Things I Like To Whisper About

Would You Hear Me Whispering

بتمـــون




وانا بالامارات توفى عمي الله يرحمه و معظم صاحباتي كتبولي عالفيسبوك ليعزوني - هي وحده عرفت وبس كتبت عالفيسبوك المعظم عرف - و بنفس اليوم بعتتلي صاحبتي مسج على موبايل خط الاردن تطلب ابعتلها رقمي بالامارات, بعتلها الرقم, انا فكرتها بدها تتصل تعزيني ولكن مااتصلت و بعد اسبوع بعتتلي مسج على موبايل الامارات بتحكيلي اذا اتصل فيكي الرقم هاد و كتبت الرقم ما تردي عليه و اذا بعتلك مسج ابعتيلي اياها فورا و احكيلي اذا بتصل, انا طبعا ما فهمت شي, بعتلها انو ماشي بس بدي افهم و بسرعه.

تاني يوم بعتتلي ايميل تشرحلي فيه, طلعت الاخت مكتشفه ان اخوها اللي متزوج جديد للمره الثانيه بحكي مع وحده روسيه بعرفها من زمان و مقيمة بالامارات, كان فاتح ايميله على جهازها وقام يعمل شي و شافت الايميلات اللي بينهم, قامت عملت ايميل بشبه ايميل البنت, و بعتت منه لاخوها الفاضل ايميل و فيها رقم موبايلي عاساس انه رقم الروسية و بتحكيله احكي معي :$

انا كان فيي مخ و طار, انسم بدني و انحّميت حتى مرة اخوي انتبهت, انا كنت حاكيتلها عن المسج و حكيتلها عن الايميل وانصدمت هي التانيه, جد انسم بدني و ال ايش "ما الي غيرك امون عليه بالامارات" حملت هم و صرت زي اللي انا عامله شي غلط وكل ما رن الموبايل انقز لكني رديت على كل الاتصالات و خصوصا اني كاتبته بالسي في اللي باعتها للشركات , و الحمد لله لا اتصل ولا بعت مسجات.

حكيت لاخوي عن الموضوع و خصوصي ان هالرقم لكل العيله, مين ما اجا ضيف لاخواني التنين او اهل زوجاتهم باخدو هالرقم, برضه التاني انسم بدنه و بحكيلي هاي مش انها استعارت جاكيت مثلا وحكت بمون عليها لأ هاي عملت مصيبه, و انا بصراحه خفت الشب يكون اله صحاب بالامارات و يصيرو يتصلو عأساس اني الروسيه و نبلش معهم و هاد اللي خلاني احط اخوي بالصوره, كنا مروحين من دبي للعين انا واياه لحالنا و ال بدي اعمل جو حكيتله هالقصه مع قصه تانيه بتسم البدن قام المسكين من قهره استعجل و لقطه الرادار, ماشاء الله علي اخترت الوقت الممتاز وال ايش بدي اسليه :$

انا بعتلها ايميل وبينت اني متدايقه بس حكيت خلي المعاتبه وجها لوجه, وفعلا التقيت فيها بس رجعت عالاردن و حكيتلها قديش انسم بدني و ردّة فعل اخوي, اللي همها هو رد فعل اخوي و منظرها قدام العيله , و بررت بانها متأكده ان اخوها ما حيتصل, طيب كيف متأكده و هو هيو على علاقه بالبنت؟؟

انا صاحبتي هاي بحبها و مهما صار بنضلنا صاحبات و بعاتبها و بتعاتبني, لكن موضوع انها "بتمون" علي فتعمل اللي بدها اياه و اللي بمصلحتها و مش مهم انا شو يصير معي هاد اللي جلطني, تورطيني بمصيبه و بعدين اللي يهمك منظرك قدام العيله بجلط اكتر, انا طبعا حكيتلها هالحكي و ما حسيت وصلتها خطورة الموضوع, تعاتبنا و انتهت المشكله وما صار شي

لكن ضلّت فكرة "بمون" هاي بعقلي و ضليت افكر بكم المون و لوين ممكن ان حد يمون على حد توصل فيه؟؟؟
هل بمون عليكي يعني استغلّك؟؟؟
هل بمون عليكي يعني افكر بمصلحتي وانسى اني ممكن اضرك؟؟
هل بمون عليكي يعني اقيدك؟؟

27 التعليقات :

هاد الموضوع مش مون هاد موضوع فيه خراب ناس كتير تاخذ حد المون الى ما ابعد ما من الممكن احتماله الله عانك على هيك صديقه بهيك مونه
والواحد بيتعلم من كيسه وما بيتعلم من كيس غيره والله يحميك من هيك صحبه!!

 

مع احترامي لصاحبتك
بس شو اللي بمون وما بمون
رقم موبايل بنت واعطته لشب , هاي ما كانت حاسبتها من مرة

لو كل اطراف القصة شباب , يعني واحد اعطى رقم شب لشب ثاني , يعني مقبولة

انداري عنّك انتي الثانية
:D

 

يخرب بيت هالكلمة شو صرت أكرهها
يعني عن جد الناس بتسغلك بشكل ابن كلب..
بهالأيام الواحد إما بكون لئيم بكرامته أو طيب و الناس بتستغله

بعين الله ويسبر..
شكرا على الـ
Poke :D

 

اسمحيلي احكيلك
صاحبتك ما بستحي!
مش عمله بصراحه، يعني بعدين شو هالأخ النضوه الي عليها، متزوج ومصاحب ع مرتو كمان؟

ما شالله حوله وحواليه

 

طبعا انا لو مكانك كان اعملتها قطيعه
ما اطول بالك بتمنى ان تفهم صديقتك كم هي محظوظة بك وان تحترم موقعها كصديقة

 

المهم انها عدت على خير
ومادمنا عيشين في الدنيا يا ما حنشوف
اللهم سترك يارب

 

اه بتموون,,,بتمون توقعك بمشاكل بين اخوها والروسيه....هي ايش دخلها اساسا باللي صاير مع اخوها؟!!!!

احلى شي انك ما بتخبي شي عن اهلك ...دائما مشاركتيهم بأي موقف بيصير معك...هاد هو الصح

 

عادي ويسبر ...

لو بعرف رقم تلفونك بعطي لا ابو راتب البقال لانو بدو مني حق بكتين دخان وعلبتين عصير زاكي

:)

 

طبعا انا بقرأ كل شي على مدوناتكم بس بصمت ما بعرف ليه ؟!! المهم ...

هيك مواقف بتسير بس المهم يكون الواحد واضح مع صاحبتوا انوا انا ما بحب هيك وانك ما بتموني لما الموضوع بدو يخرب بيتي !!! وهيك ما بتقرر تعمل شي اسوأ!! والحمدالله اجت سليمة هاي المرة على الأقل اخوها ما تصل بالمناسبة اخوها شكلوا نسونجي :P

 

والله انا اتسم بدني من اللي صار و انا بعيدة. بس اعتقد و هادا رأي بس انه مالازم يكون في عتب, لازم يكون فيه اكتر من كدا, خصام او قطيعة لفترة معينه علشان تستوعب اللي صار لانه و بالرغم من العتب ماهمها الا صورتها و بعدين حتى لو صديقتك جدا برضه لازم تفهم الخطأ و انه في حدود و انه مايصير تورطي الناس معاكي
ايش اللي بتمون علي او مابتمون, الكلام دا خطأ
بس ان شاءالله تعدي الامور على خير
:)

 

مافي حدود لشو تمون أو على شو ماتمون
بس في شغلة يلي مابستحي
إنو والله مرات في شغلات الواحد بيستحي يعملها أو يطلبها
فا كيف هدول بيجيهم قلب إنو يعملوا هيك شغلات وبيغطوا حالهم إنو يحرجوكي والله إنتي أحسن وحده ووالله ما إلي غيرك و و و
مافي مشكلة لتعملي هالشغلات
بس برضو إشي ومنو

أنا أصلا بكره كل الناس
هيك أريح لراسي وكل الناس بتحقد عليي لأنو مش طالعين معي بقشرة بصل لأنو لو بطلعوا معي بالقشرة بطلعوا معي بالبصلة
ويا داخل بين البصل وقشرته .. يم يم جاي عبالي هارديز مع بصلهم الزااااكي

 

أي الواحد بيمون بس مش لهالدرجة، عالأقل تاخذ إذنك، بس شكلها حبت تعمل دور "تحري خاص" مثل الأفلام الأجنبية

 

مساء الخير

لن اعلق
ولكنني ساقترح
بما انك فتحتِ موضوع ما في من وراه الا فتح جروح
وبما انني من ضحايا بتمون
وبما ان الكل بيمون عليّ
وانا ما بمون على حدا

لذا اقترح ان يكون موضوع بتمون
من ضمن المواضيع المقترحة للحوار الجماعي الشهر القادم

بما ان الموضوع اصلا منك
والعنوان...ماركة مسجلة الك

اعتقد انك بتموني

 

Sozan

ما انا هاد اللي ضليتني افكر فيه...شو حدود المون بالزبط!!!
وشو يعني بتموني علي تقومي تعمليلي مشكله و تدخليني بموضوع غريب عجيب

الله يسامحها شكلها ما فكرت منيح بوقتها
امين يا رب

LUNAR.

زودتها الله يسامحها بس انا ما قصرت و فشيت قلبي ولكن موضوع المون هو اللي ضليت افكر فيه

بالزبط...تدخليني بموضوع شب متزوج و علاقته بمش عارفه مين :$

ههههه ذكرتني باخوي...هو كمان عصب علي :)
شو دخلني انا :$

 

جعفر

انا جديده علي بهالمعنى الاستغلالي هاد ...كتير ناس استلبطو علي من باب المون ولكن ما كان الها هالاثر هاد

بدي اكون طيبه و بكرامه وبدون ما حد يستغلني...ما بقدر!!
لازم نقدر

ههههه العفو :)
هو بيني وبينك لهلأ مش فاهمه شو معناها بالزبط عالفيس بوك

مياسي


:$
هي الله يسامحها زي ما حكيت ما فكرت بتبعيات الموضوع فكرت حالها بتعمل اشي منيح
وانا ما قصرت بيني وبينك لكن خلصنا القعده واحنا متفقين :)

شفتي بالله عليكي و حكتلي انه مش متفق مع الجديده وممكن يتركو بعض :$

وانا مال اهلي ....يستطفل منه الها و يحل مشاكله بعيد عني

 

جفراء

ما انا ما حبيت اتصرف بناءا على ردّة فعلي الاولى لهيك, وحبيت اتعامل معها وجها لوجه افضل وحكيت كل اللي بدي اياه و هي اتقبلت لانها عرفت انها غلطانه بس اكثر شي اثر فيها منظرها قدام اهلي :$

وانا محظوظه فيها بس لولا هالحركة الغريبه ....ان شاء الله تكون تعلمت بس

شهر زاد

الحمد لله مشيت وما صار شي و ربنا ستر

معك حق....كل ما بتزيد خبرتنا و تعاملاتنا مع الناس بنشوف اكتر واكتر :$

 

Naysan

بالزبط
مبدئيا شو دخلها بامور اخوها وهالشي حكيتلها اياه, ال هي بتعرفه منيح انه لا يمكن يخون مرته بس بدها تتأكد

بحب دايما احطهم بالصورة وبكل شي, هيك متعوده اللي الي و اللي علي
اريح كتييير من التخبايه و حمل الهم, غير اني انقهرت اني زي العامله عمله و اشي سر و انا ما الي دخل اساسا

بالعاده سبحان الله الاشي اللي بتخبى وحتى لو ما كان اله معني بس يكتشف تخبايته بوقتها بتخيه كبير

نادر

اذا بتعطيه لراتب ماشي بتموووون :)

بس ابو راتب!!!
O_o شو بدي فيه هاد

 

Hana

اهلا وسهلا فيكي دائما مع اني بحب اعرف وحهة نظرك بالمواضيع :)

الحمد لله, و انا عاتبتها و بينتلها حجم الموضوع واللي كانت هي مش شايفته كبير

بيني و بينك....اخوها مش مستلطفته انا بالمره :(

Wafa'

هو شي بسم البدن, واخوي التاني انصدم و انسم بدنه بس عرف
لكن هي صاحبتي من ايام المدرسه و كتييييييييييير بنفهم عبعض, تيّست معها هالمره شو اعمل, عاتبتها و انتهى الموضوع لاني انا ما بدي اخسرها برضه

الحمد لله عدّت و انا فهمتها و ان شاء الله تكون استوعبت الموضوع صح

 

نورنياتي

مش المفروض يكون في حدود؟؟؟
يعني بس يكون فيها ضرر للطرف التاني ما في اشي اسمه مون

يااااا الله شو بكره شغلة الاحراج و المخاجله


الواد منصور......ما بيجمّعش
ههههههههههه وين كنتِ و وين صرتِ و شهيتينا عأخر هالليل الله يسامحك , عالهارديز بس لاني بطلب الساندويش بدون بصل :)

Saleh

زودتها الله يسامحها:$


قصدك تدخل بالعالم, و اذا قصدها الاصلاح مش هيك, تحكي معه وجها لوجه مش تمسك عليه مماسك
هاد كان رأيي اللي حكيتلها اياه
وهي ما اقتنعت :)

 

Yosef

مساء الورد

شكله الكل دايق من ماراة المون و كاين ضحيه اله في عالاقل موقف من مواقف الحياة

خلص انت اكيد "بتمون" و الشهر الجاي حيكون من المواضيع المطروحه ان شاء الله :)

وانا اكيد بمون على حالي.... عالقليله بالخير هالمره :)

 

ويسبر
بوك من أوائل الشغلات اللي عرفتها عالفيس بوك..
معناها زي كإنط بتدقي واحد إنو وينك؟؟

 

غريبين الناس .. كيف بفكروا ؟ مش عايشين معنا على نفس الكوكب ؟

الله يكون بعونك وسبووورة على اللمون و الكمون و اللي بيمووون ;)

 

جعفر

ومنكم نستفيد :)
انت من اللي بغيبو ..فاااا اكيد راح توصلك مني كتير ;)

هديل

بفكرو بمصلحتهم و براحتهم اول شي و اخر شي :$

هههههههه... هديل عويس صايره :) شااااعره
الله يعينا عليهم...الكل بعاني طلع

 

yeeeeeeeeeeeeeeeee... ya 3aibha yeeee!!
Anyway.. a7san shee sara7tek m3 ahlek... jad 7abbet.ha...
jad enti hek 7aleti akbar jozo2 men elmoshkeleh:))
o allah yer7am 3ammek o ye3'ferloh.. halla2 3rft

 

Ahmad Merie

Al7amdolellah ana met3adeh 3ala halshee....ana w mama sa7betaaat w kul she KUL shee bt3raf 3anno :)

b7es 2enn t5bayet 2ay shee betdammer el mawdoo3 w 7atta law kan shee ma elo m3na

Ameen ya rab shokran Ahmad ... 3ala my real name facebook account katabet w2t-ha

 

ballah jd 0_O
minny minnek b2olelha sho ra2iek a5bo6ek kaff adwerek ma ana kman bmoon 0_O

 

Had 2elly sar :$

LOOL 3ajbatne raddet fe3lek :)

laa sama7.... halmarra bs :)