كل الاطفال, اليوم اكتشفت اني ما بحب الصغار الزنخين و القليلين ادب :$ البوست القادم بكتبلكم شو صار

3. انا بحب شعر البنات كتير كتير ...كل ما اشوف البياع او اسمع الصفيره فورا لازم اشتري و مش بكيت او بكيتين لا باكل لتصيبني صدمه سكر مع اني ما بحب الحلويات بشكل عام و بفضل الموالح :)

4. انا اجتماعيه بحدود بأول لقاء, بكون شوي حذره لاعرف اللي قدامي و هالشي مرات بخلي الناس تتهمني بشوفة الحال :$ مع اني ابدا مش هيك وبأني جامده وجدّيه, بس اللي بتعرفو علي منيح بعرفو اني عكس هالصفات, و هاد الحذر ما بمنع اني دائما بنصدم بالناس, لاني بروح لاخر حد بكل شي, اذا حبيت بحب لاقصى حد واذا كرهت بكرة لاقصى حد, ولهيك دايما بنصدم :(

5. بالجامعه كان لقبي رجل آلي :) وهالشي اكتشفته بالصدفه, مشيتي كانت سريعه و عسكرية على رأي ماما, كنت ماشيه رايحه من مبنى لمبنى سمعت شب بحكي هي اجا الرجل الآلي, بتطلع اشوف مين هو, لقيتهم بتطلعو علي, ما قدرت امسك حالي و صرت اضحك, همه انصدمو, كانو بفكروني ما بضحك :( حتى لمّا رجعت اخد شهاداتي مريت على صاحبتي بالمختبرات, وسلمت عالاساتذه انصدمو, بحكولي هلأ انتي اللي كنتي بتدرسي عنّا بالجامعه؟؟ كاينه كشرة كشرة وانا مش عارفه :)

6. الي تقريبا سنتين في عالم التدوين و لليوم ما بتتصورو الفرحه اللي بكون فيها بس اشوف تعليق :))) جد الموضوع ما بصير عادي عندي, بنبسط بالتعليق زي فرحتي بأول تعليق وصلني.

هيه... هيه خلصت الواجب :)))

تعديل..

طلعت مش مكمله الواجب :$ شكرا لماهر اللي نبهني واللي حيكون اول المرشحين لعمل الواجب :)

هلأ بما اني بحس ان في ناس ما بحبو هالمواضيع وهالحركات , و بما اني كتير متأخرة بالواجب والكل تقريبا انذكر اسمه فأنا برشح اسم ام عمر و اي حد بحب يعمل الواجب يعمله :)

دائما بتنوروني

من يوم ما دخلت لعالم التدوين وانا يوم عن يوم بتعلق فيه اكتر

و تعلقت اكتر باخوان واخوات تعرفت عليهم عن طريق التدوين, و في مدونات صرنا كتير قراب من بعض و صارت بينا ايميلات و مسجات وتلفونات, ولكن للاسف لهلأ ما زبط انّا نتلاقى, حتى مع قرابتي رولا اللي اكتشفنا بمحض الصدفة انّا مش بس جيران, لأ و طلعنا قرايب.

اللي خلاني اكتب هالمدونه انه انا اول ما غيرت شكل المدونه انوعدت بمفاجأه زي هدية للنيو لوك :) من اخوي و صديقي المدون أشرف محيي الدين, واللي انا من اشد المعجبين بكل ما بكتبه في مدونته افكار وتساؤلات واللي بطرح فيها كل اسبوع فكرتين و حولهم الكثير من التساؤلات.

صديقي أشرف هالاسبوع كتب موضوع " نجتمع على همسات واحده" وفيها كتب عن مدونتي اشياء اسعدتني جدا وبتمنى اني اكون هيك فعلا وان جميع اللي بحبو يتابعو مدونتي هيك شايفيني و شايفين مدونتي ....ما بدي احكي كتير لان شهادتي بأي مدونه من اللي بحب اتابعهم حتكون مجروحه لاني جد كتير بحبهم, لكن بسعدني وجودكم بحياتي و ان شاء الله اني اكون ضيف خفيف الظل في حياتكم :)

ضحية مين بالزبط؟؟

بنت خالي بتشتغل مدرّسة في مدرسة حكوميه في منطقه فقيره, دايما بتحكيلنا قصص عن البنات ومستواهم المتدني وكيف بس توصل وحده منهم العاشر فورا بتتزوج, واذا كملت توجيهي اكيد اكيد بتكون مخطوبه.

كل مرّة بنلتقي بتحكيلنا مغامرة جديده, بس هالمرة القصه كانت عجيبه فحبيت اشاركم فيها, سامحوني لان الموضوع طويل.

حكتلنا عن بنت بصف تاسع انتقلت لمدرستهم نقل تأديبي من مدرستين قبل, يعني مدرستهم كانت الثالثة, و بالصدفه بنت خالي كانت مربية الصف, بتحكيلنا حاولت احتوي البنت و اشركها بكل شي, ودائما احكي معها بلطافه مع انها جدا دفشه بالحكي, بالاذاعه...عريفة نظام...بتوقيع الحضور والغياب, حتى بجائزة الملك عبد لله للتفوق الرياضي حطوها مع انها مش متفوقه رياضيا بس علشان يرفعو من معنوياتها, لكن ابدا البنت دائما عنيفه مع الطالبات, وحتى المرشدة الاجتماعيه يأست انها تحكي معها, لان البنت ما بتتجاوب بالمرة, اضطرت بنت خالي تكتّبها مجلسين ضبط, مرة لانها ضربت بنت بعصايه و البنت اغمى عليها و اجو اهلها عالمدرسة, ومرة لانها هددت معلمة ,حكتلها " احفظي ملامح وجهك منيح لانك راح تشتاقيلو بس ارمي عليكي ميّة نار " :$

المهم بنت خالي بتحكي انه بسبب مجالس الضبط ردت انتقلت نقل تأديبي لمدرسة رابعه, البنت كرهت بنت خالي و يوم احتفال المدرسة بعيد الاستقلال نطت من السور وصارت ترمي على البنات وبنت خالي حجار و اوساخ, بتحكي بنت خالي طنشتها وبعدت و اخدت البنات حكيتلهم احنا بنحتفل بيوم وطني و ما بدنا تخرب الفقرات, بتحكي بنت خالي فجأه صارت كراسي تنرمى علينا, و ما لقت البنت الا هاجمه عليها, بنت خالي بدها تهجم اجو معلمات وطالبات مسكوهم, بتحكيلنا بنت خالي مش منظر اهرب منها او ما اعمل شي, انا لساتني مدرّسة بهالمدرسة و منظري ما راح يكون منيح قدام الطالبات, هدي الوضع وراحت بنت خالي عغرفة المعلمات, شوي بحكولها اهربي اهربي البنت جابت "قنوة" وبدها تضربك, برضه ما هربت و البنات والمعلمات مسكو البنت و مشي اليوم.

بنت خالي بتحكي لاهلها اللي صار, اخوها نصحها تروح تشكيها بالشرطه, بلاش تاني يوم تأذيها البنت ومش متأكدين لوين ممكن توصل بتصرفاتها, وفعلا تاني يوم من الصبح راحت عالمخفر ويا دوب حكت للشرطي عن البنت, بحكيلها مين قصدك؟؟ فلانه!!! واللي هي البنت نفسها, بتحكيلو اه , حكالها هلأ طلعت سيارة تجيبها من المدرسة, اتصلت المديرة وبتحكي انها متهجمة عالمدرسة بسكينه!!!!! و حكولها انها لازم تروح تشكي بمخفر تاني بنفس منطقه المدرسة وفعلا هاد اللي صار, راحت عالمخفر لقت البنت و اخوها قاعدين هناك....

بنت خالي دخلت غرفة الضابط لقت البنت واخوها قاعدين وما في مكان فاضي غير جنب البنت او جنب الشرطي , قعدت جنبها قامت البنت مش عاجبها ووقعدت جنب الشرطي, الشرطي بحكي معها بهدوء كتير وهي ما بترد, قاعده بطريقة مش مناسبة, بحكيلها زبطي قعدتك يا فلانه, بتحكيله هاد احسن اشي عندي, بحكيلها اسكتي بلاش تاكلي قتله هلأ, بتحكيله ليش عاساس انك زلمه يعني, كلكم هون نسوان وما فيكم زلمة, بحكيلها اسكتي بلاش تلحقي امك واختك عالسجن هلأ ... قام الشرطي يحكي مع بنت خالي, بحكيلها هاي قاصر وبدكيش بهادل, بلاش تكتبي شكوة وانا هلأ بخليها تيجي لعندك وتعتذر, بنت خالي كانت مترددة, حكتله لأ بدي اكتب شكوه و وتوقع على تعهد, لف وجهه ونادى ضابط وحكاله خدها أدبها شوي, رجعو بعد فترة بحكيلها الضابط شو بدك تحكي لمعلمتك, بتحكيله ايش؟؟ بحكيلها بدك تعتذري؟؟, حكت انا اسفة, سألتها بنت خالي على شو اسفه, حكتلها ما بعرف همه هيك حكولي احكي, حكتلها بنت خالي انا ما بدي اياكي تقربي عالمدرسه, ويلا والله بخلي البنات يطعموكي قتله ترييكي منيح, بتحكيلها والله ما بتسترجي وحده ترفع عينها بعيني, الضابط صار يحكي مع البنت بلاطفه وهدوء, انت منيحه وما شاء الله عليكي و الله بعتلك مدرّسه زي هاي تحطيها فوق راسك, هي قربت عالضابط وصارت تفتش بالدروج بتحكيله شو عندك اشي بتاكل, صرّخ عليها الضابط و حكالها " هلأ بلخمك كف بخليكي تعدي سنانك عن الارض" حكتله بس تكون زلمة بالاول هدد, انقهر الضابط وقام لخمها كف ضربت بالحيط, بتحكي بنت خالي منيح اللي كنت قاعده, لو واقفه والله يمكن كان اغمي علي, وصوت ضربتها بالحيط هزني هز, وقفت البنت بتحكي, ها شايف مش زلمه, انت مره و ضربك زي المره, رد لخمها كف تاني, و ردت عادت نفس الكلام, بنت خالي قررت تكتب شكوى بعد هالمنظر وما تتنازل.

كتبت شكوه و كتبّو البنت تعهد, وصلت المردسة لقتها قايمه قاعده, بحكولها الله سترك ما اجيتي الصبح, كانت بتستناكي بالسكين من ال 7 الصبح, وبس اتصلنا بالشرطه قعدت تهرب والشرطي يلف وراها بالساحه, طلعت جاي بالسكين لبنت خالي :( وكل المدرسة فاهمه ان بنت خالي خافت وما داومت, بالفرصه بنت خالي نزلت عالساحه وحكت للبنات وين كانت و شو صار, علشان منظرها و احترامها للسنوات الجاي, بس ضلت مرعوبه و حملت معها بجيبتها رشاش الفلفل, وصارت تصف سيارتها بنص الساحه لحد ما وصللها قبل كم يوم ان البنت حطوها بجمعيه حماية الاسره لانها ضربت شرطي :$ و حاليا محبوسة هناك وبشوفها معالج نفسي بشكل يومي.

الموضوع كلّه كأنه فيلم, البنت وتصرفاتها و الرعب اللي عملته للمعلمات والطالبات -حتى المعلمات بخافو منها -و البيئه اللي عاشت فيها البنت و خلتها هيك, والاهل اللي بتركو بناتهم, اخوها طلع بحشش وياما ماسكينه, وبتحكيلنا بنت خالي بالمخفر يسب عليها مسبات وقحه ويحكي انه بتمنى تموت ليخلص منها..... وكل هالمؤثرات خلت البنت مجرمة

مدونة صيف 2010....شو رأيكم؟؟

بتتزكرو زمااااااااااان ...هو بصراحه مش من زمان, كأنه قبل كم شهر صح..
مدونة صيف 2009

مثل هالايام قبل سنة الفكرة فكرة زميلنا المدون احمد المحروق, وانا كان الي الحظ اني اشارك معه بالترتيب
وفازت المدونه عروستنا ايناس :)

السنة بصراحه كان عندي تردد بالنسبة للموضوع, لانه جربنا بالشتا و ما كان في اقبال كتير.
احمد المحروق في مدونته عامل تصويت اذا بتحبو يكون في مدونة صيف 2010 ويلا لأ
يا ريت تشاركو بالتصويت هناك و شكرا الكم مسبقا :)

لئمنه...بس هاد الحل

المصدر

كل يوم تقريبا بنسمع عن شخص حاول ينتحر الموضوع صار زي موضه, في ناس الهم اسبابهم اللي من وجهه نظرهم ان انهاء حياتهم هو الحل الوحيد, وناس فعلا ظروفهم صعبه لكن الانتحار اكيد مش الحل, وناس اسبابهم تافهه او بس بغرض الشهرة و لفت النظر.

كل مرّه بقرأ خبر من اللي طلعت عالعمارة وجابولها شيبس وعصير...للي طلع ينتحر علشان مش راضيين يزوجوه حبيبته...لاخر وحده طلعت تنتحر وترمي ولادها علشان علاج زوجها وبس انقذوها زوجها حاول ينتحر, كل مرة بخطر ببالي سؤال....شو ممكن يصير لو ما حد عبرهم لهالناس, شو ممكن يصير لو كل الامن وكل الناس انسحبت وتركت اللي واقف فوق ينتحر يعمل اللي بدو اياه؟؟؟

هلأ في شغلتين ممكن يصيرو, بس بدي اوضح قبل اني ما بستهين بمشاكل الناس اللي بخلو الدنيا تسكر قدام وجههم وان في ابتلاءات مرات ما بحس الشخص انه ممكن يستحمله, لكن مهما كان الانتحار مش حل اكيد

ردة الفعل الاولى

ممكن اذا الكل انسحب , اللي واقف وبدو ينتحر يزهق بعد فتره و ينزل لحاله, واكيد بدو يفكر بالعواقب اللي بدها تصير بعدها, ان كان من قبل الشرطه واللي لازم يكونو فارضين عقاب لازعاج الناس و السلطات غرامه او حبس مدّه مناسبة للموضوع, وبرضه شو رأي الناس والاقارب والجيران وشو ردود افعالهم واللي برضه برأيي لازم يكون عنيف, لازم تكون ردة افعال الجميع قوية حتى تكون رادع للي ممكن يفكر بالانتحار بعدها

ردة الفعل الثانيه

انه ممكن بعد ما الكل ينسحب, ان اللي واقف ينتحر فعلاو يرمي حاله, هلأ انا عندي قناعه 100% ان ما في شخص عاقل ممكن يقتل حاله, ما بعرف ممكن لانه بتخيل ان الانسان اجبن من انه يأذي نفسه, وخصوصا اللي بطلعو هيك قدام الناس, يعني لو فعلا بدو ينتحر ببيته ومش قدام الناس, وممكن يترك رساله تبين سبب انتحاره, لكن قدام الناس فهالشخص اكيد بكون في عنده مرض نفسي معين, هلأ لو انتحر الشخص, ممكن تقوم الدنيا وما تقعد على رجال الامن و انهم ما عملو اشي لانقاذ روح مواطن اعلن بانه حينتحر وما عملو شي, وانهم كانو سلبيين, و اللوم راح يوصل للاهل اللي ما حسو بابنهم و انهم ما راعو هالشي وما راقبوه.

انا بصراحه برجح ردّة الفعل الاولى, واللي هي انه ما حينتحر و اعتقد انها الحل لتنهي سلسلة هالمحاولات والاخبار اللي بنتصبّح فيها كل يوم, الحلول مش بأنهاء حياة, لانها مش حل هيك انت ما نهيته للموضوع لتستفيد ولغيرك يستفيد, المفروض تسعى وتحاول تحل المشكله وتجرب كل الابواب و الانتحار اكيد مش واحد من هالبواب, الانتحار اغلاق مش فتح و نهاية مش بدايه

برأيي....اتركوهم و روحو وهمه لحالهم حينزلو.

تسويق

كل سنه اول ما تصيف الدنيا ببدا امشي بشكل يومي, بحكم ان شغلي مكتبي وطول اليوم قاعده فالمشي بكون رياضه و تخفيف وزن و انتعاش, جد بتتغير النفسيه كتير, السنه بصراحه ولاول مرّة بخاف اطلع امشي وخصوصا بعد ما قرأت هالموضوع والي صار بمنطقتنا :$, بس قبل اسبوع تشجعت و اقنعت حالي اني بمشي بشوارع فيها حركه و قريب المغرب, وبديت امشي واجهتني مشكله تانيه واللي هي اني مضطرة امشي عالشارع, لانه الارصفه كلها ما شاء الله مشغوله يا بالشجر يا بعمدان الكهربا والتلفون يا بالسيارات اللي صافين عالرصيف, غير ان ما شاء الله الكل صار عندو كلاب و عشرين الف نئزه بنئزها وانا ماشيه, بس اوصل باب الكراج ببدا يعوي و انا بسوي حالي عادي مع اني بكون نقطه وبدب ابكي :(

المهم قررت ادور على نادي قريب اصير اروح عليه, انا كنت اسجل بنادي السنوات الماضيه بس بصراحه ما كنت مرتاحه كتير لانه بالوقت اللي بقدر اروح عليه بكون في ناس كتير و عالدور بنكون, رولا قرابتي وجارتي نصحتني بنادي منيح وقريب, بس جديد فتح نادي بنفس منطقتنا قرأت عنه بالجريده, قريب لدرجه انه ب 10 دقايق مشي بكون عنده, فقررت اروح اشوفو واسجل.


هلأ النادي وحسب الاعلان هو عالمي واله 10 الاف فرع بكون دول العالم, اتصلت فيهم واعطوني موعد بعد باسبوع, رحت انا وماما عالموعد, المبنى من بره ممتاز, المدخل ممتاز, والنادي من جوا جيد, و شوي صغير و ديق, اول شي لفت نظري ان عدد الالات اللي بنتدرب عليها قليل كأنه 7, و محطوطين على شكل دائرة و بغرفه صغيره, قلت ممكن في غرف جوا, اشي تاني لفت نظري ان المدربات او كل اللي بشتغلو هناك حتى اللي عالريسيبشن كلهم اوزانهم ثقيله, عرفت عن حالي واجت وحده من المدربات علشان تقعد معي وتاخد معلوماتي, البنت مليانه والها كرش و ظهرها منحني وكتافها قاشطين - على رأي نسيت شو اسمها اللبنانيه بسوبر ستار - شرحتلي عن النادي وعن كيفية التدريب, وطلعت هاي بس غرفة التدريب وجوا غرفة تغيير وخزانات,وهي بتكمل شرح انا كنت مقرره ومتأكده 100 % اني ما بدي اسجل عندهم, يعني هلأ بصراحه انا رايحه اسجل بنادي فالمفروض عالقليله اشوف مدربات مستخدمين هالالات و واضح اثر التدريب عليهم, يعني مش منطقي تيجي وحده تدربني و تحكيلي شو مفيد وشو مش مفيد و تعطيني نصائح وهي وزنها ضعف وزني :$..... بلغه اخرى علشان الشباب ما يحسو الموضوع تافه, مثلا لو راح شب يتدرب حديد بنادي و اجا المدرب عبارة عن عظمه و ما في عضلات و صار ينصحك شو تعمل مستحيل تقتنع منه, انو يا زلمه لو فعلا بدك تفيدني كان فدت حالك :)

هلأ انا ما بفهم بالتسويق كتير, بس اشياء بنتعلمها بحياتنا مش كتير علميه بس يعني تمشايه حال, و اول شي ممكن افكر فيه هو طريقة عرض البضاعه, يعني لتسوق شي صح بدك تعرضه بطريقه صح, والجماعه مخربين الدنيا, المكان ديق و الالات قليله و المدربات كأنه ولا الهم دخل بالرياضه, والامرّ والادهى انهم طلبو مبلغ خيالي كأشتراك, و طلبو اشي اول مره بسمع فيه بنادي, طلبو 100 دينار رسوم اشتراك غير مبلغ الاشتراك الاساسي :) انو بالله عليكم, بدكم تاخدو خلو المكان مني :$

المهم طلعت من عندهم عالنادي اللي حكتلي عنه رولا و سجلت هناك , نادي طابقين و طابق كامل للالات وطابق غرف للايروبكس و بركة سباحه و مدربات متخصصات :)

كرتونا و كرتونهم

اليوم صاحبتي بتحكيلي انها بدها تلغي قناة سبيس تون من عندها , استغربت بحكيلها, قصدك اشي تاني صح؟؟ بتحكيلي لأ سبيس تون
بتحكيلي انت ما شفتي الكرتون اللي بعرضوه, البنات بدون لبس و هاد حب هاد, وهاي بتحب هاد, و اولادها طول الوقت, بحبها بتحبو وبحبو بعض....

صرنا نتزكر الكارتون اللي كنا نحضره, هلأ بغض النظر ان الكارتون ايامنا كان اشي فخم بصراحه مش زي بعض التفاهات اللي بحطوها هلأ, اكتشفنا انه برضه كله حب بحب, ساندي بل بتحب مارك, عدنان بحب لينا, حتى اوسكار فيه حب و طم طم.... طم طم كاين بلاوي زرقه واحنا مش عارفين,اذا اخوي الصغير بحكيلي عن مشهد انا ولا متزكرته بحكيلي انا حافظه عن غيب, اشياء غريبه عن اخت طم طم و حبيبها عرفان.....

المهم اكتشفنا انهم كلهم كاينين حب بحب برضه, ولكن وصلنا لنتيجه

احنا كنا بريئييييييييييييييييييييين كتيييييييييييير
و الجيل الجديد اقوى وافتح واكسر منا و بدو انتباه كتيييييييييييييييييير


ملحوظه زغنونه...لو يضلو يعيدو عدنان ولينا و لخمسين سنه قدام راح اضلي احضره و اتابعه :)

New Look :)

الي فترة حابه اغير اللوك للمدونه

بتعرفو صيف وموسم فلازم تنعنش شوي

احترت بين اشياء كتيره

انا بحب اللون الازرق و للأسف ما لقيت اشي ازرق منعنش

الازرق اللي لقيته وعجبني كتير هادي بس ما حسيته بلبق للمدونه

ان شاء الله يعجبكم النيو لوك

وبتمنى يكون مريح لعيونكم

و اذا عجبكم اللي بالصورة اكتر احكولي :)

كتير اشياء لسا بدها تزبيط وتعديل

و اكيد راح احتاج لمساعدات بأشياء كتيره :$

ذكريات ومغامرات و تدمير :)

امبارح بالليل اجا اخوي وعيلته من السفر, يعني فروووحه حبيبة قلبي اجت :) ما شاء الله عليها حبيبتي شو كبرانه وشو صايره بتجنن, احلى شي بس يجي واحد من خواني من السفر -غير وجود فروحه وعبود طبعا- لازم نقعد قعدة ذكريات, ونتزكر كل القصص والمغامرات والدمار اللي كنّا نعمله.

اخوي هاد كان كل عطله صيفيه تكون وحده من ايديه مكسوره :$ لدرجة ان خالتي اللي كانت بكندا كل ما تيجي تنصدم, انه مش معقول , وبالاخر صارت تجيب من ضمن الهدايا حماله طبيه للايدين المكسورة :) , ومرة كنّا عند تيتا امها لماما و كانت ماما وتيتا وخالاتي بالغرفة التانيه, بتحكيلنا ماما فجأه بطل الكم صوت, بس صوت ضحك غريب, اجيت لقيتكم واصلين سلك راديو قديم بالكهربا و الطرف التاني للسلك مكشوف و ال دور دور بنحطه على ايدنا أل بزغزغ و بنضحك - هالمرة لقيتها للكلمة بزغزغ :) - ماما حبيبتي بتحكيلي كان راح يغمى علي بس شفت المنظر :(

كانت كل طلعه لبابا وماما و تركنا لحالنا بالبيت مغامرة, نتأكد ان السيارة تحركت, نعطي 5 دقايق احتياط ليكونو ناسيين شي, وبعديها بنبدا :) , العادي و المتكرر انّا نقلب الكنبايات, و في سجلون كبير - يا الله زمان على هالكلمة و عالسجلونات :) - نقيم مكان ما بنقعد و نفصله و نقلبه, هو عبارة عن 3 مقاعد مع بعض, بس نقلبه يكون في 3 فراغات بينهم خشب محطوط عليهم قماش, نقعد احنا ال3 فيهم - اخوي الصغير ما كان لسا مولود - و نلعب انّا بالبحر و بنصيد سمك, السمك كان عباره عن اي شي عالارض بالاضافه للحفايات, و نحط على وجهنا عجال صغيره و نربطهم عأساس ان هدول نظارات الغوص, مع انه في عنّا نظارات سباحه كان, لانا كنّا مشتركين بالمدينه الرياضيه, بس العجال احلى ومناسبين اكتر للجو البحري اللي عاملينه :) او لعبه تانيه واحد من خواني ينام جوا السجلون و يرفع المقعد برجليه, وانا واخوي التاني نقعد نتسلق و هو يهزّه يحاول يوقعنا :)

هلأ ليش كنّا نستنا 5 دقايق لنتأكد انهم طلعو.؟؟؟ لانهم في يوم كنّا نلعب و نرمي على بعض لبنه...ايون لبنه, ما بعرف كيف ومين بدا, و فجأه كل الحيطان والعفش لبنه, و فجأه رن الجرس , طلعت ماما راجعه ابصر شو ناسيه, انصدمت المسكينه, وهددتنا اذا برجعو و بلاقو الدنيا هيك لتحكي لبابا, واحنا عنّا اي شي ولا بابا يعرف, طبعا عأساس نظفنا, ولا اشي بس فرشناها و مشحّنا الدنيا :( لكن ماما ما حكت لبابا :)

اخوي هاد في بينا كتير مغامرات, مثلا مرّه و هو رايح عالمدرسة وانا كنت مريضه وبالبيت ومعطله, كان بالشارع وانا واقفه عالدرج قدام البيت, قرر الاخ يحكيلي باي, ناداني ما سمعته فكيف بدو يخليني انتبه؟؟؟ رمى علي حجر :) واجا بنص راسي و طبشني , وفي مرة كان حاملني على كتافه و بمشي فيي بالبيت, فجأه انتبه ان الرباط مفكوك, طمّل يربطه وانا اجيت طب على وجهي :), ومره كان بدو يعلمني كيف اصير اطلع عالخزانه زيهم و انط عالتخت :) رفعني و يا دوب مسكت طرف الخزانه تركني, سحلت, ايد باب الخزانه زي الخطاف من الاطراف, ولا شي بس علقّت فيه و ايد الباب دخلت في بطني, واجت ماما لقتني معلّقه عأيد الباب, منظر بهز البدن, بس الحمد لله سليمه, كلهم اسبوع زمن ولا كأنه صار اشي و نرجع لمغامرات جديده, واحلى شي انه ما في فساد بينا, مين عملك هيك؟؟؟ الجواب دايما واحد, وقعت عالتخت :)

How I see things

الغروب في حدائق الملك عبد الله

عبود بضحك لان السنابل tickling him :)

مش عارفه اكتب الكلمه بالعربي :$

فرووحه بتعمللي... "بي عينو" :)

ابحث عن فضولي :)

عبووود

دايما بحب اقرأ شو المكتوب عالفلوس,و بنبسط بس الاقي شي :)

الحاجة ام الاختراع...في احدى مؤسساتنا الحكوميه :$

هييه هييه...منسف منسف

متزكرين قصب السكر :)

ما صدقنا لما شفناه بدبي انا واخوي النا سنين مااكلنا منه

الثلجة اللي داومنا فيها :(

سبحان الله, شكلها زي كأنها من الشمع,

علشان هيك بسموها الشمعه و ريحتها كتير حلوه

"الاورينتال" Oriental

طريق السلط

Oriental

لما كانت المروحه خربانه ...من غير يوم :$

ماذا يهتف الاتراك

اتمنى في يوم ما ان نستطيع التعبير عن غضبنا بالفعل والعمل
بالجهاد و القتال......
حتى ولو باعتصام او مسيرة ...
اتمنى...

وصلني الايميل التالي من قريب لي يسكن في تركيا كان حاضرا في المسيرات و الاحتشادات اما السفارة الاسرائيليه في تركيا...

ماذا يهتف الاتراك

انطلق الشعبُ التركيُّ أمس إلى الشوراع بكل أطيافه ومذاهبه الفكرية وانتماءاته الحزبية، انطلق الإسلاميون فيه والعلمانيون والقوميون، انطلق مؤيدو الحكومة ومعارضوها، انطلق أبناء الشعب التركي كل الشعب التركي أمس ليحتشدوا أمام السفارة الإسرائيلية منذ الصباح الباكر (عقب الاعتداء على أسطول الحرية مباشرة) إلى ما بعد منتصف الليل، وخرجتُ لألتحق بهذه الجموع دون أن أسأل عن عنوان السفارة فبمجرد أن تصل إلى أي منطقة مركزية في المدينة ترى الحشود تتوجه نحو السفارة بالحافلات والقطارات الخفيفة حاملة أعلام فلسطين وصور أحمد ياسين وحسن نصر وثلة من أعلام المقاومة، فإذا أردت الوصول إلى السفارة فما عليك سوى أن تلتحق بمجموعة من هذه المجموعات حتى تصل في نهاية المطاف إلى السفارة الإسرائيلية التي تحولت إلى قرية محصنة محاصرة يتربص فيها الموظفون من وراء جُدُر..

لفت انتباهي تنوّع أطياف المشاركين في المظاهرات، فمن جهة ترى متدينا أعفى لحيته وأطالها وارتدى ملابس صوفية فضفاضة يهتف ويرد الناس وراءه، ومن جهة أخرى تجد شاباً يلبس الجينز الممزق، ويضع على أذن من أذنيه قرطا (حلقا)، وقد أطال شعره وربى "سكسوكة شقراء" على وجهه، وفتح الأزرار العلوية الثلاثة من قميصه كعادته ليظهر عقده وعليه قلب حُبّ أهدته إياه عشيقته، ترى هذا الشاب وقد رفعه أصدقاؤه على أكتافهم وهو يصرخ "تكبير" ويردد الناس من حوله "الله أكبر".. بل وتسمعه يكبر تكبير العيد ويردد الناس معه ( وهي من عادات الشعب التركي في مظاهراته أن يكبر تكبير العيد) مشهد يشدّ الانتباه، ويجعل المرء يدركُ كم هو المدّ الثقافي والحضاري عميق في تكوين شخصية المرء.. المحجبات وغير المحجبات، المتدينات وغير المتدينات، المتجلببات والمتَشرّتات، الكل أرخى على كتفيه الكوفية الفلسطينية، الكل حمل العلم الفلسطيني إلى جانب العلم التركي، الكل أخذ يهتف هتافات اعتاد المشاهد العربي أن يسمعَها على شاشات التلفاز دون أن يفهم معناها، الأمر الذي جعلني أدوّن بعضها أثناء المظاهرة حتى أترجمها للمواطن العربي وحتى تعرف الشعوب العربية ما يقوله الشعب التركي.. فإليكم ترجمة هذه الهتافات مع الأخذ بعين الاعتبار أن الترجمة لن تحافظ على التناسق الموسيقي للهتافات:

· في البحر وفي البر ستستمرّ الانتفاضة

· نحن إلى جانب أخينا الفلسطيني

· فلتُقهر إسرائيل

· كلنا فلسطينيّ كلنا سنقاوم

· اضربي يا حماس اضربي إسرائيل

· سوف نواصل على طريق الشهداء

· جيش محمد هو رعب الكفار

· غزة لنا وستبقى لنا

· تحية لحماس ومواصلة للمقاومة

· نحن أحفاد الفاتح نحن شوكة ٌ في حلق الصهاينة

· السن بالسن والدم بالدم الانتقام الانتقام

· اضرب يا مَحمدجيك اضرب إسرائيل (مَحمدجيك هو لقب يطلق على الجندي التركي ويحمل في طياته الانتساب إلى النبي محمد عليه الصلاة والسلام)

· اضرب يا أردوغان اضرب إسرائيل

هذا هو بعض ما كان يردده الشعب التركي في مظاهرات أمس، وقد سمعتُ بعضه وأنا في منزلي إذ كانت مجموعة من أطفال الحيّ قد اجتمعت في الشارع وأخذت تردد هذه الهتافات لتنذر الجهاز الصهيوني بمستقبل عسير..