شجرة حبنا...

مرة عمي نايمه عنا من كم يوم, و اليوم الصبح صحتني ماما بتسألني بدك تفطري بالبيت ويلا بالحدائق, طبعا الرد معروف :)

جهزنا امورنا واخدنا الشاي والقهوه و الشيبس و الشوكلت والمي و رحنا على ابو جبارة اشترينا ساندويشات سوبر كعك ورحنا عالحدائق, وصلنا مع أذان الظهر صفيت السيارة جنب المسجد ورحنا صلينا- بحب بس يصحللي صلاة جماعه بدون ترتيب :) - كان نفسي اصور المسجد من جوا لكن المشرفه ما رضيت, بصراحه ما ناقشت, ما الي نفس اناقش وما بدي اسم بدني, المهم صلينا و رحنا اخترنا مقعد تحت شجره الكينا, احنا مسمينها شجرة بابا :) لان بابا دايما بحب يقعد تحتها.

الحدائق مليانه حبّيبه, همه خطاب همه عرسان همه صحاب مش عارفه, ومليانه شباب كل واحد قاعد بزاويه بس بتطلع عاللي رايح واللي جاي, و بس يلمح بنات من بعيد فورا بمشي لعندهم, وبقعد قريب منهم وبشغل الاغاني على الموبالي, و مليانه سيارات مشغلين موسيقى عالعالي, والمشكله السيارة ما فيها غير السائق, طيب عالقليله جيب صاحب واحد تتسلو, وبنات ماشيين , كل ما بنت بدها تقطع الشارع, لازم توقف السيارة و ابصر شو يحكي السائق و هي يا تتجاوب بضحكه او ما تعبره بالمره, وفي شباب قاعدين بحالهم جايبين وجبات و باكلو بمكانهم و بحكو تلفوناتهم, وفي شباب فارشين حصيره و بدرسو :)... يعني في هيك وفي هيك.

انا و كالعاده بحب اصور المناظر اللي حوالي, لفت نظري ان شجره بابا ما في عليها مكان فاضي عالساق الا ومكتوب عليه, اسماء بنات و اسماء شباب,و تواريخ وقلب وفيه احرف زي اللي كنا نعملها مع صاحباتي وانا بصف اول ابتدائي :$

الشجره كتير حلوة و ما شاء الله كبيره و عاليه, و لكن منظرها مشوه او يمكن من وجهه نظر ناس تانيين منظرها حلو و بدل قديش احنا شعب رومانسي و حبّيب, بس انا برأي ان الشجر مش مكان لهالرومانسيه.

ممكن يعملو سور جنب بحر بس للعالم تكتب و توقع و تبصم باسمائهم و اسماء اللي بحبوهم, مش غلط , خلي الناس تفش قلبها و تكتب اللي بدها اياه, بس مش بأي مكان هيك يلا نسجل للتاريخ حبنا هون, وما بدي اخوض بنوع و مدّه هالحب.

قصصي الطرمه المسروقه ...

وانا بدور جوجل على البوست اللي كتبته ومنه حصلت على اسم وي وي WeWe اللي بسموني فيه بعض صديقاتي المعلقات, علشان اعيد نشرة ليعرفو المتابعين اللي سألو من وين اجا الاسم, بالنتيجه بينت النسخه في مدونتي وبينت نسخه موجوده على ديونجي ,انا استغربت لاني عامله اكاونت بالموقع وناسيه شو هو ولا اذكر اني كنت احط فيه نسخه من البوست اللي بكتبهم

المهم اكتشفت ان في اخت مغربيه ناسخه البوست زي ما هو وراده عالتعليقات كأنها هي اللي كاتبته,انسم بدني بصراحه وكتبتلها تعليق فش قلبي....يمكن .

خطرلي اشوف اذا في شي تاني ناقلته ,الهستري تاعها بوصل 900 واشي صفحه,وصلت لصفحه اشي و خمسين ولقيت بوستين غير هاد و10 من سلسله عرسان وكلهم بدون ذكر المصدر,غير وحده من سلسله العرسان حد سألها وحكت انها من مدونه وحتجيبلهم كل الحلقات

انقهرت بصراحه ,لكن عدد زوار الموضوع والتعليقات ريحتني شوي, لعند ما وصلت لرد الاخت على تعليق بتسألها اذا" باخر حلقه بتتزوج ؟؟" فردت عليها " يمكن تلاقي ابن الحلال اللي واعي ومثقف واهله واعيين ويمكن عنست ههههه"

انا حششت عأخر شي وجد ضحكت من كل قلبي وفجأه اختفت الضحكه,هلأ موضوع عانس رجل او ست انا ما بقتنع فيه,ما بقتنع بتحديد عمر معين,انا العنوسه بعتبرها حاله مش عمر, يعني العانس واحد او وحده بغض النظر عن عمرها وعن حالتها الاجتماعيه,لابسه غامق ومش معتنيه لا بلبسها ولا بشكلها,قاعده بغرفه عتمه وحاطه ايدها على خدها,الزمن وقف عندها,بتكره نفسها وبتكره اللي حواليها,بتحسد وبتحقد عكل الناس, انا ولله الحمد لا هلأ هيك ولا لو وصلت لأي عمر ممكن لاسمح الله اصير هيك

اللي قهرني هو ان هاي المواضيع وحتى لو حطيتها بقالب فكاهي مرح ضحكت انا عليها وضحكت معكم,فهاي حياتي وابدا مش حلو الشعور بس حد تاني ياخدها نكته ويضحك عليها بدون ما تكون انت بالصوره

مابعرف اذا غلط اني اكتب عن حياتي بهالتفصيل!!! يمكن غلط اكتب السلسه كلها.... مش عارفه, بس الهدف من المدونه اني اكتب اي شي بخطر ببالي, وكل شي بدون تعديل او تنميق , هل بتحسوني ببالغ بالتعبير؟؟؟ هل المفروض ما اكتب كل شي؟؟؟ في مواضيع خسيتوها غلط بنحكى عنها؟؟ يا ريت تجاوبوني...

وبعرف انها ممكن بتقرأ هالبوست هلأ , بس بطلب منك مستقبلا انك تذكري المصدر :) و تراعي انها قصه ناس هاي مش خيال, في منو واقع مع انو بقالب كوميدي بس بوقته كان بعني شي, وممكن لهلأ ذكراه بتعني شي ...

خير تعمل...شر تلقى

كنا معزومين عالغدا وبابا بسوق وطالع من شارع فرعي لشارع رئيسي, و كان في ماشي وراه بيك اب من اللي بجمعو الخردوات من الشوارع, يعني ماكله هوا عالاخر, وقف بابا عبداية الشارع الفرعي و ما انتبه سائق البيك اب اللي وراه وضرب السياره, نزل بابا وشاف ان في اضرار لكن الحمد لله مش كتيره, وسيارة الزلمه اساسا ماكله هوا فما بين عليها اشي, بابا حزن عالزلمة اللي بين عليه انه مسكين و ما بقدر يدفع حق تصليح, حكاله خلص انا اساسا مستعجل, روح الله يسهل عليك ومسامح.

كملنا مشوارنا و روّحنا عالبيت, اول ما ندخل البيت لازم ماما تشيك answering machine - يرحم جدي :) - المهم لقيت ان في مكالمه , شغلتها, طلعت من مديريه امن صويلح :) و بحكو لبابا يرجعهم بالسرعه الممكنه :))) , ما فهمنا ولا خطر ببالنا ليش وشو في, المهم فورا بابا راح و طلع سواق البيك اب رايح شاكي بابا بالمخفر , ال بابا ضربو و هرب , طبعا بابا و اخوي انصدمو, شرحو للشرطي اللي صار, حكوله مصدقينك بس هلأ احنا في بلاغ ولازم يتنفذ, وما في مجال غير ان سائق البيك اب يتنازل, حكالهم بابا بس هي السيارات قدامكم و بتقدرو تكشفو عليهم, حكوله هاد ما بصير الا ليجي السائق, والسائق بلغناه يجي وما اجا, قام بابا اخد عنوان السائق حتى يجيبه هو من بيته, طلع ساكن بمكان بعيد و بحكيلنا بابا ان بيته شبه كهف بالجبل, المهم جابو الزلمه واللي ما انكر كذبه و يحلف و يضل يقول لبابا هاي السيارة اللي بتطعميني انا و اولادي...الله يسامحك..قطعت لقمة اولادي, و اخوي بحكي بالعافيه انا ماسك حالي عنه ويلا بدي اضربه, المهم الضابط اخد بابا عجنب وحكاله انا بعرفهم هالاشكال ما بتخلص منه الا بس تراضيه, حكاله بابا وكيف وبكم بتراضى الاخ, حكاله 20-30 اللي بطلع من نفسك, وفعلا الزلمه اتنازل وبابا اعطاه 20 دينار وبحكيلنا بابا ما لفيت وجهي الا الزلمة صار بالسيارة وطيران.

يعني تخيلو اول شي الواحد بس يعمل خير مع هيك اشكال كيف بتطلع عراسه, وكيف بعدها بدو يعمل خير, و كيف الشرطه بتعرف بهالتصرفات ومتعوده عليها وبتسمح فيها, بابا حكا انه ما رضي يدفع الا لما حس انه الحل الوحيد للموضوع ليخلص من هالموقف خصوصا مع تعاون الشرطه التام مع الموضوع.

كتير بكون ماشيه ورا هيك سيارات بصيرو يبطئو بزياده وبحسهم بدهم اياني اضربهم, كل ما اروح عمسرب بمشي قدامي و بوقف فجأه, طبيعي انهم يعملو هيك مدام ما في قانون يأدبهم و يحمي حقوق العالم منهم, بس مع هيك ضل بابا يسامح الناس بس يكون الموضوع بسيط, واخوي الله يخليلي اياه بسامح عكل الاحوال, طبعا مهي سيارتي اولا و بعدين بحكي سمه بدن وصارت ليش تضيع السهره :)

يا خسارة التأمين الشامل :(

قصة راس الخروف

الموضوع اللي كتبه نادر في اسبوعياته لهاد الاسبوع في الاسبوع الثالث والعشرون, والموضوع اللي كتب عنه Harege زكروني بهالقصه اللي حكتلي اياها ماما

ما بعرف شو خطر عبال بابا واجا بنفسه ياكل راس خروف, سأل ماما لو جبتلك بتعرفي ويلا احكي لامي -تيتا الله يرحمها كانت ساكنه معنا بالبيت - حكتله لأ جيبه وبجرب وشو وراي, انا وقتها كان عمري اشهر, وبابا ما كزب خبر وجاب لماما راس, بتحكي ماما انها عملت زي ما كانت تشوف تيتا والدتها الله يرحمه بتعمل, وبتحكي كنت اشوفهم بفتحو تم الخروف مش عارفه ليش, مسكت ماما فكين الخروف وشد يللي بتشد وطبعا ما صار اشي غير ان سن الخروف غز باصبع ماما :( و اجت تيتا عليها وهي بهالمرحله, وحكتلها اساعدك طبعا ماما وافقت وطلعو بشقو الاطراف قبل ما يفتحو التم, وتيتا ما شاء الله خبره , بحركه وحده زبطت كل شي, وعالاكل بتحكي ماما شغل نهار كامل, يا دوب اكلنا كم لقمه وانصدمنا من الاكل لانها تقيله الاكله, اكلو الفته و تركو الراس زي ما هو.

بالليل محل ما غز السن طلع زي حبه غريبه, راحت ماما عالدكتور تاني يوم و حكالها هاي بدها تنشال بالليزر وكل شي بكون تمام, و عمللها اياها وروحت عالبيت, بالليل طلعو يسهرو عالسطوح - يا الله شو بحب سهرات السطوح, الله يسهل على هديك الايام - المهم بتحكي ماما انو بدو ايديها يحكوها كتير, وهي بالعتمه تحك و تفكر ان في قارص بالجو, نزلت عالبيت و انصدمت من شكل ايديها, كلهم حب زي جدري المي, كان يوم جمعه و الدنيا ليل, بابا اخدها عالمستشفى, الدكتور -مش متزكره اسمه مع ان ماما حكتلي اياه - اول ما شافها بحكيلها هاد من سن خروف صح؟؟؟ حكتله اه, جاب كتب و قعد يقرأ نص ساعه وبعدين لم دكاترة المستشفى وفرجاهم ايدين ماما وسألهم عن التشخيص, اشي يحكي جدري مي, اشي يحكي حصبه, حكالهم هاي جرثومه من سن الخروف , كل مليون خروف في واحد بحمل هالجرثومه, شوفو سبحان الله هالواحد جبناه عنا عالبيت :$

المهم اعطا ماما 14 علبه دهون و مضاد حيوي و حكالها هالشي بروح بعد 4 اسابيع بالزبط و ضلك ادهني من هالدهون وما توقفي ليخلصو ال 14 يوم, وما تحكي ايديكي بالمره لانه لو وحده من هالحب انقشر راح يعدي كل جسمك :$ ,بتحكيلنا ماما ان اول 3 ايام كانو اصعب شي, بالنهار ماشي بس بالليل المشكله, يدهنلها بابا ايديها بالدهون و يلفهم بقماشه, نص ساعه يروح تأثير الدهون وتبدا ماما تحك وهي نايمه, بس تتحرك يصحى بابا عليها, يصحيها و يفك القماش ويدهنهم كمان مره و يلفهم وهيك طول الليل, حبيبي بابا الله يسعده يا رب, و اجت عمتي نامت عنا علشان البيبي اللي هو انا :)

و بعد 4 اسابيع اختفى كل شي الحمد لله, ومن يومها ما دخلو هالاشياءات على بيتنا الا واخوي الصغير بصف تاني طلب الاخ رجلين خاروف, و بابا ما صدق جابهم و طبختهم ماما, يا باااااااااااااايه عمري ما بنسى الريحه :( المهم ما في غير بابا واخوي اللي بدهم ياكلو, اخوي بس شافهم صفن صفن و بعدين بسأل ماما " ماما هدول الاجرين من ورا ويلا من قدام؟؟" حكتله ماما ليش بتسأل, " اذا من قدام بكونو نظاف بس اذا من ورا بكونو اللي بيجي عليهم الاوساخ" ضحكنا و حكتله ماما لا هدول كلهم الرجلين من قدام هيك بابا جابهم, صفن صفن و بعدين حكالها " طيب خبيلي اياهم بعدين باكلهم" و اتوزعو تاني يوم على اصحاب النصيب :)

وتوتا توتا خلصت الحدوته :)

25 Things About me

ما حد عملي تاغ بس بعد ما قرأت في اكتر من مدونه عن هالموضوع واخرها مدونه رند ,حبيت انا كمان اكتب :)

الموضوع انك تكتبي او تكتب 25 معلومات, هوايات, حقائق او اهداف شخصيه, وبعديها المفروض تختاري 25 شخص بتحبي يكتبو نفس الشي عن نفسهم, و انا بحس ان مش الكل بحب التاغ علشان هيك ما حسمي اي اسم, واللي بحب يعرفنا على نفسه اكتر او في شي بحب يحكيلنا اياه عن نفسه فيا ريت يكتب :)

ما حرتب افكاري حكتب اللي بخطرلي .....

• انا بخاف اني اقطع الشارع, اذا في حد معي لازم يمسك ايدي و يقطعني , واذا كنت لحالي بضلي واقفه ليجي حد و اقطع جنبه بالعقل.

• بس اضحك عيوني بسكرو, وكتير بسمع تعليقات اشي منيح واشي لأ, زي صاحبتي بتحكيلي انتي ما بصير حد يضحك بس تنزلي الدرج, بعدين بتوقعي...ما حبيتها هالمزحه :(

• بحب الاكسسوارات كتير وخصوصا الخواتم الكبيره وكل ما طلعت عالمول لاااااااازم اشتري خاتم جديد, فكل لبسه الها اكسسوارها عندي.

• بالألوان بحب اللون الازرق و الفواتح اجمالا, وبالارقام بحب رقم 8

• لهلأ بس امشي بمكان في بلاطات كبيره بحاول ما ادعس على الخطوط بينهم, لعب مش تفاؤل و تشائم.

• من انا صغيره وانا بتمنى يكون في الي صديق خفي زي عقلة الاصبع اخده معي وين ما رحت وما حد يشوفو.

• وانا بسوق بحكي وبعلق كتير, ما بسب ولا بغلط بس بعلق, " بالله عليك".." منشاااان الله شد شوي"..."اه طبعا بدك تكوني بنت :)".... " يلا يا عمو يلااااااااااا"

• بكره الحوامض وما بطيق اكلها, اذا حد اجبرني اكل كرزه خضره بقعد اكل فيها ساعه, نتفه نتفه :$ بس بحب عصير الكيوي والليمون من الربيع, جد منعش و زاكي.

• بمشي اشياء كتيره بالحياة ما عدا الكزب, اكزب علي بتخسرني للابد, لانه تلقائي بتخسر ثقتي ومستحيل اتعامل مع حد ما بثق فيه.

• بكره حد يحكيلي وطي صوتك, لاني بكره الصوت العالي ومستحيل اعلّي صوتي, فبحس كلمه وطي صوتك اكبر من اكبر مسبّه.

• بعشق الاطفال وبشكل جنوني , بحبهم بكل حالاتهم وبكل اعمارهم, و فعلا زي ما بحكو ان الطفل بحس باللي بحبه, لانهم بالمقابل بحبوني.

• بكره الحيوانات بكل انواعها, زاحف وطائر ويمشي على 2 او 4 او اكتر, ومعظمهم بخاف منهم.

• مخصصه درج بالمكتب كله شوكلت وبسكوت وشيبس للاطفال اللي بيجو يزورونا ان كانو مع المراجعين او اولاد صاحباتي.

• مكتبي كله العاب من كندر سيربرايز :) بحب الشوكلت و بحب الالعاب.

• بكره ريحه الياسمين كمعطّر و بصير راسي يوجعني وممكن استفرغ منها, فممنوع تدخل البيت.

• ما باكل الورقيات بكل انواعها واشكالها لا مطبوخ ولا ني,ما عدا الملوخيه :)

• عاده سيئه عندي, ما بتزكر الاشي الا بس يخلص من عنّا, مثلا بكون الموز قدامي ولا بفكر اكل منه وبس يجي في بالي بكون خلص, وهالشي دايما بدايق ماما حبيبتي, معه انه بكون عادي بالنسبه الي لكن بتكرر معي كتيييييير.

• حكيتها هاي في بوست من قبل بس نفسي يكون في عندي طاقيه الاخفاء و نفسي اروح على القهوه اللي بجبل الحسين و اقعد بين اللي بلعبو شده او طاوله, شكلهم منسجمين عالاخر :)

• برضه هاي حكيتها, نفسي يكون في اختراع للسيارات فوق السيارة زي مكان الاعلان بالتكسي الممتاز, يكون في مجموعه جمل او كلمات بس حد يدايقني بالسواقه اكبس زر تنكتب الجمله او الكلمه فوق, مثلا " بالله عليك" او " شووووو ياااااا" او " هدّي اعصابك" وممكن مرات "شكرا "

• كتير بنرفز من الصوت المتكرر لفتره طويله, انو حد يلعب بالمفاتيح او يلعب بكيس نايلون, بكره تكرار نفس الصوت لمده طويله حتى بالاغاني, بس يكررو المقطع اكتر من مره بغير القناة.

• ما بعرف افاصل بس اشتري اشي, والمبلغ اللي بطلبو البياع بعطيه اياه فورا, مع اني متأكده انو غالبني بالسعر, هاي مشكله, مش اني بستحي او بخجل, لأ بس ما بعرف افاصل :$

• ربنا رازقني بنعمه التفكير السريع بالردود, الحمد لله بالوقت المناسب بطلع مني الرد المناسب اللي بفش قلبي, ومرات قلب اللي حوالي.

• ما بحب الغش وما بعرف اغش, بالجامعه بس حد كان يطلب مني اشي, كنت ارفع راسي واصير اتطلع عالمراقب, بصيرو اللي حوالي يترجوني انزل عيني وما اعطيهم اشي, ما بقدر اغش ولا اغشش الحمد لله.

• انا فضوليه كتير, بس مش حشريه ولا ببحبش ورا الناس, بس انو حد يبدا قصه وما يكملها ما بقدر, او حد يحكيلي بعدين بحكيلك, برضه ما بصبر, لكن اشي ما الي دخل فيه ما بدور عليه ولا بهمني اعرفه, بشغلي احنا مربوطين بدوائر كتيره بالبلد, ومنها بقدر اعرف المعلومات الشخصيه وحتى الرواتب, لكن عمري ما دورت عأسم حد اعرف معلوماته, واللي دورت بكون لسبب وبحكيلهم اني بحببشت بمعلوماتهم :)

• اخر شي اشي انا بحاول ما احكي عنه علشان ما يكون فيه نوع من الرياء لا سمح الله, بس للافاده راح احكيه, انا متطوعه في مشروعين بهالفتره المشروع الاول هو مشروع بتعامل مع الايتام وهاد انا مشاركه فيه من سنتين تقريبا, سنه ونص كان عباره عن يوم بالاسبوع بروح وبدرس الاطفال هناك, مع اني بكره التدريس بس تدريس هالاطفال جد غير, التعامل اجمالا مع الايتام في اله مشاعر خاصه, اكتشفت من خلال هالتجربه ان اليتيم وخصوصا المتواجد بجمعيات خيريه بكون ما بده لافلوس ولا لبس ولا اي شي مادي, بدو حد يتعامل معه, يحكي معه يضمه و يبوسه ويحسسه انه محبوب ويحسسه بقيمته و يعطيه ثقه بانه ممكن يصير شي بالحياه, جد يوم ما اروح بنسى كل التعب وكل الهموم وبتصير عندي مشاعر ما بعرف اوصفها بس كتييييييييير حلوه, فبنصح كل واحد و وحده انهم يخوضو هالتجربه لياخدو الاجر اولا و ليحسو بهالشعور تانيا, و حاليا نشاطي معهم بناءا على اداره الجمعيه شهري, كل شهر بنجتمع و بنعمل نشاط معين تعليمي عملي او رحله و ان شاء الله برمضان في افطار و بالعيد في طلعه , المشروع التاني هو مشروع المؤاخاه بين بنات عنا بالاردن وبنات بتركيا, بنحكي مع بعض عالمسنجر والهدف منه تعليم اللغه العربيه للطالبات التركيات حتى يتمكنو منها اكتر, فبنحكي مع بعض بامور الحياة باللغه العربيه الفصحى, اختي الجديده اسمها خديجه و بتدرس علوم اسلاميه بتركيا وطلع سبحان الله في اشياء كتيره متشابهه بينا, جد بحبها كتير وقريبا راح تيجي عالاردن وان شاء الله حنتلاقى ونتعرف على بعض شخصيا :)

وبس :) دوركم هلأ...

ليش بتصرّخ

يا الله شو بكره الصوت العالي واللي بصرخو.
وهالفتره كل اللي حوالي صايرين يصرخو, ان بحكو تلفون بصرخو وكل العالم بتسمع المكالمه, هالشي كنا نسمعه بالمكالمات الخارجيه وخصوصا من كبار السن, مساكين من الاشتياق والفرحه بفكرو انهم لازم يصرخو لان اللي بحكي معهم بحكي من برّه, بابا حبيبي لهلأ بنعرف ان واحد من خواني اللي بحكي من صوت ال "اهلاااااا" اللي بتهز البيت, مع انهم بحكو معنا اكتر من مره بالاسبوع :) , هلأ بتكون ماشي بالشارع او حتى واقفين عالاشارة, بتسمع المكالمة كامله من السيارة اللي جنبك.


غير اللي طبيعتهم بصرخو وهمه بحكو, المراسل اللي عنّا لازم كل فتره وفتره يسمع موشّح من حد بالقسم عن صوتو العالي, بكون بالممر و بصرخ باعلى صوتو بنادي حد فينا علشان يسألنا اذا بدنا شي, وبكون عنّا مراجعين او بنحكي تلفون, فضيحه بصراحه , بحكيلو دايما انا مش مضطره اسمع صدى اسمي بالممرات علشان ما بدك تغلب حالك تمشي خطوتين, بهدى يوم يومين, وبعدين برجع

غير المراجعين اللي بفكرو ان بالصوت انا حخاف و امشّي اللي بدهم اياها, ما بعرفو انهم لو حكو شوي شوي حتوصل فكرتهم اسرع و واوضح, وان مش كل العالم بتمشي بالصوت

غير السيارات اللي بس ماشيه بتزمر بداعي و بدون داعي, وسيارات الخضره اللي بنتحل قلبه للشريط وهو بنعاد خمسين الف مرّه, و مأساه اذا حد قرر يشتري, بستمر الموشح نص ساعه " يلا يا بطيخ ...يلا يا بقدونس...يلا دب دب داااه....يلا ياااا......كلّه عالسيارااااااه" طبعا مش كلّه واضح و مرات بنقعد انا وصاحباتي نتحزر شو الكلمه اللي انحكت علشان نتسلى :)
و سيارات الغاز, والسيارات اللي حاطه زوامير زي زامور الشرطه اللي مش فاهمه ايش الحلو فيها, انه العالم بخافو من الصوت و ببعدو عن المسرب لانهم بفكروه لشرطه...مثلا!!!

بالشارع الدنيا صيفّت وبدو الاطافيل يطلعو عالشوارع " شوووط ولك شوووط " " مررها ..هيني فاضي" مش ضروري انّام احنا لأ

والعالم المنطربه بالشارع و بالبيوت, اصوات موسيقى و اغاني الكل محتفل ما شاء الله, المشكله يا ريت همه شخصيا مبسوطين, معللي المسجل عالاخر و مش عارفه مين بغني او بتغني, والسائق مكشر!!! طيب ازعجتنا و ازعجتنا عالقليله انت تكون مبسوط

حتى بالراديو الكل بصرخ... المذيعين بصرخو - المذيعات لأ بكونو اخر نغاشه على هالصبح :$ - الدعايات بصرخو...طيب ليش يا جماعه ؟؟؟ في دعايه لفرشه مش عارفه شو بتيجي عالراديو, انو انهيارات وانقاض .... الزلمه بصرّخ, طيب ليش؟؟؟ ليش بتصرّخ؟؟؟

ّ

اثنان وستون عام و لم نرد الحياة بعد...

متى سنثور...متى سنتحرك

الى متى سنستكين....الى متى سنتذكر ونعيش الذكرى و ننسى

...الى متى سنبقى صامتين

الى متى سنترك الاخرين يخطون مستقبلنا....

الى متى سنبقى عاجزين عن كتابه حاضرنا

الى متى سنتبخر و نندثر؟؟؟

متى سنطلب الحياة....لينكسر القيد؟؟؟

إذا الشّعْبُ يَوْمَاً أرَادَ الْحَيَـاةَ فَلا بُدَّ أنْ يَسْتَجِيبَ القَـدَر

وَلا بُـدَّ لِلَّيـْلِ أنْ يَنْجَلِــي وَلا بُدَّ للقَيْدِ أَنْ يَـنْكَسِـر

وَمَنْ لَمْ يُعَانِقْهُ شَوْقُ الْحَيَـاةِ تَبَخَّـرَ في جَوِّهَـا وَانْدَثَـر

شو بالنسبه...4

this is cute :)

شو بالنسبه للبنات والشباب وخصوصا البنات اللي بلبسو بلايز وقمصان عليها رسمات غريبه عجيبه, او كلمات الها معنى جدا مقرف او دعايات لاشياء غريبه؟؟؟

موظفه جديده عنا عمرها 26 سنه , البنت بعرفها منيحه ومحترمه ومن عائله محافظه, لابسه بلوزه مكتوب عليها "I'm so hot"

و تقريبا انزفت عنّا بالشغل, فجأه الكل قلب مثقف وبفهم انجليزي, و المسكينه بتحكي انها ما انتبهت شو مكتوب , بس الالوان عجبتها , طيب انا من انا صغيره بعرف ان ماما لازم تقرأ وتشوف الصوره المحطوطه عاللبس, لانه فعلا بكونو مخبصين بالحكي مرات, اي مرّه كنت بدي اشتري بندانه ايام الفياعه, بدي لون كحلي و احمر, اخترت وحده اللون عجبني بس فردتها اشوف الصورة, اشي مخزي كانت, مش فاهمه كيف هيك متداوله بالبلد!!!!

وفي قريب النا, اجا زارنا, انا بعرف ان الشب كتير ملتزم و قريب ما يكون شيخ , لابس بلوزه عليها صورة باندا و مكتوب "panda beer"

يعني دعايه لشركه بيره, حكيتله عمرك قرأت شو مكتوب عالبلوزه؟؟؟ بحكيلي لأ, بحكيله ولا اشي بس انت اعلان متنقل غير مدفوع الاجر لشركه بيرة :)

غير اللي بشوفهم بالمول, رسمات غريبه عالبلايز, صور شفايف و صور مش عارفه شو, غير الكلمات اللي بتكون مرات مسبات مقرفه وكتير عيب, والبنت او الشب ماشيين وفخورين.

يا ريت الشباب والاهالي شوي ينتبهو لهالشي, مش حلوه بنتك تكون ماشيه بالشارع والشباب بعاكسوها وهي مش عاجبها ولا انتي عاجبك و بتجحري بالعالم ومكتوب على بلوزتها "I'm with stupid"

ابشع منظر كان بنت محجبه لابسه بلوزه عليها مجسمات بنات و مكتوب

"for mature audience only"

بالله عليكم انتبهو شو لابسين و شو بلبسو ولادكم...

شيك على بياض

قرأت خبر بوكاله عمون عن اماراتي عجبته لوحه للشيخ نهيان مع الرئيس اوباما, وقدم للرسامه اكتر من عرض لحتى يشتري اللوحه وهي ما رضيت وبالاخر قدملها شيك على بياض, وبرضه ما وافقت

كتير بستغرب بهالعالم, كأنهم مش عايشين بالدنيا, ماشي انا معك انه فن وانك هيك بدك تبين انك مواطن ومنتمي لبلدك و لرئيسك, ما اختلفنا و شكرا عالمشاعر الطيبه هاي في حاله جد كانت صادقه وهاد هدفها مش هدفها التميز المريض اللي بعانو منه فئات من الناس بالعالم و خصوصا العالم العربي, و مش تفاخر وتباهي , بس جد يعني هلأ بما انك صاحب مقدرة ماليه انك تقدم شيك على بياض, ما بطلع من نفسك تقدم مبلغ من المال لاخوانك اللي بتدمرو و بجوعو بفلسطين, بالعراق, بالصومال...او باي بلد عربي شقيق العالم فيه بتموت يومي من قلّه الغذاء والدواء و قلّه الفلوس؟؟؟

كتير بنسمع عن اخبار مشابهه بتحسسنا ان في ناس جد نايمين, او بعملو حالهم نايمين.

خبر تاني استوقفني برضه بوكالة عمون الاخباريه

نتنياهو: القدس "حشاشة قلوبنا" !!

حش اللي يحشك ان شاء الله, صار هلأ بحس و عندو قلب و اله حشاشه كمان...الله يهفيهم و يخسفهم عن قريب

بعيدا عن هالاخبار اللي بتسم البدن, انا لما قرأت الخبر الاول فكرت بأشي

هلأ لو صح لواحد منا شيك على بياض....شو المبلغ اللي ممكن نكتبه؟؟؟ وشو ممكن نعمل بهالمبلغ؟؟

عن نفسي راح اخد نص المبلغ اللي بملكه الشخص, على اعتبار انه بملك كتير طبعا يعني اشي محرز باخد, بس بخليله نصه حرام يعني, و نص المبلغ جزء بتبرع فيه و جزء ببني فيه مسجد, نفسي ربنا يرزقني وابني مسجد, انا ولله الحمد صحللي فرصه اني اشارك بمبالغ جدا بسيطه لبناء مسجد, بس نفسي ابني مسجد كامل.

بالنص التاني, بفتح مشروع عائلي , كل العيله تستفيد منه, وبالباقي بشتري بيت الي ولاهلي, بشتري سيارة الي و سيارة لاخوي, وبخبي شوي بالبنك علشان الزمن, بركي ما زبط المشروع :)

بحكيلكم على اعتبار المبلغ محرز اللي حاخد نصه :)

انتو شو ممكن تعملو؟؟؟؟

جوزي فوزي

قبل كم يوم انا وصاحباتي بالشغل رحنا نزور صاحبه النا تزوجت قبل سنه و استقالت وسافرت مع زوجها عالمانيا

قعدنا عندها ساعتين تقريبا لانا طالعين من الشغل كنّا- فساد ارداري بعرف :) - المهم بصراحه مع ان القعده كانت كتير حلوه لكني ما صدقت وانا اروّح, بصراحه راسي صار يوجعني كتير, لاول مرّه بحياتي بسمع كلمة "جوزي" بهالتكثيف هاد
جوزي..جوزي..جوزي..جوزي.....بطريقه مش طبيعيه


ممكن الموضوع عادي للناس, لكن احنا عنا مش حلو تحكي زوجي و خصوصا مع كل كلمه , و بصراحه حسيتو مبالغ فيه, يعني تحكي اسمه, تحكي ابو فلان, ماما اللي الها 38 سنه متزوجه عمرها ما حكت زوجي, بتحكي "ابو ... " او بتحكي " بابا" اه ماما بتنادي والدي "بابا" و والدي بناديها "ماما" :) حتى بس يكونو بمكان بره بشترو اشي دائما ماما بتغلط وبتنادي والدي "بابا" الكل بصير يتطلع و مستغرب


بتذكر ماما كانت تحكيلي انتو الجيل الجديد بخوف - هاد لما كنّا جيل جديد - آل ليش... لانهم وهمه صغار وهمه بلعبو مع بعض بس وحده بدها تسب عالتانيه تحكيلها "يا مدام" و بعدين يصيرو يحكو " استغفر الله العظيم...استغفر الله العظيم" اما الجيل الجديد بحكي بدي اتزوج و بدي اجيب كزا ولاد وبدي اسميهم...عأساس ان هاي القوه والكسارة, ما كانت حبيبتي تعرف الجيل الجديد الحقيقي شو بدو يبدع باساليب الكسارة والقوه, اذا بنت خالتي اللي بالصف الرابع بتحكي لامها "ماما لو سمحتي ما تدخلي بلبسي " انا لليوم ما بقدر احكي لماما هيك :) هو اي نعم ما بتتدخل بس برضه ما بتخيل حالي بحكيها..

كالعاده ببدا بإشي وبطلع عن الموضوع .....
سامحونا
نهاركم ومساكم سعيد :)

-----------------------

هاي النكته من وحده بحبها كتير كتير ...يمكن قديمه لكن عجبتني و عراسي كل اهل الزرقا بس طلعت مناسبه لافكار الجيل الجديد :)

حلم بنت من بنات عبدون


بنت من بنات عبدون كانت نايمه و صحيت فجأة و راحت ركضت على امها و هيه بتبكي...امها شافتها ....
الام : ايش يا ماما سلامتك في شي
البنت ( الدموع تملأ عينيها ) : ماما ..ها اه .. ماما ...
الام : ايش مالك يا ماما
البنت : ماما .... انا كنت احلم و حلمت حلم فزيع كتير كتير ..
الام : خير يا ماما أيش حلمتي
البنت : حلم فزيع كتير كتير مش أادره احكي
الام : خوفتني يا ماما .. ايش حلمتي ....
البنت : مش عارف شو بد ي احكيلك ...
الام : هدي حالك ماما ........... شو حلمتي .. اكيد حلمتي إنه البوي فرند تاعك تركك و راح لوحده تانيه ...
البنت : لا يا ماما لسه افزع من هيك ...
الام : أفزع من هيك !!!! طب اكيد الموبيلات انشطبوا ..
البنت : لا يا ماما لسه افزع أفزع من هيك ....
الام : مممم يا ربي ..... ممم .. اه اكيد سكروا عبدون مول ..
البنت : لا يا ماما لسه افزع من هيك .....
الام : عجزتيني يا ماما .. ايش حلمتي ..
البنت : مممممم ....ممممممممممم اه يا ماما اه....اححح ..حلم ...حلمت ...حلمت ...أنه .....



إحنا ..... سكان

" الزرئا "

قصص براءة

بدي احكيلكم اليوم قصه من القصص اللي كتير حبيتها لاولاد صاحبتي

صاحبتي بتحكيلنا عن اولادها "س" عمره 6 سنوات و "ع" اللي عمره 4 سنوات

"س" و "ع" كالعاده و الوضع الطبيعي انهم بتقاتلو طول النهار والليل, امبارح متقاتلين و قد ما "س" عصّب عأخوه حكاله " يلعن ابوك!!"
طبعا "ع" مش فساد بالمره, طيران لعند ابوه و حكاله ان "س" سب علي وحكالي يلعن ابوك, صاحبتي بتحكيلي فورا زوجها نادى "س" اللي هرب على غرفته, بتحكيلي احنا كنّا بنحضر اشي مهم عالتلفزيون و نسينا الموضوع وكل شوي "ع" يرد يزكر ابوه , والاب بنادي "س" و برجع بنسجم مع التلفزيون, بتحكيلي بعد نص ساعه من هالوضع , نادى الاب "س" باصرار هالمره


بتحكيلي اجا "س" وجهو احمر زي الدم و عيونو جاحظين لبره و حمر حمر, و بتعصّر و واضح انه معصب...بتحكيلي لسا ما حكاله ابوه اشي شوي "س" بتطلع عأبوه و بحكيله...


" يلعن ابوك انت كمان!!!!" و زي الطير هرب عالغرفه
بتحكيلي لثواني ضلينا منصدمين بعدين نص ساعه واحنا بنضحك, وهلأ بالبيت بس حد يعصب صرنا نحكي " يلعن ابوك انت كمان"
وهلا احنا بالشغل بس يجي مراجع معصب او حد يعصب بنحكي " يلعن ابوك انت كمان" :)

صباحكم سعيد :)

الحالة الاجتماعية

واضح اني ما الي دخل بتزبيط الصور :$

كتير مرات بكون المجتمع اللي عايشين فيه عنده نوع من الظلم خصوصا للبنت,احنا مجتمع ذكوري مهما تقدمنا وتطورنا وتعلمنا وتثقفنا

خليني اشرح اكتر وحستخدم نفسي" ويسبر" كمثال علشان زي ما اتفقنا بلاش نورط مع حد ,احنا مش ناقصين :)

هلأ نظرة مجتمع صغير مثلا مجتمع التدوين ل "ويسبر" كعزباء

بنت عمرها 33 سنه مش متزوجه,كاتبه قصص عن سلسله عرسان,اي نعم كلهم طلعو اشي بخزي بس برضه بقدر هالمجتمع انه يستنتج ان ويسبر متطلبه وما بعجبها العجب وهي لو تحط عقلها براسها وتهدى شوي وتبطل شوفه الحال ربنا بكرمها بأبن حلال بس هي ما تطلع فيه 100 عيبه وعيبه ,مافي حد كامل حتى هي مش كامله

او.... بنت وماشاء الله عليها وعمرها مش قليل وبتضل ترفض عرسان -هالنوع عندهم العريس لقطه لو ايش ما كانت صفاته وعيوبه,ما بنرفض- اكيد الموضوع في إنّ.....

لو شب و وصل 40..... مسكين الدنيا اخدته والتهى ونسي موضوع الزواج, بدور على عروس ومش لاقي,حواليكم بنت متخرجه جديد بنت عالم وناس :) ونادرا ما يتهم بأي اتهام او اي صفه بتمس بعدم زواجه لهلأ ,في اتهامات لكن نادرا ما يطلقوها بهالمجتمع

‏ هلأ لو "ويسبر" مطلقه

اهاااا والله كنا متأكدين واضح من كتاباتها ان في عقده معينه عندها,والله كنا شاكين خصوصا من سلسله هالعرسان,احكيلك انا بتوقع انها مألفتهم,اه مش بعيده العقد بتعمل اكتر من هيك,وبعدين بتتزكر البوست الفلاني? لما كتبت كزا وكتبت كزا كان واضح ان في ألم معين واضح ياجماعه
ياخوي ابعد عن الشر وغنيله شو بدك تتورط مع هالاشكال,هاي بدها عريس والسلام اسألني انا بتمسكنو ليتمكنو, روح نقيلك بنت صغير "ما باس تمها غير امها" وشو الله جابرك تاخد وحده مطلقه
لاحظو انهم طبعا ما جابو سيرة ولا سألو عن سبب الطلاق :)


هلأ لو كان الموضوع شب مطلق..... اكيد قرفتو بعيشتو ويلا ليش بدو يتركها? اكيد امها بتتدخل بكل كبيره وصغيره,اكيد كانت مخططه تحكمه,يلا منيح اللي خلص منها
طيب في حواليكم بنت متخرجه جديد لهالشب? ?

احنا مجتمع بحب يطلق الاحكام على كيفه,هو القاضي وهو محامي الدفاع ومحامي الادعاء وهو الشهود اللي ماشافو حاجه, والمشكله الكبرى ان رأيهم بصير اوامر وتطبق من الجميع بدون نقاش,لانه مين انا اتحدى المجتمع ومين انا ليكون الي رأي بعد رأي المجتمع وانا عايش بهالمجتمع والا ما اتأثر فيه,فمن مبدأ الموت مع الجماعه رحمه

انا رأيي انه بضل موت ولو رشيتو عليه شوالات سكر بضل موت وبضل مر
هاد استسلام لان الوضع هيك كتير اريح,تبريرات ما بتدل غير على انك جزء من هالمجتمع الذكوري,انا بحكي عن مجتمع مش عن اشخاص معينين,بحكي عن تفكير الناس اللي حواليك اذا انت ما بتفكر او بتفكري بهالطريقه
فبرجع وبحكي انّا مهما اتطورنا ومهما اتعلمنا ومهما اتثقفنا بنضل مجتمع ذكوري :)

المغطس - نهر الاردن

سمعت كتير وقرأت كتير عن كيف ان نهر الاردن يوم عن يوم بنقص وبتبخر وكيف ان وضعه من سيء لاسوء

الموضوع كتير خطير وبس شفته بعيني حسيت بخطورته اكتر
بفتره وجود اخوي هون الله يسهل عليه وبناءا على طلب زوجته رحنا عالمغطس, للاسف لا خطرلي ولا اعتقد انه بعمره حيخطرلي اروح عالمغطس او على نهر الاردن من منطلق ان ما في النا تعامل مع الموقع و ان الموقع موجود وبأي يوم ممكن نروح عليه :$

رحنا ودفعنا دخوليه كأنه دينارين وركبنا زي Van بمشي تقريبا 10-15 دقيقه وبنزلنا احنا و المرشد و بمشي معنا و بشرحلنا عن المواقع لمده تقريبا 40 دقيقه
بنمشي بممرات حواليها شجر المفروض بس الجفاف عامل عمايله فيها,جفاف ونشاف والنهر اشي تحت صغير لونه بني ومعكر بطريقه غريبه

وصلنا لمنطقه المفروض مكان ما بظنو ان سيدنا عيسى تم تعميده,زي بركه فيها مي خضرا ,مش نهر لأ مياه راكده من سنين لدرجه انها عفنت والطحالب طلعت

المعظم اجانب والمعظم يستغرب وجود بنت محجبه بالمكان,وبأشرو بدوائر حول وجهم عن الحجاب :)

اشي لفت نظري ان كل اللي معنا عبو قناني مي من النهر,ما بعرف شو بعملو فيها وخصوصا انها بنيه ومعكره بطريقه كبيره, اللي فكرت فيه ان لو كل سائح بدو ياخد هيك طبيعي ينشف النهر :$

اشي تاني لفت نظري لما وصلنا عالاخر وصارت الاعلام الاسرائيليه بصباحنا, منطقتنا نشاف ومش منظمه ومنطقتهم مرتبه ومدهونه وكلها زريعه وورد :$
اتركم مع الصور :)

هون بعمدو الاولاد الصغار بحكيلنا المرشد انها كانت بركه كبيره وبالاخر صفت على هاد 3 متر مربع

كيف ابدأ يومي

مساء وصباح الخير عالجميع
اسفه كتير حاسه اني طولت عليكم, بس هلأ الحمد لله رجعت Whisper القديمه و ان شاء الله ما بغيب اكتر :)
كيفكم وشو اخباركم, ان شاء الله كلكم تكونو بالف خير, المدونات اللي بحب اقرأها كلها قرأتها ولكن ما علقت, كان عندي المزاج العجيب على رأي اخوي ولكن هلأ رجعت, تخيلو اني فكرت اني اسكر المدونه!!! انا اللي كنت استغرب كل ما حد يقرر او يوقف مدونته, انه كيف قدر و شو دخل التدوين باي شي مزعج بالحياه, لانها مصدر سعاده عالقليله انا هيك بحس , جد كنت حابه ابعد شوي, ولكن بعد التفكير لقيت اني بحب المدونه كتير وبحب اكون قريبه من كتير ناس عن طريق هالمدونه,بشكرا لكل اللي بعتلي ايميلات يسأل عني :)

يومي ببدا بس ترن الساعه 7 الصبح و اقوم و اعملها سنوووز لل 7:5 :) الي سنين هيك وما بتعرفو هالخمس دقايق كم بتعطيني نشاط, وبس اكون جد نعسانه, بصير ادعي يا رب باركلي بهالخمس دقايق و الحمد لله هيك مرات كتير بصير :)

بقوم بلاقي بابا وماما بالمطبخ بالعاده, الا بس يكون عندهم موعد بتروح عليهم نومه :) سبحان الله , المهم ماما بتكون بتجهز القهوة و بابا بحط الفناجين و الاشي الحلو اللي بدهم ياكلوه مع القهوه.
بزبط اموري و بصحى اخوي من النوم, اللي بشغلنا احنا عنده سنووز انا وماما, لكن انا بمل بسرعه و بصحى وببدا يلاطش لانه متأخر, و بما ان انا واياه بنستخدم نفس التواليت, بتروح علي اذا بدي افرشي سناني ليتفضل ويتكرم علي و يطلع :$ وبهيك بصير انا المتأخره , بنفطر و بنجهز عال 8 الا 10 بنكون بالسياره.

بوصل اخوي لشغله اللي جنب البيت, و بروح عشغلي, المعاناة اليوميه باني الاقي صفه قريبه للشغل والي مرات بتصيب و كتير بتخيب, بصف "عند بيت اهلي" على رأي صاحبتي, من كتر ما هي بعيده.

في الطريق لباب الشغل في بسه الله يسامحها مش راضيه تترك المنطقه, مهما حاولت اني ادور عليها مرات علشان ما تنأزني ما بلاقيها و فجأه بتطلع بوجهي, واذا شفتها بضل مراقبتها وكأنو عادي يعني ما في مشكله عندي, لكن هي بتحس, و بتضل واقفه تطلع علي :(, اليوم مثلا شفتها بتقطع الشارع, ارتحت انها حتبعد, اجت سيارة واحد ابن حلال خافت رجعت ركاض عالرصيف و فجأه صارت قدامي :( كل اللي بالشارع عرفو اني بخاف من البسس.

بالشغل بتتلاقى بالموظفين والموظفات ومن اللي بتتلاقى فيهم بتعرف كيف حيكون يومك, مش من باب التفاؤل بالعالم او عكسه, لا سمح الله, لأ بس في موظفين الله يسامحهم بستلموني شغل من اول ما ادخل الباب, وقبل الختم حتى, الجهاز مش راضي يشتغل, المراجع بدو اشي, مع اني لا موظفه صيانه ولا المراجع الو شغل عندي, ولكن بس يبدا اليوم هيك, بعرف اني لاخر الشغل ما حقدر ارفع راسي خلص, يوم شغل نحت بكون.

احلى اشي بالشغل هي ساعه قهوة الصباح :) , في عنا احصائيات يوم بعد يوم لازم تكون عمكتب المدير الصبح, يوم ما تكون مطلوبه انا بروح بشرب قهوتي عند صاحباتي بقسم المحاسبه, و البنات اللي معي بالقسم الله يرضى عليهم بطلعو الاحصائيات, ويوم ما يكون في احصائيات بتكون القهوه عندي بالمكتب مع بنات القسم, جد هالساعه هي اللي بتعطينا دفعه لاخر النهار وبس ابدا يومي من دونها, لان المدير قرر انو بدو اشي عبدايه الصبح وهاد اللي بصير باغلب الايام, حتى القهوه ما بشربها :(

خلينا بال Bright Side زي ما بحكو, بيوم القهوه, عند بنات المحاسبه بتكون عبارة عن تناقل اهم واخر الاخبار على كافه الاصعده, الحمد لله ما بنم الا نادرا عالمدرا :) بس بنحاول انّا انّبه بعض, اخبار الشغل و برّه الشغل, اشي قرأناه او خبر سمعناه, احداث قبل بيوم, خصوصا الاهل, انا اخوي دائما اللي اله نصيب الاسد بقصصي, وهو بعرف هالشي, قصصه رهيبه بصراحه, بعديها قصص فروحه وعبود اذا كنّا حاكيين مع اخواني او باعتيللنا صور جديده.

يوم القهوه اللي عنا بالمكتب هو اللي بحبه اكتر بصراحه :) بكون عباره عن قصص اولاد صاحبتي بالمكتب , واولاد اخوان صاحبتي التانيه, جد قصص منعشه وحركات بتجنن و دائما بنبدا نهارنا بالضحك, قريب حكتبلكم اشياء من قصصهم, براءة الدنيا بكل تصرف بتصرفوه.

و بعدها ببدا الشغل :)
هي يومي و واضح من طول البوست انه مش باختصار ابدا :)
بتمنالكم ايامكم تكون سعيده و كلها ذكريات حلوه و احلى

اللهم ارزقنا الرضى

انا متأكده ان مافي شخص منا ما تعرض لضغوطات ومشاكل الحياه واللي انا بفضل تسميتها بابتلاءات من رب العالمين, واللي كان الي نصيب واااافر ولله الحمد منها :)

ومهما اختلفت ابتلاءاتنا واختلفت عظمتها من شخص لاخر فهي موجوده بحياتنا,ممكن غيرنا يشوفها ما الها معني بالمقارنه بهمّه,او اللي بيعاني منه, وبنسى ان هالهموم السخيفه بنظره عظيمه كتير ومقلقه وسارقه النوم من صاحبها, و ممكن احنا نشوفها ما الها معنى بالمقارنه مع هموم الناس من باب اللي بشوف هم غيره بهون عليه همّه, لكن بضل في اشي مدايقنا من جوا و بنفكر فيه كتير.

اللي بدي احكي عنه اليوم اشي اله دخل بالابتلاءات, وهو الرضا و الايمان بالقضاء و القدر و التسليم اله مهما كان وبأي موضوع ومش بس بالمواضيع اللي بظاهرها شر او مش شر..... اشي مش مستحب النا.

انا الي فترة بصلي صلاة استخارة لخطوة جديده بحياتي, كنت متأكده منها 100% و بعدين مع تعركس الامور اختلفت الافكار, فهل معقول ان ال 100% هاي تكون غلط؟؟ هل معقول اني انا بطلب من رب العالمين انه اذا فيها خير يتممها وهي ما فيها خير؟؟؟؟
بعدين انتبهت لاخر جمله بنحكيها بالاستخاره " واقْدِرْ لي الخير حيث كان ، ثم رَضّتَيِ به ."
يا الله ...قديش صليت استخاره بحياتي اول مره بنتبه لخطورة هالجمله, الرضا بالمقدّر كتير صعب مرات بكون خصوصا بس تدخل اهوائنا و ميولنا و عواطفنا بالموضوع, و لهالسبب احنا بندعي رب العالمين انّا نرضى.

ما بعرف الموضوع حيتم او لأ و ما بنكر ان عدم تمامه لا سمح الله حيأثر علي , لكن متأكده اني بما اني توكلت على الله فأكيد ربنا حيكتبلي الخير ان شاء الله و حيرضيني فيه و حيعوضني خير :)

الله يفرجها على الجميع و يكتبلنا كل الخير يا رب
اول مرة بحس حالي مش عارفه اعبّر, يعني كأنو اشي كتير شخصي هالمره- مع اني ما بقصر بالحكي ولا قصرت مسبقا - و الموضوع ما بده تحليل و تمحيص كتير, الموضوع همّ بما فيه من تفكير و قلق وان شاء الله حينفرج, مش انا توكلت على رب العالمين...اذا اكيد ان شاء الله حينفرج
و اهم شي الرضااااااااااا.....وان شاء الله حكون من الراضيين :)