Things I Like To Whisper About

Would You Hear Me Whispering

قهرني



انا بالعاده مش كتير صحبه مع كرة القدم, ولكن كأس العالم و مباريات منتخبنا الوطني هاد شي ما في نقاش اكيد, استغربت من اللي صار بعد فوز الاردن على السعوديه و فكرتهم اخدو الكأس, وتفاجأت بالرغم من فرحتي اكيد بما تلى فوز الاردن على سوريا, مش لكرهي للفريق السوري ولكن اشي طبيعي انّا نشجع منتخبنا الوطني و نفرح لفوزه, و لكن زياده كانت التعابير عن الفرحه, من باب انّه لسا ما اخدنا الكأس و من باب انهم دائما بس نفرح كتير و يبدعو بصيرو يلعبو بشكل غريب بعدها :( فمنعا من تكرار هالشي, نوع من التشاؤم من اعاده الاحداث يعني ....

بالليل و احنّا بنقلب بين القنوات شفنا منظر من مسلسل ولا عمرنا سمعنا عنّه على قناة الدنيا السورية و لكن طبيعي نضل 5 دقايق نتابعه - مش عارفه ليش هالعاده فينا - المهم التهينا و خلص المسلسل و بدا برنامج اسمه " الكورة بملعبك" للاعلامي الكبير اللي بصراحه اول مرّه بشوفو و ما عرفت شو اسمه ولكن اليوم بحبشت لاعرف اسمه و طلع "لطفي الاسطوري"...السيد "لطفي" اخد الموضوع كتير جدّي ان كان بالمقدّمه المبتذله اللي حكاها و ان كان باسلوب الحوار و طريقة اجراء الاتصالات التلفونيه و بقراءة المسجات, الشب او العمو مش عارفه, نسي انه لازم يكون حيادي باللي بطرحه انه يكون دبلوماسي بانتقاء كلماته و موضوعي بكل شي بحكيه, حتى ولو كان ما بعبّر عن رأيه الشخصي, انت كمحاور و كمذيع المفروض تكون حيادي, بتأسف لخسارة فريقك ولكن ما بتهاجم الفريق التاني اكيد.

المذيع المتألق, هاجم و بشكل واضح و بكلمات رنّانه المنتخب الاردني وحكا ان الحظ هو اللي وصلّه لهون و بما معناه ان لعيبة المنتخب الاردني ما بعرفو يلعبو وانهم كانو مغمورين لولا قبل كم سنه اجا المدرب الجوهري, وان المنتخب السوري "اهدى" الفوز للمنتخب الاردني اللي ما بستحقّه على طبق من ذهب" و وصلت فيه الجرأة انه يطلب عأساس انه بحكي بلسان الشعب, طلب من رئيس اتحاد كرة القدم السوري الاستقاله مثل ما رئيس اتحاد كرة القدم السعودي استقال و لمّا رئيس الاتحاد عصّب عليه و رفض السؤال و بيّن انه برأيه ان مش الشعب اللي طلب هيك طلب و هزّئه بشكل مش دبلوماسي و احمرّ و اخضرّ لمّا اعترض المذيع على ان المدرّب ما راح يستمر مع الفريق و بينّله ان هاد قرار المدرب ومن ساعة توقيع العقد بينهم, و اتصل برئيسة تحرير جريدة رياضيه و التاني هزّئته و حكتله بما معناه انه لا يزاود على وطنيه حد, وان كل الشعب و منهم اللعيبه ما حد بقدر يقلل من وطنيتهم.

و عند قراءة المسجات اللي اجت وحكا عن الاتصالات اللي وصلته واللي كلها ان الشعب بدو ينجلط و قلبه يوقف و انه واحد من المتابعين حكاله انه صار "يتفشش" بولاده" الضيف برضه ما سكت وحكا ان الحلول هي انّا نفكر مش مين يستقيل و مين نلوم و انه يا ريت نحاول نبعد عن العواطف بتفكيرنا ونعرف كيف نحل المشكله للمستقبل, الضيف كان رائع جدا بردوده , و بعد ما صار يقارن المذيع بعدد الهجمات و الضربات الركنيه و ال.... بين الفريقين, حكاله الضيف بس الاردن جابت 3 جوال بمرمى سوريا وهو اللي صار

المشكله بس جابو رأي الشعب الكل برقص و مبسوط و بحكو انهم ما بلومو حد غير تغيير المدرب باخر فتره, و الكل بدبك و رافع العلم و بغنو و بعبرو عن فرحتهم ورضاهم عن لعب اللعيبه و ما شفت حد بدو ينجلط ولا حد بتفشش بحد.


اليوم وانا بدّور على اسم الاخ عرفت سبب انه محموق لهدرجه, كل التعليقات اللي بتخصّ اسمه بتطالبه بالاستقاله لان من وجهة نظرهم هو السبب بهالخسارة لانه اوهم الشعب و اللعيبه بقوّتهم وجاهزيتهم و لانه طلع الاخ شانن حرب على المدرب القديم و هو السبب بانه تغير بوقت كتير قريب من هالمباريات.

بغض النظر عن اللي صار و فرحتي بفوز الاردن هلأ اكتر ومواساتي التامه لكل المشجعين السوريين و اقتناعي بانها كره يوم معك ويوم مع غيرك....بس قد ما قهرني المذيع باسلوبه و طريقته الغير احترافيه على قد ما انفش قلبي باللي معلقينه العالم اليوم



بالاخر بحب احكي للمذيع القذّ يا ريت ترجع تشوف المباراه مرّه تانيه و شغّل عاليوتيوب اغنيه و اسمع كلماتها و طبقها منيح...الاغنيه لمتعب الصقّار وهو بحكيلك " لد لد شيف انّه...كيف اخذ الطابه منه"


هلأ عرفت ليش بسموه عرس وطني
لانهم بضلّو يزمرو :)

31 التعليقات :

بصراحة اللي بسمع تصريحات سوريا و لا السعودية مستطوين (مش عارفت كتبتها صح و لا لأ) كثير ، بالرياضة و غيرها حتى سخافات مسابقات التفاهة الثانية بعطوني شعور كأنا من قبائل افريقية مع احترامي الهم

 

تحياتي ويسبر اذا في مجال يتكبر الخط شو العتب على النظر لانه
دمتي بخير

 

Khaber

هلأ انهم زعلانين و متأثرين...حقهم كتير و احنا لا سمح الله لو خسر الفريق الاردني راح نتدايق
بس ما بنطلع عالهوا و نقلل من قيمة الفرق التانيه

ما فهمت "مستطوين" بصراحه لاحكيلك صح او لأ :)

اهلا فيكي من جديد :)

 

http://www.youtube.com/watch?v=3qx4Y9skhpg

 

جفرا


غالي و الطلب رخيص

كنت عم بزبط فيه ...شكلك قرأتي و انا خاسفته بالغلط

بس هلأ زبط ان شاء الله :)

 

Anonymous

شكرا جزيلا عالفيديو :)


جد اشي بقهر

 

شكرا كثير على الفيديو. انا كنت حاب كثير اشوف فرحة الناس بالشوارع. بس تعرفي شو اكثر شيء مفرح؟ انه كل الأردنيين كانوا مع بعض. ما كان مبارح في شيء اسمه اردني، فلسطيني، شركسي او شيشاني. فعلا شعور حلو. يا ريت منتخبنا يتحسن ويصير دايما يلعب مبارايات خارجيه.ـ

 

غلقليل انتو بتدافعوا و بتفروحوا لفوز فريقكم...
احنا بنسكر الطرق من الفرحة عشان برشولةنة فاز

الله بعين

 

ويسبر هانم، عن جد حاجة بتقهر، بقية التعليق نزلته إدراج عندي بعنوان كرة قدم

http://salehspace.blogspot.com/2011/01/blog-post_18.html

 

Jaraad

العفو :)

فعلا معك حق....بهيك مواقف الكل بجتمع

لكن في ناس بجتمعو بس من مبدأ انا و ابن عمي عالغريب :$

الروح الرياضيه معدومه عند البعض زي الاخ المذيع

انا جبت الفيديو من موقع فيه اكثر من واحد هي اللينك اذا لسا بتدور :)

Abuelsharif

زمين حكالك انّا ما بنعمل افراح برشلونيه او مدريديه عنّا بالبلد :)

كلّه موجود.....احنا شعب قلبه كبير و بفرح و بجامل الغريب قبل القريب :)

 

صالح

معنا حق...اشي بقهر :$
و جميله جدا تدوينتك التعليق

الحمد لله على كل حال :)

 

انا مو من محبين الكره ابدا ومو كتير بفهم قوانينها بس اللي حكيتي بجلط انوا يكون في حدا هيك بيطلع على الشاشة!!
بس كمان عندي سؤال : مو غريب انوا فريقنا الأردني فجأة بلش يربح؟!!!!!!!!

 

ما كنت باعرفك رياضيه يا بنتي :)
مبروك للاردن ونحقق انجازات اكبر في مجالات اخرى

 

بصير أتفشخر و أقول إني ما عندي تلفزيون و مريح راسي من كل هال

"أدخل الكلمة المناسبة هنا"

:]]]

+ أنا ممارس و لست متابعا ً من زمااان
:)

[لأ! ما بيصير؟ ، طب بلاش]

و الله كل الشغلة ما إلها طعمة!

أنا صرت بتمنى نخسر من الأدوار الأولى و نعصب يوم و لا توصل مواصيل
هبلة!!!

 

فيديو جميل حبيبتى
الفرحة حلوة ربنا يدمها علينا
تسلم الايادى

 

ino 5ls 5elsat el game get over it,msh lazim tdallo te7ko 3nha osboo3,jd people are weird...w iza 5serto?ma e7na yama 5serna bs el 7ilo ino el wa7d ydall me7tarem 7alo wel nas el tanieen,el reiada m3naha a7la w arqa b kteer min haik bs el nas el tafha betshawehha!!

thanks for the post Whisper,jd ana kman aharny :S

 

Hana

مسا الورد

انا مش كتير برضه بستوعب كل شي, بس منتخبنا الوطني و كأس العالم ما بعرف ليش ما بقدر ما احضر او اتابع اخبارهم عالقليله :)


الفريق بعرف يلعب....مشكلته انه بركن في لحظات حرجه و بصير يخبص الدنيا....ان شاء الله هالمره ما يعملو هيك كمان :$

Sozan

ما الك علي يمين - تذكر قبل فشره او خرطه كبيره- من يوم يومي لياقتي عاليه وما ببدا النهار الا برياضه الصباح :)

هو فتره كنت مجبره احضر بحكم تواجدي مع 4 شباب, بابا و اخواني و بعديها اقنعت حالي اني بحب كرة القدم :)

ان شاااااء الله....
بركي بدايه الغيث يكون :)

 

Sheeshany

انو شو ذخل التلفزفز بالموضوع!!!

ما انت لو متابع و بتقرأ جرايد راح تقرأ هالكلام بالجرايد

اصلاطن بالعكس لو عندك تلفزيون كان شفت اللقاء :)

الموضوع اللي قهرني المذيع و احترافيته مش موضوع مين غلب

مع اني معك و ضد المواصيل الهبله اللي البعض صاير يوصللها :$

هبة

مسا الورد و الياسمين

الله يحلّي ايامك يا قمر :)

امين يا رب...ربنا يديمها عالجميع

 

Rain

elmoshkeleh be7ko 3an elly betqabbal kul shee bsader ra7eb 2enno 3endo ro7 rieadyyeh.... hal3alam ma 3endha la roo7 wala mo5 b3eed 3annek

kalam ma 2elo da3y w mesh bemakano wala fe wa2to w sader 3an nas elmafroood befhamo :$

 

Btesma3i bel "sore losers"? Hada akbar methal. Dayman ra7 ykoun fi nas hek, 3ashan ma beseer kol el nas tkoun roo7hom reyadeyyeh :)

Anyways, I know how you love tags, so you've been tagged :)

 

أنا "زجيت" بشغلة التلفزززززززيون إنو فشخرة
و تخويت

شوووو ويسبر
حس الدعابة عم يضمحل عندك
لازم ترجعي على بلد الابتسامات في إجازة شكلو
;)

 

تحيه
لقد تم نشر التدوينه في تجمعنا مدونات من أجل التغير

 

Rand

Ahaaaaaaaaaaa..... elshab 6ele3 menhom 2ezan :)

yaaaaaaaay yaaaaaaaay ....new Tag , m3 2enno wwwwwala b7ebhom belmarra ;)
Thanks ya amar...6ayaran 3ala ur post la 2ashoof el tag :)

Sheeshany

بتعرف شو.... رجعت قرأت ردي على تعليقك و حكيت لحالي " ايش في!!! شو مالك!!!" انو جد ليش اخدت الموضوع شخصي كأني

مع انو بوقتها ولا كان قصدي هيك :)

لا تخاف.....عائدوووون عائدووون و قريبا كمان :)

 

مدونات من اجل التغير

شكرا جزيلا الكم :)

 

بتعرفي إنو كتبت عن الموضوع نفسه على الفرحة المبالغ فيها حتى قبل انتهاء الشوط الثاني هههههه :))
والأردن أولا دائما وأبدا ودائما ما كان إله حساد وكارهين إله لكن للبيت رب يحميه :-)
ولد لد شيف إنو ...شيف أخد الطابا منو ........:))))

 

Mar7ba whisper

3njad in Jordan they take soccer very serious I do not why it is just sport .I wish the get exited about something more important if you what I mean not soccer(it’s just game)

And for the Syrian team or reporter where is what the call sport spirit and just accept the lose and that is it.
Allah ba3een.

 

أنا وقت المباراة ما كنت متضايق
كنت مع ال2
واللي بفوز الله محييه
:)

طبعاً اكيد دارتلك الفكرة

 

Orangee

اه قرأت البوست بمدونتك :) قلبك حاسّك كنتي

الموضوع تحوّل من اشي ممتع رياضه و انبساط الى حرب :$

الناس مش زعلانه بقدر هالعمو هاد....الحمد لله ان العالم اعقل منّه طلعو

:)
بس لا تحكي....لااااااااااااااابقه الاغنيه للموقف :)

NrJordan


ya hala ya amar :)

Every where they take it kteeeeeeeeeeeeeer seriously dayman bnesm3 3an 6wash fe kul makan

For them it's not "just a game" it's a death life matter lool really la 2enhom - both of the country's fan -yjm3o 6aqat-hom be shee tanee mofeed 2akeed b3melo fare2 kbeeer

 

Ahmad

اول شي الحمد لله على السلامه و ربنا يعطيك العافيه ....ان شاء الله تكون عملت منيح بالامتحانات

طبعا فهمت قصدك :)

المهم اللعب الحلو زي ما بحكو ....صح!!

 

أهلا ويسبر

الله يسلمك .. وان شالله اكون قدمت منيح
بس كان فصل مقرف

شكرا الك
:)

 

not getting the new comments! again! :(
saw this by coincidence :(