ذكريات ومغامرات و تدمير :)

امبارح بالليل اجا اخوي وعيلته من السفر, يعني فروووحه حبيبة قلبي اجت :) ما شاء الله عليها حبيبتي شو كبرانه وشو صايره بتجنن, احلى شي بس يجي واحد من خواني من السفر -غير وجود فروحه وعبود طبعا- لازم نقعد قعدة ذكريات, ونتزكر كل القصص والمغامرات والدمار اللي كنّا نعمله.

اخوي هاد كان كل عطله صيفيه تكون وحده من ايديه مكسوره :$ لدرجة ان خالتي اللي كانت بكندا كل ما تيجي تنصدم, انه مش معقول , وبالاخر صارت تجيب من ضمن الهدايا حماله طبيه للايدين المكسورة :) , ومرة كنّا عند تيتا امها لماما و كانت ماما وتيتا وخالاتي بالغرفة التانيه, بتحكيلنا ماما فجأه بطل الكم صوت, بس صوت ضحك غريب, اجيت لقيتكم واصلين سلك راديو قديم بالكهربا و الطرف التاني للسلك مكشوف و ال دور دور بنحطه على ايدنا أل بزغزغ و بنضحك - هالمرة لقيتها للكلمة بزغزغ :) - ماما حبيبتي بتحكيلي كان راح يغمى علي بس شفت المنظر :(

كانت كل طلعه لبابا وماما و تركنا لحالنا بالبيت مغامرة, نتأكد ان السيارة تحركت, نعطي 5 دقايق احتياط ليكونو ناسيين شي, وبعديها بنبدا :) , العادي و المتكرر انّا نقلب الكنبايات, و في سجلون كبير - يا الله زمان على هالكلمة و عالسجلونات :) - نقيم مكان ما بنقعد و نفصله و نقلبه, هو عبارة عن 3 مقاعد مع بعض, بس نقلبه يكون في 3 فراغات بينهم خشب محطوط عليهم قماش, نقعد احنا ال3 فيهم - اخوي الصغير ما كان لسا مولود - و نلعب انّا بالبحر و بنصيد سمك, السمك كان عباره عن اي شي عالارض بالاضافه للحفايات, و نحط على وجهنا عجال صغيره و نربطهم عأساس ان هدول نظارات الغوص, مع انه في عنّا نظارات سباحه كان, لانا كنّا مشتركين بالمدينه الرياضيه, بس العجال احلى ومناسبين اكتر للجو البحري اللي عاملينه :) او لعبه تانيه واحد من خواني ينام جوا السجلون و يرفع المقعد برجليه, وانا واخوي التاني نقعد نتسلق و هو يهزّه يحاول يوقعنا :)

هلأ ليش كنّا نستنا 5 دقايق لنتأكد انهم طلعو.؟؟؟ لانهم في يوم كنّا نلعب و نرمي على بعض لبنه...ايون لبنه, ما بعرف كيف ومين بدا, و فجأه كل الحيطان والعفش لبنه, و فجأه رن الجرس , طلعت ماما راجعه ابصر شو ناسيه, انصدمت المسكينه, وهددتنا اذا برجعو و بلاقو الدنيا هيك لتحكي لبابا, واحنا عنّا اي شي ولا بابا يعرف, طبعا عأساس نظفنا, ولا اشي بس فرشناها و مشحّنا الدنيا :( لكن ماما ما حكت لبابا :)

اخوي هاد في بينا كتير مغامرات, مثلا مرّه و هو رايح عالمدرسة وانا كنت مريضه وبالبيت ومعطله, كان بالشارع وانا واقفه عالدرج قدام البيت, قرر الاخ يحكيلي باي, ناداني ما سمعته فكيف بدو يخليني انتبه؟؟؟ رمى علي حجر :) واجا بنص راسي و طبشني , وفي مرة كان حاملني على كتافه و بمشي فيي بالبيت, فجأه انتبه ان الرباط مفكوك, طمّل يربطه وانا اجيت طب على وجهي :), ومره كان بدو يعلمني كيف اصير اطلع عالخزانه زيهم و انط عالتخت :) رفعني و يا دوب مسكت طرف الخزانه تركني, سحلت, ايد باب الخزانه زي الخطاف من الاطراف, ولا شي بس علقّت فيه و ايد الباب دخلت في بطني, واجت ماما لقتني معلّقه عأيد الباب, منظر بهز البدن, بس الحمد لله سليمه, كلهم اسبوع زمن ولا كأنه صار اشي و نرجع لمغامرات جديده, واحلى شي انه ما في فساد بينا, مين عملك هيك؟؟؟ الجواب دايما واحد, وقعت عالتخت :)