جوله في محفظتي :)

بعد ما شفت كاريكاتير ابو محجوب اللي عجبني كتير كتير فكرت انا كمان اعمل جوله في محفظتي واشوف شو فيها وخصوصا انو حسيت ان في تشابه كبير بالموجودات

Prada محفظتي جلد اسود
اشي فاخر عالاخر جبتها معي من دبي السنه الماضيه يعني لساتها جديده ومش متدمره
بالنسبه للورق الاخضر..في ورق اخضر و الحمد لله لانه الدنيا اخر الشهر و مستلمين الراتب جديد ففي قوس قزح و كل الالوان بتلاقيها وانا حبيت اكتب اليوم وما ءاجل الكتابه لانه بعرف حالي اعطوني 24 ساعه بكون قاضيه عالراتب وبمشي حالي لاخر الشهر بالمعونات اللي بتعطيني اياهم ماما حبيبتي
وبما ان اخوي الكبير اجا من السفر ومقيم عنا ففي سلبطات كتير بدو يتحملها :)

في كشفين حساب من الصراف الآلي ,عاده عندي ما بعرف منيحه ويلا سيئه بحب اسحب كشف حساب مختصر وكشف اللي بتعطيني اياه الآله بعد ما اسحب
el "ATM" y3nee :D
طبعا عمري ما قارنت ولا عرفت شو مكتوب ولا انتبهت الشهر اللي بعده ازا صح المبلغ اللي خليته بس عاده و لازم اعملها ما بعرف الواحد بركي احتجتهم...اذا هي اول تشابه وصولات صراف الي قديمه :")

يانصيب لا ما في منو هالحكي ما بحبه وما بتعامل معه

اهااااااااا فواتير...بصراحه لقيت فاتوره اشترينا اواعي لاولاد اخواني اللي راح ينولدو على خير اخر الشهر انا عاده بحط الفواتير بالكيس و بكبهم بس اخد اللي بالكيس بس هدول هديه و مش حلوه يضلهم بالكيس فحطيت الفاتوره بالمحفظه ..هيني كبيتهم :")
هي تاني تشابه

ارقام تلفونات ..في كروت بس لناس بعرفهم وبتعامل معهم وبتصل فيهم فمش محسوبين

ههههههه صور...انا ست مين بحب يحتفظ بالصور
شوفو شو في معي
(بابا,ماما,اخواني ال 3,مره اخوي الكبير واكتشفت انو ما عندي صوره لمره اخوي التانيه...شو عيب منيح ما تشوف,بنت خالتي الصغيره,ابن بنت خالتي اللي بموت عليه,بنت صاحبتي القمر,صوره عمو الله يرحمه,صوره مره عمو اللي اعطتني اياها بالخاوا لما اخدت صوره عمو :$,صوره صاحبتي و ابنها وبنتها,صورتي وانا صغيره,صورتي بالصف الاول,صوره التخرج) بس والله محطوطين باشي خاص للصور ومرتبين يعني مش معفشكه المحفظه...هاي تالت تشابه

اللي بعده

فش مشابك..فش كروت اطباء...اكيد ما في صوره للمدام...هويه و رخصه بس بكامل قواهم ما في اشي مكسور ولا اشي محطم..كروت موبايل لأما في....اهااااااااا رساله غراميه...في عندي رساله لبنت خالتي وهي صغيره كاتبتلي انها بتحبني وراسمه عليها اشياء المفروض انها نمل..شو دخل ما بعرف بس هاي الرساله من 2002 ما بعرف تعتبر غراميه ويلا لأ.. خليناه نعطيها نص تشابه يلااا بس علشان ابو محجوب...هلا عمي

"بطاقه فيزا كرتونيه تباع مع المحفظه" لا هاي اساسا مش موجوده ما انا حكيتلكم
فلااا مش موجوده Prada

ازا طلعنا بتلات تشابهات ونص :)

لاا الحمد لله مش كتير دمار الوضع طلع...انا بس شفت الكاريكاتير حكيت هاي محفظتي يا جماعه ولا شو
بس طلعت مش الي ....لاا لاااا طلع حجاج وابو محجوب بريئين :)

يا ترى انتو كمان لقيتو تشابه بالموجودات..تأكدو منيح ليكون ابو محجوب لاطشها من حدى فيكم ....