الفاضي بيعمل.....

زي ما كلكم بتعرفو و بناءا على تذكيري الكم بالموضوع 1500 مرّه فانا من شهر 10 وانا مجازه من الشغل :) راحه نفسيه مش طبيعيه الحمد لله, نفسيا و جسديا مرتاحه و خصوصي نفسيا لاني كنت احس الشغل بدو يغير من نفسيتي, هلأ الكل ملاحظ اني جدا ايجابيه و دائما بضحك و الحمد لله.

بس اللي ما بتعرفوه اني فاضيه ولكن ما معي وقت احك راسي - على رأي وحده صاحبتنا و بتكرهنا وخده بالك حضرتك - وقتي مليان عالاخر و باشياء مسعدتني و هاد الفرق بين هلأ وبين وقت ما كنت مشغوله بالشغل اللي كنت احبه كتيييييييييييييير و لكن بكره الاداره اللي فيه, الحمد لله كل الاداره تغيرت و الوضع صار احسن و اذا ما صار و اشتغلت لشهر 10 فانا راجعه عليه :)

المهم خليني احكيلكم و انا فاضيه شو بعمل

• بنت مرضيه :)

كل وقتي بقضيه مع بابا وماما, من الصبح لليل و لهيك بالغالب ما بشبك منيح الا بالليل, انا حابه كتير هالشي و بابا و ماما مبسوطين اكتر, ما بعرف موضوع اني كنت وما زلت يمكن اسافر خلاهم يتعلقو فيي اكتر, اي مشورا اي اشي بنحضره اي شي بناكله لازم مع بعض و بالاغلب مع مميتي :)

• طالبه :)

ايون طالبه.... غير دروس الفقه و تفسير سورة النساء اللي متعوده عليهم من وقت الشغل انتسبت لنادي بندرس فيه تفسير الجزء 28 و حفظه بالاضافه لمحاضرات تربويه

من ضمن الاشياء اللي بناخدها بالنادي في دروس طبخ فااا بتقدرو تحكو عني شبه طبّاخه :)

عملنا هاي الاشياءات الزاكيه ....اول صورة بنت خالتي اللي عملتها بس انا اعملها بفرجيكم الصوره ان شاء الله, الباقي لتارت و لطبخه اسبانيه كتير زاكيه اسمها Paella تعلمنا كيف نعملهم و اكلناهم :)

بالاضافه لمحاضرات منفصله بيوم تاني مش بالنادي في اساليب التدريس لطلاب صعوبات التعليم و هاد بنقلني للعمل اللي بعده

• مدرّسة :)

رجعت للتدريس الحمد لله و هاد من اللي حسّن كتير من نفسيتي, زي ما حكيتلكم قبل اني كنت ادرّس طلاب في جمعيه الايتام و حاليا بدرّس طالبه جديده بعرفها من قبل و لكن اول مره بدرسها, بدرسها عربي و رياضيات, هي صف تاسع و مستواها يمكن صف رابع, للاسف مستواهم كتير متدني وان شاء الله اقدر اعمل فرق , لكن التعامل معهم مره تانيه كتييييييييييييييييييييييييييييييييييييييييير ببسط, برجع وبنصح الكل يحاول يتطوع بهيك مشروع لانه بحسسك النعمه اللي انت فيها غير سبحان الله في راحه نفسيه و سعاده غريبه بتدخل على قلبك

وفي مشروع تاني اذا زبط بحكيلكم عنه :)

و اخيرا وليس اخرا

• محاولات مصوّره :)

مش بس رين و الدكتور وحل و هنا اللي بحبو التصوير...لااا ويسبر كمان بتحب التصوير :)

الباقي صور من الامارات بين دبي و العين :)

لنكتب عن.... المعاقين و المسنين , نحن معهم ام عليهم

مسائكم سعيد

انتهت مدّة التصويت على الموضوع اللي ان شاء الله راح نحاول كلنا نكتب عنه باخر اسبوع من شهر نيسان ابتدا من اليوم و اعلى نسبة تصويت كانت لموضوع " المعاقين و المسنين...نحن معهم ام عليهم"

بتمنى الجميع يشارك بالكتابه و يا ريت تخبروني لمّا تكتبو لحتى يتم نقل التدوينات للمدونه الجديده اللي بنيناها لهالفكره حتى يتم الوصول الها بسهوله مع العلم انه راح نحط لينك لمدونة صاحب التدوينه بكل موضوع

و زي ما انتو شايفين نزّلنا استفتاء جديد لشهر ايار ان شاء الله و فيه المواضيع اللي اقترحتوها علينا بالاضافه للموضوع الحائز على ثاني اعلى نسبة تصويت , ويا ريت تقترحو اشياء جديده بتحبو يتم الكتابه عنها لحتى يتم التصويت عليها في الاشهر القادمه

اهلا وسهلا باي اقتراح او تعديل او اي وجهة نظر بتحبو تلفتو نظرنا الها

العمل جماعي و بنحب الكل يشاركنا فيه

شو رأيكم؟؟؟

هل بتقبلي بعريس رفضته قريبتك او صديقتك؟؟

هل بترفض عروس رفضها قريبك او صديقك؟؟

بالنسبه الي

هالشي حصل معي من زماااان, تقدملي شخص رفضته قريبتي , غير انه قريب و احنا عنا قاعده لا بنعطي ولا بناخد قرايب ولكن سبب رفضي الاساسي ان قريبتي رفضته

هلأ بس افكر فيها بحسبها غير

انه الاذواق و الاهتمامات و المعايير بتختلف من شخص لاخر, يعني المواصفات اللي بتهمني بشريك حياتي ممكن انها تختلف عن المواصفات اللي قريبتي /صديقتي بدها اياها, حتى لو من ناحية الشكل, اذواق العالم بتختلف برضه, اللي بعجبني بختلف عنهم , الامور اللي بعتبرها اساسيه انها تتواجد في شريك الحياة بتختلف عنهم.

ما بعرف اذا بنعاد الموقف هل ممكن يكون حكمي بمنطق و عقلانيه ويلا راح يكون قراري مبني على - وهو الارجح اعتقد - الّلامنطقيه !!!!!

انتو شو رأيكم...شو ممكن يكون ردكم لو انحطيتو بهيك موقف؟؟؟

خارج الصور

حاسة حالي عايشة بين صور كتير في حياتي

اللي بحبها و اللي بكرهها واللي بتبسطني و اللي بتزعجني

ولكني مش جزء منها

حاسه حالي خارج هالصور كلهم وبس متفرجه وما الي دور ولا تأثير

وما الي صورة خاصه فيي ارجعلها حتى

هالشعور مش صحيح ولا صحي انا متأكده

بس حاسه ان ما الي اي اثر او تأثير

حاسة حالي خارج كل الصور اللي بعيش معها و فيها

بتمـــون

وانا بالامارات توفى عمي الله يرحمه و معظم صاحباتي كتبولي عالفيسبوك ليعزوني - هي وحده عرفت وبس كتبت عالفيسبوك المعظم عرف - و بنفس اليوم بعتتلي صاحبتي مسج على موبايل خط الاردن تطلب ابعتلها رقمي بالامارات, بعتلها الرقم, انا فكرتها بدها تتصل تعزيني ولكن مااتصلت و بعد اسبوع بعتتلي مسج على موبايل الامارات بتحكيلي اذا اتصل فيكي الرقم هاد و كتبت الرقم ما تردي عليه و اذا بعتلك مسج ابعتيلي اياها فورا و احكيلي اذا بتصل, انا طبعا ما فهمت شي, بعتلها انو ماشي بس بدي افهم و بسرعه.

تاني يوم بعتتلي ايميل تشرحلي فيه, طلعت الاخت مكتشفه ان اخوها اللي متزوج جديد للمره الثانيه بحكي مع وحده روسيه بعرفها من زمان و مقيمة بالامارات, كان فاتح ايميله على جهازها وقام يعمل شي و شافت الايميلات اللي بينهم, قامت عملت ايميل بشبه ايميل البنت, و بعتت منه لاخوها الفاضل ايميل و فيها رقم موبايلي عاساس انه رقم الروسية و بتحكيله احكي معي :$

انا كان فيي مخ و طار, انسم بدني و انحّميت حتى مرة اخوي انتبهت, انا كنت حاكيتلها عن المسج و حكيتلها عن الايميل وانصدمت هي التانيه, جد انسم بدني و ال ايش "ما الي غيرك امون عليه بالامارات" حملت هم و صرت زي اللي انا عامله شي غلط وكل ما رن الموبايل انقز لكني رديت على كل الاتصالات و خصوصا اني كاتبته بالسي في اللي باعتها للشركات , و الحمد لله لا اتصل ولا بعت مسجات.

حكيت لاخوي عن الموضوع و خصوصي ان هالرقم لكل العيله, مين ما اجا ضيف لاخواني التنين او اهل زوجاتهم باخدو هالرقم, برضه التاني انسم بدنه و بحكيلي هاي مش انها استعارت جاكيت مثلا وحكت بمون عليها لأ هاي عملت مصيبه, و انا بصراحه خفت الشب يكون اله صحاب بالامارات و يصيرو يتصلو عأساس اني الروسيه و نبلش معهم و هاد اللي خلاني احط اخوي بالصوره, كنا مروحين من دبي للعين انا واياه لحالنا و ال بدي اعمل جو حكيتله هالقصه مع قصه تانيه بتسم البدن قام المسكين من قهره استعجل و لقطه الرادار, ماشاء الله علي اخترت الوقت الممتاز وال ايش بدي اسليه :$

انا بعتلها ايميل وبينت اني متدايقه بس حكيت خلي المعاتبه وجها لوجه, وفعلا التقيت فيها بس رجعت عالاردن و حكيتلها قديش انسم بدني و ردّة فعل اخوي, اللي همها هو رد فعل اخوي و منظرها قدام العيله , و بررت بانها متأكده ان اخوها ما حيتصل, طيب كيف متأكده و هو هيو على علاقه بالبنت؟؟

انا صاحبتي هاي بحبها و مهما صار بنضلنا صاحبات و بعاتبها و بتعاتبني, لكن موضوع انها "بتمون" علي فتعمل اللي بدها اياه و اللي بمصلحتها و مش مهم انا شو يصير معي هاد اللي جلطني, تورطيني بمصيبه و بعدين اللي يهمك منظرك قدام العيله بجلط اكتر, انا طبعا حكيتلها هالحكي و ما حسيت وصلتها خطورة الموضوع, تعاتبنا و انتهت المشكله وما صار شي

لكن ضلّت فكرة "بمون" هاي بعقلي و ضليت افكر بكم المون و لوين ممكن ان حد يمون على حد توصل فيه؟؟؟

هل بمون عليكي يعني استغلّك؟؟؟

هل بمون عليكي يعني افكر بمصلحتي وانسى اني ممكن اضرك؟؟

هل بمون عليكي يعني اقيدك؟؟

باقي اسبوع

باقي اسبوع لنهاية مدّة التصويت للموضوع اللي ان شاء الله راح نكتب عنه في اخر اسبوع من شهر نيسان

بناءا على التصويت اللي موجود في مدونتي و في مدونة زميلنا يوسف فلهلأ النسبة الاكبر للكتابه عن موضوع "المعاقين و المسنين...نحن معهم ام عليهم" بنسبة 56% من الاصوات و اكيد لسا باقي اسبوع و ما بنعرف اذا ممكن تتغير النسب لوقتها

اصدقائي المدونين و المعليقين اقترحو مواضيع جديده لحتى نصوت عليها في الشهور القادمه, و بتمنى انكم تشاركونا بالتصويت و الاقتراحات و اكيد بالكتابه

في يوم 24 الشهر من كل شهر راح نكتب عن الموضوع الاكثر تصويتا و لمده اسبوع كامل لحتى الجميع يشارك معنا للفت النظر لهالمواضيع اللي مرات بتكون مهمشه بين الناس او بتختلف اراءهم فيها و بهيك بنفتح مجال اكبر لتبادل الخبرات و وجهات النظر و للحوارات البنّاءه ان شاء الله

للاسف كنت مشغولة كتير الفتره الماضيه كان نفسي اعمل شي غير عن مدونه عاديه بس مبدئيا هي المدونه اللي جهزتها و ان شاء الله من اليوم ليوم 24 بكون عامله شي افضل , صديقنا وحل برضه حابب يساعدنا واذا صار معه وقت بعمللنا شي افضل من هالمدونه :)

المدونه الجديده

________________________

اليوم 17/4 وما حد بنسى يوم الاسير الفلسطيني

ربنا يفرجها و يفك اسر جميع الاسرى في جميع سجون العالم

اي كلام ممكن نكتبه نعتذر فيه لاسرانا انّا بنعيش حياتنا بشكل عادي وما عملنا شي لنحررهم او نحرر ارضنا الغاليه فلسطين ما حيكفي , للاسف اكثر من الدعوات - مع يقيني بقدرتها على التغيير - ما بنقدر نقدم في الوقت الحالي ولكن ان شاء الله ربنا يجعلنا من مغيري الواقع اللي بنعيشه

كبر الأسير

تتموَّج الذكرى, وبياراتُ أهلي

خلف نافذة القطارْ

وتغوص , تحت الرمل والباردود , دارْ

كل النوافذ أُشرعت في ذات يوم

للعيون السود, واحترق النهارْ

وَلَعاً بساحتك الصغيرة

وأنا كبرتُ..كبرتُ..

حَطَّمْتُ المرايا كُلَّها,

ونفضتُ أجنحةَ الغبارْ

عن جنَّة نبتت بصورَهْ

ورأيت وجهك في السنابلِ

وهي تبحر في سماء الضوء

في فرح الضفيرة

يا حبي الباقي على لحمي هلالاً في إطار !

أترى إلى كل الجبال , وكل بيارات أهلي

كيف صارت كلّها .. صارت أسيره؟

وأنا كبرتُ, كبرتُ يا حبي القديم مع الجدار

كبر الأسير , وأنت توقدُ

في ليالي التيه أُغنيةً ونار

وتموت ’ وحدك , دون دار

محمود درويش

ملاحظه ع الهامش

اي عدم ترابط في الكلام او اخطاء فكل الحق على ام عمر اللي حكت معي الف مرّه - هاد يختي المشغوله فيه كنت و خده بالك حضرتك وحاضر راح اشرب الحليب وانام منيح وما انسى احط الورده الحمره بكره :) - و على نيسان اللي ما بترد على تلفونها, اقرأي ايميلك يا بطه و اسفه اني رنيت عليكي بوقت متأخر كل الحق على ام عمر :$

نظرات...

بتعرفو بس تكونو ماشيين بمكان او حتى قاعدين و تلفو وجهكم و تيجي عينكم بالصدفه بعين حد , حد ما بتعرفوه بالمره ولا عمركم شفتوه بس في احساس غريب بيجيلكم ان في شي مشترك بينكم او ممكن يجمعكم, و بتشعرو ان هالشي همه كمان حسوه من نظرتهم او من رجوعهم المفاجأ للنظر الك كأنهم شافو شي بوجهك

هالشي صار معي مرتين بحياتي و اليوم مره منهم, ما بعرف شو بعني و هل هو شعور حقيقي ويلا وهمي وهل هو بصير مع الناس كلها ويلا بس صار معي و لكنه شعور غريب

وعلى سيره النظرات

يوم الثلاثاء يوم العواصف الهوائيه الغريبه اللي صابت عمان, كان عندي مشوار و اخوي وبما اني قاعد عالجاعد هالايام و مهما قامو الجاعد و رجعوه بضلي قاعد, اخوي بستخدم سيارتي و بروح فيها عالشغل و اللي موقعه بالشارع اللي ورا بيتنا سبحان الله, المهم عندي مشوار فقررت اروح مشي لاجيب السياره , بالعاده بهيك موقف بابا بوصلني لشغل اخوي لاخد السياره ولكن انا حبيت امشي, بتعرفو القرارات بالمواقف الغلط و بس تصرّو عليها, وفعلا لبست و طلعت و كنت شوي و راح اطير فعليا, مش هوا اللي كان, بالبدايه كان من ورا فكأنه في حد بدفعني لقدام, وبعدين اكتر من مره اوقف لاني مش عارفه اتحكم برجلي و انا بمشي, صرت امشي جنّابي من الهوا و اكبر مصيبه اولى لمّا دخلت من شارع فرعي لاطلع عالشارع الرئيسي, زوابع و مش قادره اتحرك, و المصيبه التانيه لمّا طلعت فوق جسر المشاه لاقطع الشارع دماااااااااااااااااااار, انا طبعا كل ما افقد السيطره اصير اضحك, بضحّك الوضع شو حد يدزك لورا و بعدين لقدام وبعدين تمشي يجي الهوا يطير رجلك وما تعرفي تحطيها عالارض!!!

المهم وانا بالممر الفرعي باتجاه الشارع الرئيسي مرّت من مقابلي ست و لابسه يونيفورم شكلها مروحه من الشغل, بتطلع من بعيد فبس قرّبت انا ذوقا بحكيلها "الله يعطيكي العافيه" مع ابتسامه لطيفة ظريفه وتقولوش سبيت عليها, تقولوش كاينه قاتله اعز عزيز على قلبها و تعرّفت علي , شوي و بدها تضربني, كشّرت و رفعت حواجبها واتفرجت علي من فوق لتحت و مشيت :$

انا برضه ضحكت شو بدي اعمل يعني

اجواء ورحلات ربيعيه

الحمد لله ربنا يسر وصبحت منيحه الجمعه الماضيه و رحنا رحله و كانت كتييير حلوه مع كل اقسامها...... اقسامها لان الرحله عنا بتنقسم ل 3 اقسام

قسم التجهيز ما قبل الرحله, انا و ماما بنجهز اغراض الاكل و الشرب في الرحله و اخوي بجهز السياره باغراض الرحله من طاوله وكراسي و منقل..... وخلافه و بابا يشرف على التجهيز و بضل يذكرنا بالوقت مع تكرار كلمه "يلا" 1500 مره :)

القسم التاني قسم اختيار المكان المناسب للرحله و الشبه طوشه

دائما وابدا لازم يصير مشادات كلاميه و اصوات بتعلى واصوات بتنخفض وكله من بابا مع نفسه على اعتراضنا على اختياره لمكان الرحله, بابا بترك كل الخضار اللي بالعالم و بقرر يوقف ببقعه حجار وتراب وبنتكون بالعاده مايله :$ يا بابا يا حبيبي يهديك يرضيك مش حلو هالمكان, بزعل و بتدايق و بنرجع نلفلف وهو يتأفف و بنزلنا على موقع اسخم من اللي قبله و بنضل ساكتين زي الشاطرين ولا بنحكي شي علشان ما يزعل

و بالعاده بنروح احنا و عيلة خالتي و نفس السيناريو بتكرر عندهم زوج خالتي بكون عامل عندهم نفس الفيلم, و نفس السيناريو بتكرر مع خواني كمان مش عارفه هي صفه عامه بالرجال ويلا بس برجال عيلتنا, لو المشادات مش عالموقع بدها تصير على شي تاني, يعني لازم ينعجقو الرجال بعيلتنا بالرحلات ليش ما بعرف و لهيك خبرت مرتات خواني بهالشي وصار العادي انه تصير هالعجئه و الاختلاف بتوقيتها و ننبسط بس نخلص منها بسرعه و باول الرحله :)

بننزل من السيارات و ما حد بسترجي يتخنفس بكلمه التنين - بابا و زوج خالتي - معصبين و مش طايقينّا و وجوهم حمرا من الشوب و منا :) بنحضّر الاكل و بنتمشى انا وبنات خالتي و بنكتشف كم من بقعه حلوه بنقعد و بنحكي عن كل شي و بنقعد نقارن بردود افعال بابا وعمو و همه بالطريق واللي سبحان الله بتكون نفسها و بنقعد نضحك على تكرار هالفيلم بكل رحله.

القسم الثالث و الاخير وهو احلى قسم واللي بصبرنا على البدايات الغريبه للرحل, بعد ما نخلص اكل و شاي بنضب الاغراض و بننتقل لمنطقه جديده و سبحان الله بتكون خضرا و مبسطه و نظيفه و لطيفه, للقهوه و الشيبس و الكيك وكل اللخبطيطات اللي بتتاكل بالرحلات و اهمها شعر البنات :)

بس تصير الدنيا ليل بنولّع المنقل و عليه بتبدا قعدتنا, هالقعده عباره عن غنا و نكت و قصص ايام الشباب من بابا و زوج خالتي سبحان الله كلنا بنقعد جنب بعض و كلنا بتصير قلوبنا بيضاااااااااا وصافيه و بس بنضحك من كل قلبنا, اعترافات وقصص غريبه عجيبه عن احلى الايام و المغامرات المضحكه

رحلتنا استقرت بالاخر على طريق السلط ياما ماشينا :)

الموقع خدمة 5 نجوم و فيه علاقات كمان :)

سبحان الله كيف الورده طالعه بوسط الصخره :)

وبما ان الكل حط صور شجر اللوز فحبيت ادلو بدلوي انا كمان :)

المنظر عجبني بمنطقة صويلح

باقي الصور بدي انزلهم عالفليكر ان شاء الله :)