مغامرات عائليه :)

اليوم المفروض بدو يجي اخوي من السفر
احنا عنا عادات وتقاليد عائليه للروحه عالمطار وخصوصا ان هالشي بتكرر اكتر من مره على مدار السنه بحكم ان خواني التنين في الامارات و متزوجين يعني واحد بتيجي مرته بعدين بلحقها بعدين بيجي اخوي التاني وبعدين بنرجع نودعهم وهيك..يعني بتقدرو تعتبرو المطار بيتنا التاني :)

من الصبح بابا صاحي وبيفيق فينا يلا اليوم بدو يجي اخوكم...بدنا نلحق نروح عالصلاه و نرجع وفورا نطلع عالمطار طيب يا بابا يا حبيبي اخوي جاي عال 2:45 و هلأ الساعه 9:30 مش حاسس انو بكير :$
يعني بنروح عالصلاه وبنرجع ويا دوب صارت 12:30 طبعا هالحكي عالفاضي لانه لو كان اله تأثير كان من 1900 بطلنا نعاني من هالموضوع
انا بصراحه دايما بحزن عاللي بيجو من السفر وبيصيرو يدورو بين الوجوه على حد بيعرفوه بعدين ينفقسو ويوقفو على جنب يستنو اهلهم...والله لولا العيب والحيا نفسي اروح اسلم عليهم واحكيلهم بالنيابه عن كل عيلتكم في الاردن والخارج وكل جيرانكم بحكيلكم الف الحمد لله على السلامه D:
ما علينا نرجع لموضوعنا
افطرنا و رحنا عالصلاه و بعد الصلاه اتصلنا نتأكد من موعد الرحله طلع في تأخير ساعه..بس برضه بابا حكالنا ان الساعه 3 بالزبط بتكونو بالسياره حاضر امرك ولا يهمك....من الساعه 2 بدا بابا يعلن الكاونت داون للاقلاع...ضايل ساعه...ضايل نص ساعه...طيب حبيبي مش حكيتلنا عال 3 خلص والله لنكون جاهزين....ضايل ربع ساعه :$ الحمد لله اخيرا صارت 3 وكنا بالسياره و بدينا مغامرتنا

بابا الله يحماه عمره 66 سنه..بس بالسواقه انسى موضوعه...طول ما هو بسوق بتضلك تتشهد وتستدعي و بتختملك كم ختمه قرأن ما شاء الله مسيطر عالموضوع بس احنا بنتدمر شو نعمل المهم كنت انا وماما و اخوي ومره اخوي اللي بدنا نستقبله معنا وهي حامل بالشهر التاسع بدينا المشوار عادي سواقه طبيعيه هاديه..... شوي شوي بدا بابا يتسجم ..بس يعني بشكل مقبول نوعا ما فجأه الحراره عليت بالسياره..ايه ايه خير خير..السياره ما فيها مي...بابا بحكي:اه صحيح من امبارح انتبهت شكله في تسريب
بابا دايما بيعطينا محاضره عن ان الواحد بس يروح مشوار لازم يكون مخطط لكل شي..لازم يعمل حساب كل شي..يجهز اواعيه..حتى جراباته يكون محضرهم
طبعا كلنا ولا كلمه ولا نفس مع انوفي كلام كتير كنا بنقدر نحكيه بلحظتها بس اكيد كلنا بنعرف ان الانسان يكون ارنب سعيد ولا اسد تعيس وكنا حابين انام بالبيت الليله بصراحه

طبعا صف عاليمين و استنى ليبرد المش عارفه شو وافتحه شوي شوي و شغل السياره وعبي مي.طبعا هالشي اخد معنا تقريبا ربع ساعه بس بابا حكا لا مش مشكله بنوصل ان شاء الله عالموعد وانطلق بابا الانطلاقه العجيبه......بالطريق في سياره عرس مزينه وحوليها 4 سيارات ماشيين وبزمرو ..اتفاجأنا انو هلأ في عرس ..لسا بكير بصراحه..بس ما علينا شوي الاخوان سكرو الشارع وصارو يمشو على مهلهم ويزقفو ويزغردو ويرقصو السيارات...اه يرقصو السيارات كيف مش عارفه بس السياره كانت ترقص...المهم بابا زمر للي قدامه ما اتحرك..اخد بابا الشمال وزمر و اعطي ضو ما رضي يتحرك...من هون من هون يا ولاد الحلال افتحو الطريق ابدا...بابا عصب و بدا ولك يا...توووت توووت تووووت ..ولكم يا تووووووووووووووووت...وصار يلزق بالسياره ويزيح هون وهون واحنا مكلبشين ببعض انا ومره اخوي ....وبتحكيلي مره اخوي طبعا البيبي هلأ حاسسته ماسك بالقفص الصدري و متفاجأ باللي بصير
مسكينه وبعد 10 دقايق لزاحو قليلييين الزوووق بابا طبعا فش قلبه بكم من مسبه...و اخوي طل وحكالهم مبروووك الشارع بس برضه ضل متوتر و طاير وصلنا المطار اخيرا يا دوب اول المطار, اخوي اللي جاي من السفر بتصل مع اخوي اللي معنا وينننننننننننننننكم يا جماعه...الي نص ساعه بستنا زي الهتيشه لحالي :$ بحكيلو اخوي ليش هو انت جاي اليوم ويلا بكره انصدم اخوي اللي بالمطار..بحكيلو نعم :-| ضحك وطمنه انا احنا على باب القادمون صرنا....وطلع اخوي واستقبلنا وضحكنا ولا كانو صار اشي D:
و روحنا واخدنا الهدايا وتغدينا المقلوبه اللي انطبخت بناءا على طلب اخوي اللي جاي من السفر

شهر ان شاء الله وبنرجع نروح نودع اخوي وبتبدا مغامره عائليه جديده