![](https://blogger.googleusercontent.com/img/b/R29vZ2xl/AVvXsEj1Lwdsw14fqnRdRG9HEjJXqREO7eP0_VryVtIzkSm-gu_FLpg3tL37tN81Iq8Hwb3xDwxrr8STHqe3BV-UJ7p3T2exxQ5GHX62E0UuD6okAgXuOlvoRpJ-1FmhxV5DzAN38oUArmXuhLpj/s400/nooon.jpg)
اول ما وصلني عرض الشغل بالامارت احترت كتير , استخرت واستشرت و الحمد لله ربنا يسرلي الجيّه هون, من ضمن اللي استشرتهم بنات خالتي واللي زي خواتي , بنات خالتي 2 تؤم اكبر من ب 4 شهور, و احنا من واحنا صغار تؤم روح افكارنا وتصرفاتنا وحده, بنشبه بعض كتير و قلوبنا من الصغر مجتمعه, حكيت لوحده فيهم شو بدي اعمل لو انا مسافرة و وحده فيكم خطبت؟؟؟ كيف ما راح احضر الخطبه ويمكن ما احضر العرس, حكتلي هلأ لو وحده فينا خطبت و تزوجت فهي راح تبعد و فرصه تلاقينا هاي اللي شبه يومي راح تلغى تماما هاد غير انه ممكن تسافر برّه البلد," فامشي بحياتك و لا توقفي لحتى تستني حياة ناس تانيه تمشي" و سبحان الله, اليوم كتب كتاب بنت خالتي, قلبي من جوا قد مهو فرحان قد مهو مقهور لاني مش معها بس لمّا حكيت معها اباركلها خف الوجع لاني سمعت السعاده بصوتها, بنت خالتي راح تتزوج بشهر 1 و تسافر عالكويت مع عريس المستقبل :)
الحوار التاني كان مع زوجة اخوي, الفترة الماضيه لمّا تأزمت مشاعيري حكتلي اشيين جد عالوجع بالنسبة الي, والدتها متوفيه من وهي بالجامعه فحكتلي انها تعلمت من وقتها ان ما بصير اي انسان يعتمد على شخص معين و يستمد منه القوه و الاطمئنان, ما بصير يكون شخص سبب حياتنا لانّا بس تفقده - لا سمح الله - بتكون الصدمه و الالم مضاعف, والاشي التاني حكتلي ان مشكلتنا بس نخسر شي بشخصيتنا بنضل واقفين على اطلاله و نضل ندور عليه و بدنا نرجعه, بس تحس ان في شي جواك تغير لازم تستمر لانك لسا بتمتلك اشياء اكتر و ما بصير نضيّع الوقت و احنا نفكر باللي خسرناه و كيف كنا و كيف صرنا, انا مثلا و لاسباب عدّه مريت فيها فقدت قدرة اني اضحك من كل قلبي, في اشي جواي مات ما بعرف اوصفه بالحكي, هلأ انا غير عن نفسي قبل 5 سنين واللي بعرفني منيح بلاحظ هالشي, لكن من وقت ما حكيت مع زوجة اخوي قررت فعلا اتطلع بس لقدام وما اتطلع لورا بالمره, و احافظ عاللي عندي و ارضى فيه زي ما هو.
الحوار الثالث... امبارح وانا بالشغل اتصل فيي شخص بدائرة تانيه بدو شغل من عنّا, احنا طبعا كل حكينا عالتلفونات انجليزي , رديت و من حكيه حسيت انه عربي فبديت احكي معه عربي, مين معي حكيت الاسم و علّق نفس التعليق اللي بسمعه من كل شخص قابلته لهلأ بس يسمع اسمي, المهم حكالي شو بده و اللي طلبه مش انا اللي بعمله , اخدت المعلومات و تبرعت اني امررها لزميلي, بعدين بدا الحوار...
"انت من وين؟؟"
"من الاردن"
"لا وانا كمان من الاردن..انا فلان الفلاني"
"من وين بالاردن"
" من عمان"
"من وين بعمان"
" انا اصلي من فلسطين"
" اهاااا هاد اللي بدي اوصله...من وين بفلسطين"
"من يافا"
" انا من ...." بصراحه مش متذكره من وين حكالي :$
"سكان وين بعمان"
حكيتله وين ساكنه و طلع ساكن بطبربور
"شكلك مولوده هون"
" لا مواليد الاردن وجديد اجيت"
" كم الك هون"
"5 شهور"
" انا الي 7 سنين"
" اهلا وسهلا...اوك اذا بمرق طلبك لزميلي و بأكد عليه"
" انت متزوجه"
O_o
" لأ"
" طيب انت كبيره!!"
O_O هو 34 بس بعطي على 25 و مؤدبة وخلوقه و اقدّس الحياة الزوجيه... طبعا هالحكي بعقلي و ردي كان
" ااااوووووووكي راح امرر طلبك لزميلي و ءاكد عليه انه يمشي المعامله"
" ههههههههه طيب ماشي و شكرا الك يا ....."
انو بالله عليك ...ليش هيك العالم بطلت تعرف تحكي؟؟؟ انت كبيره؟؟؟ انت كبيره؟؟؟؟ هيك السؤال
اليوم حكا معي مره تانيه لكن على مين, كشرتي بينت عنده من جوا التلفون ...مش طايقته يا جماعه شو اعمل بحالي :)
25 التعليقات :
الأول
الله يتمملها بخير و ما تنحرمو من بعض ثلاثتكم
و الدنيا ما تشغلكم عن بعض
---
الثاني
ما حأعلق هون
يممممممكن أبعتلك إيميل
---
الثالث
كلمة وحدة
MEN!
امييين يا رب
تسلم يا رب...عقبال عند هيّوم ما تفرح بتخرجها و تشوفها احلى عروس :)
بانتظار الايميل
شفت بالله عليك....كنت بدي احكيله الملافظ سعد بس حبيت انهي الحوار باقل الخسائر بالارواح :)
كبيره!
انا داري ياختي الزوق ما هو مقطوع ولا لخمه ولا مش عارفه:)
المهم هاد البوست ذكرني ببوستات لما كنتي في الأردن:)
ومزبوط حكي مرة أخوكي، الحياة بتمشي لقدام ما ترجع لورا فانبسطي بحياتك:)
اشتقنالك
بالنسبه لآخر حوار .. كان لازم تردي عليه :
"أكيد بالفهم أكبر منك بكتير"
عن جد الناس أجناس
تحياتي
الحوار الأول
كأنه كان قصدك استشرت بنات خالتي مش استخرتهم :)
الله يتمملها على خير وربنا يجمعك مع كل اللي بتحبيهم على خير وهداة بال يا رب
الحوار الثاني
مزبوط كلامها للأسف, لأنه الوقعة لا سمح الله راح تكون بتوجع اكثر بكثير, بذكر مرة حكيتها وبعيدها, اذا كان الواحد مركن على غيره عشان (السعادة, هداة البال, الراحة, الاطمئنان, الخ) فهو بكون زي اللي بلعب قمار, لأنه بأي لحظة وممكن لسبب تافه جدا يروح هالواحد او تروح كل الاسباب اللي كنت مركن عليه فيها
العب وحدك تيجي راضي - من هاي الناحية
زي ما تفضلتي, الشغلتين مرتبطات سوا, لما الواحد ينكسر اشي جوّاه , جد عمره ما بزبط, بس الشطارة انه ما دامه انكسر لأي سبب , انه نرميه وما نوقّف على اطلاله, اريح لراسك , الحكي سه بعرف, بس بظل التطبيق عندك :)
الاشي الثالث
كان حكيتيله : الست الوالدة شو اخبارها؟
او حكيتيله : اذا انت هيك , كييييييييييييييف حالك؟؟؟؟
jad ma 2dert ma ad7ak, specially lama wselt lal a5er..
awal she 3ashn bnt 5altek, allah yhanneha w ytammemlha 3a 5er.. w ya rabby nfr7 feke 3n 2areb :)
w mne7 eno e5tasarte m3o, coz shklo 7abebe ye7ke kter kaman :D
allah yhawen 3alike el '3orbe
مرحبا
أنابس عندي سؤال و تعليق
السؤال بيقول...شو هوه التعليق اللي بتسمعيه دايما عن اسمك؟
التعليق على موضوع انه الناس ما بتعرف تحكي...يا ستي هاذا الزلمة مؤدب يعتبر بالنسبة للأشكال اللي عندي...طنشي و الحمار جاوبيه على قد حمرنته
الحياة أحيانا بتكون قاسية و أحيانا بنفتقد أشياء كتير بشخصياتنا بس كمان بنكتسب أشياء جديدة...العبرة في اكتساب الصفات الحميدة ان شاء الله و اللي بتخلينا نقدر نستمر...لأنه المسؤوليات رح تزيد مع استمرار الحياة
بتمنالك التوفيق بحياتك
نظرة الرجال التقليديّة التي لن تتغيّر تجاه المرأة وعمرها بالذات
فلتحمدي الله أنه لم يسألك عن تكملة السيرة الذاتيّة لكِ كما حصل معك في صالون السيدات ذات مرّة
نهارك سعيد ومبروك عودة المدونة للطريق السريع
بالنسبة للحوارات
لاتعليق ....يكفي نحن بحاجة لمسدس
I loved this post! Reminded me of your old posts!
I agree, life is going, it won't wait any of us, we need to keep going :)
عن جد
بتفاجأ فيكِ مرات
معقول بعدك بتضايقي من هيك شغلات؟
انا بعرف انه اللي بيعيش بهالبلد سنة واحدة فقط .... بيتعود على اكثر من هيك ...بديش اقول اكثر من هيك
انا بحس ان سبب تقدم الكثيرين في هذه البلد هو تحديهم لكلمات الاحباط
احنا الام لما بدها تحكي مع ابنها بتقوله روح الله لا يوفقك يا البعيد
.....
صديقتي العزيزة ويسبر
عليك ان تتعودي على ان تتجاهلي الكثير مما تسمعي وان لا تحاولي ان تقنعي نفسك ان تلك الحالات ...حالات خاصة ويمكن علاجها او تطويرها
إنسي......إنسي
الله يرضى عليكِ ويسعدك
ألف مبروك لبنت خالتك :) الله يتمملها على خير يا رب :) و عقبالك يا قمرة :)
و فرصة اقعدي فترات طويلة مع مرت اخوكي والله ان كلامها رهيب حبيتها انا :) و شكلي انا بدي اتعرف عليها قريب ان شاء الله :)
بالنسبة لاخر حوار فبدك تتعودي على هيك شي و اسخم في الامارات هاد انا شفته مؤدب بالمقارنة من الهيباب اللي شفته :) بدي احكيلك موقف و احكمي لحالك
مرة واحد حكى معي شغل يعني رح الاخ عجبه الصوت فما لاقيته الا طب تاني يوم عندي بالمكتب :S
ما علينا طبعا عرفني على حاله و حكى شوي معي بالشغل و بعدها بحكيلي بصراحة الصوت احلى كتير من الصورة و سحب حاله و راح :S
بصراحة انا بالاول بلمت بس بعديها صرت ضحك على الموقف و طنشت :D بدك اكتر من هيك زناخة :D
تعودي على التطنيش هون :) و الله يوفقك و يسعدك يارب قريبا جدا :)
صباح الفل يا بطه
اول شي ما عرفنا الاموره اللي فوق من وين ؟؟؟ما شاء الله على ضحكتها وشعراتها بيجننوا!!!
طالعه لعمتها مثلاً؟؟؟
تاني شي مبروك لبنت خالتك والله يوفقها ويسعدها ونعم لا توقفي حياتك لتستني حياة حدا تاني...ما حد بيعلم بالغيب الا رب الغيب...وهذا بينطبق على الحوار التاني ايضاً...والله لا يحرمنا من احبابنا جميعاً ..لكن الحياة بتستمر بالاخر ....شئنا ام ابينا...رضينا وللا ما رضينا...عجبنا وللا ما عجبنا.
اخر شي....ليش تحكي معه بالعربي من الاول؟؟؟
اختصري من الاول الله يرضى عليكِ...اختصري هالحوارات اللي عارفه نتيجتها من قبل ما تبدا...ترا الواحد مش ناقصه وما عاد فيه يتحمل .
سلام ويسبر،
حبيت هالبوست كتير عن جد زي لما كنت تكتبي من قبل..
و حبيت كمان كتيير كلام بنت خالتك" لا توقفي و تستني حياة الناس التانية تمشي"
معها حق والله
و كمان كلام زوجة أخوك ، فعلا هاي شغلة بحاول أقنع نفسي فيها دايما أني ما أخلي شخص هو كل حياتي ( طبعا المقصود ماما ) لأني كتير بحبها و لأنو للأسف الحياة ما إلها أمان ..كل شي ممكن يتغير فجأة...
أما الفهمان الي معك بالشغل ، فهو فهمان يعني هيك عقلاته عقدو ،و هلقد "فهمتو" يعني ...... بعين الله!
ويسبر كيفك :)
الله يخليكم لبعض ثلاثتكم ويارب تحضرين فرحها بدل كتب كتابها
وزجة اخوك كلامها جدا مقنع وهذا رأيي الخاص بعد , ما احب اطالع لورا لأني عارفه انه بيوجع بعض الأحيان
واخر شي عن تلفون الشغل مع الرجال لاتعليق ؟!!!؟
مياسي
لا هو الذوق انعدم شكله والله اعلم, يعني الشب ما حس حاله غلطان...او يمكن فهمني اني كبيره ومستحيه احكي :$ بتعرفيش كيف بفكرو هالعالم
هو كان فشّة قلب زي ايام زمان, المشكله عندي قصص عن الشغل بلاوي بس كل قصه ببين فيها وين بشتغل بالزلط و بيني و بينك بدناش ننتشر و ننكشف عالاخر :)
انا اكتر يا قمر ...ان شاء الله بركي شفناكم على خير :)
أم محمد
اهلا وسهلا فيكي نورتيني :)
هو بيني و بينك اجا كتير ردود ببالي بس حبيت اختصر و اخلي الموضوع يمشي على خير :)
مساءك سعيد
LUNAR
شكرا على التنبيه وتم التصويب :) اكيد استشرت
امييييييييييين يا رب.... الله يهنيها يا رب
المشكله نها هاي مشاعر ما بتقدر تتحكم فيها, يعني مش قرار و بتقرره و بتتغير ولكن اكيد بدك تقنع حالك لتكون صدمات الحياة اخف
الله لا يبلينا يا رب
الحوار الثالث انا كنت نقطه وراح احكيله كييييييييييييييييف حالك انت...بس بيني و بينك حكيت خلينا رسمي وبلاش ناخد على بعض :)
Lily
shofty el malafez bellah 3aleky ....3alam 3'arebeh...
Ameen ya rab..teslamy ya amar w 3o2balek 2eza lessa mesh metzawjeh :)
Amen ya rab....zaman ma bayyanty ya amar, dayman 6amnene 3an 2a5barek :)
مواطنون بلا حدود
اهلا وسهلا
بما انّا في منطقة التعليقات فبننتقل للتعليق فورا :)
والله وبعد ما قرأت تعليق ليو اكتشفت ان معك حق 100% كمان ... جد العالم بطلت تعرف تحكي او ان التدبيش طبيعي عندها
فعلا ...انا بالخمس شهور الماضيه مع انها قليله نسبيا و طويلة جدا بالنسبة الي كتير اشياء تغير بشخصيتي و بطريقة تفكيري و بنظرتي وحسابي للامور....الغربه صحيح الها اثر سلبي و لكن اكيد الها اثر ايجابي بالمقابل
تسلم يا رب...ما حكيتلنا شو قررتو ؟؟؟ يعني نحكيلك ابو زينه؟؟
Black Rain
غيرعن موضوع العمر و قصصه مع انه في عليه تحفظات ولكن طرح الموضوع و اختيار الالفاظ هو السيء هو اللي صدمني بزياده
اهاااااااااااااا صالون السيدات :)...لا تتصرو سعادتي بس اعرف ان في حد بقرأ القديم من تدويناتي :)
شكرا لمتابعتك و لتواجدك :)
ثائر
نهارك ومساءك اسعد صديقي :)
الله يبارك بعمرك..الموقف كان مواقف ايام الطريق السريع لهيك رجع و ان شاء الله يبقى
هههههههههههه ... في كل مرحله بحاجه لمسدس شكلنا
Susu
Suuuuuus i miss u a lot ya amar....how r u and how is every thing with u???
Maybe because this conversation returned so many old memories to me, I wrote with the same old way :D
We need and we have to go on...inshallah never to face such a case to forse our selves to go on
Jum3a mubarakeh ya amar
يوسف
تخيل و بعد كل العشرطعشر موقف اللي تعرضتلهم لسا بتفاجأ و بتضايق من هالعالم :)
مشكلتنا بانتقاء الالفاظ, يعني لو بكل بساطه حكالي بقدر اعرف كم عمرك, بحكيله و انتهى و كل واحد فينا مرتاح ومبسوط ولكن دج الكلام غريب على الاذن حتى :$
" لا تحاولي ان تقنعي نفسك ان تلك الحالات ...حالات خاصة ويمكن علاجها او تطوير"
جميله جدا هالجمله ... و بتلخص المشكله
المفروض انسى تماما
امين يا رب...ويرضى عليك و عنّك و يسعدك على طول
LioneSS
اهلا اهلا بالطبيّخات :)
الله يبارك بعمرك يا قمر...اللهم امين و يفرحنا باخواتها و بكل الصبايا يا رب
ههههه رهيبة مرت اخوي, بطلع منها شغلات دائما عالوجع
ان شاء الله تتعرفو على بعض قريب....انا حكيتلها عنك وعن اليوم الحلو اللي قضيناه مع بعض
مهي بتعرف عن المدونه :)
الله يعينك عاللي شفتيه و سمعتيه....جد انو زنخ و بايخ هالانسان
بس مرات بحمد ربنا و بحس لان ربنا بحبنا بخليهم يحكو و يخبصو بالحكي لنوقف مكانا وما نمشي ولا نتزحزح بالموضوع
هيك شكله...انسي و طنشي
تسلميلي يا قمر...
نيسانة التدوين
يا صباح الورد والياسمين:)
اخيرا حد عبّر الصوره :)
هاي نووووووون "نور" بنت اخوي, بس بهاي الصوره حتى حالها ما بتشبه ههههه مش عارفه كيف ضحكت هالضحكه حبيبتي , وهي بالاصل بتشبه بهبهوها...وفي مقولة اخرى بباها, ولكن الشعر عندها فاهم الجاذبيه غلط و بضل واقف و طالع لفوق :)
نغشه و بالنغاشه طالعه لعمتها ....ال يعني :)
الله يبارك فيكي يا رب....اللهم امين ربنا يخليلنا اياهم كلهم وما يحرمنا منهم
لاحقينا وين ما نروح هالعالم... انا حكيت منا و فينا الشب بس طلع زين اصلي...بوجّع الراس و بقزز :)
Lily2
انا اتلخبطت :$
هلأ انتبهت ان ليلي اللي فوق الها مدونه ....فكرتكم نفس الشخص ...ويلا انتو نفس الشخص :$
لخبطيطا الوضع عندي
اهلا وسهلا فيكم انتو التنتين
و اشتقتلك يا قمر :)
بالزبط هو الحوار كان عن ماما..الله يخليلياياها هي وبابا و يخليلكم كل احبابكم يا رب
هههههه عجبني التحليل....منطقي جاد وما بطلعلي الومه بالمررررررررررررررررررره :)
الله يعن شو بدنا نعمل
White Freedom
اهلا يا قمر...انا الحمد لله بخير :)
اشتقنالك يا قمر
تسلمي يا رب..اللهم امين
المشكله انك ما بتقدري تتحكمي بعواطفك ومشاعرك :$
هههههه هو لا تعليق بكفي و بوفي بالمسبة للموقف :)
مساءك فل وياسمين
وجمعه مباركه للجميع
White Freedom
اهلا يا قمر...انا الحمد لله بخير :)
اشتقنالك يا قمر
تسلمي يا رب..اللهم امين
المشكله انك ما بتقدري تتحكمي بعواطفك ومشاعرك :$
هههههه هو لا تعليق بكفي و بوفي بالمسبة للموقف :)
مساءك فل وياسمين
وجمعه مباركه للجميع
لما ماعرفت اوصل لمدونتك اتدايقت فكرتك سكرتيها.. بس الحمدلله رجعت لقيتها..
اولا مبروك لبنت خالتك ربنا يتمملها ع خير ويرزقك ويرزق اخواتها الازواج الصالحين يارب
ثانيا.. حبيت كلام زوجة اخوكي ..سبحان الله كيف الحياه فعلا ما بتوقف لعند شخص رغم انه عنجد بنكون مركنين عليه بكل اشي بامور حياتنا..
اما ثالثا.. مش عارفه شو هالناس الغريبه هاي.. الله يعينك على هالنقلات
اما الصوره فبلييييز لاتحكوا عن الشعر اللي رافض الجاذبيه وماشي عكسها عندي عينه هيك والتانيه شكلها مش افضل حالا.. بس المهم انها اموره ربنا يحميلكم ياها ويحفظها من كل سوء
Ro$e
Ro$e
اهلا يا قمر
زمااان هالقمر ما بان :)
الدومين صار فيه مشكله فرجّعت المدونه للعنوان القديم لحين اصلاح المشاكل :)
الله يبارك بعمرك يا رب ..اللهم امين
الله لا يحرمنا منهم يا رب :$
ثالثا...موعوده انا بهيك ناسات
ههههههههههههه بتعاني من الموضوع شكلك....حبيبتي انولدت و شعرها واقف نور و هلأ اعطيها نص ساعه بعد الحمام كله بستنفر :)
إرسال تعليق