شو الصفات اللي المفروض تكون موجوده بالشخص لنحكم عليه انه سيء؟؟؟ هل هي صفات الكل بتفق عليها؟؟ ويلا في وجهات نظر مختلفة بهالموضوع؟؟؟ممكن يكون في صفة احنا بنكرها كتير بالشخص و وجودها فيه بنحكم عليه انه سيء و غيرنا ما تعنيله هالصفة اشي؟؟؟
كتير افكار خطرت ببالي من هالنوع لمّا اليوم اجا عندي عالشغل واحد قريبنا في اله معامله عنّا و بفترة جلسته تحدثنا بامور كتيره ومنها قصة طلاق بنته اللي صدمتني, لانه المفروض والواضح للجميع ان الحب والتفاهم كان كبير بينها وبين زوجها, و صورهم على موقع العيلة , نعم في موقع لعيلتي عاملينه عالنت :$ انا مش مع هالشي لانه عباره عن صور بصور و طبعا الكل اعتبرني معقدة لاني ما رضيت يحطولي اي صورة عالموقع :) لكن مش موضوعنا , موقع صور البنت مع زوجها كلّه صور احتفالات ومناسبات و مفاجأت بعيد ميلا و اشياء كتيرة و معظمها بتبين ان الحب هو الطاغي.
طبعا تعودتو علي بالتعليق والكتابه من موضوع لموضوع بنتقل, خلينا بموضوعنا :)
البنت طلع زوجها او طليقها حاليا مطلقها اللي الهم 6 سنوات متزوجين مطلقها طلاق بائن, يعني هلأ بحاجه لمحرم وما بتقدر ترجعلة, و طلع مطلقها مرتين بفترة الخطبه و ضاربها كمان!!!
ابوها بحكيلي انه عصبي و الزلمه العصبي بطلع معه شغلات هيك, وطلع كاين يسب عليها بالفاظ مخزيه الله يخزيه وكاين يترفشها بكل ما تحمل الكلمه من معنى ومن تصور, اذا كاين يخنقها ال مش واعي.... و عندهم بنت كل ما يجي عالبيت تتخبى بغرفتها و تحكي "خاف ..خاف" انها خايفة منه, و كل ما احكي اشي, الاب يحكيلي بس هو مش سيء, بس هو كان منيح.
ما قدرت حكيتله عمو والله واحد بضرب مرته و بهينها هاد انسان سيء ومش منيح, الاب مصر انه مش سيء بس عصبي و هي المفروض تتحمله, مش قادرة استوعب اللي بحكيه بصراحه, بسأله طيب كيفها هلأ, بحكيلي انه مستغرب انها كتير منيحه وانه كان متوقع انها تكتئب ولكنها بالعكس , اقبلت عالحياة وعالشغل بطريقه جديده و مبين انها احسن مش اسؤ و انها بتحكيله " دائما السكينه بتكون اقوى من الجرح, لكن بحالتي الجرح طلع اقوى من السكينه"
معقول هو جد شايفه منيح بعد كل اللي عملة مع بنته؟؟؟ روحت عالبيت مش شايفة الفضى زي ما بحكو, بحكي لماما القصه واذ....طلع الاب كاين يعمل نفس الشي مع مرته - ام البنت - الله يرحمها اللي توفت من فترة, زبتحكيلي ما كان يهدى الا لمّا ينزللها الدم, انا شوي وكنت بدي انجلط, بحكي لماما يا ريتني ما مشيتله المعامله :(
لكن ضلت الافكار ببالي وما الها جواب, معقول من وجهه نظرة ان حق هالشب يجي يعمل هيك ببنته؟؟ معقول من وجهه نظرة ان هالشب مش سيء؟؟؟
انا عمري ما فكرت بهيك صفات اقرر بناءا عليها, اي نعم بكره العصبيه و بكره الصوت العالي والمقاتلات, لكن في صفات تانيه كانت ببالي, الكزب اولها , انا ما بكزب ولا مستعده اكزب لاي سبب و بالتالي ما بقبل الكذاب بالمره, هل لأني ما بكزب ويلا لأن الكذب صفة سيئه؟؟ هل احنا بنحدد الصفات السيئه لانا بنملك عكسها و يلا لانها غلط؟؟؟
انا اللي مقتنعه فيه اني بكره الصفات السيئه لانها غلط, لكن موضوع اليوم خلاني اعيد تفكير بهالشي...
28 التعليقات :
مش عارفه بصراحه
بس بعرف انو زمان كان مش بس الزلمه يكتل مرته
كمان سلافها كانوا يشاركو بعملية الترفيش وكان شيء غير مستهجن
يعني حتى موضوع الحكم على السوء هو شكله موضوع ثقافه
لا اكتر ولا اقل
walllah il ha2 il set il bterda takhud wa7da bidrubha.. is she stays in a relationship like that btistahal il 3alga :P
مياسي
حتى بايام زمان اعتقد انه هالشي ما كان مقبول من ىالجميع, يعني مش اشي مسلم فيه وخلص ساكتين عليه
بتزكر ماما حكتلي انها اكتشفت ان بابا حاكي لتيتا و عمي اللي كانو ساكنين بنفس البيت اول ما تزوجو بابا وماما, ان ماما خط احمر و ما حد اله يحكي معها كلمه
وهالشي ماما اكتشفته من جديد :)
يعني الرجل هواللي بحدد كيف بدو يحترم زوجته و يفرض احترامها عالجميع :)
معك حق بان الثقافات و البيئة اللي بنعيش فيها الها دخل بالموضوع
Dino$
I'm with u 100%
But when my mom told me about the woman's father, and how he used to treat her mother, and how the girl want only to go out of her fathers house ,which is suicide in my opinion
bs el byout asraaar zay ma be2olo, wallah 2a3lam bezorofhom :S
Welcome again :D
اكيد ... انه الواحد يهين زوجته بهيك طريقة هو "سيء" ... ومش بس هيك .. كمان "حقيـــــــــــــــــر" ..اسف ع التعبير
المهم ... الناس الطبيعيين اكيد ما بختلفوا ع الصح والخطأ
تقبلي مروري ويسبر
والبوست اجا بوقته
عارفة في شغلة معروفة إسمها "لحظات كوداك" و فيها الناس دايما بتضحك و سعيديين بدون اي هموم و لا اي مشاكل و اللي بيتطلع من بعيد بيقول ماشالله عليهم نفسي اكون زيهم
طبعا هذا كله عبارة عن تمثيل و زيف اجتماعي طبعا ما بقدر اسمّيه كذب لأنه معظم العالم بتحب تظهر احسن ما عندها للناس. زي لمّا الناس تزبّط حالها و همة رايحين على عرس مع العلم انّهم معفّنين ... يعني هم لا يكذبون و لكن "يَتَجَمَّلون" (انصحك بقرائة الرواية لإحسان عبد القدّوس-طبعا- او مشاهدة الفيلم لأحمد زكي)
غير عن هيك، في الخطبة الطلقة الواحدة عبارة عن طلقتين. يعني ما بيجوز شرعا من اساسو ان يطلّقها مرتين ايّام الخطبة. احتمال في نوع من المبالغة
ثالثا، انتي سمعتي من طرف واحد فقط، يعني الأب و الأم شو رح يكون رأيهم في اللي طلّق بنتهم؟ لازم يكون سكّير، و نسونجي، و بخيل، و عصبي و تبع ولاد و تبع رجال، و بجيب صحابو على البيت، و سرسري و بيضرب و مصاريه حرام، و مكذّب عليهم، و شهادته مزوّرة ... يعني لازم تطلع القطط الفاطسة في الزلمة، و اللا بنته اللي ستّين صرماية؟و مش مربّاية بالمرة، و كانت مصاحبة واحد على النت من ورا جوزها و ما بتنحوى في بيوت؟
في هاي الأشياء و طبعا البيوت اسرار مافي هوّة عاطل، و هيّة ملاك! او هوّة وردة و هيّة صرماية! في اتنين ما أتفقو و لمعرفة كافة التفاصيل لازم يكون في ناس اولاد حلال و احد من طرفه، و واحد من طرفها يقعدوا و يحكو في كل المواضيع العالقة. بغض النظر عن اي شي تاني
انا طبعا لا عم بدافع عن الشاب ، و لا بلوم البنت. لكن لازم كلّنا نكون موضوعيين و نحاول ما نحكم على الأمور من الظاهر. لأنه اكبر دليل ان حكمنا قاصر هو المفاجأة انهم اتطّلقو يعني حكمنا انهم سعداء من الصور و المظهر، و نسينا الجوهر المخفي
و دمتم ... آسف على الإطالة
أنا عارفه ياويسبر
القضيه كتير نسبيه وبتعتمد عبى خلفية كل واحد فينا
بس أكيد هاد الانسان مش طبيعي ممارساته فيها قمه بالساديه
وأكيد هي ارتاحت منه
الله يعين بس كيف بترضى واحد متل هيك من الأساس؟
مسا الخير ويسبر
الحق على اخوانها يا ويسبر
لو كانو رجال ما كان رضيوا على أختهم الضرب وهمه ساكتين
أقسم بالله أنا بتعجب لما أسمع انو في ناس بتضرب ام ولادهم
el mawdou3 mw perceptions, kollo ma3rouf bel fitra, howweh nafso momken ykoun mesta7qer 7alo w hw 3m be3mal hek, Allah be7ott el 5air bel ensan awwal ma yenwaled, w eza dall 3ala hek be3raf enno ghalat aw sa7, ma fi 7ada beshouf el ghalat sa7 ella el ma3mee 3ala albo (le zorouf 5assa)
ba3dain el abb 7akalek enno howweh mesh sayye2 3ashan ybarrer la 7alo enno howweh nafso kaman mesh sha5s sayye2 :\
زي صديق الي قبل فترة بحكي عن صاحب الو ... بحكي عنو منيح لولا انو بسرق وبتدين وما بسد واذا اعطيتو امانة ما بوصلها وكذاب ؟؟؟
يعني كل هل خصل فيه ومنيح كيف اجت ؟؟
بس زي ما قلك قويدر مرات صعب تفهمي القصه بس تسمعي من طرف واحد
الله يعين العالم الناس بتتفشش ببعض ... تحت اي ضرف ما بصح الضرب لانو الاثنين بالغين عاقلين وكل اشي بنحل بالتفاهم بس يدخل الضرب خلص بتصير معركة مش حياة
Ahmad Al-Mahrouq
مهما وصلّت الامور بينهم انه يمد ايده عليها فهاي شغله كبيرة كتير, عدم احترامها و اهانتها هي عدم احترام لنفسه واهانه اله برضه.
اهلا وسهلا فيك احمد
Qwaider قويدر
بعد مشاهدات كتيرة تبينلي هالشي, ان المظاهر دائما خداعه و ما الها دخل بالحقيقه
هي من وجهة نظرهم تجمّل, لكن اخفاء الحقيقة بندرج تحت الكذب في بعض الامور
هلأ اللي حكيته هو اللي بصير بالزبط بهيك ظروف, لكن ابو البنت المهانه اللي بتنضرب بحكي عن الشب اللي ضرب بنته منيح ومش سيء,وهاد اللي فاجأني
موضوع الطلقة بالخطبة تعتبر عن 2 اول مرة بسمعها, لكن مش بعيده عن الشب , الشب مش ملتزم باي مبدأ ديني, وطلع مطلق مرته من 3 ايام وبدون ما يحكيلها و بعد 3 ايام اتمشكلو فحكالها انه اساسا مطلقها, يعني 3 ايام عاشو كزوجين وهمه متطلقين و طلاق بائن بينونه كبرى :$
الشب ما خلّى للصلح مكان لانها ما
بتقدر ترجعله هلأ
اكيد البيوت اسرار والله اعلم شو المخبى, و القصه من طرف واحد مش كاملة بتكون
شو اسف!!!...بالعكس نورتني :)
انا حضرت الفيلم "انا لا اكذب و لكنني اتجّمل"
ميسم
حسب الحكي البنت انتعشت بس تركته, و باقي القصه اللي ما كتبته فيه تقييد للبنت في كل النواحي و اهمها المادي , لانها تقريبا هي اللي بتصرف عالبيت لانه من عصبيته طردوه من اكتر من شغل :$
بعد اللي بيّن بالخطبة كان المفروض تتركه وما تنتحر بانها تكمل معه علشان
تهرب من جو البيت
ما الها خوان, وابوها واقف مع الشب وبحكي عنع انه منيح, غير ان ابوها شخصيته نفس الزوج من كل النواحي , العصبيه والضرب و الانفعالات اللي ما الها لازمة.
هاد شخص لا يستحق الاحترام
Rand
That's a v good point of view< 2e7na 3enna 3a2el bewzen el2omor w be3raf sho el3'ala6 w sho elsa7
As her father said 2enno kul youm beje w beseer yebkee nmen elnadam, laken b3 shoo belzabt!!!
Allah ye3en el3alam, w allah yoktobelha el5ear
Rand 2
2abb men el2elleh, ya allah sho 3amelehom mashakel kayen :$
قط البكتريا
كل هاد ومنيح!!!
معكم حق المفروض تسمع من الطرفي لتكون عندك صورة كاملة للي بصير
امين يا رب
Well!! i cant get it at all!!!
If these two couples already had 2 divorce episode and they still in the engagement period, what did they think that their life will be??!
Did they thought that they will live happily after !!! 2 divorce and they still engaged?!!! this is enough alarming sign for them that their life will be not more than a hell!!
I think the proverb "ظل زلمة ولا ظل حيط " made a huge impact in females brain, they keep saying that "he is nervous" , "he is good " ...and that comforting crab , just to comfort her self and excuse him for acting bad, because she afraid of the "classical divorced women picture" in our Arab community!
And as answer for your question, yes, its enough for one character to consider that person is bad or not, i think its more than enough to consider someone who hurt his wife (physical i mean) a bad person, and this dont apply only for me , no, everybody should consider him as a bad person , there is no excuse for a husband to hit his wife, and i am talking according to religion too, hitting your wife in Islam regulation has a certain stranded , "certain conditions,not harming, not painful!!!!....etc" so after all; no excuse for hitting your wife never ever.
The parents have some responsibility too, they should put some "red lines" too as in your case.
Excuse my blabbering!
مرحبا ويسبر
موضوع واقعي ويحدث في الواقع في جميع أنحاء العالم وليس في المجتمعات العربية فقط فقضية ضرب الرجل للمرأه والاعتداء عليها موجود في كل مكان ولكن لو نظرنا معا إلى موضوع أن يعتدي رجل على مرأة بالضرب فهو موضوع مستهجن بكل المعاني الانسانية والسبب أن هنالك تفاوت في القوى الجسمية بينهما وبمعنى آخر فإن هذا الاعتداء لايمكن في أغلب الحالات الرد عليه من قبل المرأة وهنا نستطيع القول أن الرجل الذي يضرب المرأة بطريقة جنونية أو على وجهها هو شخص مريض نفسيا ولديه عقدة نقص وضعف أمام جنسه من الرجال ولذلك يحاول أن يعوض ذلك من خلال العربده على جنس المرأه ولا اتفق ابدا أن الصفات قد تكون مستهجنه أو مقبوله عن البعض وعند البعض الاخر ليس كذلك لان الصفات السيئه سواء الكذب أو غيرها هي صفات مستهجنه ومشتركه في مختلف المجتمعات
تحية
على فكرة الطلاق قبل الدخول مصيبة على الشب اكثر من البنت! يعني اوّل شي الطلاق بائن بينونة صغرى. يعني مافي عليها عدة
تاني شي لازم يدفع نص المهر عاجلة و آجلة! يعني اذا كان مقدمها ربع ليرة و مؤخّرها ميت الف. بدّو يدفع خمسين الف و نص ليرة و رجله فوق رقبته. بسبب كلمة! غير عن هيك الهدايا و الشبكة و توابعو شرعا ما بترجعلو. يعني بهدلة
غير عن هيك اذا غير رأيه لازم عقد و مهر و شبكة جداد غير الأولانيين! و في النهاية بيكون عندهم مجال لطلقة واحدة بس
ثانيا، بالنسبة للزوج اللي بيطلّق زوجته من وراها، فالطلاق ما بيوقع لحد ما تعرف. لأنه ما بينفع يضل الموضوع سر! شو هو لعب ولاد صغار!
على العموم احتمال وحيد ضايل ليش ابوها حكى عن الشاب انه كويّس! احتمال عارف شي ما حب يحكيلك ايّاه. و لو عرفتيه او عرفو اي حد رح يقولك بالفعل الشاب مش غلطان و الضرب و المبالغات ما صار منا و البنت احتمال هي السبب و بتستاهل. لكن ما حب يسوّد وجه حالو او يقطع بنصيب بنته
على العموم برجع و بأكدلك في هاي الحالات في قصّتين، قصة البنت، و قصة الولد ... و طبعا في الحقيقة اللي لا هو و لا هي رح يعتروفو فيها
على سيرة "الكتل"! في وحدة جارتي كل اسبوع تيجي عند امّي ملحّمة! وجهّها الوان! و حتى الجيران كانو حابّين يفزعولها، تاكل كل بدن و لا اخو! و تسمعي صوتها من آخر الشارع. المهم! لما حد يحكيلها شي، تدافع عنّو و تقول اصلا لو ما اكلت كتلة كل اسبوع بعرف انّو بطّل يحبّني! و الله قصة حقيقية!
بعرف حاجتين بالموضوع هادا....بخلوا القرار النهائي....صعب!
واحد) الحلال بين و الحرام بين و نفس الإشي الصح و الغلط..يعني اللي بعمل الصح بعرف إنو بعملوا...و نفس الإشي الخطأ الا اذا كان عندوا خطأ بالمفاهيم الأساسية للصح و الخطأ...و هادا بدو طخ أو إعادة تأهيل !
تنين) كلشي نسبي بالدنيا هادي !
Mar7ba whisper
for me I don’t think no matter what the women is doing or did that a man can come and hit her that way .I think any man who dose that I s a jerk ,and you know before I got to the point of the story where your mom told you that the father used to do that to his wife ,I knew it wallah before that he says that the guys is good but he is giving an excuse to him self that he is good too and he cant do any thing or fix what he did because his wife died ,but really shame on him for standing for his daughter I think he is ignore that he cant see how pain that his daughter went through he used do that to his wife what do you expect. I understand that all household has secrets and we have heard both sides before we judged any body but every thing has limits.
Am so glad for her that she moved on and left the past behind her. Good luck for her.
Thank you whispers have a good day
عادي همسه هو كويس والبنت اللي عليها الحق ليش تزعله !!صح كان لازم تسكت وتحط .....في فمها وتسكت
تعرفي ذكرتيني بهالقصه لانسانه باعرفها كان جسمها لونه ازرق من كثر الضرب واهلها كانوا يحكوا والله لو انها ما تستاهل ما كان ضربها وكانت كل ما كانت تيجي عليهم حردانه توكل قتله فوق القتله تبعتها وبروحوها لما اجا اليوم وقررت تروح ع الشرطه وتروح ع السجن هرب من اهلها وزوجها وبيحكولك بعدين البنت عصتنا وحل موتها قصص الله يعين وفي النهايه هي الملومه كأنه هي المسؤوله لو كان زوجها ابن حلال او ابن حرام الخلاصه حبيبتي في عرفنا القلم مرفوع عن الرجل عنا وفي اعتقادنا الزلمه لا يعاقب الحق على المره
Dr.Mohammed
This is exactly what I feel. I'm lost between the words, how they decide to go on after that??? the engagement period is for knowing each other well how could they move on after knowing all that I can't understand...
I think "the classical divorced women picture" is much much better than what they face from men like this one.
Hitting and insulting his wife is a bad thing to do, what ever she did, she don't deserve to treat her like crap
Thanks Mohammed u say it all in ur comment :)
أشرف محيي الدين
اهلا اشرف
الشخص اللي بضرب زوجته شخص مريض نفسيا زي ما حكيت, لانه الضرب مش وسيلة لحل اي شيء بالحياة, اذا مع الصغار مرفوض فما بالك مع شريكة العمر و الحياة.
المزعج ان في ناس بتقبلو هالشي وبحكولك خليه يربيها, عاساس هو جايبها من بيت اهلها مش مربية, و عاساس لما اجا يتزوجها ما عجبته بكل صفاتها السلبية والايجابية و هلأ بطل يقدر يستحمل هاد في حال عملت اشي كتير كبير و ازعجته,غير اللي بضربو زوجاتهم تفشش بس مش اكتر او لارضاء ام او اخ او اخت وهالشي للاسف بحصل كتير
Qwaider قويدر
جديدة هالتفاصيل علي...يمكن لان كل اللي عرفت عن حالات انفصالهم بتكون بنفس السيناريو
الشباب بطلعو عين اللي بخطبوها لحتى هي تطلب الانفصال و بهيك تروح كل حقوقها و بالعكس بترجعله كل اللي دفعو و بطلع منها مش خسران اشي, حتى انه انفصل, بمجتمعنا البنت اللي عليها علامات الاستفهام
اه بالفعل القاضي حسب العدّه من يوم ما راحو عالمحكمه مش من يوم ما طلقها هو, بس اللي صار في نوع من الدنائة و القذارة, وهيك انسان لا يمكن احكي عنه منيح حتى لو كانت مطلعه عين اللي خلفوه, مع اني برضه معك ان لازم نسمع القصة من الطرفين و برضه نحكم نفسنا, يعني انا البنت الي مأخذ عليها و مش كتير بتعامل معها, ولكن الاب طلع ماضيه مثل زوج بنته, وكان يضرب زوجته و بالنسبه اله عادي الزلمة يضرب مرته, علشان هيك اي صفة راح نطلقها على زوج البنت راح تمسّه هو كمان
ما بنكر ان في تفاصيل صغيرة بتكون اساس المشكلة و ما بتنحكى للناس لانها مشينة لاحد الطرفين, والبيوت اسرار زي ما حكيت والله اعلم شو اللي بصير فيها
بالنسبة للجارة فااااااااااااااا
حبتها العافية والله, تتهنى بهالحب
زكرتني في حلقة من بقعة ضوء بتحكي بنفس الموضوع بدور عليها واذا لقيتها بحط اللينك ان شاء الله
Sharif.H
لو بنرجع الاشي للمنطق و العقل ممكن يبين معنى اذا الاشي صح و يلا لأ, لكن زي ما حكيت في ناس منطقهم اعوج بالاساس , هدول احسن حل معهم الطخ, برتاحو وبريحو :)
النقطه التانية باعتقادي اشي كتير ايجابي, وهاد اللي بخلي نص العالم متفقه مع بعضها, لو كلنا النا نفس القرارات ونفس الاتجاهات و نفس المفاهيم كان خربت الدنيا, العالم ومع هالنسبية مش طايقين بعض
الحمد لله
Njordan
Ahlan wa sahlan be Noor :D
he is a jerk...and sorry to say that her father is a jerk too as my mom told me :$
Any thing will said about the man reflected automatically to the father,because of that he is good in the fathers opinion..
Al7amdolellah that she moves on in her life and all that didn't effects her, no matter if she was good or bad in dealing with her husband
u too ya amar,have a wonderful day
Sozan
ما بنكر ان في ناس كتير هيك بفكرو للاسف, لكن الحمد لله ان خليت بليت زي ما بقولو لسا في ناس بفهمو بهالدنيا و بقدرو يحددو الغلط من الصح
مع ان النسبة الاكبر من المجتمع رأيها زي ما حكيتي, في الي صاحبة اختها كان زوجها يضربها و بس تحرد يرجعوها بالغصب, لحد ما يوم اتصلت فيهم المستشفى و طلع هالك البنت ضرب لدرجه انها دخلت العناية المركزه, بتحكيلي صاحبتي والله ما عرفتها من كتر التنفيخ و الجروح اللي بوجهها, اهلها اجبروها تتنازل عن بلاغ الشرطه في سبيل تحقيق شرط البنت بانه يطلقها, وعاشت عند اهلها حياة زفت لحد ما ربنا فرجها بزوج و الحمد لله هيها متهنيه معه
ربنا ما بترك عبادة و ما بنسى حد وخصوصا المظلومين
هنالك مقولة مشهورة تقول
مئة خصلة حميدة لا تكفي الشخص أن يصبح شخصا فاضلا ولكن خطيئة واحدة تكفيه ليصبح إنسان سيء
أعتقد أن هذا ينطبق بشكل كبير على الخطايا الأساسية
مثل فيلم سفن
الخطايا السبعة
فأعتقد أن صفات مثل العصبية و البخل و الكذب
تكفي بشدة ليكون الشخص سيء
بالنسبة لقريبتك، أعتقد أنها هيا الفائزة في الموضوع فخسارة مثل هذا الزوج مكسب وليس خسارة
و السؤال الذي يطرح نفسه ماهو الشيء الذي جعل زوجها كويس في رأي والدها؟؟ هل لأنه ينفق على البيت؟؟ أم لأنه يعمل مثلا؟؟ واضح أنه لديه خلل كبير في معايره
البيوت أسرار كما قلتي و الله اعلم ماذا يحدث بينهم
وأنا لدي وجهة نظر شخصية بسيطة إذا وصلت الأمور بينك وبين زوجتك لحد أن تضربها فأعتقد أن الطلاق هو أفضل الحلول ويحفظ كرامة الجميع ، فالضرب خصوصا بهذه الطريقة الوحشية ليس آدمي أبدا وضد الشرع و المنطق و الدين
وأوكد في النهاية على أن أفضل حكم يأتي بعد سماع قصة الطرفين
ستر الله علينا جميعا وعافانا من كل شر
سراج الماضي
هالمقولة صحيحه 100% و مطبقة بحياتنا وبشكل كبير
سبحان الله, بالنسبة الي هاي هي الصفات اللي بكرها , يمكن هاي الصفات مكروهه من الجميع لكن اللي بختلف تطبيقها على البشر, بمعنى اني يمكن اشوف انسان بخيل مثلا غيري يشوفه حريص مش بخيل...
انت هون ذكرت مقاييس تانية عند الناس للحكم على الاشخاص, فعلا في ناس بنظرها اذا بصرف على البيت اذا شخص منيح, مش انه واجبه يصرف عالبيت اساسا
فعلا زي ما المعظم حكى, ما بنقدر نحكم الا لمّا نسمع من الطرفين والله وحده اللي عالم باللي ما انحكى, لكن الضرب مش حل لاي مشكلة اكيد
امين يا رب العالمين
أصلاً متى ما الرجال مد ايدو على مرتو بنزل من نظري على طول..
وصفة العصبية مو منيحة..
في حديث للرسول عليه الصلاة والسلام؛
"ليس الشديد بالصرعة ولكن الشديد الذي يمسك نفسه عند الغضب"
والضرب هادا لحالو قضية تانيه!! وموضوع أبداً مو مفروض ينسكت عليه..
الله يهديه
Rula A.
لا عقل ولا دين بقبلو ان اي واحد يمد ايه على زوجته و فعلا بعد هالشي الحياة بينهم بضل فيها شرخ كبير ومن الغلط انها تستمر
العصبية دائما بتأدي لنهاية غلط و بالعادة العصبي بفقد حقة
امين يا رب العالمين
إرسال تعليق