سلسلة عرسان - الحلقة 12

قبل ما اسافر باسبوع اتصلت فيي موظفة قديمة عنّا و هلأ تقاعدت, هالموظفة حكيت عنها هون

حكت معي كأنا شووو كنّا صاحبات عالعظم زي ما بحكو, كيفك وشو اخبارك وشوفي اشي جديد عندك ومن هالحكي, ومن موضوع لموضوع وصلت لانها جايبتلي عريس, خير اللهم اجعله خير, ابن بنت حماها قال بدور على عروس بنفس مواصفاتي, جد زهقت من هالكلمة, المشكلة بهيك موضوع بفكرو العالم اني راح اطير من الفرحة و اني انبسط هيك بس لانه اجاني عريس, بحكيلها طيب ما في "مواصفات" اله كمان؟؟؟ بركي مش نفس "المواصفات" اللي بدي اياها.

سكتت شوي حستني ناكرة للجميل شكلها, بتحكيلي دارس .. وبشتغل ب... و راتبه كتير منيح وبشبه امير, حكيتلها مين امير؟؟ بتحكيلي امير اللي بعاصي, وانا ثقافتي بالتركي عدم, حكيتلها ما بعرفه بصراحه, بس ما حكيتيلي عن عمره, بتحكيلي هون المشكلة , انت اكبر منه ب 6 سنوات بس, حكيتلها مش بس, الموضوع هون انتهى, بتحكيلي هو بعرف هالشي وما عنده مشكله و بالعكس حابب كتير يتعرف عليكي, حكيتلها لا انا العمر عندي مشكله, و خلص انسي الموضوع, اعطيه فرصه ما اعطيه فرصه, حكيتلها انا اساسا بعد اسبوع مسافرة عدبي, سألتني ايمتا راجعه و جاوبتها بعد شهر, بتحكيلي طيب انت عندك مانع تطلعي معو برّه تشربولكم كاسة عصير وتتعرفو على بعض, حكيتلها اه ومانع كبير كمان, بعد اصرار و الحاح اتفقنا انه اذا بدو يجي زيو زي اي مراجع بيجي عالمكتب بشربله فنجان قهوه بنحكي شوي و بناء على هالجلسة ممكن نحكم مبدئيا على بعض,وممكن مع الحكي يبين ان الشب عقلة كبير و بنشوف موضوع العمر, و خلص الاسبوع وسافرت وما اجا :)

انا استغربت الموضوع لان البنت قعدت معي بالمكتب فترة و بتعرف اني ما بقبل اطلع بره اتعرف على شب,و بتعرف ان العمر بالنسبة الي فيه مشكلة, وارتحت لقراري وهيك ما بكون بس بحكي لأ زي ما بتهموني صاحباتي بالشغل, ما بتصدقي على اشي وتحكي لأ, الموضوع مش هيك, الموضوع انه الزواج بده تأني و تفكير, بدو تختاري صح علشان ما تندمي, وفي تجارب كتير بتخلي الواحد لاااااازم يتأنى بهيك موضوع, واشي تاني ما بنكره, ان كل ما تتأخر البنت بالزواج بصير تفكيرها انضج و بتصير الامور اللي بتهمها تكون بالشب غير عن قبل, يعني منظور فارس الاحلام بكون موجود ولكن بمعايير بتختلف و الاولويات لهالمعايير بتختلف.

بعد ما رجعت بيومين, يومين بالعدد الاخت بتبعتلي مسج عالموبايل, نص الرسالة " بتقدري تكفليني بدي اشتري موبايل, و بالنسبة للشب فهو لسا حابب يشوفك"

تخيلو الوقاحه لوين وصلت بالعالم!!! طلعت الاخت عامله كل هالقصه علشان بدها مصلحة مني, انا بعتلها "لأ ما بقدر" و اكلت حالي ندم كيف وافقت انه يجي عالمكتب, جد انقهرت, و انقهرت اني انا بعرف البنت منيح والي قصص معها قبل و مشاكل وطوش وكيف انا زي الشاطرين رجعت احكي معها عادي, وهي التانيه في الها صاحبات متطلب منهم, بس بعد ما سألت تبين انها طالبه منهم و لانهم عندهم تجارب معها من قبل بانها ما بتسدد الفلوس بطلو يكفلوها.

جد قهرتني

ملاحظه: اي تشابه بالاسماء او بالاحداث فهو من محض الصدفه البحته, والاحداث جميعها من وحل الواقع

الحلقات السابقة