A late Happy Birth Day

في ناس بمرو بحياتنا بالوقت و الظروف المناسبه و اللي بغيرو فينا و بغيرو من نظرتنا للاشياء
اللي بخلو نظرتنا لامور الحياة بمختلف نواحيها اكثر تعمقا
اللي بخلونا نوقف شوي كمتفرجين على حياتنا و احداثها لنلاقي الحلول بتفكير اكثر عقلاني
قليل ما نلاقي شخص بحياتنا يجمع الكل على محبته و تقديره
قليل ما نلاقي انسان يجتمع الكل على تقديره و احترامه
قليل ما نلاقي انسان يحاكي عقول الجميع مع اختلاف الفروقات العمريه
وبنفس الوقت يتربع في قلوب الجميع بدون استأذان

مساؤك و صباحك
ي... ياسمين بلدي
و... ورد اقحواني
س... سنابل قمح فلسطينيه
ف... فل و نرجس

صديقي يوسف..مسائك مشرق
كل عام وانت بالف خير
كل عام وانت منور بينا
كل عام و تبقالنا الاخ و الاب و الصديق العزيز على قلوبنا جميعا

**************************

بعتذر عن التأخر بالرد على التعليقات و التأخر عن قراءة مدوناتكم
بسبب وجود الاهل هون :) الاقامة ببيت اخوي اللي النت عنده بتفرفط الروح هاد في حاله صار مجال نفتح اللاب توب.... حتى هالتدوينه مش طالع اي شي من الخيارات لازبط شكل الصفحه او احط لنك , بعتذر مرّه تانيه و بنفس الوقت بشكر النت اللي زبط اليوم لاعرف انه عيد ميلاد صديقنا يوسف لاعبر عن سعادتي بتواجده بينا
http://yosefstranger.blogspot.com/
Happy Birthday And Many Happy Returns My Friend :)

اخر اخباري 4 :)

نعم...نعم...نعم...

اخيييييييييييييييييييييرا

و بعد المحاولة الثالثه

تم و بحمد الله تعالى

ان

ان

أأأأأأأأأأأأأن

اخدت الرخصه يا جماعه

استأجرت سياره و رايحه جاي عالخط

دبي - العين - دبي :)

الله يسعد ال GPS واللي اخترعه

اي نعم مرات بتتركني وصلت للمخرج و بصير اترجاها تحكي كلمه

و هي ما في غير كلمة ... Recalculating :(

بس باخر كل مشوار بنتصالح

برجع بشكرها و بتأسف على الصراخ للي صرخته عليها و احنا بالطريق :)

ملاحظه ع الهامش

هالبوست جكارة ببعض جماعه بنادو بسحب رخص النساء...واخد بالك حضرتك!!!

قلبي انقلب على قلبي

قلبي انقلب على قلبي والعقل يقف على الحياد

القلب يريدك و القلب لا يطيقك و المعركة في إحتداد

آه ما اوجع نبضات قلب تخفق باتضاد

هذه تحبك وتلك مقتها لجرحك في ازدياد

هذه لعالم الاحلام ترفعني و تحلق بي كريشة بلا عتاد

و تلك بواقعي تضربني بسياط لوم النفس بلا هواد

While in Jordan...1

بما اني راح اضل رايحه جاي على خط دبي - عمان - دبي فحبيت اشاركم بالمشاهدات و القصص اللي صارت معي و اللي راح تصير معي مستقبلا

نبدا باول شي و اخر شي بنشوفه بعمان وقت السفر ...المطار

انا غير مطارنا شفت مطار دبي, الشارقه و مطار البحرين, كل واحد فيهم عند الجوازات في كاونتر لاهل البلد و كاونتر للاجانب, الاجانب هون العربي و الاجنبي, و بالخليج في كاونتر للي جايين من دول مجلس التعاون الخليجي, بكل المطارات بكون طابور الدول الاخرى مليان و بكونو 2 او 3 و اهل البلد بكون تقريبا فاضي الا عنّا , بكونو كاونترات الدول الاجنبيه فاضي يا دوب 5 او 6 اللي واقفين و احنا دور طويل عريض على نفس الكاونتر, مع انه في 3 كاونترز للاردنيين بس دائما و ابدا واحد اللي شغال و دائما و ابدا بيجي واحد على اساس منظم بقطع الدور من مكان ما في بنت اموره من غير هدوم و و بخليها توقف اول الدور الجديد و دائما و ابدا بكون واقفه قبل هالبنت بكم واحد و بضل اخر الدور....يااااا سبحان الله انا معكم ان طبيعي وحده محجبه و روحها مفرفطه و على وجهها كشرة اللهم احفظنا مستحيل حد يختارها لتكون اول الدور بس برضه مش عاجبني الوضع :)

المهم ما بنكر ان للحظه تمنيت اكون من الدول الاجنبيه لاخلص و امشي من الهلاك و في شب حكاها " يا ريتني اجنبي يا عمي لاخلص" .... خلصنا و مشينا و وصلنا للدرج الكهربائي....ايش العفن اللي احنا فيه؟!؟!؟ هلأ بما انه في مطار جديد كبير بدو يفتتح بعد كم من .... - املأ الفراغ لانه مش باينله وقت - بيعني اهمال المطار اللي بنستخدمه و بنستقبل فيه الزورا و السياح؟؟

الدرج من كتر الوساخه لونه اسود ومش امبن الحديد اللي فيه, و بهزّ و بدقّر مع كل درجه بمشيها من الدبق الرهيب اللي عليه, الدربزين اشي مخزي, طبقات طبقات الوسخ عليه, الموضوع مش معضله يا اخوانا, الموضوع شويه مي و صابون و واحد من اللي بنظفو بساعه بخليه يضوي.

اوك نزلنا تحت, لا في ضو و لا في اوكسجين, كل مطارات العالم بتكون انارتها قويه , وبتذكر مطارنا من زمان واحنا صغار كتير الضو قوي و نور بزياده و خصوصي ان بوقتها كان ما في نيون بالبيوت و الاضاءه كلها لونها على احمر\ برتقالي اما بالمطار الدنيا بيضاااا, هلأ عتمه بشكل بكئب, و نفس مشكله الحزام, حاليا صارو 2 و برضه لسا بتوه وين تروح, لا في مونيتور مكتوب عليه ولا في واحد تسأله, و اللي بشتغلو بس بنزلو الشنط وبكوموهم فوق بعض بدون ترتيب ولا بشكل عالقليله تروح تدور و تشوف التاغ الك ويلا لأ, بعد ساعة انتظار, واحد من الاخوان المسافرين و اللي كان واقف جنب شنطه نسخه عن شنطتي اخد شنطه عن الحزام نسخه عنها برضه و مشي, طلع الاخ ماخدها وبس شاف انها مش اله مش يرجعها عالحزام, لأ تركها جنبه و قعد يستنى شنطته :$

نيجي للطريق و اللي الحمد لله صار اهون و ان شاء الله بعد هالشتويه ما يطلع تزفيته مثل باقي شوارعنا الجديده و تقبّع شقف الزفته كأنهم بلاطات مش زفته.

الكراج.... جد جد جد مش قادرة استوعب انهم معينين واحد يوقف على باب الكراج عالاله ياخد الورقه و يتطلع على ساعته و يكتب الساعه عالورقه و يكبس كبيسه ليفتح القاطع, ونفس الحركه عالسيارة اللي وراها ولانه دقيق الشب برجع بتطلع عالساعه كأنه يعني مشي نص ساعه من قبل دقيقه بس اتطلع عالساعه للسيارة اللي قبلنا وهلم جر, وبحكولك ليش ازمه بالكراجات, انو بالله عليكم!!!! شو بالنسبة للتكنولوجيا؟؟؟ الهم اكثر من سنه على هالوضع, زبطوها لهالآله ابووووووووووووووس ايديكم.

ملاحظه ع الهامش

للي بدو يحكيلي ما الك كم شهر برّة البلد و بدك تنتقدي و صرتي ناسيه و هالقصص بحكيله يا ريت تقرأ هالبوست تحت عنوان " مطارنا العزيز" و هالبوست تحت عنوان " المطار...يعني و بعدين" و اللي كتبتهم من زمان و انا لساتني بالاردن.

و دمتم :)

فائدة جديده للشاي الاخضر

وحدة راحت عند الدكتور ووجها مورّم وبقع نيليّة وزرقة!!

قالها الدكتور :

خير شو في شو صايرلك ؟

قالتلو :

يا دكتور , كل ما بيجي جوزي من الدوام بيبلش ضرب فيي..

وما بيخلي مطرح من جسمي إلا ما بيضربني فيه..!

قالها :

غريب بس أنا بعرف جوزك منيح وبعرف انه عاقل وما بيعمل هيك ..!!

قالتلو:

متل ما بحكيلك يا دكتور!!

قالها :

طيب خدي هالدوا , معمول من الشاي الأخضر وشوية أعشاب مفيدة كتير,

وبس تعرفي أنو جوزك صار بده يوصل على البيت,

إغلي شوي منو وضلك عم تتمضمضي منو قد ما تقدري ..

وحتى لو وصل جوزك ضللك عم تتمضمضي ..

وارجعي لعندي بعد شي أسبوعين لنشوف النتيجة!

بعد أسبوعين رجعت ووجها نضيف وما في آثار ضرب بالمرة!!

قلها الدكتور:

شو عملتي؟

قالت

:

عملت متل ما قلتللي بالضبط..

بس أحس إن زوجي راجع ... أغلي شوي..

واتمضمض فيهن شي نص ساعة زيادة..!

قلها :

شفتي شلون هاي النتيجة,

لو بتضلك مسكرة تمك وما تبربري لمن بيوصل جوزك من الشغل

ما كان صار اللي صار من قبل !!!

قال شاي أخضر قال

حيداشر...حيداشر...الفين و حيداشر :)

اليوم بالتاريخ ما اله اي معنى...بس احنا بنحب نلهي حالنا و نلتهي باي شي, و لكن اليوم بالتارخ بعنيلي اشي, اليوم بدي اعترف لنفسي و قدامكم كلكم اني اكتشفت اني بحب حياتي :) الاجازه هاي فتّحت عيوني على اشياء حوالي و نعم كتيره موجوده بحياتي مش عارفه شو اللي كان مغمم على قلبي و عيوني من مدّه ومخليني ما اطلع من حاله ال.... مش عارفه شو الاقيلها اسم او وصف, بس اعتقد انكم كلكم اللي بتعرفوني منيح فاهمين عن شو بحكي

بالاجازه هاي عرفت ان كل الناس ماشيه وانا اللي وقفت, بحبهم و بحبوني ...بشتقلهم و بشتاقولي ...ما بقدر اعيش بدونهم وما بقدرو يعيشو بدوني بس استمرو و انا اللي وقفت...

حتى وانا بحكي القصص اللي صارت معي والمواقف اكتشفت اني صار عندي صديقات و اصدقاء كتير بالشغل وانا مش حاسه ولا منتبهه, كنت افكر اني لسا ما كوّنت صداقات حقيقيه و لكن القصص اثبتت عكس هاد, اللي ما برضى واللي ما بترضى ياكلو الا بس ياخدوني معهم علشان ما اكل لحالي, واللي ما بترضى تروّح الا بس اروّح معها..واللي ما بطلب اكل لحاله الا بس يسألني شو بدي...واللي وقفّت باص الشغل و نزلت من الباص وما رضيت تركب الا بس وصلت...واللي ساعدوني بموضوع النقل بالسكن...واللي و اللي واللي.. كلّه ما كنت شايفته ولا حاسه فيه...كيف مش عارفه!!!

فاااااا ابتداءا من هلأ...لا نكد بعد اليوم... الحياه تفاؤل تفاؤل تفاؤل و تعلّم و استفاده من اي تجربة جديده بدون ما اقبل اي خسائر

من اليوم لا ذكريات و لا حاضر ولا مستقبل لازم يغيرني الا للافضل

حق نفسي عليّ اني ما اوقف ولا اغمض و اتغاضى حق نفسي علي اني امشي وما اوقف.

الحمد لله رب العالمين على جميع نعمه اللي انعمها علي ...اللي بعرفها و اللي ما بعرفها ....والحمد لله على نعمة وجودكم انتو بحياتي اللي زهقّتكم من الملل اللي كنت فيه و استحملتوني :) بس خلص ان شاء الله مرحله و مشيت

مسائكم سعيد :)

اسئلة تطرح نفسها ارضا...كلاكيت تاني مرّة

بما اني مش فاضيه و الافكار خالصه من عندي من كترها فقررت اني اعيد نشر بوستات قديمه من ايام ما كان دمي خفيف و بالي فاضي :)

ليش سائقي التكاسي ما برتاح قلبهم الا بس يحطو خط المسرب بنص السياره؟؟

ليش سائقي التكاسي بس يكون معهم راكب, بصيرو مناح ما شاء الله و بمرئو كل اللي جاي من طريق فرعيه,وطيبين و بمشو بطيء و بحترمو قانون السير, يعني ببدو يوقفو السياره بس يشوفو الاشاره اللي بعد كيلو ها...هاا بدت تصفّر؟؟؟؟

ليش واحنا واقفين صف طويييييييييييييييل عالاشاره بتصير الاشاره خضرا وما بنتحرك ولا نقطه و بس تصير حمرا بتبدا السيارات تمشي؟؟؟

ليش لما تحترم نفسك وما تزمر للي بقطع الشارع, علشام حرام ينصرع من صوت الزامرو بصير يتطلع عليك و بحط ايديه بجيابو و بمشي و بقطع الشارع على اقل من مهله؟؟؟؟

ليش لازم اذا واحد بحكي تلفون خلوي بالشارع او بالمطعم لازم كلنا نسمع موضوع المكالمه من اولها لاخرها؟؟؟

ليش الاشياء بتكون قدام عيونا و مزهقيتنا ومقززيتنا واحنا النا 100 سنه مش مستخدمينها, وبس نحتاجها بتختفي, وبننسى وين حطيناها؟؟؟واذا كبيناها,تاني يوم بالزبط بنحتاجها ؟؟؟

ليش صرنا بس نحكي علبناني - مع انها لهجه حلوه وخصوصا من نورا :) - و بس نطعوج بالكلام و احنا بنحكيه و نحكيه بطريقه غريبه من مناخيرنا - مش من راس مناخيرنا انه تكبّر لا نحكيه بخنف - هيك بنكون يااااااي شو كول و راقيين و متتورين - متطورين - وبس نحكي على طبيعتنا بنصير ياااااي شو فلجر و حفرتل؟؟؟

ليش بس تكون منيح مع الناس, بتصير اشي عادي بحياتهم و آخر اشي بفكرو فيك و بمشاعرك, وكأنك اشي روتيني بحياتهم, و اللي بكون يسيء الهم بكون مهم و بحملو هم مشاعره و احاسيسه؟؟؟

ليش اول ما يجيني فلوس زياده لازم يخرب اشي بالسياره :"( ؟؟

ليش دايما بنضل نأجل تنظيف الشبابيك بركي شتت الدنيا, و بس نيأس و انظفهم تاني يوم بتشتي سبحان الله؟

شو كمان...شو كمان...كان في بالي اشياء اكتر بس مش متزكريتهم...بس اتزكر برد اضيف...انتو زكروني ايش كمان؟؟

من الاسئلة اللي ضافوها اصدقائي بالتعليقات

ليش كل مرّة بغسل السيارة بتشتي؟؟

ليش بنظل نستنى بالعطله و بس تيجي بنزهق من اول يوم؟؟

ليش البنت بعد ما تنخطب بتحلى بعين الناس؟؟؟

اخر اخباري 3 :)

الله يسعد صباحكم و كل اوقاتكم يا رب

كل عام والجميع بالف خير و ربنا يعيده علينا بالخير و البركه دائما

العيد يعني اللمه ...يعني صلاة العيد...يعني الاهل ...فااااا انا متأكده ان نوركم معبي الاردن ولكن ما تنكرو ان نور الاردن زاد نقطه امبارح الساعه 10:30 الصبح :) يس قرقرت اني اخد اجازه و اعيّد مع الاهل, الحمد لله رب العالمين الاكور تيسرت و تسهلّت مع انه ممنوع اجازات بموسم الحج والعيد و لكن ما بعرف كيف وافقولي :)

اتصلت باهلي وحكيتلهم انا عازمه حالي عالفطور اول يوم العيد فاحسبو حسابي :)

عنّا عاده انّا بنروح نشتري الشوكلت و الحلو الساعه 12 بالليل قبل العيد بيوم, ومع ان مظاهر الاحتفال بالعيد غير السنه علشان خالو الله يرحمه مش معنا ولكن ماما اصرّت ان كل المظاهر تكون موجوده بسبب تواجدي معهم حتى ولو كانت النا احنا :)

كل عام وانتو بالف خير مرّه تانيه :)

اه صحيح...موضوع الرخصه ما زال مستمرا ...ادعولي اخلص منه :")

و اه صحيح مره تانيه...اخواني واصدقائي...اليوم يوم عيدياتنا بس للتذكير يعني :)

Revenge...

كنّا بنحكي انا واخواني قبل كم يوم عن كيفيه مقتل القذافي و اللي صار معه, كيف مسكوه و كيف قتلوه و عن انه كان لازم يعامل معاملة الاسرى, و كدين اسلامي بنادو فيه الثوار مع مقولة "الله اكبر" مع كل حركه, حكينا انه كان الاولى مراعاة حقوق الاسير اللي علمنا اياها الدين الاسلامي , وبعدين حكينا انّا لازم ما ننسى برضه العذاب اللي تعذبه هالشعب وكم واحد منهم فقد عزيز وغالي و كم واحد منهم تشرد و اهين بسبب الحاكم والحكم اللي كان.

صفن اخوي و بحكيلنا, بتعرفو اكبر مخاوفي بالدنيا, ان اي اذى يصيب بناتي, يعني بتخيل لو شخص اذاهم شيء بسيط شو ممكن اعمل فيه, حكا ان اخر شي بكون بدي اياه هو اني اقتله, بدي اعذبه و افش غليلي بتعذيبه وما اظن يشفى, حكالنا انه كتير بحلم وبخطرله اشياء و مواقف بعيد الشر ممكن تحصل لوحده من بناته و انه فكر منيح بطريقة التعذيب....

راح يبدا بتقطيع ايدين ورجلين الشخص و يحرقهم بزيت مغلي همه والجروح حتى يلتئم الجرح و لحتى يفقد امكانيه ارجاع الاعضاء, و بعديها يبدا بالتعذيب... فترة صمت طويله سادت الجلسه و اخوي كان بحكي بجدّيه تامه... اخوي انسان متدين بأمن بالقضاء والقدر و مش انسان متهور او عنده اي ميول اجراميه

كلامه نابع من خوف ابوي تام....اب خايف على بناته من شي ما صار وان شاء الله بعمره ما بصير....فما بالكم باباء و امهات و اخوان واخوات شافو بعيونهم وعايشو قتل و تعذيب و سجن وظلم و اهانه.وفجأة الجاني صار بين ايديهم...هل راح يتحكمو بردود افعالهم بس يمسكو الظالم؟؟؟

مع اني مع مقولة... لا تبالغ بالعقاب فيصبح المخطئ شهيدا...ولكنني لا استطيع ان احكم على ردود الافعال اللي صارت هل كانت صواب ام خطأ.

اشتقت اليّ

تائهه ما بين الوجوه والاشياء

ابحث عن شخص يطمئنني

او عن شيء يسكن مشاعر التوهان في داخلي

قلّبت الوجوه و تفحصت الاماكن والاشياء

ليس ذلك ولا ذاك

ليس هذا ولا هنا

بحثت و دققت بلا امل

اليوم فقط عرفت عمن و عن ماذا ابحث

اليوم فقد تأكدت انني لم اجد ما ابحث عنه

بالطبع لم اجده

كيف ظننت ان اجد نفسي في وجوه الاخرين!!

Blue...Blue...Blue

محاولة لتغيير مود المدونة وصاحبتها

و بناءا على طلب الاصدقاء بتنظيف المدونه من الغبره

و شكوتهم من اضطرارهم للبس كمامات بس يجو عالمدونه

بما انها شبه مهجورة هالفتره

وبما انه العيد قرّب "كل عام وانتو بالف خير يا رب" وهيك هيك لا بد من التعزيلات

اليكم الثيم الجديد بلوني المفضل :)

BLUE :D

ملاحظه ع الهامش....

بعرف انكم ما بدكم تذكير ....ال 10 الاوائل من ذو الحجة بدو يا جماعه ...ربنا يقدرنا على صيامهم واللي ما بقدر يااااا ريت ما يضيّع صوم يوم وقفة عرفة وطبعا ....لا تنسوني من الدعاء :)

ذلك الشعور...

ماذا يحصل عندما اراك؟؟؟

ينتابني ذلك الشعور .....اتعرفه؟؟؟

عندما تشعر بان كل شيء حولك يصمت ويختفي...

حتى جسدك يتلاشى ولا يبقى سوا

قلب ينبض بالم و رعبه مستحبّه

واصوات انفاس تتعالى

و نورك انت

ومن ثم هدوء

حوارات

اول ما وصلني عرض الشغل بالامارت احترت كتير , استخرت واستشرت و الحمد لله ربنا يسرلي الجيّه هون, من ضمن اللي استشرتهم بنات خالتي واللي زي خواتي , بنات خالتي 2 تؤم اكبر من ب 4 شهور, و احنا من واحنا صغار تؤم روح افكارنا وتصرفاتنا وحده, بنشبه بعض كتير و قلوبنا من الصغر مجتمعه, حكيت لوحده فيهم شو بدي اعمل لو انا مسافرة و وحده فيكم خطبت؟؟؟ كيف ما راح احضر الخطبه ويمكن ما احضر العرس, حكتلي هلأ لو وحده فينا خطبت و تزوجت فهي راح تبعد و فرصه تلاقينا هاي اللي شبه يومي راح تلغى تماما هاد غير انه ممكن تسافر برّه البلد," فامشي بحياتك و لا توقفي لحتى تستني حياة ناس تانيه تمشي" و سبحان الله, اليوم كتب كتاب بنت خالتي, قلبي من جوا قد مهو فرحان قد مهو مقهور لاني مش معها بس لمّا حكيت معها اباركلها خف الوجع لاني سمعت السعاده بصوتها, بنت خالتي راح تتزوج بشهر 1 و تسافر عالكويت مع عريس المستقبل :)

الحوار التاني كان مع زوجة اخوي, الفترة الماضيه لمّا تأزمت مشاعيري حكتلي اشيين جد عالوجع بالنسبة الي, والدتها متوفيه من وهي بالجامعه فحكتلي انها تعلمت من وقتها ان ما بصير اي انسان يعتمد على شخص معين و يستمد منه القوه و الاطمئنان, ما بصير يكون شخص سبب حياتنا لانّا بس تفقده - لا سمح الله - بتكون الصدمه و الالم مضاعف, والاشي التاني حكتلي ان مشكلتنا بس نخسر شي بشخصيتنا بنضل واقفين على اطلاله و نضل ندور عليه و بدنا نرجعه, بس تحس ان في شي جواك تغير لازم تستمر لانك لسا بتمتلك اشياء اكتر و ما بصير نضيّع الوقت و احنا نفكر باللي خسرناه و كيف كنا و كيف صرنا, انا مثلا و لاسباب عدّه مريت فيها فقدت قدرة اني اضحك من كل قلبي, في اشي جواي مات ما بعرف اوصفه بالحكي, هلأ انا غير عن نفسي قبل 5 سنين واللي بعرفني منيح بلاحظ هالشي, لكن من وقت ما حكيت مع زوجة اخوي قررت فعلا اتطلع بس لقدام وما اتطلع لورا بالمره, و احافظ عاللي عندي و ارضى فيه زي ما هو.

الحوار الثالث... امبارح وانا بالشغل اتصل فيي شخص بدائرة تانيه بدو شغل من عنّا, احنا طبعا كل حكينا عالتلفونات انجليزي , رديت و من حكيه حسيت انه عربي فبديت احكي معه عربي, مين معي حكيت الاسم و علّق نفس التعليق اللي بسمعه من كل شخص قابلته لهلأ بس يسمع اسمي, المهم حكالي شو بده و اللي طلبه مش انا اللي بعمله , اخدت المعلومات و تبرعت اني امررها لزميلي, بعدين بدا الحوار...

"انت من وين؟؟"

"من الاردن"

"لا وانا كمان من الاردن..انا فلان الفلاني"

"من وين بالاردن"

" من عمان"

"من وين بعمان"

" انا اصلي من فلسطين"

" اهاااا هاد اللي بدي اوصله...من وين بفلسطين"

"من يافا"

" انا من ...." بصراحه مش متذكره من وين حكالي :$

"سكان وين بعمان"

حكيتله وين ساكنه و طلع ساكن بطبربور

"شكلك مولوده هون"

" لا مواليد الاردن وجديد اجيت"

" كم الك هون"

"5 شهور"

" انا الي 7 سنين"

" اهلا وسهلا...اوك اذا بمرق طلبك لزميلي و بأكد عليه"

" انت متزوجه"

O_o

" لأ"

" طيب انت كبيره!!"

O_O هو 34 بس بعطي على 25 و مؤدبة وخلوقه و اقدّس الحياة الزوجيه... طبعا هالحكي بعقلي و ردي كان

" ااااوووووووكي راح امرر طلبك لزميلي و ءاكد عليه انه يمشي المعامله"

" ههههههههه طيب ماشي و شكرا الك يا ....."

انو بالله عليك ...ليش هيك العالم بطلت تعرف تحكي؟؟؟ انت كبيره؟؟؟ انت كبيره؟؟؟؟ هيك السؤال

اليوم حكا معي مره تانيه لكن على مين, كشرتي بينت عنده من جوا التلفون ...مش طايقته يا جماعه شو اعمل بحالي :)

مثل الحلم

المصدر

مرات بحس كأنا واقفين على جبل عالي , كلنا واقفين هناك وما حد بحكي مع حد بس بنراقب حالنا اللي تحت الجبل, بنشوف الحاضر من فوق, بنشوف حالنا ماشيين بالحاضر اللي المفروض عايشينه, بعضنا خلص كأنهم مشيو عن هالخطوه و مشيو بحاضرهم يكملوه للمستقبل و بضل الجسد يراقب من فوق, ومرات بكون زي الحلم و فجأة بنصحى على حالنا واقفين فوق الجبل, زي كأن روحنا اللي شفناها ماشيه وعايشه حياتها تحت الجبل بترجع لجسدنا فوق الجبل لتبدا حاضر جديد, زي الحلم باول النوم, بتكون صاحي ومش صاحي و تفكيرك و خيالك راح لمكان تاني وانت عارف حالك نايم عالتخت, بتبدا تعيش الحدث\الحلم و فجأه بترجع لواقعك انك عالتخت.

مش عارفه اعبّر...فاهمين علي؟؟؟

اذا لأ...فبسيطه لاني انا مرات مبطله افهم على حالي :)

مسائكم سعيد

ملاحظه ع الهامش.... البوست مش نابع من شعور كئيب...بالعكس انا كتيييير مبسوطه والحمد لله :)

من هنا و هناك ...دبي

عندي عشرطعشر اشي احكي عنه بين لطيف وجميل ومكئب وحزين

فالافضل انّي اسكت :)

صديقنا جراد اله فتره بصور اشياء ايجابيه بامريكا

مش صعبة التحقيق بس شوية تفكير

وخصوصا في مصلحة المواطن

و انا لاحظت ان هون بدبي في من هالتفكير

فحبيت اشارككم في شوية اشياءات

و الباقي عالطريق :)

خلونا بالمفيد.... خلونا بالصور

مش عارفه اذا هالشي موجود بكل كراجات المولات او لأ

لانه بالعاده ما بكون في مكان فاضي

مصف لسيارات العائلات اللي معهم اطفالجنب المدخل و جنب مصفات ذوي الاحتياجات الخاصه

بكل مولات دبي :)

هدول بمحطة المترو

بغض النظر عن الترجمه...خلونا بالعقوبة :)

Even Bins Get Hungry....Feed me to one when you're done :)

واخيرا وليس اخرا.... لازم ارجع للاردن :)

متذكرين هدول؟؟؟؟

اخوي صورلي اياهم و بعتلي الصور

وبابا بحكيلي انسي الزريعه...صارت مقر رسمي للحمام يحطو فيه البيض :)

لسا يااااااا دوب شغلت الموبايل بالاردن و هلّت المسجات زي الكذب

10 ترحيب و 10 سمّعني و 15 دعايات اشي غريب هالزين

انا عندي حنين

تصوير صديقي مؤيد حباس....المصدر

دائما ما احببت مشهد المقعد الفارغ, للبعض المقعد الفارغ يعني الوحده و العزلة ولكنه مشهد يبعث البهجه في قلبي, مشهد يعني لي الذكريات المضحكه والمبكيه احيانا, ذكرى الم ام ذكرى سعاده لا فرق جميعها تزيد من دقات القلب, تسارع دقات القلب ارتجاف القلب و القشعريره اللذيذه التي تسري في الجسد مع كل ذكرى .

قد لا تكون ذكريات عشتها بنفسي , ولكن دائما ما يخطر في بالي كم الذكريات التي مرّت على ذلك المقعد عبر السنين, كم من جسد منهك تعبا او حبا او الما او سعادة القى بنفسه على ذلك المقعد, كم من جسد عانق ذلك المقعد شوقا او فرحا او بحثا عن الامان, كم من حرف كتب عليه وكم من اسم نحت على حوافه...

انظر اليه و ذكرياتي التي لم اعشها تبدأ في التحرك داخل ارشيف عقلي, تعرفون ذلك الشعور عندما ترى نفسك مع من تحب ومن لم تلتقي بعد , شعور مجهول لشخص مجهول ولكنه يتحرك داخلنا, او ربما لا تعرفونه و يكون شيء اضافي في قائمتي الخاصه , لا لابد انكم تعرفونه,انه ذلك الشعور الذي تحدثت عنه فيروز ب "انا عندي حنين...ما بعرف لمين" , لكل شخص فينا احلامه التي لم يعشها, في مخيلته تقطن ذكريات و مواقف لم تحصل, ليس ضرورا ان يكون بطلها المعشوق الضال, قد تكون ذكرى مع اب او ام, صديق او اخ...طفل لم يصل بعد.

اه كم احسد ذلك المقعد, كم اتمنى ان اسمع تلك الهمسات التي همست حوله, كم اتمنى ان اقرأ الاسطر التي كتبتها اعين المارين عليه, كم اتمنى ان ارى احلام ذلك العجوز الذي اتخذه سريرا لنصف ساعه, كم اتمنى ان اسمع شكوى تلك الفتاه, واسمع ضحكات ذلك الطفل.

منح الحقوق

زي ما كلكم بتعرفو اني لا محلله سياسيه و لا دارسه بواقع و اقتصاد و بنيه تحتيه و رأسماليه اي دوله, هالمصطلحات واصلتني بمفهومها الطبيعي الواضح و ما ببحث و بتعمق بمعانيها و اثارها, ولكن عندي عقل مغلبني مرات و مريحني مرات اقل ,و عندي مدونه لحتى اريح راسي واكتب اللي بدور بعقلي لحتى ارتاح, ممكن حكيي يتعب بعض الناس و لكن لكل واحد حريته بالتعبير عن افكاره الشخصيه و فرض الرأي مستحيل يجي بالعافيه.

هالمقدمه اللي ما الها معنى يمكن لحتى ابدا بموضوعي الرئيسي , فكرة ان اي شخص بهالدنيا يتمنن على اي شخص تاني باني اتنازلت و اتعاطفت و قررت اني اعطيك ابسط حقوق الك بالحياه واللي كنت مانعها عنك مزاجا و خوفا على مصالحي و كسبب لانشغالك عن امور الحياة التانيه اللي مانعها عنك.

همه بصراحه خبرين قرأتهم رفعو ضغطي اليوم انا ما بعلّق على سياسة دول و قرارات مسؤولين انا بعلق كأنسانه بسيطه من "حقها" انها تفهم اللي بصير

الخبر الاول تحت عنوان "السعوديه :منح المرأة حق المشاركة السياسية "

كيف الحقوق بتصير منحه ؟؟؟

ما فهمت ولا راح افهم.... كيف بنحط شروط متى و وين و باي شي تمنح الحقوق؟؟؟ وليش لازم نهلل ونفرح ونبارك جهود مثل هيك قرارات ؟؟؟

و الخبر الثاني اللي قهرني جد

"10 جلدات لسيدة قادت سيارتها.. والأمن يحتجز ناشطة بتهمة «السواقة»"

موضوع منع المرأه السعوديه انها تسوق موضوع بسيط حبّو يعملو شائك لتلتهي العالم فيه, بصير الست تطلع مع السائق اللي مش معروف شو اصله ولا فصله بس انها تسوق لحالها....هاد فجأه صار منافي للدين والشرع و الحدود الاخلاقيه والعادات والتقاليد والاعراف ومرفوض, واللي بتقوم في مثل هالعمل البغيض "تجلد" !!!!

انا بعرف ان الجلد عباره عن تنفيذ حد او قصاص, من وين جابوها هاي بالشرع انها اذا ساقت بتنجلد؟؟؟

ما بدي احكي حقوق انسانيه ولا حقوق بشر...وين رفقا بالقوارير و ين عقاب الظالم وين مخافة رب العالمين؟؟؟

باي شرع واي قانون واي عادات وتقاليد واي اعراف تسمح ان انسانه تجلد او تحبس او تعاقب على ممارسة بسيطه مثل السواقه؟؟؟

اغتيال شخصيتو O_o...ده انجليزي ده يا مرسي

"كل من أشاع أو عزا أو نسب دون وجه حق إلى أحد الأشخاص أو ساهم في ذلك بأي وسيلة علنية كانت أياً من أفعال الفساد المنصوص عليها في المادة 5 من هذا القانون أدى إلى الإساءة لسمعته أو المس بكرامته أو اغتيال شخصيته عوقب بغرامة لا تقل عن ثلاثين ألف دينار ولا تزيد على ستين ألف دينار".

دون وجه حق و فهمناها

يعني اذا انت مسكين وعلى قدّك و ما في اسم وراك يدعم موقفك القانوني و يثبت صحّة كلامك و اذا انت موظف غلبان و شفت الكبار بسرقو قدّام عيونك و سمعت و عرفت و شهدت واقعه الفساد

بتضلك ساكت و ما تتخنفس

اساءة لسمعته و المس بكرامته

برضه بمشيها بالرغم من اقتناعي ان اي شخص فاسد بتكون

"كرامه "و "سمعه"

عباره عن كلمات ذات معنى مبهم و احيانا مضحك بالنسبه الهم

يعني جيب اي "فاسد" -بدون ذكر اسماء لسا ما حوشنا اشي لندفع غرامات - و احكيله كرامه بوقع عالارض من الضحك!!!

نيجي هلأ للكلام الكبير

يغتال شخصيته .....أن أن أأأأأأأأأأأأأأأأأأن

ما بدي احكي عن الخبر ولا كيف بدهم يخلو الانسان اللي بفش قلبه و بفش قلب اللي حواليه بشوية كم كلمه يعبّر فيهم قبل ما ينجلط ويموت و تموت الكلمه بحلقه و على اطراف قلمه....ما بدي احكي على رأي اخوي مش عارفه قبل كم سنه يوم مباره كرة السله بين سوريا و الاردن و الحكم المصري

" مبيوعه...مبيوعه"

ولا بدي احكي كيف الكل اكل هوا بس لانه ذكر اسم اللي ما يتسمى هداك اللي سافر يتعالج برّه و طلع معالي فلان و علّان و الراس الكبيره علتان موافقين و راضيين و متراضيين مسبقا

اه ..اه ولا راح احط اسم

المهم ...لا ما بدي احكي عن كل هاد

اللي بدي احكيه

ان مهما فكرنا انّا صرنا ملمين بلغتنا العربيه سبحان الله نوّابنا , قصدي معالي و عطوفات و معاطيف و اعطاف و سياده و ....اي مصطلح هز ذنب , بتحفونا بكل ما هو جديد و بنمّو قدراتنا اللغويه و بزيدو من مورود اللغّه و بخدرو ادمغتنا باجمل العبارات

الله يسامحكم.... دائما ظالمينهم

هيهم بدل ما تنحبس منك اله خلوك تدفع اللي فوقك و تحتك و تموت بين افراد عائلتك .

اه اللي فوقك و تحتك لانه اي شخص يحتكم يدفع مبلغ 30000- 60000 غرامه هو فاسد اساسا :)

مع اعتذاري المسبق لاي شخص "اغتلت شخصيتو "

و سلامتكم

اللهم اجعلنا من الصابرين

كل عائلة فيها الشخص اللي معتمد عليه في اوقات الازمات, الازمات الحزينه و الازمات المفرحه, شخص بتطلب مشورته في كل شي و حتى ولو بعدت عنه فتره بوقت الشده هو اول شي بخطر ببال العيله كمنقذ اكيد من هالورطه, هالشخص وفي اكثر من عائلة مش ضروري يكون اكبر فرد بالعائله, لا شخص سبحان الله بتحس انه هو اللي ممكن يحل المشكله و بكون ربنا واهبه طريقه و اسلوب وحكمه .

هالشخص بعيلتنا هو بابا الله يخليلي اياه يا رب و يطول بعمره, بابا الملجا لجميع افراد عائلته في المشاكل ابتداءا بمشاكل الصغار و المدارس و التدخين و الهروب من المدرسه وهالقصص انتهاءا بانه يكون المتحدث الرسمي في الجاهات هو يطلب العروس و هو اللي يعطي العروس بزواج كل اولاد و بنات عماتي وعمامي و حتى بوجود والدهم و اللي بنفسه يطلب من بابا يقوم بالمهمه الصعبه و بابا المصلح الاول و الملجأ الاول لمشاكل الازواج بعديها والمقرب لوجهات النظر بين اي اشخاص بينهم مشكله.

بيتنا كان بيت العائله وخصوصا ان تيتا الله يرحمها كانت ساكنه عنا, مع ان بابا مش الكبير تيتا اختارت انها تسكن معنا لانه سبحان الله قلبها كان حاسسها انه هو اكثر من يعتمد عليه, ومن وقت ما تزوجو بابا وماما بابا حكا لماما " كبير القوم خادمهم و انا كبير القوم بعيلتي" وكان بيتنا مفتوح للجميع بالافراح و بالمشاكل و باستقبال المغتربين و بالاصلاح و بكل شي.

عيلة ماما كان خالي - ترتيبه الثاني و مش الاكبر- هو المصلح و في لوقات غيابه و سفره لانهكان مقيم بلمارات كانت عيلة ماما تلجأ لبابا دائما و بعدين خالو رجع واستقر بالارن, خالو حياته كانت جدا صعبه ابتداءا بمرض والده و توليه مسؤوليه الصرف على جميع افراد العائلة وهو صغير مرورا بوفاة زوجته وهي عمرها 34 و ترتكه مع 6 بنات و 3 اولاد اكبرهم 17 سنه و اصغرهم سنتين وقرر ما يتزوج ويكرس حياته لاولاده و مرورا باصابة بسرطان الحنجره من اثر التدخين و استئصالها و التواصل مع الناس بواسطه جهاز مثبت مكان الاحبال الصوتيه.

خالو وبالرغم من كل هالامور ضلو قوي و بنحسة اقوى منا احنا الشباب وخصوصي بانه رياضي من الدرجه الاولى , ربى اولاده وبناته احسن تربيه, زوج معظمهم, حج و بناته كلهم بلبسو جلباب بارادتهم و كلهم ادو فريضع الحج, كان في مشكله بينه وبين وحده من خالاتي و الحمد لله ربنا يسر انهم يتصالحو بالعيد و وقتها كتبت عن فرحتي وفرحة العيله كلها بلمّة العيله مرة تانيه.

كل سنه خالو بسافر عند بناته المقيمين بامريكا كاجازه و اشي بخص الاقامه و الجرين كارد مش عارفة شو بالزبط و بنفس الوقت بعمل شيك اب كامل ليتطمن على صحته, السنه راح و قضى الوقت كله مع الاولاد و رجع عالاردن وبنفس اليوم تعب كتير, بالعاده خالو ما بشكي وما بعترف بانه متألم و لكن هالمره حكا و بطل قادر يقوم من السرير وبعد الفحوصات تبين ان خالو عنده سرطان ومنتشر في كل مكان بجسمه, العظم و الدم و المعده و.... و بدت حالته تسؤ بسرعه و بدت علامات الكبر تظهر عليه بشكل مخيف, وحتى انه صار ينسى كل شي, انه بالاردن ويلا بامريكا بالبيت ويلا بالمستشفى من اجا زاره قبل شوي و اخد المسكن ويلا لأ, و بعد تقريبا شهر توفى خالو :(

ربنا يسرلي اني انزل الاردن واشوفه بهالاربع ايام وازوره واكسب كلمة الله يرضى عليكي منه, الله يرحمك يا خالو و يدخلك فسيح جنانه و يبدلك بكل الم تألمته اجر وعافيه وحسنات يا رب و يجزيك على صبرك ويقينك بالله الجنان يا رب العالمين.

اخر اخباري 2 :)

كتير اشياء و كتير قصص و كتير احداث صارت الفترة الماضيه خليني احكيلكم اهمها

اولا زيارة الاردن و لمدة 4 ايام :) من شهر 6 حجزت لانزل عالاردن في اجازتي الاربع ايام لانه رمضان من غير الاهل اكيد ما اله معنى, اتفقت مع اخوي اللي بالاردن و قررت افاجئ بابا وماما و لكن بعد نصيحة الجميع باني ما افاجئهم حكيت مع ماما وانا بالشارع اللي ورا البيت تماما و فعلا الكل كان معو حق, ما بصير نفاجئهم لانهم و بالرغم من اني خبرتهم قبلها بدقائق كانو مصدومين كتير و خصوصا بابا اللي جد خفت عليه, كان نايم و صحته ماما قبل ما اوصل بتحكيله " لمين مشتاق كتير" بحكيلها " لاولادي" حكتله " ولمين مشتاق اكتر شي فيهم" حكالها " ل... ويسبر" حكتله " طيب هيها شوي و بتيجي" :) الحمد لله ربنا بارك بهالاربع ايام و استغليت الفرصه و جددت الرخصه لانه اخذ الرخصه هي الخطوة اللي حاليا شغاله عليها :)

تاني شي وهو اني و بعد تجربة السكن مع حد قررت اني ما بدي الغرفة Single و بدي ستوديو لحالي , و الحمد لله بعد اخد وصد و نشافة ريق و طوش و مسح جوخ و مجاملات اخدت الاستوديو, لانه بما اني لا متزوجه ولا مخطوبة ما بطلعلي ستوديو و لكن ربنا يسرها الحمد لله, اخواني الله يخليلي اياهم و يسعدهم همه و مرتاتهم و اولادهم جهزولي معظم الاساسيات في البيت ومن يوم ما اجيت للامارات و لحد ما بديت انام بالاستوديو ما نمت بهالراحه و العمق اللي بنام فيهم.

مشاركة " الحمام" اجلّكم الله و البيت مع حد مفهومه للنظافه و للترتيب و للازعاج غير عنك كتييييييييييييييييييييييييييييييييييييييييييييييييييييييير صعبه :$

قبهيك بتكون Mission #1 accomplished :D و هيني شغاله بالمهمة التانيه واللي هي الرخصه و انتهاء مدة الرخصه الاولى هو اللي اخرّ الموضوع لانه طلع القانون اذا رخصتك خالصه تعتبر ما معك رخصه وتعامل معاملة اللي ما بعرف يسوق :)

و المهمه الثالثة الجديده هي اشتراك النت و اللي ان شاء الله قريبا جدا راح تحصل

رمضان كل ايام الاوف قضيتهم عند اخواني واول ايام العيد كنت مداومه و احتفلنا بالعيد انا واخواني تاني يوم, اجتمعنا و تغدينا سوا و وزعنا هدايا الصغار و بعدين اخوي وصلني عالشغل للشفت المسائي.

الحمد لله التأقلم على العيشة الجديده بتحسن مستمر و بديت استقر و شعور لوم النفس على جيتي هون يختفي , الانسجام بالشغل الجديد واستيعابه و تكوين صداقات جديده و من نوعيه جديده ومع جنسيات جديده مستمر و متطور

هاي اهم واخر اخباري اللي قدرت ارتبها حاليا.... في قصص كتيرة ومواقف كتيره ولكن مش عارفه اصيغهم تخيلو :( بطلت انطلق بالحكي زي قبل مش عارفه ليش

يلا فتره و بتمشي ان شاء الله

كل عام وانتو بالف خير و ربنا يعيده عالجميع بالخير رمضان طار اسرع من السنوات اللي قبل مش عارفه هل قلّة البركة بالوقت عقاب او انه ثواب انّا ما نحس بالتعب!!! الله اعلم و بنرجع نحكي" اللهم بلغنا رمضان"

نراكم قريبا ان شاء الله :)