الوطنيه افكار ومبادئ بتأمن فيها وبتطبقها
الوطنيه انك تحمل الوطن بقلبك و بمبادئك و بعقلك و بتصرفاتك.... انك تحمل مسؤوليه كلمه بتحكيها
الوطنيه مش شخبطه كلام وحط صوره اعلام او شخصيات انت بتعتبرها رمز للوطنية, مو حاله بتكتبها عالفيسبوك و بعدها بخمس دقايق بترجع بتتذمر من شي حياتي عادي و علشان تبين بقمه الانسجام بتقوم بتسب الرب او الدين, ولا انك تتفاخر والتخبر العالم بوصولك لقمة النشوه من كاس او سيجاره مشبوهه دخنتها بمكان غريب او من صورة مقززه مقرفة
الوطنيه حب مش كره....لما تكون بتحارب بتكون بتحارب لحب وطنك اكتر من كره عدوك
لما تكون بتناقش بتكون بتدافع بحب عن افكارك ما بتهاجم المختلف برأيه عن رأيك
الوطنيه حب كبير بخليك تعيش بعالم خاص وللعالم كلها مخلص مقدام وبدون انتظار اي رد من الناس...عندك هدف و بتسعى لتحقيقه ومو شايف غيره
الوطنيه قلب وبالقلب
قلب كبير بوسع كل الخير وما في مكان للشر
قلب كبير كله حب وما في مكان للكره
قلب كبير بكبر الوطن معبى كلام وذكريات وقصص
معبى افكار وعزيمه لتحقيقها وتنفيذها
الوطنيه مش مزايده ولا معايره ولا تملّك
الوطنيه مشاركه و مشاوره و تعاون
الوطنيه مو كلمه....الوطنيه تنفيذ وتضحيه
ملاحظه ع الهامش
ممكن يكون الكلام مو مترابط او ما اله داعي بس في اشياء بشوفها الي فتره دفعتني لاكتب هون و اعبر عن اللي ببالي.... وبدون تعميم ولا تلطيش...لا ليش الكذب في شوية تلطيش
7 التعليقات :
طب احكيلك اشي وكلو تلطيش على كل الناس واولهم حالي؟
احنا العرب مشكلتنا انو كل اشي اعنا اساسو انانيتنا... بنفكر حالنا بنحب اوطاننا بس القصة انو كل واحد فينا بيعشق حالو عشق وبيحب وطنو بس لأنو هو منو، يعني بيحب وطنو من منطلق انو "كل اشي الو علاقة فيي هو احسن اشي"، وما بعرف كيف احنا بنعبر عن الاشي الايجابي بالمقابل السلبي تبعو... بدل ما نوثق بحالنا بنقلل من قيمة الناس التانيين... بدل ما نحب حالنا بنكره التانيين... بدل ما ننتمي لأوطاننا ونخلص الها بنسير بدنا نورجي انو اوطان الآخرين ما الها قيمة...
والحلو انو كلنا فاهمين هالحكي، وكلنا مش هيك، وكل واحد فينا شايف انو اللي حوليه ما عم بعمل الصح
طب هدول الناس السلبيين اللي بالشارع مين؟ ازا مش انا ومش انتا ومش هو ومش هي ومش ابوي ولا امي ولا اخواني ولا قرايبي... الناس اللي بتعمل الغلط جاية من الفضاء؟
زي ايام ما يكون موسم خواطر شغال... كل الناس متأثرة فيو وكل الناس بدها تنجلط من الغلط اللي بيورجينا اياه... طب ازا كلنا متفاعلين معه مين الزفت اللي بيعمل الغلط؟!!!!!
دائماً في "هدولاك" فاهمين الدنيا غلط... وفاهمين حب الوطن غلط... وبيعملوا الغلط...
آآآآخ يا أم الوسابر!!!
بحيرة البجع
صباح الخير :)
طولي بالك و لطشي متل ما بدك بطلعلك
شكلو في الايام الغريبة اللي بنعيشها بدنا تعريف جديد لكتير مصطلحات منها الوطنية و ربما الوطن لنعرف نتعامل مع غاياتنا او اهدافنا على الاقل لما نصف حكي
احنا بمرحلة التيه
اه التيه تبع الصحرا و غيره و الله يسترنا منه
@بحيرة البجع
معك حق 100%
احنا تأثرنا للاسف لحظي او موقفي و بتلف وجهنا بننسى
مشاعرنا كلها هيك صايره للاسف
بنحاول نزبط حالنا وان شاء الله يطلع بايدنا نعمل شي
اللي قاهرني همه مجموعه معينه كتبت البوست كله عنهم بصراحه
الاتجاه السياسي و الديني ما بعنيلي
حياة العالم ما بتعنيلي ولا بهمني شو عملت وشو بتعمل
بس بكره النفاق انا يا اختي
بكره المجاهرة بالافعال اللي بفكرو حالهم فيها جرايئين و هي فعليا بتكون وصلت حد الوقاحه
@لبنى
يااااا صباح ومسا الفل :)
لطّشت لحكيت بس و فشيت قلبي واستريحت...شوي :)
في ناس الا من رحم ربي بدهم فرمته لمخهم و تنزيل المفاهيم من اول وجديد :$
بقدر احكيلك انو في ببالي عينة بينطبق عليها الكلام اللي بتحكيه...
ونعم صحيح ميه بالمية...
هدول الناس اللي متل هيك بيستهلكوا القيم الحقيقية الحلوة والمهمة وبيخلوها تسير متل العلكة المعلوكة... او متل القماشات اللي بنمسح فيهم الغبرة... ما الها شكل لا هي مربعة ولا مستطيلة ولا مدورة، ولا الها لون لأنو لون الغبرة بطل يروح منها، ومهرية ومقرفة لا بتسر العين اذا شفتيها ولا بتفيدك اذا استخدمتيها!
:-|
بحيرة البجع
nf6ar wa6aniyeah o ntghadda wa6aniyeah o nt3asha fasad
لا هلأ الشفافيه شغاله 100%
بنفطر و بنتغدى و بنتعشى و بنتحلى فساد الحمد لله :)
و بنتحلى فساد
jad da77akteeny
:)
reading yr replies on all the previous posts.
u won another thing!
laaaaaaaaaaaaa,, bayyanat enha FASAD
إرسال تعليق