انكتاب: القراءة عدوى

قرأت كلمة انكتاب اكتر من مره من قبل,و مع ان فكره و اهداف النادي عجبوني كتير "نهدف من وراء “انكتاب” إلى تشجيع القراءة باللغة العربية ونشر ثقافة القراءة في مجتمعاتنا وربما بين هذا و ذاك تطرقنا لهموم اجتماعية أو سياسية أو دينية. على صعيد آخر، نرجو أن يساهم النادي و لو بشكل بسيط في إثراء المحتوى العربي على الإنترنت" زي ما هو مكتوب في مواقعهم و عموقع الفيس بوك

بصراحه و للاسف ومع اني بعشق القرأه جدا ما اثار فضولي الموضوع كتير الا لمّا سمعت انه تم استضافة الكاتب مريد برغوثي و عن مدى الفرحه و الاستمتاع اللي صارت خلال مناقشة كتابه "رأيت رام الله" في مدونة صديقتي علا

قرأت التغريدات و التعليقات و حسيت بالغيره اني ما كنت معهم و اني ما شاركت بالنادي وانا موجوده بالاردن و من وقتها فضولي زاد ومتابعتي زادت لهالنادي, و اثناء تواجدي بالاردن اخر مره و احنا بنرتب طلعه حلوه انا و مياسي ذكرتلي انها ما بتقدر نتلاقى بيوم معين لانها رايحه على انكتاب ولولا الزحمه الاجتماعيه اللي كنت فيها كنت ناويه اروح معها

المهم اخر نشاط للنادي و اللي عجبني كتير وهو موضوع هالتدوينه فكره "بكتابك عبي جيابك" الفكره و بكل بساطه بيع و شراء الكتب المستخدمه, اذا في عندك كتب قديمه و حابب تبيعها لتشتري كتب تانيه هالنادي بساعدك بهالشي وما عليك الا انك تحكي معهم على واحد من هالارقام (0796391544 ) او (0795482737) حتى تحددو موعد تسليم الكتب اللي عندكم او بتقدرو تروحو على المركز العربي الثقافي من الساعة ٤ لل ٧ كل يوم وحتى تاريخ 5\6\2012 لتسليم الكتب اللي بدكم تبيعوها, لكن هالشي لازم يكون قبل تاريخ 6\6\2012 لانه بهاليوم راح يكون في معرض كبير لعرض الكتب للبيع,المعرض راح يكون ب 6\6\2012 من الساعه 4 للساعه 9 في المركز العربي الثقافي و بتلاقو عنوانه باخر البوست

برأيي الفكره لازم ما تمشي بدون ما تستغلوها, للاسف وجودي بدبي راح يخليني اخسر فرصه شراء كتب قيمه و بمبلغ لا يتعدى الدينارين, عندي كتب قرأتها 5 مرات يمكن و هلأ الها سنين محطوطه بدرج المكتب, وفي في بالي كتب كتيره حابه اقرأها , غير ان فرصه انك تاخد رأي قارئ للكتاب و نصيحه منه راح تكون متوفره و بسهوله وهاد شي مهم جدا برأيي, صحيح في اختلاف في امزجتنا في نوعيه و مواضيع الكتب اللي بنقرأها و لكن اي توصيات بتحببنا اكثر او بتلفت نظرنا اكثر لنوعيه المواضيع بالكتب اللي بنقرأها..... روحو و اشترو الكتب عني و عنكم و ان شاء الله المره الجاي اللي بكرر النادي الفكره تكون اثناء وجودي بالاردن.

عنوان المركز: المركز العربي الثقافي - جبل اللويبدة - دوار باريس

قرب مستشفى لوزميلا- شارع فؤاد سليم - بناية رقم (8)

عدت سنة

مساء الفل..

بوست سريع وتجربه،، طبعا المعظم عرف بموبايلي الجديد :) عادتي الحلوه بالتقزيز و الاعلان عن كل و اي شي جديد بصير معي :)
ممتي بالامارات و بالرغم من بعض تغييرات الخطط المرتبتها بس ان شاء الله لسا في وقت للتطبيق، حابه تكون اجازه حلوه لا تنتسى لمميتي

امبارح كملت سنه كامله و انا ضمن فئة المغتربين ... مش مصدقه ان سنه كامله مشيت، المشاعر هي هي مثل اول يوم ... الاشتياق و قبضة القلب و السؤال " انا ﺷﻮ اللي عملته بحالي " لسا موجود بالرغم من التأ قلم اللي ما بقدر انكره على اسلوب الحياه الجديد ...ما بنكر اني حبيت فكره الاستقلاليه الى حد كبير...اخد القرارات و ترتيب الحياه بناء على ﺍحتياجاتي انا مش حد تاني ، تحمل المسؤوليه و تقبل النتائج صار اكبر

هلأ انا في مرحلة اعاده الحسابات و اتخاذ قرارات اكبر ان شاء الله تكون في مكانها ... ادعولنا :)

اخر شي بدي احكي لنيسانه التدوين كل عام و هي بالف خير و سامحيني عالتأخير يا قمر... العمر كله تقضيه بالسعاده و الهنا يا رب


و دمتم

اعز الناس

كلام كتير و احداث كتير

و كالعاده

....ما في كلام راضي يطلع

بس حبيت امسي عليكم يا اعز الناس

مساكم فل

عادات الزواج

الحلو بشغلي الحالي انه بعرفني على ناس من مجتمعات و بلدان و خلفيات و معتقدات مختلفه, بالبدايه كنت محافظه على مسافة امان لحتى اتعرف على كل واحد و الاكتر اني اعرفهم على طبيعتي لتحديد الحدود و عدم تخطيها ولحتى ابين اللي بقبله واللي ما بقبله, اولها كم من مجادله اكبرها بزياده لحتى الكل يعرف شو بقبل وشو ما بقبل.

و الموضوع مش بس مع الاجانب, لأ العرب كمان, في موضه بشغلي العرب الشباب بستخدمو كلمة "حبيبي" بس يحكو مع البنت, الاجنبيات ما بهمهم و بالعكس بستخدموها معهم و معنا احنا البنات, انا كل ما حد يحكي حبيبي انئز ,كبيره يا جماعه حتى بدون معناها الحقيقي بس كبيره فكنت كل واحد يحكيلي اياها احكيلو" ما تحكيلي حبيبي و اه كمّل شو بدك" في منهم عادي و فهمو وفي منهم التافهين اللي بدو بانا مش قصدي انك حبيبي و انت زي اختي و هالحكي, و وضحتلهم اني اختهم و اختهم الكبيره كمان بس انا ما بحب هالكلمه, مع الوقت اتعودنا على بعض و صار التعامل غير, باحترام و بحدود.

تعرفنا على بعض زاد من معرفتنا بثقافات و عادات وتقاليد بعض , بالاكل باسلوب الحياه بالقوانين بعادات الزواج, خلينا بعادات الزواج ....مثلا الباكستانيين عندهم بس توصل بنت لسن الزواج, واللي هو 20 عندهم بتتولى وحده من قريبات العروس بتزويج هالبنت و بتصير تحكي لكل الناس عنها, لانهم بباكستان و بسبب الظروف اللي عندهم الكل بخاف من الكل, وحتى الجيران ما بتعاملو مع بعض, الكل بحمل مسدسات و عادي تكون ماشي وتلاقي طلقه مرت من قدام وجهك, فبخافو جدا من الخلطه والعلاقات الاجتماعيه شبه معدومه, لهيك ما بعرفو ان هالبيت في بنت للزواج و المفروض حد يعلن عن هالشي و ينشر الخبر.

بنيجيريا الوضع جدا غريب, زميلي النيجيري عاش مع زوجته قبل الزواج 4 سنوات و صار عندهم ولد و بنت وهو متردد يتزوجها, لانه وبكل بساطه اذا الاب رفض الزواج البنت و اولادها برجعو لبيت ابوها و ممنوع يشوفها الشب, و عندهم طلب الزواج بكون من العمّه مش من الاب, لانه عندهم العمّه هي الوحيده اللي الاب لا يمكن يرفضلها طلب, و اذا العمّه وافقت الاب راح يوافق على طول, فكل بنت بتكون في الها عمّه كتير قريبه منها و بتختارها لحتى يجي الشب و يطلبها منها, و بس العمّه توافق و طبعا الاب تلقائي يوافق , بيوم العرس البنت بتركع قدام ابوها قدام الناس و بتطلب منه يزوجها الشب, بقوم الاب بسألها اكيد بدك اياه و بكرر السؤال 3 مرات و هي لازم ترد بالموافقه, و ممكن هون كمان الاب يحكي انه مش موافق و يلتغي كل شي لهيك اهل العريس بكونو قاعدين مع بعض بعيد عن اهل العروس لحتى اذا صار الرفض ينسحبو بهدوء.

و الحلو انهم بعد الزواج بتضلها العمه المسؤوله واذا صار مشاكل بتشكي البنت لعمتها و هي الوحيده اللي بتمون عالزوج و بطلعلها تتعامل معه زي ما بدها و اي قرار بتاخدو هو اللي بمشي....فرجانا صور العرس و مرته كانت حامل و اولادهم حواليهم :) صورة مرته راكعه قدام ابوها و صوره اهل العريس قاعدين على جنب بعيد لخحالهم....بحكيلو بس يا ريت تكون عارف حجم التضحيه اللي عملتها مرتك بانها تركع قدام الناس هيك, بحكيلي عادي هاد شي بصير يومي :$

وييييييييييييييييي

افـتح الصندوق ^^.

طلـّع المقص =)).

قـِص منخارك .،.

رجـع المقص ?.

خـذ الوردة وشمهـاا !!!.

كييف شميت الورده و انتا ما عندك منخااااار 

قبل كم يوم نشرت عالفيس بوك عن هالعبه اللي معظمنا لعبها بطفولته 

وكان تعليقي انو  يا باااااااااااااااااااااااااي ما ازنخنا كاينين :)

الحقيقه انّا ما كنا زنخين...و زي ما علّق واحد من الاصدقاء

"بس أحلى إشي والواحد صغير راحة البال ! إشي ما بيرجع للأسف :( "

تذكرت ايام زمان و احلى الاوقات و طريقة تفكيرنا و العابنا اكيد في العاب كتير مشتركة بطفولتنا كلنا, الطابة و السبع حجار...الجلول....عالي واطي...طماية \استغمايه.....وايش اسمها هديك اللعبة اللي كان واحد ينط على رجل وحده و يلحق الباقيين؟؟؟ 

اكيد بتختلف الاسماء بس المبدأ كان واحد.

امبارح اخوي ودّى  سيارته عالصيانه الشهرية و طلعنا كلنا بسيارتي, مرة اخوي و بناته قعدو بالمقعد الخلفي لانه ما في مقاعد السيارة و بدها تسيطر عليهم, حطتلهم الحزام و مشينا, و احنا ماشيين كل ما نيجي على لفّة يحكو بنات اخوي "ويييييييييييييييييييييييي" و يميلو على بعض :) حششنا ضحك انا و اخوي تذكرنا ايام زمان لمّا كنا نعملها لهالحركه وكيف نصير نحسبها لوين بدنا نلف و نجتمع على الجهه التانيه و بس يلف بابا كلنا "وييييييييييييييييي" ويا ويله اللي عالطرف.

قبل هالمره حكينا لمرة اخوي عن هالشي و طلعو همه كمان كاينين يلعبوها :)

ايام حلوه كتيركانت, كل ما كبرنا كل ما خضنا تجارب جديده و واجهنا مشاكل اكبر بتزيد و بتكبّر بهمومنا و بتزيد افكارنا, و احنا صغار يمكن كان عنّا مشاكل و هموم ,على قدنا اكيد ,ولكن برضه بضل هم و كنّا نواجه مخاوف و مشاكل,بس الفرق انّا كنّا ابسط و كنّا ننسى بسرعه, كانت مشاكلنا تنحل اما احنا نحلها او اهلنا يحلولنا اياها بابتسامه او بضمه و احيانا بمحاضره و مرات قرصة دان, كنّا ما نوصل الغرفه الا واحنا ناسيين كل اللي صار, هلأ مش عارفه قلوبنا قسيت ولا ذاكرتنا قويت, بطلنا ننسى و صرنا نراكم و نراكم, بطلنا نسامح و صار السواد يكبر بقلوبنا, مش عارفه مشكلتنا بالحياة واللي بنواجهه ويلا مشكلتنا احنا وطريقة تفكيرنا؟؟؟

 كل شي بنوقف عنده و بهزنا كتير و بكسر ظهرنا فورا, بنبالغ بردود افعالنا ويلا مصايب الحياة بطلت تنحمل؟؟؟

كتير افكار ببالي هالايام و كتير براجع مواقف هزتني و غيرتني, اكيد راح نتغير, بنكبر و عقلنا بنضج و تحليلنا للامور بصير اعمق و بزياده بنغوص فيه مرات, بس مشكلتنا او مشكلتي اني بوقف, و بفقد اجزاء من نفسي مع كل وقفه و بعدين بكمل, قبل هالمره حكيت عن النصيحه اللي انحكتلي بان الانسان الا ما يفقد اشي من نفسه بكل مرحله و المفروض بدل ما نوقف وندور على الاشي اللي خسرناه و نحاول نرجعه, نفكر باللي لسا باقي و نستمر و نحافظ عليه, قررت اعمل هيك بوقتها و اكيد القرار اسهل من التنفيذ, بس هلأ اجا وقت التنفيذ, خلص بكفي كلام و بدي امشي و بدي احافظ عاللي عندي و اكتشف اشياء جديده عندي و اشتغل عليها و اخليها تطفو عالوجه و امشي فيها لقدام وما اتفرج لورا ابدا ابدا اطلاقا مطلقا ان شاء الله.

كالعاده ببدا بمكان و بنتهي بمكان ما اله دخل بس هاد اللي اجاكم :)

مساكم ورد وفل اصدقائي