Things I Like To Whisper About

Would You Hear Me Whispering

حكي بدون سبب




كتير بستغرب كيف بعض الناس بتفكر مرات
يعني كيف بتوقعو ان المشاعر و الاحاسيس عبارة عن كبسة زر؟؟؟
او شي مؤقت بعد فتره بنعمللهم ريسيت و كأنهم ما كانو اساسا؟؟؟
كيف بقدرو انهم ينتقلو من دور لدور بمنتهى البساطه؟؟؟

مش عارفه هو انا و اللي غير و يلا هالعالم اللي غير, انت بس تجرح بني ادم الوقت ما بشفي ابدا, ممكن استمرار الحياة بلهي و لكن الانسان بعمره ما بنسى جرح, بعمره ما بنسى ان هالانسان اذاه...ان هالانسان اخد منه اشي كتير مهم , اي لحظه بحياة انسان اي مشاعر ثقه اي مشاعر تقدير او اعجاب هاي كلها بنظري اشي كتير عزيز عالانسان وما بعطيها لاي شخص و بتروى كتير و بدور كتير ليعطي هالمشاعر و يوجهها لحد ولما يكون هالانسان مش على مستوى الثقه اللي بتعطيه اياها بانه يقدر هالمشاعر و يحافظ عليك و عليها فهو انسان صعب انك تتعامل معه

انا انسانه مشاعري كتير غاليه علي و حافظت عليها وما وزّعتها هون و هون و بنظري اذا حد وصلني لمرحله اني اثق فيه و اتعامل معه بكل حرّيه و ادخله حياتي و احكيله ادق ادق التفاصيل وما احترم هالشي فانا هالانسان بعتبره خان الامانه اللي توقعته انه بستاهل يتحملها, ما بنكر اني انا كمان بتحمل جزء كبير من المسؤوليه بالوقوع دائما بنفس المطب و هو الثقه بالناس اللي مش اهل الها و لكن برضه ما بتهون علي نفسي انه حد يأذيها ولو بنفخه هوا

بدعي ربنا يبعد عنّي و عنكم مثل هالناس ..... وبدعي لكل شخص انقرص قبل انه ما يوقع بنفس المطب مرّه تانيه

27 التعليقات :

بتعرفي شو بكره بهاي الشغله

لما يصير موقف زي هاد وحد يجرحني والجرح يكون واضح ,, وأنا أتخذ موقفي وأبعد أو أزعل أو أعصب أو أعمل أي ردت فعل - شو بصير معي بالعادة إنهم همه بيزعلوا إنو ليه عاملتينا هيك إحنا ما عملنالك شي إنتي إنجرحتي لحالك وهسا عم تنكدي علينا وعملتيلنا قلق وفي الآخر إزا بدهم يحكو غلط تقولي بحكوها ليحملك جميله

بكره هاي الشغلة وبكره إنو الناس مابتحس على كلامها لما تجرح وكأنك مطاط أو كبسة زر زي ما حكيتي

تصدقي حتى مش متزكره بحياتي حد غلط فيي أو جرحني وإجا راضاني أو استسمح مني على الغلط يلي عمله
تخيلي

 

نورنياتي

اه في منهم هدول كتير, او اللي فجأه برجعو يتعاملو معك عادي ولا كأنه صار شي .....انه بالله عليكم !!!!!

دائما اللي بجرحو الناس بكونو من الحسّاسين اللي بزعل بسرعه و بنسو ان للناس مشاعر برضه

بكرههم هدول العالم انا

 

ان شاء الله ما تكوني تعرضت لقرصة صديق :(
مشكله حقيرة انه تصادفي انسان تثقي فيه وبعد هيك ومن ورا ظهرك يدعوك او يحكي عليكي
الله يحمينا من هالنوعيه من الناس

 

مهو هاد اللي بقهر...انك بتفكريهم قريبين منك :(
بس زي ما حكيت انا بتحمّل جزء كبير من المسؤوليه...


هدول اللي حكيتي عنهم من اسؤ الناس اللي بمرو في حياتنا

امين يا رب العالمين

 

طولي بالك ويسبر هانم، بتصير هيك شغلات، المهم كيف تتجاوزيها بأقل قدر من الخسائر، و إللي خسر ثقتك هو الخسران في النهاية

 

Saleh

معك حق ما بصير نوقف كثير و لازم نمشي....لكن الصدمه والمشكله لما همه يتعاملو معك كأنه ما في شي و بدهم اياك ترجع طبيعي

طيب كيف؟؟؟

الثقة بس تنفقد ما في شي ممكن يرجعها

 

ويسبر

مساء الخير

اولا
لا يخون الا الاصدقاء

ثانيا
الطيب قد ما انقرص ما بتعلم
إسأليني انا والسبب انه دوما يؤمن بان الخير موجود وهو يُّقدم حسن النية عن سوء النية لذلك يكون عرضة لهكذا مواقف
ورغم ذلك فان تكون طيبا ويقرصك احدهم افضل بكثير من ان تكون خبيثا وتقرص الآخرين

دمتِ بخير

 

مظبوط والله كلامك يا همسه

صفه اسفل من الي بالرجل الله يعزك ويعز السامعين

الواحد بنقرص كل يوم من الناس وبشوف عجايب ، بس اسوء قرصه لمن ايكون عندك ايمان بالشخص الي بتتعاملي معو لمن تعطيه كامل ثقتك وعارفه انو مش ممكن في يوم يجرحك ، او يخيب املك
هان بتكون الطامه .
انشالله الله يبعد هالناس عن طريقك وما تتعرضي بيوم لقرصه لا من قريب ولا من بعيد :)

 

المشاعر والأحاسيس مو لعبة, ومو كبسة زر
الله يبعد عنا احكام الناس اللي بحاولوا يتحكموا بمشاعرنا والله يبعد عنا الناس اللي منظرهم بختلف عن دالهم والخاينين والمنافقين
امييييييييييين

ملاحظة رح اعمل copy لأول كم سؤال للبيج على الفيس بوك
ok?

 

المشكلة لما تيجي تحكي للناس انه : انا ما بنسى الاشي العاطل

بحكولك انك حقودة وقلبك أسود
يا عالم قلبي أنا قلبي أسود إذا هيك معاييركم انتو

البني ادم لو يحط حاله محل اللي قباله ويتصرف بناء على هالحكي , عمره ما بصير في مشاكل ولا اي خلافات

لأنه راح بيصير الواحد يحسب حالف حساب لكل كلمة او حركة بتطلع منه تجاه الناس

بالنهاية
خذيها من تجربة
ما في حدا بتحمل البني ادم الا نفسه , مهما اللي حواليكي بيّنوا انهم بشيلوا همّك معك او بخلوكي تفتحي قلبك , اخرتهم يتغيّروا , فا ديري بالك من هاي الناحية

ويسعد صباحكم جميعا

 

ح ادعي معك واقول امين....الله يبعد عنا هالاشكال

لكن عارفه وين المشكله....لما تنجرحي من حد قريب وهو او هي مش اخذين بعين الاعتبار انه هذا جرح او زعل ولما تعاتبي بيقولولك....عادي ....ليش انتي حساسه لهالدرجه!!!!

 

Yousef

مسائك سعيد صديقنا يوسف


اعتقد ان الكل بخون و لكن بس يكون شخص قريب منا بنحس بالم الخيانه اكتر لانه بيجي فورا بالقلب

للاسف 34 و ما زال العد مستمر - العمر الطويل بالخيرات ان شاء الله :) - و لسا مش عارفه اتعلم و كل مره الخطأ اكبر


اول ما اجيت للشغل هون اخوي بحكيلي خدي قاعده بالحياه, اللي قدامك مش منيح حتى يثبت عكس ذلك, انا ما اقتنعت و حسيتها نظره سوداويه و بتبعدني عن الناس, ان شاء الله ما يكون كلامه صحيح :$

Jarat

منمن العسل....مسائك فل و ياسمين

بالزبط...هاد اللي بجرح كتير, لانه جزء كبير من الجرح بكون ان نفسك مش هاينه عليكي باللي صار فيكي و بالاعتراف بانك كنتي غلطانه بحكمك عالاشخاص

امين يا رب.....ان شاء الله الكل ما يتعرض لمثل هيك قرصه

 

Hana

امين يا رب....الله يبعدهم همه و امثالهم عنّا كلنا

طبعا يا قمر....الادراجات كلها تحت امرك يا حلوه :)

LUNAR

يا الله شو بكره هالرد اللي دائما بسمعه, يعني انت تأذيني و تجرحني و انا بس انسى, و انت حساس وما شاء الله عليه اما انا المفروض اكون حجر لا اتأثر ولا اعبّر

يااااا ريت العالم ولو جزء بسيط منهم يصيرو يحطو حالهم مكان اللي قباله لصارت الحياة حلوه و بالف خير, ولكن بدك مين اللي يحس و يفكر بالعالم قبل تفكيره بحاله :(


"ما في حدا بتحمل البني ادم الانفسه" يا الله شو قويه و شو حقيقيه هالجمله و بنفس الوقت محزنه جدا

ربنا يسعد صباحك و مساك و كل اوقاتك صديقنا ابو زينه :)

ان شاء الله تكون وصلت عند الاهل بالسلامه و كرمشتلنا زينه القمر :)

 

Naysan

امييييييييييييييين يا رب

بحس حالي بدي انجلط بهيك مواقف....حسّاسه و بتكون كأنها مسبه , اما همه فيا ويلك اذا ولو بالغلط عملتي شي ما يعجبهم

الله يخلصنا من هالعالم و يبعدهم عنا

 

بتعرفي يا ويسبر يمكن كتير منا تعامل مع هيك نوعيات من الناس بمراحل حياتنا ... بس صدقيني و عن تجربة بقلك .. الخلل مش بانسان بيمنح ثقة .. لانو الحياة بتكون مرعبة لما توصلي مرحلة تتعاملي مع الناس و الوضع الافتراضي عندك انهم مش ثقة .. انا قابلة انو اثق و اتعرض لخيانة هالثقة ولا اوصل لحالة دائمة من الشك بنوايا الناس .. كل شخص بخون امانة وثقة هو وبس هو اللي بحمل اثم هالغلط

و الله يبعد عنا وعنك هالانواع من الناس المريضة

 

على فكره انا اتفق مع يوسف في الموضوع الطيب عمره ما بتعلم انا ما بدي أيئسك بس والله من تجربه عشتها الله يخلي امي كان الكل شغال نميمه وغيبه وكل ما تعرفي من تصرفات سيئه وهي ولا عبالها واذا حدا حكالها بتحكي خليها ع الله كله بثوابه !

 

سلام ويسبر، كيفك؟جاي كلامك هالمرة عالوجع تمام.بتعرفي أصعب شي لما تكوني مصاحبة ناس المفروض إنكم صحاب و بينكم محبة ومودة و بنفس الوقت بيستغلوكي تحت شعار المودة وال....... وإنت عارفة و ساكتة عشان الصحبة....بتعرفي في الأخر (بركبوكي و بدندلو إجريهم كمان)آسفة عالتعبير بس هاي الحقيقة المرة.بصير كل شي بتعمليه واجب عليك و إلزامي وإذا مرة كشرت من التعب ياااااااااوييييييلك،،لا و بعدين بطعنوك في صدرك، هدول الناس لازم نطوي صفحتهم.
نظرية أخوك رائعة و هي الي بتنفع في هاد الزمن،يا ريتنا نعرف نطبقها،كل مرة بقول لالالا يمكن هالناس أحسن من التانيين......يمكن غلطتنا بنفتح قلوبنا و عقولنا وبنعطي بدون حساب،لازم نأجر بوابين على العقول والقلوب ما يفتحوهم إلا بصعوبة......

ديري بالك عحالك هلأ بالغربة بتشوفي أشكال وألوان ،حطيلك حارس شاطر على قلبك و مشاعرك....

 

همسة

المزعج يا هموس اني لسا بثق بالناس الغلط و لهلأ مش عارفه افرّق

انا هيك رأيي, الدنيا بتصير مش حلوه اذا هيك عملنا, اذا حسينا ان كل اللي حوالينا سيئين بتعتّم الدنيا بعيونا :(

لاااا ان شاء الله ما نتعرض لهيك مواقف و ربنا يبعدهم عنا اجمعين, القلي شو بدو يستحمل ليستحمل يا اختي :)

Sozan

شكلك دايقة كثر يا قمر.....الله يعينك و يبعد عنك هالناس او عالقليله يبعد عنك اعمالهم

ربنا يخليلك اياها و يحميها يا رب...متأكده ان خالتو قلبها ابيض لانك وارثه هالشي عنها :)

 

Lily

اهلا اهلا يا قمر :)

مشكلتنا انّا ما بنعرف نحدد اللي قدامنا من اللي بقدر الاشي اللي بتعمليه و يلا من اللي زي ما حكيتي مع الوقت بعتبر هالطريقة بالتعامل و تمشاية المواقف هو العادي و اللازم ينعمل و بتصيري اذا زعلتي تتعاتبي كمان O_o

مش عارفه اطوي صفحتهم...مش هاينه علي حالي يا اختي و مش عارفه انسا :(
مقهوره على حالي مش عليهم...فاهمتيني؟؟؟

نظرية اخوي صعب كتير اني اطبقها لاني شايفتها مدمره اكثر ما هي مصلحه للوضع :$

لازم ننتبه و نزيد من درجة حذرنا و ربنا يستر :)

ان شاء الله.... الي خال بس احكيلو دير بالك على حالك بحكيلي الله بدير باله عالجميع ان شاء الله

 

5ls sam7eehom 7ram :(

 

2eza 7ada wahhamek be shee w 5alaky tetwaq3y 2enno sh5syyeh ma 7asalat w b3dean 6ele3 kullo fashoooooooosh b3ed ma wtheqty fehom w 6ele3o mesh 2ad haltheqa ....betsam7ehom ???

For me.... I CAN'T :(

 

أول شي فكرت تخويث لأنو ما بين عندي أي كلام!

بس ظللت الشاشة و بينت الأحرف :)

"بعرف، شطور أنا" يخزي العين

و آه أمي جابت غيري

:]

و آه عم بحاول أخليك تبتسمي بشلن لأنو الكل حكى و وفى :)

---
اللي بفكر المشاعر بكبسة زر أول/أكثر واحد بيزعل لما تعامله بالمثل!!!

 

هههههه
يعني بتعلّق و بترد بالكلام اللي بدي احكيه ؟؟
جد انك شطور :)

ايوااااااااااا و بس تواجهه بالواقع بتصير انت قليل عقل و مش مقدر للامور

اشي بقهر يا زلمه

 

m3ek 7a2 bs lama ktbt el comment kont mza3leh 7ada lol

 

Ahaaaaa...inshallah halla2 ma 7ad z3lan mennek wala 2enty z3laneh men 7ada :)

 

ااااااه ياقلبي
كتير هالموقف بيصير
ومتل ماحكوا الكل هون.. بس تاخذي موقف منهم بتصيري انتي الحقودة واللي قلبك أسود وراح تدخلي جهنم كمان وانو الله بيتوب على عبيدو وبيسامح كيف انتي ما بتكوني هيك كمان , وبتصيري بالنهاية انتي اللي مابتعرفي الله
والخلاصة انتي الشيطان الرجيم!!

بس وحياااتك عادي
خليها ع رب العالمين
واللي عمل هالموقف البايخ معك هوي الخسران صدقيني وما تسامحيهم ! اه ما تسامحيهم مش لأنك حقودة وقلبك أسود بس لأنو حرام اللي احترمتو ووثقت فيه يطعني ويعمل فيني هيك

w SMILE ya 3asal (:

 

شكله الكل مارر عليه من هالعالم هاي :(

يمكن اسهل طريقة للدفاع عن النفس هي الهجوم من وجهة نظرهم لهيك بحاول يحسسوكس ان اللي صار عادي بس انت اللي مش راضيه تفهمي :)

والنعم بالله...ربنا يبعدهم عنا يا رب وما يبتلينا بحد فيهم

I'm smiling ya amar ...walaw Bullet 3enna w ma beddy abtasem :D