بتمـــون

وانا بالامارات توفى عمي الله يرحمه و معظم صاحباتي كتبولي عالفيسبوك ليعزوني - هي وحده عرفت وبس كتبت عالفيسبوك المعظم عرف - و بنفس اليوم بعتتلي صاحبتي مسج على موبايل خط الاردن تطلب ابعتلها رقمي بالامارات, بعتلها الرقم, انا فكرتها بدها تتصل تعزيني ولكن مااتصلت و بعد اسبوع بعتتلي مسج على موبايل الامارات بتحكيلي اذا اتصل فيكي الرقم هاد و كتبت الرقم ما تردي عليه و اذا بعتلك مسج ابعتيلي اياها فورا و احكيلي اذا بتصل, انا طبعا ما فهمت شي, بعتلها انو ماشي بس بدي افهم و بسرعه.

تاني يوم بعتتلي ايميل تشرحلي فيه, طلعت الاخت مكتشفه ان اخوها اللي متزوج جديد للمره الثانيه بحكي مع وحده روسيه بعرفها من زمان و مقيمة بالامارات, كان فاتح ايميله على جهازها وقام يعمل شي و شافت الايميلات اللي بينهم, قامت عملت ايميل بشبه ايميل البنت, و بعتت منه لاخوها الفاضل ايميل و فيها رقم موبايلي عاساس انه رقم الروسية و بتحكيله احكي معي :$

انا كان فيي مخ و طار, انسم بدني و انحّميت حتى مرة اخوي انتبهت, انا كنت حاكيتلها عن المسج و حكيتلها عن الايميل وانصدمت هي التانيه, جد انسم بدني و ال ايش "ما الي غيرك امون عليه بالامارات" حملت هم و صرت زي اللي انا عامله شي غلط وكل ما رن الموبايل انقز لكني رديت على كل الاتصالات و خصوصا اني كاتبته بالسي في اللي باعتها للشركات , و الحمد لله لا اتصل ولا بعت مسجات.

حكيت لاخوي عن الموضوع و خصوصي ان هالرقم لكل العيله, مين ما اجا ضيف لاخواني التنين او اهل زوجاتهم باخدو هالرقم, برضه التاني انسم بدنه و بحكيلي هاي مش انها استعارت جاكيت مثلا وحكت بمون عليها لأ هاي عملت مصيبه, و انا بصراحه خفت الشب يكون اله صحاب بالامارات و يصيرو يتصلو عأساس اني الروسيه و نبلش معهم و هاد اللي خلاني احط اخوي بالصوره, كنا مروحين من دبي للعين انا واياه لحالنا و ال بدي اعمل جو حكيتله هالقصه مع قصه تانيه بتسم البدن قام المسكين من قهره استعجل و لقطه الرادار, ماشاء الله علي اخترت الوقت الممتاز وال ايش بدي اسليه :$

انا بعتلها ايميل وبينت اني متدايقه بس حكيت خلي المعاتبه وجها لوجه, وفعلا التقيت فيها بس رجعت عالاردن و حكيتلها قديش انسم بدني و ردّة فعل اخوي, اللي همها هو رد فعل اخوي و منظرها قدام العيله , و بررت بانها متأكده ان اخوها ما حيتصل, طيب كيف متأكده و هو هيو على علاقه بالبنت؟؟

انا صاحبتي هاي بحبها و مهما صار بنضلنا صاحبات و بعاتبها و بتعاتبني, لكن موضوع انها "بتمون" علي فتعمل اللي بدها اياه و اللي بمصلحتها و مش مهم انا شو يصير معي هاد اللي جلطني, تورطيني بمصيبه و بعدين اللي يهمك منظرك قدام العيله بجلط اكتر, انا طبعا حكيتلها هالحكي و ما حسيت وصلتها خطورة الموضوع, تعاتبنا و انتهت المشكله وما صار شي

لكن ضلّت فكرة "بمون" هاي بعقلي و ضليت افكر بكم المون و لوين ممكن ان حد يمون على حد توصل فيه؟؟؟

هل بمون عليكي يعني استغلّك؟؟؟

هل بمون عليكي يعني افكر بمصلحتي وانسى اني ممكن اضرك؟؟

هل بمون عليكي يعني اقيدك؟؟