اليكم ....

الى كل من تسول له نفسه او سوّلت له نفسه بترك العالم التدوين

من موقعي هذا - و هو عفكره غير عن الموقع اللي كل ما سكرت معي كنت اقرر اني اسكر البلوج و طبعا قرار لحظي بحت يكون وارتاجع عنه زي الشاطرين - اليكم انت

يمنع منعا باتا ....

التقاعد....التقاعد المبكر.... اللي بقررو يتقاعدو وبسوو انهم برتاحو... ...الاجازات....الغياب الغير مبرر و المبرر و حتى لو بانذار سابق - الا صديقنا يوسف لانه يحق له ما لا يحق لغيره على ان لا تزيد الاجازه عن اممممممم 3 ايام يلاااا احنا مناح و صديقنا يوسف بستاهل :)

اما بالنسبة للي سكرو مدوناتهم, ما في ...اه ما في و ممنوع, واللي سكروها بس مش بالاشي الحديد - ما بعرف شو اسمه - بس خلو الفترينه مبينه انو مر و شوف و تصفية نهاية الموسم و شوي شوي بنسكر بدون ما حد يحس فاااااا برضه ممنوع و الحكي الك يا نادر و اسمع يا ابو زينه....اه اه بحكي معكم بالذات.

بننشغل...بنطول...بنغيب...بتخلص المواضيع....بتتراكم المواضيع و ما بنعرف نعبّر...بنكتئب....بتسكر معنا...بننعجئ مع الدنيا...بننعجئ مع الاهل والاصدقاء

كلّه ماشي بس نبعد و نسكر و نختفي ....لأ .... نو .... نيه - بلغاري هاد - و هئه ......ممنووووووووووووووع

في اصدقاء كتير بغيبو عنا فترات طويله و بنشتقلهم بس بنعرف انهم راح يرجعو اكيد, زي ما ام عمر بتعمل و جفرا - لبنى- و جفراء - ليلى- واشرف - اللي اختصر لمدونه وحده بالاسبوع و بطل يطلطل علينا - و كعكي - اين انت يا كعكي- و فرح و هنا - اللي الها فتره مختفيه -مياسي اللي بتكتب كل شهرين مرّه - هاد تشجيع لتكتبيلنا عن اخر رحلة :) - وفاء و وايت فريدوم اللي بغيبو كتير برضه, عروستنا و لبؤتنا الغاليه اللي مش عارفين نزبط موعد نتلاقى فيه :$ و نورا - شكلي لازم اعملك تاغ لترجعيلنا - و رولى - قرابتي الغاليه اللي اشتقتلها - منمن جرّه العسل المصفى,هموسة يلا عطلت المدارس و بدنا همه تدوينيه عاليه, اورانجي اللي بتغيب و بتيجي بتنزل عشرطعش بوست و بترجع تغيب, كيكي اللي بتغيب و بتيجي بتكتب اشياء بتخلينا اسبوع نفكر, نيسانه اللي عاقبت حاله مرّه وحده و ابدعت - شكله لازم نضل نعاقبها - جعفر ولو انك حاطط بوست اليوم بس برضه بتطول كتير, صديقنا مالك مسامح لانه بالعطله ما بقصّر, و مواطنون اللي كنت ناويه انزل فيه اقصى عقوبه بس الحمد لله رجع بالاخبار الحلوه فبرضه مسامح , دكتور وحل, شايفتك بتقرأ الاسبوع الجاي اخر فرصه الك عفكره .... و الكم كمان احمد المحروق و احمد مرعي و احمد حمدان و دريمي و PP....هيني بخبركم, دراسه...شغل...ما بعرف طولتو كتير.

الكل بغيب فتره و برجع, بس البعد بعمل جفا يا جماعه فلا تطولو, لانه شوي شوي بتخف المتابعه - مثل صالح و صديقنا ثائر على سبيل المثال لا الحصر -و فجأه بتبطلو تمرو علينا بالمره و هالعالم اللي مجمعنا حلو بكل واحد فينا

شوفو هيثم مثلا - مضطره احطك مع اللي في الهم نجم- شوفو سوزان اللي صرت اعرف اخبار الاردن منها, و نورانياتي اللي جديد تعرفت عليها و جدا بستمتع باللي بتكتبه, و سمسم - عروستنا الثانيه - اللي هلأ بالاردن بين الاهل - ربنا يتمم عليكم الفرحه و الف مبروك عرس اخوكي - و رند - عروستنا الثالثه- بتضلها اتطلطل علينا , شوفو رين اللهم لا حسد, مدونتين ونازله ادراجات....بتذكرني بطفولتي التدوينيه :)

فاااااااااااااا برجع و بحكي....الكل بدو يرجع ان شاء الله, خدو وقتكم, ما راح احدد مدّه يلااا عيشو, بس الكل ..سامعين الكل بدو يرجع اوكيز؟؟؟؟؟

ايوه هيك بدي اياكم

الله يرضى عليكم و يسعدكم يا رب - اسمي الام الروحيه للمدونين و نانا ويسبر على رأي هيثم اللي عصباحو نجمه - و جمعه مباركه مقدما ولا تنسو تقرأو سورة الكهف :)

ملاحظه ع الهامش

لفيت عالمدونات مرتين فاي اسم سقط فتأكدو انه سقط سهوا و اعذروني لان تركيزي صاير صفر و سووووووووووووووووورررررررريييييييييييي مقدما :)

عالسريع

طولت الغيبه بس بصراحه كانت بتجنن بوجود مميتي و بتنويرها لدبي, للاسف 10 ايام مشيو زي غمضه عين وماما تسهلت اليوم عالاردن :( الحمد لله اللي ربنا يسر اشوفها وما تطول فتره الغيبه اكتر من هيك, ان شاء الله قريبا راجعه لاكتب عن زيارتها حبيبتي

هالفتره مشغوله بامتحانات و دورات و بشوية تنظيم للوقت و الحياه, غبت 10 ايام رجعت لقيت 82 موضوع جديد مش قارئتهم :$ نشيطين ما شاء الله عليكم, رجعت لقيت طوش و قصص, وناس مزعلين ام عمر - سلامة قلبك يا قمر - و قبلها ناس عاملين حادث - الحمد لله على السلامه- و ناس مقررين يبعدو مع اني لا اذكر اني اعطيت اي اذون بالمغادره او بتسكير اي موقع, وناس اجا عيد ميلادهم و ما فضيت اعمل شي , كل عام وانت بالف خير سوزان العمر كله يا رب, وقصه كبيره وتعليقات على مدونة صديقنا يوسف مش فاهمتها لسا , وناس بدو يشتغلو بنشر الاشاعات , مساء الخير صديقنا صالح :) -الموضوع حجه لاني اكتشفت اني ولا مره كاتبه عن مدونتك O_o

شكرا لكل اللي تذكرني و استفقدني, شكرا لتعليقاتكم و لايميلاتكم و لاتصالاتكم .... و اللي ما استفقدني فاااااااااااا الله يسامحه :)

اسفه عالتأخر بنشر التعليقات و بالرد و لكن قريبا ان شاء الله راح افضى و ارجع

بس حبيت اجي عالسريع و امسي عليكم ....

لجميع اصدقائي و صديقاتي ...اخواني و اخواتي... مسااااااااااااااكم فل و ياسمين :)

لنكتب عن.... ظاهرة المعاكسات \ شهر حزيران

من اقرف المواقف اللي كانت تواجهني في الباص :(

اول مره بطلع لحالي و بروح وباجي كانت بالجامعه, و مش اي جامعه, الجامعه الهاشميه و تعتبر سفره و ساعه ونص ب 3 باصات اشي بوّتر و كانت اول مره بركب فيها باص كمان, يعني جو جديد و بعد و عجئه جامعه كانت حياتي بشعه جدا, فتره الجامعه وحده من الفترات اللي بكرهم بحياتي, بعيده و صحرا بالاضافه لان كان عنّا بالبيت احداث غريبه جديده فكلّه اجا مع بعضه.

فتره الجامعه انا ما كنت محجبه, والحمد لله تحجبت على اخر فصل بسنه رابعه, كانت المعاكسات اشي غريب برضه, مشي بالمجمعات و اختلاط بعالم غريبه و من بيئات مختلفه, من رمي كلام و من مدّة ايد اشي بقزز بقرف بخزي وبقهر, اسمع اشياء مرات ما افهمها اروح احكي لاخوي, شو يعني بس شب يحكي هيك طبعا هو يصير بدو يلطم, يحكيلي مبدئيا لا تعيدي الكلمه و بعدين انا صحيح بحب تحكيلي كل شي بس راعي مشاعري, يعني ان اختي ينحكالها هيك كبيره يا عالم ... غير طبعا عن لزقة صحاب المحلات و الديباجه و الاسطوانه المشروخه " ليش زعلانه" بالبدايه كانت تقهرني الكلمه و بالاخر بس صرت "كبيره" صرت احكيلهم " مش خلصت موضه هالجمله؟؟؟ جد خلص بطل الها سوقها يا جماعه" ...خالتو ويسبر بصير :)

اللي بدي اوصله من هالحكي انّي اول ما تحجبت حسيت كأني اختفيت عن وجه الارض بالنسبة للعالم, كأني صرت اشي شفاف ما بشوفوه, ادخل المحل واطلع ولا كأنه في حد دخل, امشي بالمجمع ولا كأنه في حد بمشي, انا بصراحه انبسطت و حمدت ربي و خسيتها نعمه و رضا من رب العالمين اللي صار.

المهم خلصت جامعه و بديت الشغل, شوي شوي حسيت ان العالم صارت تشوفني, رجع التعليق و رجع الغمز والابتسامات, انا انصدمت, لكون مش منتبهه لطريقة لبسي او مزودتها بشي وانا مش منتبهه, سألت بنات خالتي اللي تحجبو بنفس الفتره اللي انا كنت محجبه فبها حكولي انهم همه كمان ملاحظين ان المعاكسات زايده, تخيلو يا جماعه اني بكون واقفه علشان اقطع الشارع بيقوم شخص "محترم جدا" بوقف سيارته و بصير يتطلع علي عأساس انا من اياهم :( بطلت العالم تميز الكل صاير يفظّع بتصرفاته و يتخبى ورا الحجاب و قليلين الحيا بطلو يميزو فبجربو حظهم مع الكل.

بنت خالي المنقبه برضه بتتعرض لنفس الموقف, و بتحكيلنا انه بلحقوها شباب و بصيرو يرمو حكي , مشهد ان شب ماشي بطيء بالسياره ورا بنت و بتفاهم معها على المبلغ المطلوب صار شي متكرر و مأساه اذا بصير شي عادي, ما بنكر ان في بنات بفظعو باللبس , مش محجبات و محجبات اشي غريب اللبس, لكن برضه في شي اسمه غض بصر و مش عذر ابدا انك ترمي بلاك على بنات العالم, لان زي ما في من هالبنات بحبو و بدهم حد يتحركش فيهم في نسبة جهل بس عايشه عالتقليد الاعمى للموضه و اخلاقهم ما بتعكسها طريقة لبسهم.

خايفة نوصل بيوم لانه يكون في عنّا شوارع خاصه "معلن عنها" للرذيله, خايفه يصير الشك قائم و التعميم قائم بسؤ الاخلاق حتى يثبت العكس, خايفه يصير شيء طبيعي الشب يتعرض للبنت بالشارع, خايفه يصير شيء مقبول تلفظ الالفاظ النابيه الجارحه الخادشة للحياء على مسامع الجميع, خايفه اي شخص مريض نفسيا يعطي لنفسه الحق انه يتحرش ببنت بدون اي رادع و بدون اي خوف من ردود افعال, لانه وللاسف العالم صارت تمشي على مبدأ "ابعد عن الشر و غنيله" بس قبل ما تبعد ما في مشكله لو وقفت تتفرج و طلت موبايلك و صورت و اذا في مجال شاركت.

واخيرا :)

يا سلااااااااااااااااااااام ما اجمل هالاحساس

اليوم حدث تاريخي بعمري

اليوم تغيير جذري بحياتي

و لاول مره من 9 شهور

واخيرا

واخيرا

قبضت الراتب :)

اول شي عملته

اشتريت عطرين لاخواني حلوان الراتب

اه...اه....بلشنا :)

ياااااابااااااااااييييييييييه ما احلى الشعور

الحمد لله :)

أسطح من هيك

اليوم واحنا بالطريق انا واخوي لبيت اخوي التاني كنّا نسمع عالراديو برنامج من اللي المذيعه بتحكي كلمتين و بعدين بتيجي موسيقى و بتحكيلنا معلومه مهمه و بتيجي اغنيه صايبه بالموضوع, الحكي كان غريب اليوم, يعني انا سمعت عن اعرف شخصيتك من لونك المفضل, من رقمك المفضل, من شكل الخط اللي بايدك اليمين و اللي عليه بقررو انت حتعيش سعيد ويلا تعيس العمر كله, كل هالامرو غريبة بس مش بغرابة موضوع اليوم, اليوم كان اعرف شخصيتك من شعرك ...اه من شعرك

اذا كنت من اللي بحلقو عالصفر, اصلع, فانت انسان منطلق تتأقلم مع جميع الاشخاص و البيئات, اذا كنت بتحلق قصير فانت انسان معتدل محبوب من اللي حواليك, اما اذا كنت من اللي بطولو شعرهم فانت انسان مغرور و بتهتم بنفسك اكثر من اهتمامك بالغير!!!! و المذيعه طايره بالتحليل النفسي اللي توصلتله الاخت و موسيقى و بالخلفيه صوت راغبعلامه بغني اغنيه نفس عادة اغنيه لا بتعرف هي جديده ويلا قديمه, نفس الصوت و اللحن و الموضوع.

طيب غريب عجيب و لسا بنحكي انا واخوي عن هالسطحيه اللي بفكرو فيها و انهم ال يعني ببدعو بالتحليل, قامت الاخت شكلها انسجمت و بدت تحكي عن علاقة الزواج و الموافقه على الزوج من خلال نوع اللحيه و شكلها و نعومتها O_o

اه والله ...و ال ان "البنات" - مش فاهمه عن اي بنات بتحكي- ال البنات بفضلو ذوي اللحية الخشنه بالزواج ال لانهم بكونو عارفين انهم حيكونو اكثر سعاده و بأمان معهم, بحكي لاخوي طيب كيف؟؟؟ يعني بيجي العريس بقوم انا بحكيله بعد اذنك و بحس لحيته و ال اذا ناعمه بحكيله اااه انا اسفة جدا....ما في نصيب, و ممكن يكونو مخادعين الخطاب و يحطو جل مثلا و بتصير اللحيه خشنه !!!!

شو هالتفاهه هاي ؟؟؟ شو هالسطحيه بالتفكير؟؟؟؟

يعني حلينا كل امورنا و حللنا كل اللي بصير حوالينا و تركنا الثورات و العالم اللي عم تستشهد و البلدان العربيه اللي قايمه قاعده و بس صرنا نفكر بنعومة و خشونه اللحيه وتأثيرها المباشر على نسبة الزواج!!!

جد انهم مش بس سطحيين ...لأ أسطح من السطحيه