Things I Like To Whisper About

Would You Hear Me Whispering

‏إظهار الرسائل ذات التسميات m7alyaaat. إظهار كافة الرسائل
‏إظهار الرسائل ذات التسميات m7alyaaat. إظهار كافة الرسائل

ما بعد الغربة (2)


بعد ما رجعت من دبي ارتحت  تقريبا شهر بالبيت و بعدين رجعت لشغلي القديم, المدير العام متغير و مديري المباشر متغير و الموظفين اللي بمديريتي نفسهم و زايد عليهم كم موظف و موظفه جداد منهم شخص منتقل من مديرية تانيه بقدر احكي و انا ضميري مرتاح تماما اني بكرهو, هاد لحاله اله قصه مخبرتكم عنها سابقا و راح اكتب بوست احط اللينك و اكمل القصه لاحقا - كيف بس التشويق لا رجعه بقوّة :)

المهم انا قبل كنت اعاني باني الوحيده اللي بتعرف اوراكل بالمديريه وشغلنا اساسي اوراكل و اكتشفت ان الوضع زي ما هو, البرامج اللي احتاجت لتعديل وقف الشغل عليها, رجعو للشغل اليدوي و الاوراق والتصوير, بدون مبالغه وانا من اللي كنت بالرغم اني اعاني مستحيل اتوقع اني بس اطلع يصير الوضع بهالسؤ بس الوضع تراجع كتير لدرجة انهم اضطرو يتعاقدو مع ناس من بره ليزبط الوضع شوي, وانا اللي كنت اعاني و اشكي ما حد تفرج فيي و لا قدّر شغلي وتعبي وهاد السبب الرئيسي اني طلعت اشتغل بره.

المهم من ضمن الشركات شركه انا بعرف موظفينها لاني كنت اخد عندهم كورسات و بعرفهم من ال 2004 يعني عشرة عمر, حافظينهم و حافظيني وركزو على هالنقطه, بعرفهم وبعرف عن عائلاتهم من كلامهم عنهم و همه بعرفو شخصيتي و طريقة تفكير و بعرفو معلومات عائلية و شخصيه بحدود طبعا العلاقة العمليه, اخواني بدبي , اني البنت الوحيده كلها معلومات في سياق الحديث او المواقف, زي مثلا الك اخت بتشتغل بشركه كذا كتير بتشبهك لا انا ما الي خوات, هيك يعني الكلام بخليك تفصح عن معلومات, المختصر -بعد كل هالحكي- انّا بنعرف بعض و مكونين فكرة عن بعض.

واحد من الموظفين لا اخفي اني كنت بفترتها معجبه باسلوبه بالشرح و شخصيته وخفة دمه, اكبر مني بالعمر ومتزوج و يحكيلنا عن بناته و كانت الكورسات عنده جدا ممتعه و اسلوبة بخلي الشخص مستحيل ينسى لانه كل شي مرتبط بموقف لطيف, طبعا ابدا ابدا ما عمري بينت اي شي من هالحكي لهالشخص و من 2004 ولغاية 2010 السنه اللي سافرت فيها كل تعاملنا كان عملي بحت, اتصالات دائمه بينا لكل عطل او مشكله بالداتا او السيرفر او سؤال او مساعده بامور الشغل وكل شي طبيعي.

لما رجعت من الامارات من اول اسبوع كان في اجتماع مع هالشركه بخصوص البرامج و المدير العام طلب اني احضره مع اني لسا ما بعرف شي عن طبيعه عالشغل بينا و بينهم, وفعلا حضرت و اجا هالموظف و مدير الشركه واتفاجأو بوجودي و رحبو فيي مع تعليقات المدير عن رجوعي للحكومه و يحكيلي اسبوع وراح تبدي تحكي "غلطه وندمان عليها" , الموظف متغير نحفان و مغير طريقه التمشيطه ومربي سكسوكه, من الاخر صار شكله افضل من قبل بقفزات, طول الوقت ساكت و يوزع ابتسامات انا ما فهمت منها اشي, خلص الاجتماع و ودعتهم و رجعت لمكتبي.

شوي وصلتني مسج من الموظف,بحكيلي انه سعيد جدا برجوعي وهلأ بقدرو يتعاملو مع حد بيفهم عليهم, رديت مسج شكر عاديه, تاني يوم الساعه 9 الصبح الموظف برن, كيفك و كيف حالك ونفس كلمات المسج, و وعدته اشوف البرامج ونضل عتواصل بخصوصه و سكرت الخط, بنفس اليوم الساعه 6 رجع اتصل فيي O.o وانا اساسا بخلص شغل عال 3 و بالصدفة كنت انا بره اخوي عازمني عالغدا, بسألني وينك حكيتله طبعا بره الشغل و اني باكل, بحكيلي الله يسامحه اخوكي لهلا مش مغديكي و الحكي خارج نطاق الشغل, سألته خير في شي ؟؟ بحكيلي لا بس حبيت امسي عليكي ....اعتذرت منه بلطف وحكيتله ان الاكل اجا و اذا في شي بخصوص الشغل يحكي معي وانا بالدوام.

بعدها بيوم اتصل عال 9 بسألني شربت قهوتي ويلا لسا و بحكيلي من الاخر انا لما شفتك بالاجتماع ما عرفت اركز ولا عرفت احكي, عن  فرحته بشوفتي و رجعتي وحكي غريب والشمس طلعه ملبتنجان,و هو يحكي وانا مصدومه,كيف بس تبطل تسمع و افكارك تروح فيك لمنطقة تانيه, مصدومه باني مستحيل يخطرلي انه هالشخص يكون من الناس اللي بتسلو و بخونو و بعملو علاقات, شخص كان كل مره يحكي عن عيلته وعن بناته, شخص انا بعرف زوجته لانها اجت عندي بمعامله وصرنا صحبه لفتره, وصل لموضوع انه بحب دائما يحكي معي وانه حس اني منزعجه بس حكا معي المسا, صحيت و بديت احكي, مسحت فيه الارض ادبيا لانه راح نضطر نشتغل مع بعض -وما زلنا بنشتغل و بنحكي مع بعض - و حكيتله اني ما بستقبل اي اتصال حتى لو كان من صاحبتي اذا بدها تحكي معي عن الشغل و انه ما يحكي معي الا بخصوص الشغل وخلال الدوام فقط و كان في اتفاق اني اخد دوره ريفرش لارجع اشتغل بسرعه عندهم هو اقترحها وبدون مقابل, حكيتله وبخصوص الدورة شكرا الكم انا بجيب كتب و هي النت عندي و البرامج و راح اتذكر لحالي .

تبرير الموقف من الجميع انه توقع اني تغيرت بسبب الغربه, توقع اني عقلي المسكر ما شاء الله ما شاء الله تفتح و ممكن اتجه لانحراف شوي, مع كم رأي بانها ممكن تكون ما يطلق عليه "مراهقه متأخره" ترافق سن ال 40 عند الرجال :$

ملاحظه ع الهامش
الموضوع مو ان ياي شو انا بجنن وكل العالم بتعجب فيي
الموضوع ان نفس الناس اللي بتعامل معها من 10 سنين وعارفتني وحافظه اسلوبي بالتعامل فكرو ان الغربه غيرت من اخلاقي واسلوب تفكيري وقناعاتي...وهالحادثه صارت مع اكتر من شخص بالشغل 


ما بعد الغربة (1)

عقلي ما بركب على عقلها



"ليش ما بتحبي فلانه؟"
"مش اني ما بحبها بس هيك عقلها ما بركب على عقلي"

جواب يختصر الكتير من الكلام و المواقف

لانها كل ما شافتني لازم تمقمق بوجهي لتلاقي الحبّة اللي حاطه عليها 10 كيلو ميك اب لاخفيها و تحكيلي " ييي ليش هيك وجهك؟؟؟من شو؟؟"

لانها كل ما انحفت تحكيلي  "ييي ليش هالقد نحفانه وجهك كتير متأثرمش حلو عليكي النحافة"

ولانها اذا زاد وزني نص كيلو بتحكيلي "شكلك ماخده راحتك بالاكل هالفتره!!" مع ضحكه مقززه

لانها لما نجتمع  بتحكيلي " احسن شي عملتيه انك مش متزوجه فعلا شو بدك بوجع الراس بلا زوج بلا هم بلا ولاد" وهيه مقعده بنتها بحضنها و بتلعب فيها و بتحكيلنا عن الموبايل اللي جابلها اياه زوجها على عيد ميلادها

لانها لما نجتمع بموقف تاني بتحكيلي " ليش لهلا ما تزوجتي؟؟؟ تعقدتي يعني؟؟؟ انت ليش ما بدك تتزوجي؟؟؟تلحلحيلك شوي"

لانها بس تشوفني لابسه لبس جديد بتحكيلي " يا عيني عالاحمر اللي بضوي شفته من بعد كيلو شكلك زي حبه البندوره " O.o

ولانها بس تشوفني لابسه لبس جديد بموقف تاني بتحكيلي " ليش لابسه هاللون مو لابقلك بالمره, منصحك....مسمرك....لون وجهك ابصر كيف..."


لانها كل ما شافت سيارتي بتحكيلي "لون سيارتك خطير مش طبيعي...اول مره بشوفوعلى سياره...ما بدك تغيري سيارتك؟؟"


ليش؟؟؟

اممم لان عقلي ما بركب على عقلها ....وبس  :)






دعاياتنا



كتير في افلام اجنبيه عن مصممين الدعايات, كيف بفكرو بكل جمله وكل كلمة وكيف التصميم ومين بدو يمثل و شو اللبس و الوضعيه, اساس حياتهم هو الفكرة الاساسية, وشركات بتربح وشركات بتخسر, موظفين بترقو و موظفين بخسرو وظائفهم بسبب هالكم دقيقة ومرات هالكم ثانية للاعلان, وما بننكر تأثير الاعلانات و كم الفلوس من وراها, مصاريف و مردود هائل, على شركة الاعلان وعلى اصحاب لمنتج.

بنيجي نطبق الموضوع على دعايات تلفزيوناتنا -وما راح احدد قناة معينه الكل فاهم عن مين بحكي - بتحس ان اللي فكر بالدعاية...لأ بتحس انه ما حد فكر اساسا, حرام ينحكى عن اللي بنشوفة فكرة اساسا, لا كلام زي العالم ولا صوت ولا وجه اعلاني, صراخ ورقص و صف كلام و طوش و بالاخر بتكتشف انها دعاية, بس لشو اكيد ما بتعرف لانك مصدوم بالمناظر, حتى بالدعايات بتطاوشو!!!
اذا اسمه زعل فطبيعي يتطاوشو o.O

لهيك الهدف الرئيسي من الدعايات  مش موجود عنّا,تعودنا على انها فقرة غير مرغوب فيها احيانا و فقرة اجت بوقتها احيانا اخرى, بالعاده  يا بنوطي التلفزيون يا بنعتبر فقرة الدعايات هي فرصه تتحرك من القعده, فرصة الزوج يتطلع بوجه زوجته, فرصة الام تحكي مع ابنها, فرصة تفك زنقة للي مزنوقين, فرصه تحكي تلفون او تشيك الفيسبوك - للي مش 24 ساعه شابكين - فرصة تلم كاسات الشاي او فناجين القهوه و تجليهم, فرصة  تصلي 4 ركعات العصر قبل ما يرجع المسلسل :$


سرقات




بالفترة الاخيرة كتر الكلام عن موضوع السرقات اللي بتصير ان كان بيوت او سيارات  او شنط, خالتي اللي عمرها بالثمانين بتحكيلنا انها بتعلق مفتاح البيت برقبتها لانه 2 من الجارات اللي بنفس العمر تقريبا و بياخدو معها درس الدين كل اسبوع  تعرضو لسرقة شنطهم و انسحبو عالارض و انضربو, فخوفا من انه يصير معها نفس الشي بتحكي عالقلقله اعرف ارجع عبيتي.

انا كنت احب المشي كتير وخصوصا ان مكان سكنّا مناسب للمشي نسبيا, ولكني فعلا صرت اخاف, كتير ناس بتهموني بالمبالغه و انه الدنيا امان, بس القصص اللي بنسمعها كتير بتخوف ومش مستعده اعرض نفسي لاي موقف لا سمح الله, ربنا يحمي الجميع وبعرف اللي ربنا كاتبله شي حيشوفو بس انا ماشيه على مبدأ اعقل وتوكل

من بين القصص الكثيره بخصوص السرقات اللي سمعتها في قصّه صدمتني كتير,حكاها موظف بشتغل مع قريبه الي عن اخته, مستأجره عند جماعه كويسين و علاقتها معهم ممتازة وبعتبروها زي بنتهم, اتصلت فيها الست صاحبة البيت بيوم و طلبت منها تنزل عندهم لتسشور شعر بنتهم الصغيره لانه عندها حفله , وفعلا نزلت و حطت مفتاح البيت على التسريحه قدامها وبدت تسشور شعر البنت, فجأه فقدت المفتاح ما لقته, دورت عليه بالغرفه ما اله اثر, قورا طلعت وراحت على شقتها و لقت الباب مفتوح و الصدمه الكبرى انها لقت الست صاحبة البيت حامله بايدها اشياء وطالعه من غرفة النوم, انصدمت المسكينه و صارت الست تترجاها ما تحكي لحد وخصوصا لزوها صاحب البيت, وصارت تحكيلها انه بخيل وما بصرف عليهم -عاساس حجه مقنعه للسرقه - و وعدتها انها راح ترجع الاشياء و راح تدفعلها حق اشياء سارقتها من قبل!!!  اخت الموظف كانت تفقد اشياء بس ما تفهم وين ممكن تروح وما حد بيدخل بيتها و غرفتها.

ما عرفت شو صار بعدها وشو قررت الست تعمل, بستنى اشوف قريبتي لاعرف منها :$
لو انا مكان هالست شو ممكن اتصرف, بسكت ويلا ببلغ عنها , ما قدر احدد بصراحه ....ربنا لا يبلينا بهيك قصص 




ما بعد الغربه (1)


كل غيبتي على بعضها لا تتجاوز السنتين, وخلال هالسنتين وبعد مرور اول ست شهور ممنوع الاجازات فيهم كنت تقريبا كل شهر اكون بالاردن الا الفترة اللي اهلي اجو همه فيها, بابا وماما اجو مره و ماما اجت مرتين لحالها, يعني لا تعتبر غربه كبيره و خاصه اني بدبي , صح ساكنه لحالي بسكن الشغل بس برضه اخواني التنين حولي همه وعائلاتهم, رغم كل هاد بتضل غربه و فيها ما فيها من وجع قلب و تساؤلات.

واحنا بالشغل بالاردن رحنا انا وموظفات المديريه واللي عددنا 6, لمكتب مدير بنته نجحت بالتوجيهي لنباركله بالنجاح و بنسأله عن خيارات الجامعات المطروحه,  تطرقو للغربه كواحد من الخيارات, وكانت نظرة الجميع و تعريفهم لغربة البنت هو "الحرية" و بمفهومها الغير سوي, حره بحالك بتتاخري بره بتروحي وبتيجي ...وغيره وغيره من تفسيرات ابعد ما تكون عن انها تكون تعريف للي عشته.

شرحتلهم شو هي الغربه اللي عشتها, و شو تأثيرها علي وعلى شخصيتي, كيف علمتني المسؤوليه واصدار القرارات وتحمل النتائج, كيف صقلت شخصيتي بالحلو و المر اللي واجهته, كيف انها علمتني الالتزام اكتر من قبل, كيف كنت اتحكم باوقاتي و استغلها, كيف بتعلمك تراقب نفسك اكثر و تعرف ان ما في حد راح يفهمك و يشرح تصرفاتك ويبررها زي لما تكون بين اهلك, كيف لازم دائما تبعث رسائل واضحه و صريحه لتوصل افكارك وخصوصا بين مجتمع من كل الجنسيات و الديانات والافكار والعادات والتقاليد, كيف بدي اتعامل بنفس اخلاقي و ديني مع زملائي الرومانيين و الروسيين و الاسبان و الاماراتيين والسوريين و المصريين و الفلبينيين و الهنود و و ...مختلف الخلفيات بدك توصللهم مين انت و شو انت, وكيف بدك تحكم على شخصياتهم و تتعرف على دواخلهم بنفسك وبدون مساعده من حد.

الغربه اشي كتير بشع و بوجع, اله نواحيه الحلوه و المره وال "حريّه"  بمفهومها الخطأ  ممكن تمارسها باي مكان حتى ببلدك لان مهما تغيرت اللي جوا من تربيه و اخلاق ودين المفروض انه ما بتغير ولا بختفي.

ملاحظه ع الهامش
بدي اكتب سلسله من المواقف و الاحداث و المحاضرات اللي سمعتها و شفتها و عشتها من وقت ما رجعت و بتخص موضوع الغربه ونظرة الناس الها...الله يعينكم علي ناوية ارجع و افش قلبي :)

إحباط...



من يوم ما رجعت عالشغل وانا ما بسمع غير شكاوي من الموظفات عن ازواجهم, وانا بطبعي تلقائيا و من الطبيعي اني اوقف بصف البنت, لكن من كتر الشكاوي بديت احاول اكون واقفه على الحياد و احاول اتفهم وجهة نظر الزوج, يعني خلينا واقعيين مش كل البنات ملائكه متلي , في النكد وفي الممل وفي الزنان, وفي مشاكل طبيعيه بالحياه وبكل بيت, في ضغط على الزوج و في وقت مناسب للنق وقت مناسب للهدوء و الصمت, لا انكر بما اني مش بموقعهم ما بقدر احكم بس برضه اشي ومنه.

 صار عندي كتير تردد باني اعرف الشخص منيح ويلا سيء من القصص اللي بسمعها, بتحكيلي البنت شكوى عن زوجها بعلملة كبيره و بتختمها بس ربنا الله هو منيح ما بدي تاخدي عنه فكرة سيئه, مرات بحكيلها لا يختي زوجك مو منيح ومرات اكتر بهدي النفوس غصب عني و باجي عحالي و بسكّت حالي بالعافيه..... بالزبط انا شو دخلني و ليش اخرب بينهم وهي ما عندها مشكله :)

الفترة هاي تغيرت الشكاوي, وماشاء الله تطورو الازواج وصارت اعمالهم على مستوى ماشاء الله ماشاء الله, حب وعلاقات و خيانات و زواج من تانيه وطلاق وقصص, الي فتره بسمع قصص بنصدم منها مش طبيعيين الازواج صايرين لاااا ما تحكو متحيزة و عنصريه الوضع غريب, قبل كم يوم دخلت صاحبتي المكتب الصبح و هي بتحكي تلفون و وجهها ما بتفسر, خفت يكون في مشاكل جديده عندها طلعت المشكله عند صاحبتها.

هاد يا اخوان صاحبتها  - وهي من جنسية عربيه غير اردنيه - اكتشفت علاقة بين زوجها و بين سلفتها, اه اه سلفتها اللي يعني مرة اخوه, يعني الاخ بخون اخوه عادي و بكل بساطه, ولما واجهته بالمسجات والمحادثات اللي قرأتها و اللي كلها مشاعر و حب و حكي زفت و بتبدا دائما ب "اخوي جنبك" -خوا ان شاء الله اللي يهفيك يا بعيد-  حكالها هاد حوار عادي وانت مكبره الموضوع, حكتله لو حكيت لاهلك عن هالشي شو بتتوقع تكون رده فعلهم, حكالها اصلا امي بتعرف.
الست ما كذبت خبر و حكت مع والدته و حكتلها عن اللي شافته و هو بس عرف عصب و ضربها و طلقها و طردها من البيت, هي بتتصل بصاحبتي تحكيلها انها ما الها حد هون و مش عارفه وين تروح و انها خايفه منه وبدها تروح عالمخفر تشكيه.

تخيلو انّا نوصل لزمن الاخ بخون اخوه, بعرف ان "الحمو الموت" وان دينا ما حكا عن الموضوع لولا انه كبير وممكن يحصل, بس انك تشوف واقع كتير الموضوع كبير, و من كثر العلاقات والفساد والخيانات و الكبائر اللي بتصير بتقرف الزواج كله و بتقرف الستات و بتقرف الرجال, اكيد ما بعمم وان خليت بليت بس المجاهرة وانتشار هالاشياء بخزي صار, قبل هالمره حكيت عن العلاقات بين الموظفين عنا بالشغل المتزوجين والمتزوجات وكأنه حقها او حقه للاخ والاخت يحبو و ينحبو و يعيشو هالمشاعر اللي المفروض تكون ساميه ومحصورة لاشخاص معينين و يوزعوها على اللي بستاهل وما بستاهل.

كتير الوضع مزري و كتير المشاكل منتشره, المشاكل الغريبه , بعرف البيوت اسرار وما في بيت بخلى من المشاكل بس اللي بسمعه هالايام اشي فوق العادي,  ظلم و افترى وتدني اخلاق و رمرمه جد اشي بحبط 


مقهورة :(




الاسبوع هاد كلّه عندي دورة  DBA  وADF اشياء بمجال شغلي,  من ال 12 لل5 , يعني بروح عالدورة من الشغل و خلال هال 3 ساعات وشوي بالشغل المدير بكون بدو يستغل كل دقيقه, و سبحان الله كل شي بنستناه من ردود و اجتماعات  و لجان  صار و بدو يصير بهالاسبوع, الدورة بدها تركيز وبرمجه و اشياء جديده , و المدرب الله يسعده بحاول يعطينا كل شي علشان مصلحتنا بس احنا بنكون مش مركزين بالاخر و في شباب بصيرو يغفّو, بعرف ان في ناس بداومو لل 6 و لل 7 يمكن , بس اكيد في بريك غدا و ما في تركيز لاخر لحظه, غير ان اللي متعود يرّوح عال 3 بتفرق معه ان يصير يحسب انه لو ما في دورة كان انا هلأ بالبيت :(

الدورة بالرابية و كالعاده بتلفي 100 مرّه لتلاقي مصف, صفيت السيارة بالمكان الوحيد الفاضي وعلى ترابيه ورا العمارة اللي فيها دورة, وانا مروحه لقيت سيارة مسنترة صفتها ورا سيارتي بالزبط و ما بقدر اروح ولا يمين ولا شمال وخصوصي ان قدام سيارتي في جبل تراب وانا ريتني ما ابلى باخلاصي ملزقه فيه علشان ال ما اسكر الشارع وراي, قام الاخ \الاخت لقوها مناسبو واحسن مكان للصف.

الدنيا طبعا اليوم مش برد الا شوي و قريب المغرب عادي بتصير صقيع, زمرت و لفيت عالمحلات اللي بالشارع, ولا بيّن صاحب هالسيارة, دورت عالنت على رقم شرطة السير لاني بعرف انك بتعطيهم رقم السياره بطلعو رقم موبايله من النظام و بتصلو فيه , الموظف اللي رد اخد كل المعلومات و حكالي هلأ بنحكي معه , مر ربع ساعه ولا في اي حركه و انا البرد بتخلل بعظامي من جوا, رجعت حكيت مع ادارة السير اول ما بديت بالحكي الموظف بحكيلي بخصوص السيارة النيسان حكيتله اه, حكالي هينا متابعينها , مر كمان عشر دقايق و لا في حد تحرك, صرت ازمر لحتى حد يطل يتحرك, بيّن واحد من عمارة من العمارات نزلت و سألته اذا بعرف صاحب السياره حكالي انها مو لموظف بس بدو يسأل بركي لضيف عندهم, رجعت عالسياره وانا برجف من البرد, شغلت التدفئة ولكن لان السياره بارده و واقفه ما دفيت بالمره.


 كمان 10 دقايق شرّف واحد و بدو يركب السياره, نزلت من سيارتي و حكيتلو " يعني لا الادب ولا الاخلاق ولا الدين بحكو ان صح تسكر على سيارات العالم نص ساعه وتتركهم يموتو من البرد"
بحكيلي انا هاي مو سيارتي و انا خدمة مني "الك " رحت جبت مفتاحها من صاحبها واذا بتضلك تحكي برجع المفتاح و خليكي تستني للصبح !!!!
انا طبعا بما اني بردانه فعقلي اساسا طاير ومع جملته هاي ما تبقى من فتيفتات عقل طارو كمان, وهبو طلع مني كلّي, و بديت وصلة الردح الشرقي الادبي طبعا

حكيتله ليش هي الدنيا سايبه, انا هلأ بدي احكي مع الشرطه تيجي, و بعدين انت ليش بتحملني جميله؟؟ جميلتك على اللي نزلت بداله او بدالها و بما انك انت تبرعت تيجي فبدك تسمع كل اللي عندي, و اللي صف هالسياره لا بفهم بالادب ولا بالاخلاق و لا عنده ذرة احساس و بدل ما تعتذرو كمان بتطلعو بالعالي
بحكيلي اجينا ما لقينا صفّه شو نعمل !!
حكيتله ولا شي بتقررو تصفوها ورا سيارات العالم و تروحو و لا تتركو خبر عند حد ولا تتركو رقم تلفون
بحكيلي انا حكيتلك هاي السياره مو الي و انا بس بدي احركها علشانك

حكيتله روح نادي صاحب السياره انا هلأ بدي احكي معه 
صار يحكيلي انت شو بدك مش بدك السياره تتحرك خلص هلأ بحركها
وفعلا ركب السياره و حركها وانا ركبت سيارتي و صفيتها جنب الرصيف و نزلت و حكيتله هلأ بدي اشوف صاحب السياره, مش انت بتحكيلي مو سيارتك وما بدك احكي معك, بدي اشوف صاحب السياره و احكيله الحكي اللي عندي
طبعا اختكم بالله صوتها بس تنفعل ما بعلى لأ بصير يرجرج و بصير رفيع و حاد - اشي محرج :$ 

الشب وقف عالباب و حكالي خلص يا اختي مش حركتي سيارتك

انا مسكت الموبايل و اتصلت عادراة السير قدامه, حكيتلهم الحوار وكيف بحكيلي بخليكي للصبح , الموظف الله يسعده و يرضى عليه اللي رد علي, حكالي يا اختي هاد بحكي من بيئته و مستواه شو بدك تعملي مع هيك ناس و شكلهم شدّو عليه بس حكو معه ليحرك السياره, حكيتله بس هاي علطته ما بتخمل مسؤوليتها , حكالي معك حق
حكيتله انا بعرف ان يمكن مو انت اللي بتحللي هالمشكله بس انا مقهورة كتيرو الدنيا برد كتير  :(
وبدي تساعدني و تحكيلي شو اعمل, اعطاني فرصه احكي كل اللي بدي اياه و اشكي و هو يأيدني  لهديت شوي و بعدين اعتذرتله لان ممكن المشكله مو مشكلته ولا مسؤوليته بحكيلي "المهم فشّيتي قلبك  وانا هلأ بحول الشكوى لادارة السير و همه برجعو بحكو معه و بفشّو قلبك منيح"  حكيتله منيح :)

حسبي الله و نعم الوكيل بهيك ناس ما بتفكر غير بحالها, و كمان لا ادب ولا اخلاق و بفكرو بس يطلعو بالعالي الناس بدها تخاف وتتراجع, انا لولا ان الدنيا صارت عتمه ويلا ما بتحرك قبل ما يجي شرطي سير و يتصرف مع هالعالم و توصل محل ما توصل, بس اهلي برنو من جهه و اخوي برن من جهه و انا حرفيا صرت ارجف من البرد لدرجة اني صفيت السياره بنص الطريق و شغلت التدفئة عاعلى شي و وجهت كل المراوح علي و لزقت فيهم و ضليت شي خمس دقايق لوقفت رج :(

دعيت ربنا ان صاحب السياره ان شاء الله ما ينأذي بس يصير معه موقف مشابه  ويتذكر اللي عمله فيي اليوم :"(



ملاحظه ع الهامش

الصورة من موضوع مشابة لست سكرت باب كراج عمارة قامو الشباب قررو يردو على فعلتها بتلزيق هالعبارات على سيارتها ...للاسف ما لقيت الفيديو :$

قلوب حجر



الي قريبات الله يجزيهم كل الخير بسعو بعمل الخير دائما من اللي ببحبشو و بتحرّو بموضوع توزيع الصدقات و بحبو يوزعو بايدهم و يزورو الناس ليتأكدو من ان وضعهم بحاجه خاصه لمّا يكون  ناس معطيهم فلوس للتوزيع.

بتحكيلنا وحده منهم انها كانت مرّه سايقه في البيادر و شافت ست كبيره بالعمر بتمشي خطوتين و بتقعد عالرصيف ترتاح شوي و تمشي كمان خطوتين و ترتاح, قامت قريبتي عرضت على الحجه انها توصلها لبيتها و فعلا و صلّتها وبس وصلو قررت قريبتي تطلع توصل الحج لبيتها لتساعدها بالمشي .

الحجه ساكنه بغرفة بالطابق الرابع في عماره ما فيها اصنصير و لا في للدرج دربزين او اي شي يحمي الطالع عليه لو لا سمح الله سقط, الغرفة عباره عن مساحه صغيره فيها كل شي, تخت و تلفزيون صغير و غسالة صغيره و تلاجه صغيره مستهلكين عالاخر, قعدت قريبتي شوي عند الحجه, الحجه ما تزوجت و توفى ابوها وامها و ضلت عايشة لحالها و لا حد من خوانها او خواتها رضي يتحمل مسؤوليتها بس كبرت وبطلت تقدر تشتغل وما في مورد الها غير اللي بعطوها اياه الناس من فلوس والاكل, ومن الشباك فرجت الحجه لقريبتي 3 عمارات قدام بيتها و حكت انهم لاخوانها و اولادهم.

حكتلنا قريبتي انها صارت دائما تعمل حساب هالحجه بس حد يعطيها شي توزعه او هي بدها توزع شي و اخر مرّه زارتها كان بعد عيد الفطر, في وحده كبيره بالعمر وما بتقدر تصوم و اعطتها فلوس لتوزعها لانها افطرت برمضان, راحت قريبتي و اشترت بالفلوس اكل و حسبت حساب الحجه منه , بتحكي انه بقي معها دينار و نص من الفلوس فمرّت على الخضرجي اللي بنفس عمارة الحجه, دخلت و طلبت منه تشكيلة خضار بدينار و نص بالزبط, سألها الخضرجي اذا انها توزيع حكتله اه للحجه اللي ساكنه فوق, قام حكالها مداد "للحجه زينب" خدي بزياده و مني, قريبتي شكرته و دعتله ربنا يزيده من فضله و يكثر من امثاله و يجزيه كل الخير.

طلعت عند الحجه ما لقتها بالبيت, الاولاد اللي بلعبو بالشارع حكولها انها راحت تحضر عرس بالشارع اللي جنبهم "علشان تاكل هناك", بتحكيلنا قريبتي انه كان في شباك للغرفه مكسور منه شوي قامت دخلت كم من غرض من الشباك و اخدت الباقي و راحت للخضرجي "الطيب" لتترك الاغراض عنده وهو يعطيهم للحجه بعدين.

سألته اذا ممكن تترك الاغراض وافق و حكالها " انا بوصصلها اياهم مهي عمتي" انصدمت قريبتي و بتحكي ضليت مش مصدقه و اسأله "عمتك عمتك؟؟ يعني اخت والدك؟؟ جد عمتك؟؟ " و هي منصدمه ببروده وابتسامته وهو بأكد انها عمته اخت والده, بتحكيلنا قريبتي انها طلعت من المحل و هي مذهولة و بس وصلت السياره رجعتله وحكتله هات الاغراض ما بدي اتركهم عندك, و اخدتهم و دقت على جيران الحجه اللي ساكنين تحتها و اعطتها الاغراض و حكتلها عن الخضرجي, طلع فعلا العمارات الثلاثه لاخوان الحجه زينب و اولادهم و كل المحلات تحتها الهم و ولا واحد فيهم عمره سأل عنها او زارها او استفقدها باي شي.

سبحان الله , ناس ربنا بفتحلهم باب اجر و باب بر و همه مضيعينه على حالهم بكل بساطه , ناس ماخدتهم الحياه و قسوتها لحتى قتلت مشاعرهم وعمت قلوبهم  قبل ابصارهم.

عادات و طرق التقبيل في ﺍﻟﻤﻨﺎﺳﺒﺎﺕ


  اول شي كل عام والجميع بالف خير ربنا يعيده علينا و عليكم وعلى الجميع بالخير

طبعا و زي ما كلكم عارفين اول يوم دوام وخصوصا بالمؤسسات الحكوميه بضيع بالمباركات والمعايدات و القصص و وين رحتي و وين اجيتي و شو طبختو و مين اجا ومين حكا يعني الحمد لله الحمد لله بكون  زي يوم متمم للعيد  هي بس الصحوه بكير و النكد من شوفة بعض الناس اللي ما بتطيقوهم

 اليوم و بعد اللفه على اربع طوابق ومعايده و تسليم  على ما يقارب ال 50 موظفه لفت نظري شي مهم جدا ...الا وهو اختلاف آلية البوس  من حيث الكم و الطريقه لكل موظفه :)

في اللي بتضرب وجهها بوجهك كانها بتطاوش و بصير خدي جد يوجعني بس بكتم بقلبي و بضل  مبتسمه

في اللي بتختلف عدد البوسات على كل خد وانت بتحتاري خلص ويلا لسا  الف وجهي ويلا ما خلصت من الخد و بصير راسك يبعد و يقدم  انو خلص؟؟ لسا؟؟ تردد  واضح لفقرات الرقبه

  في اللي بتبوس بوسه على خد و خمسين  عالخد التاني و الخمسين بكونو على نفس واحد بتتابع سريع الوتيره وانت بتصيري مش عارفه شو تعملي وكل عشر ثواني تبوسيها انو عيب ما تشاركي بالحدث...الست مغلبه حالها ونفسها انقطع وانت ولا ادنى مشاركه !!  

  هلا كل هدول بشكرهم على محبتهم او حتى مجاملتهم الي لانهم عالقليله اظهروها... اللي بقهرو همه اللي بتسلمي عليهم ما بتعبو حالهم يوقفو او حتى يبتسمو وكانهم اول مره ابشوفوكي بحياتهم غير اللي ما بمدو ايديهم يردو على سلام ايدك الا بعد مده، ثواني بس بر ضه تعتبر مده من التفكير بلاش يختي تسلمي اصلاطن انت الخسرانه

الخالتو المصدومة !!!




بعد محاولات اقناع لا تتجاوز المرّه الواحده وافقت امبارح اروح على عرس بنت صاحبة ماما, ماما عندها طريقة بالاقناع بسيطه جدا...هي بس تأمر وانا بوافق على طول :)
حكيتلها ما بدي اروح , اذا بدك بوصلك و برجع باخدك, حكتلي بس انا بكون مبسوطه اكتر و مرتاحه لو اجيتي معي فااااااااااا وافقت اروح شو اعمل ما قدرت اقاوم :)

هلأ بدي احكي عن موضوعين, اولا و بما اني ما كنت حابة و لاخر لحظه اني اروح عالعرس هاد لا يعني ابدا اطلاقا مطلقا اني ما اكون لابسة اللي عالحبل و اكون ماشية لفتين تلاته بعلبة الميك اب, يعني رايحه و رايحه اروح و نفسويتي مش بالعلالي؟؟؟ بعد ما سمعنا بابا بنتناقش بموضوع الروحه و شافني و انا طالعه نظرة الدهشة على وجهو كانت رهيبه, بحكيلي هيك حابة الروحه و مجهزه حالك...اروح بالجينز يعني ياحج؟؟ انت بترضاها؟؟  :)

الموضوع التاني و هو عرض العرايس اللي كان بالعرس, لا لااااا مش هيك, يعني عرض عيني عينك, ستات بلفلفو عالطاولات و بعرفو بناتهم عالعالم, و بنات ماسكين موبايلات و ناسيين يلبسو نص اواعيهم بتمشو بالقاعه و رايحين و جايين بس هيك بتحسوه عرض ازياء, كرهت حالي كل ما اجا حد وسلم على ماما و سألها عني :(, متزوجه حلوه بنتك وين كاينه مخبيتيها, هاتي بوسة يا "خالتو" او يا "آنتي"  مع بعض التحسيس و معاينة البضاعه من بعض الخالتوهات, وماما محششة ضحك ولا على بالها

كل الخالتوهات كوم و الخالتو اللي طلعت من طرف العريس وكاينه دارسة مع ماما بالمدرسة كوم لحالها, لقاء لطيف كان بصراحه و الست كتير كتير طيوبه, قمت و سلمت عليها بمحبه قد ما شفت مميتي فرحانه بشوفتها, و بدت كم ولد عندك و كم بنت و شو مجوزه و كم حفيد و وصلولي , الخالتو تفرجت علي و رفعت حاجب و ابتسمت ابتسامه و حكت لماما " بنتك عريسها عندي"  حاولت ان حواجبي ما يرتفعو و اني اضل محافظه على ابتسامة المحبه استأذنت بكل ذوق و رجعت قعدت على كرسيي و فجأه سمعت الخالتو بتحكي بصوت عالي "هاااي؟؟؟" "هاي 36؟؟؟"  ضحكت , ليش ما انبسط ان ربنا الحمد لله منعم علي بشكل ما ببين عمري!!! و لكن الابتسامه بدت تخف بعد تكرار السؤال "هاي 36!!!" للمره الخامسه, و بعد تكراره للمرة السابعه بصراحه ولا اخفي عليكم بديت اتوه مش عارفة انبسط ويلا ازعل :$  بدى الاحراج يسيطر علي, خلص يا خالتو ابوس ايدك, خلص خلص 28 , 30 ابوووس ايدك ما كانت مزحه مزحناها معها, و فجأه الست انعجئت و ودعت ماما على عجل و راحت و انا و ماما مش قادرين نمسك حالنا عن الضحك, حششنا بكل ما تحمله الكلمه من معنى, بتحكيلي ماما " يا علي انصدمت كتير كأنها" صارت ماما حاسة بالذنب  هههههههههههههههههههههه.




اضغط للمتابعه....ورطة ما بعدها ورطة






انا من الناس اللي بكرهو ومستحيييييييييييل يشاركو او يفتحو اي اعلان  باي موقع الكتروني وخصوصا اللي على جنب الشاشة بالفيسبوك, مستحيل اضغط على لينك مهما كانت جوائزه قيمة وخصوصا المسابقات اللي فيها اشتراك عن طريق رقم الموبايل, لانها بتعني ورطه كبيره و انا بعرف هالحكي.

قبل كم اسبوع كان مكتوب عن اشياء عن الاوزان المثاليه و نقصان الوزن, وهل وزنك مثالي, واخخخخخخخخ مسكوني من ايدي اللي بتوجعني و صار الفضول يمشي بجسمي من عقلي لقلبي لايدي وهب كبست عاللينك :( ويااااااااااااا ريتني وقفت لهون لا و بديت اجاوب عالاسئله, نوعية الاكل, كم مره بتروحي عالجيم, وهب السؤال القوي, كم رقم موبايلك لنعطيكي النتيجه, صد ورد و شد و تنتيف قررت انه خلص بشارك و بس يعطوني الجواب بلغي المشاركة وخصوصا انهم كاتبين كيف تلغي المشاركه, و كاااااااااااااان يوم بمبي يوم ما كتبت الرقم, بعيدا انه طلع وزني "طبيعي" و اخدت 22 من 25 و طلع الوزن المثالي 62 ولازم انزل 3 كيلو لاوصله خصمو مني 70 قرش :(, اقنعت نفسي انه عادي و بعتت مسج لالغي الاشتراك و وصلني مسج من الموقع انه تم وقف اشتراكك,. 

بعد يومين من لغي الاشتراك واذ بالموقع ببعتلي مسج عن التفاح وفوائده و هالقصص شيكت الرصيد طلعو خاصمين 70 قرش O.o  رديت بعتت مسج الغاء اشتراك و وصلني رسالة تأكيد باني لغيت الاشتراك و رجعت شيكت عالرصيد و اذذذذذذذذذذ ب 70 قرش تانيين مخصومين :)
 اتصلت بما يسمى "خدمة الجمهور" ردت الاخت بكل لباقه و اهلا وسهلا فيكي ست "هبولة اللي اشتركت باشي بالموبايل باقل من ثواني و هات عاد الغيها" :(
 حكيت للبنت اللي صار فحكتلي بنفس لهجة الادب ان ما ببين عندها اني وقفت الخدمه الا بعد ساعه, وحكيتلها "شوووووووووو بالنسبة لل 140 قرش؟؟" ردت بانها راح تبعت رساله لقسم المتابعه و خلال "48" ساعه بردو علي واني لازم استنى الرد, طيب ماشي بنستنى يومين .

بعد يومين وصلني مسج جديده عن فوائد التفاح O.O وبررررررررررررررضك خصمو 70 قرش , ييييييييييييييييي عليناااااااااا, رجعت اتصلت فيهم و ردت علي وحده تانية برضك بقمة الادب و "الخنف" حكيتلها كل القصه غلطت و حكتلي "ممكن انت اشتركتي فيها بدون ما تنتبهي" انا كنت لحظات لحظات ها و كنت راح اطلعلها من التلفون بس هديت حالي و حكيتلها بما معناه اني اي نعم "هبولة" واشتركت اول مره بس برضه مش لهدرجه تفكرني ولا حبّه لاشترك وبدون ما انتبه :"( , المهم وقفت الخدمه من عندها و بدها تسكر الاخت "اي خدمه تانيه ستي" ... حكيتلها " شوووووووووووووووووووو بالنسبه لل دينارين و عشر قروش؟؟"
 هلأ انا خدي مني عيوني بس ما تضحكي علي بتعريفه وانا عند الاستهبال راسي بقلب حيط  ولا برسل ولا بستقبل, حكتلي ببعت مسج للمتابعه وانه مبين ان في رسالة مبعوته من قبل بس ما حد قرأها, حكيتلها "شو هالشركه الكبيره المحترمه اللي بدها اسبوع لتوقف اشتراك بخدمه و شو هالخدمة الزفت هاي اللي موظفين هالشركه ما بشتغلو شغلهم" المهم رجعت اكدتلي اني لازم استنى "48" ساعه ليردو علي.

صاحباتي ضحكو علي وحكولي انسي الفلوس و اذا بتوقف الخدمه فهاد انجاز وانا ولّعت بزياده, وفعلا 48 ساعه بالدقيقه و حكيت معهم, حكيت للبنت الموضوع وحكيتلها ااااااااااااااااااااااااخر مره بتصل و بعديها راح اتصرف تصرف تاني -هلأ  بالنسبة الي شو هو التصرف التاني فااااا علمي علمكم بس خلص بدي اهدد واتوعد , تعلمت انه بدون تهديد ما بمشي اشي - رجعت حكتلي انا سجلت الشكوى وخلال ... حكيتلها "ما تحكيلي 48 ساعه ترا كرهت هالرقم, بدي رد سريع ومستعجل انا" حكتلي ان اقصى حد 48 ساعه و ممكن خلال ساعه يردو, حكيتلها ان الي اسبوع و هال 48 ساعه تبعتهم ما خلصت و رجعت هددت و توعدت.

بعد ساعتين وصلتني رساله من قسم المتابعه بانهم راح يرجعولي الفلوس :))))))))))))))) هيه هيه لولولولييييييييييييييييييييييش, و اخيرا حد اشتغل, كنت بدي ايعتلهم خليلكم اياهم 
الموضوع مش موضوع فلوس, الموضوع موضوع مبدأ وموضوع سرقه عيني عينك, يعني ليش المشاركه بتكون باقل من فانيه و الغاء هالمشاركه بدها شهر؟؟ و ليش الفلوس اللي "نهبوها" خلال هالفتره يغطرشو عليها؟؟ كم مشترك غيري صار معهم هيك و كانو مقتنعين انه مستحيل الفلوس ترجع و ما طالبو فيهم, كم دينار بدينار و كم اشتراك باشتراك نهبو شركات الاتصال بدون علمنا؟؟؟ 

المهم يا اخوان.....طلع لتاخد حقك لازم تهدد و تصرخ و تبهدل و تعلي صوتك .....للاسف 
و الاهم ان فلوسي رجعتلي :)







ملاحظه ع الهامش

اهلا وسهلا بالمتابعين الجدد نورتونيييييييي و اهلا و سهلا بالمتابعين القديمين  دائما منورينيييي و اللي بطل يتابعني الله يسامحك :(
امااااااااااااا اللي بضل يحط ممل وغير مفيد...فاااااااااا اهلا وسهلا فيك بما انك زائر وقارئ دائم :) و برضة الله يسامحك :$

عيد العمال


المشكله الاساسية في مؤسساتنا الحكوميه هي انهم ما بقدرو ولا بحاسبو الموظف على شغله وعلى انجازه, لأ اهم شي اي ساعه اجا واي ساعه روّح, اذا تأخر 10 دقايق يكتب مغادرة و يتحمل عشرطعشر جميله و انه يضل قاعد بمكتبه طول فترة الدوام بغض النظر شو بعمل, نت و فيسبوك, شات العاب مش مهم المهم يكون قاعد بمكتبه.

اليوم المدير مصبح مستنفر, من الصبح واقف مكشر جنب ساعه الدوام ولا صباح الخير ولا برد السلام, و كلّف مدير مديرية موظف اله 100 سنه بشتغل بالوزارة بانه يلف عالمكاتب و يكتب اسماء اللي قاعدين بمكاتبهم و اللي مش قاعدين, ولما سأل عن وحده من الموظفات اللي بالمكتب اللي جنبي و حكوله انها بالتواليت, علّق واسفه عاللفظ لانه لازم انقله حرفي " ول عليكو كل الموظفين  انسهلو اليوم كلهن بالحمام" , انا كنت بشتغل و مجدّه من الصبح والله العظيم انه احبطني و لما رئيسة القسم للموظفه اللي مش بمكتبها وقفت قدام التواليت و نادت على اسمها انصدمت و حكيتيلها "من كل عقلك بتستني تحكيلك نعم من جوا الله اكبر حتى على التواليت لاحقين الموظفين"  استحو و مشيو

هلأ ما بنكر ان في نسبة كبيره من الموظفين ساعه على بعضها ما بشتغلو , وبنسو الضمير و الحلال والحرام, و خصوصا اللي في الهم تعامل مباشر مع المراجعين واحنا مؤسسة خدميه بتخدم ناس مساكين ومحتاجين, طريقة التعامل على النفتره على الذل و الانتظار على الخمسين الف مشوار ليجيبو اوراق لاستكمال المعاملات و اللي بعطوهم اياها بالقطارة و روح وتعال,لانهم عارفين انهم ما بتحاسبو على كل هاد ولكن بتحاسب الموظف اذا ما كان قاعد على مكتبه او اذا روّح قبل بدقيقتين من نهاية الدوام.

غير عن التقدير السنوي و اللي برضه "بعض" المدرء بكون تقديرهم ابعد ما يكون عن انجاز الموظف, صاحبتي المحاسبة اللي ما بعطوها اجازه الا بميت الف واسطه لانها ماشاء الله مخ نظيف و انجاز و دقة و حل لكل المشاكل تقديرها طلع جيد بس, ولما راحت تراجع مديريها بحكيلها " انا باجي عندكم عالمكتب ما بتوقفيلي بس ادخل, وبعمرك ما عزمتيني على قهوه ولا شاي, بعمرك ما جاملتيني بكلمه بصباح"
ردت عليه بانها لما قرأت قانون الخدمة المدنيه وفيما يخص التقديرات السنوية ما قرأت باب المجاملات و العلاقات الاجتماعيه فيه و طبعا ما عملت شي لانه اذا اعترضت بتيجي لجنه من الوزارة تحقق و طبعا طبعا راح تطلع محقوقه غير عن موضوع المحسوبيات و العائلات و العشائر و الوساطات, مستحيل يطلع موظف صح ومدير غلط.

المهم يا جماعه انه خميس جمعه سبت عطله و ان شااااااااااااااااء الله انّا نكيف :)
كل عام و كل يوم و كل دقيقه و الجميع بالف خير دائما :)






Standards




اول ما سكنا بيتنا بال 99 كان لازم نركب مطبخ جديد, و للاسف بابا و كالعاده قرر يستعين بخبرات عائليه,  قريب النا بشتغل بالموضوع و وكله فيه.

ماما في بيتنا القديم وبما انها قصيره مقارنة بطول عائلتنا كانت تعاني من ارتفاع المطبخ بالبيت القديم و اللي سببلها ديسك و وجع ايدين و كتاف دائم, فبما انه لما تزوجت كان المطبخ القديم راكب ما في مجال للاعتراض فبالبيت الجديد حبت تختار الارتفاع المناسب الها بما انها بتقضي وزي كل الامهات بالمطبخ 99.9999% من يومها.

مناقشات و محاورات بينها وبين قريبنا على الارتفاع و بالاخر عمله زي ما هو بده لانه وبناء على كلامه و تكراره للكلمه "هاد الارتفاع الستاندردز بين المطابخ"

بما انه "قريبنا" ومن ناحية بابا, فاااا بابا كان معه و تم عمل المطبخ بارتفاع مناسب للستاندردز العالميه بالارتفاع, ومن ال 99 وماما بتعاني من هالمشكله و كل مرّه ماما بصير يوجعها ظهرها كلنا نشاركها بالدعاء و تحميل المسؤوليات, وبابا بعد بفتره حس بالذنب ولكن خلص "اللي صار صار وشو بدنا نعمل" هيك برد

اللي ذكرني بالقصه خبر قرأته في جريدة الغد اليوم

الخطيب: الانتخابات النيابية الأخيرة تقترب كثيرا من المعايير الدولية

قديش بتقترب؟؟؟ كيلو مثلا؟؟
و هالمعايير من وجهة نظر مين صحيحه و صحيّه؟؟ و من وجهة نظر مين مناسبه؟؟ ومين اللي قرر انها تطبقت ويلا لأ؟؟
والسؤال القوي..............مين اللي راح ياكل هوا من وراها؟؟؟

ودمتم

عوالم و شخوص حولنا




قاعده في تختي تحت العشر حرامات لحتى اتدفى شوي من البرد اللي زايد بالاردن هالايام او اللي بطلت متعوده عليه بعد سنه و نص بالامارات, اجا اخوي بحكيلي "انا طالع على عبدون ادرس ب Second Cup تيجي معي؟؟" طبعا حكيتله : انا اللي باجي :)"

المحل بحبه من ايام الامارات واله ذكريات حلوه, طلبنا هوت شوكلت و قعدنا كل واحد راسة بلاب توبّه, انا بكتب تدوينه  "حقك اولويه" و هو بدرس, بدت الناس تكثر و للاسف الدخان يكثر و اصوات الناس تتداخل و تعلى مع العجئه.

سبحان الله كيف كل شخص اله عالمه و مشاكله و حياته الخاصه, اول طاوله عليها شبين من حديثهم عرفنا...اه لان الكل كان سامع الكل - عرفنا انهم اطباء ومعهم كتب شكلهم بدرسو ليتخصصو, واحد منهم بحكي قصته وعن زوجته اللي كانت حامل بطفلتهم التانيه و اللي تأخر لاخد زوجته على المستشفى و اهلها و اهله و زوجته حملوه مسؤوليه اللي صار للبيبي بعدها, الدكاتره بالمستشفى اضطرو يعملو عمليه قيصريه و البيبي انولدت بمشاكل صحيه , الاطباء بلغوهم ان الطفله ما الها امل بالحياه, قعد يوصف كيف حمل بنته للمره الاولى و كيف اهله و اهل زوجته ببكو و كيف اعطى البنت لامها وحكالها هاي بنتك استقبليها و ودعيها و اقرأي قرأن عليها لانها راح تفارقنا, و فعلا البيبي توفت :(

طاولة تانيه عليها صبيه و شب, شكلهم بحبو بعض و ناويين يخطبو, بس وضع الشب مش مناسب مقارنه مع البنت و هاد واضح من كلامها انها بتطلب منه يساعدها بانها تقنع اهلها و هو ما في بايده شي, و اهل البنت رافضين الشب بسبب الوضع المادي, الشب مش كتير متأثر او هاد اللي كان مبينه بس البنت بتطلع بعينيه بطريقه غريبه حزنتني عليها مع انها ختمت كلامها بانها ما بتقدر تعيش بمستواه لانها متعوده على طبيعه حياه غير عن حياته, اللي خلّى اخوي يترك دراسته و يحكي معي انه نفسه يقوم يلخمها كف انه شوووووووووووووووووو بدك منه يعمل يعني؟؟؟ يختلس؟؟؟

طاولة ثالثه عليها طلاب بحضرو لامتحانات جامعات بامريكا, ما بعرف ليش بين هدول بالذات حسيت حالي بين عالم غريبه علي كثير, حكي نصه عربي ونصه انجليزي , العربي انه كووول " خف عgلي و اولتيلها come on what's the hell"
و البنت بتحكي للشب انها مريضه وبدت بتفاصيل غريبه مرافقه للمرض اول مره بسمع فيها بحياتي و تحتوي على كلمات لا تناسب الاطفال تحت سن 35 سنه :$ و بتحكي عن والدها و والدتها  بتفاصيل برضك غريبه اخوي رفع راسه اعطاني نظره الحاجب المرفوع و رجع للاب توب :)


بالاضافه لطاولة الشباب اللي بس نازلين رمي كلام مشفر لبعض نص اللي بالكوفي شوب فاهمينه و بحششو ضحك بدون سبب و بشكل مبالغ, هدول عذرتهم....شبااااااب و عايش و هاد فعلا وقت الضحك ملحقين على النكد :)

what to say ya mama




في يوم و اخوي هون استغلينا الجو الحلو و رحنا على حدائق الحسين لحتى نتشمس و نلّعب الصغار شوي، رحنا عالالعاب و بدو يتمرجحو و يتسحسلو في ما تبقى من الالعاب المتدمره ،، الله يسامحهم الناس مخربين كل شي مع انه واضح انه متعوب عليها و مجهزه لتكون مناسبه و مريحه، وما بدي احكي عن علب البيبسي وكاسات القهوه اللي مرميه هون و هون و عمال الوطن شغالين ينظفو من ورا هالعالم اللي بترمي كل شي ولا سائله.


اللي بدي احكيه عن الفوضى و الازعاج اللي كان مرافق الطلعه و اللعب،، المطعم اللي جنب الالعاب كان حاطط اغاني و على اعلى صوت و ياااا دوب كنا نسمع بعض لما نحكي, ازعاج ما بعده ازعاج و للاسف ما وقف بالمره طول ما احنا هناك, غير ان الصوت مش واضح و السماعات خربانين يعني وجع راس من الاخر.

الاغاني كانت بالبدايه اغاني دمار عاطفي لمطرب مش عارفه مين هو و من اللي نكد بنكد و بعدين الاخوان حبو يحسنو الجو حطو شريط لسميره توفيق من سنة 1900, بدت اغنيه "يا ابو قضاضة بيضا" - انا كنت مفكريتها قضابة و شكرا لجوجل اللي زبطلي اياها و عرفني على معناها :)

المهم مرة اخوي اجنبيه و منزعجه من الصوت وكل شوي تسألني يعني الاغاني حلوين؟؟؟ بحكيلها لأ :$
بس بدت هالاغنيه سبحان الله طلبت نترجملها الكلام :$ سألت اخوي شو يعني قضابه بحكيلي شو بعرفني انا و بعدين اكتشفت اني مش فاهمه ولا كلمه من الاغنيه شكلي حافظه الموسيقى بس...شووووو بدي اترجملها هلأ :$

المهم اجت فقره "وان ردتني لاريدك..وان ما ردت عمرينك ويش اقول يا يما"
وهاد الاشي الوحيد اللي فهمته فاااااااااااااااا ترجمته بعد محاورات بيني وبين اخوي على ترجمه "عمرينك" و قررنا انها تكون I don't care

What to say ya mama....what to say ya mama :)







اشي بجلط




اول ما رجعت من دبي سمعت من اهلي عن بنت قريب النا الها فتره زعلانه ببيت اهلها, و ا ن هاي مش اول مره بيصير انها بتزعل, اتدايقت كتير عليها خصوصا ان اللي كان ظاهر انها كتير متفقه مع زوجها, تمنيت انها تكون زعله وتمشي خصوصا ان في عندها بنت و ولد بالمدرسه وفترة امتحانات و دعيت ربنا يصلح الحال.

شاءت الاقدار ان اهل البنت يجو عنا زياره ويفتحو الموضوع, الموضوع انفتح لان اهل البنت قراب كتير منا و حسب كلام الاب هو ما حكا اشي لحد و حابب يشكي لبابا, بشكي من اهله  كيف بتدخلو بالاصلاح و انهم مستهجنين ان البنت طولت ببيت والدها و طبعا المصيبه الكبرى كانت لما لمح الاب – الغير مقتنع بتلميحه – بموضوع الانفصال.

طلعت البنت من اول سنوات الزواج يعني قبل 10 سنين وهي تهان عند زوجها, اهانه بالضرب و بالكلام و اهانه بالتعامل واهانات معنويه, وكل مره البنت تروح عند اهلها ابوها يرجعها عاساس ان البنت ما الها غير زوجها, والزوج يفهم  الموضوع ضعف من اهل البنت و يزيد بالاهانه.

فالاب الذكي قرر يعاقب الزوج باخر زعله, فقرر ياخد البنت و يخليها تترك ولادها( ولد 8 سنوات وبنت  5 سنوات )لابوهم, البنت تدمرت نفسيا ببعدها عن الاولاد و الاب مش مقدّر هالشي, و بعد ما شاف البنت بتدوب قدامه راح جاب الاولاد, شرحتلي ام البنت الاهانات اللي بتتعرضلها البنت, المسبات و التهزيء بوجود ناس او بدون وجود ناس, الضرب  اه الضرب اللي صدمني ان في اب ممكن يرجع بنته بعد ما تضرب و يسكت عن حقه و حق بنته و يجبرها ترجع لهيك بني ادم, الضرب لدرجه ان البنت الها شهر عن اهلها و لسا امها كل ليله بتحطلها مراهم على اماكن ضربها بالحزام من زوجها, لدرجه ان البنت الها شهر ما طلعت من البيت ولا شافت حد لان الزراق و الانتفاخ اللي بوجهها لسا ما اختفى.

من ضمن الكلام انجاب سيره الطلاق و اكد الاب انه مستحيييييييييييييييييييييييييييييييييل تطلق, شو بدهم يحكو العيله و شو بده يحكي المجتمع و بلوم المجتمع اللي عايشين بينه وما بلوم حاله, انا ما قدرت اسكت حكيتله بدي احكيلك شغله اولا العالم لو بنتك مبسوطه ما حترضيها العالم اذا بدك تعيش بناء على رايهم تموت احسنلك ويا دوب تسلم, و هيني من هلا بحكيلك اذا بنتك رجعت و صارلها شي ماتت او انتحرت فانا بحكيلكم انتو التنين اني بحملكم مسؤوليتها, طبعا بابا وماما ما عجبهم تدخلو بس الله هداهم و اكتفو بالتشبير انه اسكتي.

بتحكيلي الام هو بصراحه البنت تعبت نفسيا و اخدتها على دكتور نفسي من شي سنتين و الدكتور حكالها انها مصابه بانهيار عصبي حاد و ان البنت عرضه لانها تعمل بحالها اي شي و ممكن تأذي حالها, والها سنتين عالادويه

كيف بهونلك تعمل هبك في بنتك, بديش احكي عن شبه الرجال اللي بضربها و اللي فاهم الرجوله بطريقه متخلفه, بدي اضل بالاهل, لما تجبر بنتك على هيك عيشه و لما بس بدك تساعدها تقرر تحرمها من اولادها اللي الشرع و الدين بعطيها هالحق , للاسف كتير اهل بحكو لبناتهم اللي ماكلين هوا بحياتهم تعالي انت و ارميله اولاده, عاساس انهم ولاد الجيران مش ولادها, بدك تكسر قلبها فوق الكسره اللي هي فيها, هاد طبعا في حال الاهل رضيو بموضوع الطلاق, كتير اهل الطلاق هاد غير وارد و الحل هو انك تموتي او هو يموت بس رجعه عندي ما في, كتير بنات ما بعرفو حقهم برفض هالواقع اللي بلزموهم فيه ازواجهم و اهاليهم.

اتقو الله يا جماعه في بناتكم, اتقو الله يا رجال في زوجاتكم



ملاحظه ع الهامش

اصدقائي و صديقاتي....في مشروع بشتغلو عليه زميلات مدونات النا و انا حابه اشاركهم فيه, هالمشروع بحكي عن حقوق المرأه و تعريفها بهالحقوق, حقها بالحياه, حقها بانها تحكي لأ و ما تسكت عن الظلم, اول خطوه في هالمشروع هي تجميع قصص عن العنف ضد المرأه و ياخدو رأي قانوني بالموضوع لتعرف الستات اللي ساكتين عن هالعنف شو العقوبه القانونيه للي بتعرضوله و انه الهم حق يرفعو صوتهم و يحكو لأ , بدي منكم اصدقائي تبعتولي اي قصه بتعرفوها عن الموضوع و تبعتولي اياها على ايميلي باسمكم او باسم مجهول واذا بتحبو بالتعليقات, يا ريت تشاركونا بكل القصص اللي بتعرفوها علشان اللي بتعرضو لهيك مواقف و بفكرو انو عادي الزلمه يضربها و عادي يهينها تعرف انه مش عادي بالمره و ان القانون برفض هالشي, كتير ستات عايشين بينا بفكرو ان جزء من واجباتها تجاه زوجها انها  تاكل القتله و هي ساكته و لااا كمان  تستسمحه و تطلب الغفران على شي ما عملته, بتمنى منكم تساعدونا.

وبحكولك ليش الدكاتره بنضربو




ماما من قبل العيد وهي بتشكي من ركبتها و مع عجئه العيد و طلوع درج و نزول درج زاد الوضع, راحت عالدكتور و اعطاها مسكنات و حولها للمستشفى علشان التصوير, اخدنالها موعد يوم الثلاثاء الجاي عند دكتور العظام في المستشفى ليصوروها و يعملو اللازم, طبعا 100 ترجاي انها تقعد و ترتاح و لكن بدون فائده, الها كم يوم بتسحب رجلها سحب و ما بتقدر ترفعها و اليوم و هي بتمشي من عند الباب ما قدرت ترفع رجلها و ضربت بالعتبه, حبيبتي داخت من كتر الوجع و الحمد لله كنت جنبها, طبعا نشف دمي و صرت انادي على اخوي زي المجانين :( الحمد لله صحصحت و مشي الحال.

حكينا ما بدها هلأ بدنا نروح طوارئ عالمستشفى, دور و عجئه طبيعي و ساعه الا شوي لدخلنا على غرفة طوارئ العظام , مع ان الناس بتتجاوز الدور وما حد حاكي معها شي ضلينا قاعدين لان اللي عالاستقبال حكالنا ارتاحو و انا بنادي عليكم بالخمس مرات اللي رحت اساله فيها ايمتا دورنا.

اجا الدور و لله الحمد و قبل ما حد يفحص قررو نصور الركبه, اخدنا ماما عالتصوير و صورناها, كنت انا و اخوي مع ماما و طلبنا من بابا يروّح لانه اساسا ظهره و ركبه بوجعوه وما بقدر يمشي ولا يضل واقف بالمستشفى, برضه دور عالتصوير و لكن اكثر تنظيما, خلصنا و رجعنا لغرفة الطوارئ  اعطيناهم الصور و الممرض علقها عالجهاز الخاص بصور الاشعه و خصصولنا سرير لماما, ماما فضّلت تضلها عالكرسي المتحرك لانها مش قادره تحرك رجلها, بعد بنص ساعه و احنا بنستنى حد يجي اجا الدكتور المقيم بسالنا عن الحاله, شرحناله و فحص رجل ماما و استأذن علشان يروح  يشوف التصوير و يرجعلنا , و قبل ما يطلع بحكيلنا لسا هلأ كان دكتور العظام واقف و راح و الله اعلم ايمتا يرجع, اخوي وصفله شخص كان واقف جنب الممرض اتطلع على الصور و اتطلع على ماما و طلع من الغرفه, طلع الاخ هو الدكتور بس فضل انه يطلع من الغرفه قبل ما يفحص ماما, الدكتور المقيم حكالنا هلا بنتصل فيه و بيرجع, رجع بعد نص ساعه تانيه رجع الدكتور المقيم يحكيلنا عن الصوره و عن العلاج المتوقع لرجل ماما و لكنه مش دكتور عظام و بترك القرار للدكتور اللي حكو معه وحكالهم انه  هيو جاي, واقترح يعطي لماما ابره مسكنه لحتى يخف الوجع.


اجت الممرضه بعد نص ساعه  و اعطت ماما الابره مفيش ربع ساعه  ماما صار وجها اصفر و صارت تحكيلنا انها دايخه و حاسه حالها بدها تستفرغ, ركضت عالممرضه الاخت و بكل برود بتحكيلي اه هاي الابره بتعمل كل الاعراض دوخه و لعيان و هبوط عادي عادي, رجعت عالغرفه ماما غمضت عيونها و بطلت قادره تتحرك ولا تحكي, حملناها انا و اخوي و نيمناها عالتخت و رجعت للممرضه وين الدكتور , ال حكو معو 3 مرات و حكالهم هيو جاي , ساعتين ونص و احنا بنستنى الدكتور اللي لا ذمه ولا ضمير لانه حسب ما فهمنا ما اله شغل تاني بالمستشفى غير طوارئ العظام يعني الغرفه اللي احنا قاعدين فيها , حكيتلها عن وضع ماما للممرضه وانا نشفان دمي بتحكيلي " الحجه شكلها بتبالغ" اخوي هون اعصابه اللي ضلينا انا وماما نهدي فيها طول الساعتين فلتت منه, صار يصرخ و يبهدل قام الممرض حكاله انا ما الي دخل بس يجي الدكتور صرخ عليه بدخلت الاخ الدكتور, اخوي بلش يحكيله " كيف انت دكتور و بتتطلع على صور مريضه بالطوارئ و بتتركها و بتطلع؟" 
الدكتور و بكل وقاحه  الدنيا و بنبره مستفزه جدا  " عندك مشكله ما تحكي معي و روح اشتكي" 
اخوي بلش يصرخ ويبهدل و حكاله "اه بدي اشتكي عليك" , حكاله الدكتور " اطلع بره اشتكي و بديش حكي كتير"  
اخوي " انت واحد مش محترم و لو انك محترم كان حسيت انك بتتعامل مع بشر و مرضى وانا راح اشتكي عليك و هلأ" و كان اخوي ماشي باتجاه الدكتور خلص ضاربه لولا تدخل الممرضين و باقي الدكاتره, اجا دكتور عظام تاني اخد اخوي يهديه و بعدين اجا شاف ماما و تبين انه ردّه فعل الابره غلط و هاي اول مره بصير بمرسض هيك و طلعت رجل ماما بدها جبص :(

الدكتور نفسه اخد ماما و حطلها الجبص وبدقائق كانت الوصفه مكتوبه و المواعيد محدده و الدكتور التاني اعتذر لاخوي و حكاله اذا بدك تشتكي هاد حقك بس انا عملت كل اللي بقدر عليه للوالده , اخوي حكاله انا مش جاي اقاتل انا  معي مريضه بدي اعالجها و اروح, و احنا مروحين اجا الدكتور المقيم بحكي لاخوي معك حق باللي عملته و انا لو مكانك بعمل نفس الشي, شو مريض طوارئ يستنى دكتور ساعتين و نص, و احنا دائما هالدكتور بسببلنا مشاكل مع المرضى و اهاليهم.

من ال 8 المسا لل 1 بالليل و احنا بالطوارئ....طب بالله عليكم هيك دكتور بدوش قتله تصحيله ضميره اللي مات و تذكره باليمين اللي حلفه؟؟؟

كلمة السر




من و احنا صغار و احنا بنحضر افلام الكارتون و لكل عمل سحري و لكل فعل خارق في مدخل كلمة سر...كلمة خاصه لحتى يصير هالفعل الخطير....يعني مثلا...علي بابا و الاربعين حرامي - وما قصدي شي ولا حضرته للفيديو فلا تروحو بتفكيركم لبعيد - لمّا كانو بدهم تفتح المغاره كانو يحكو "افتح يا سمسم".... لمّا الساحره غيرت اليقطينه لعربايه لسندريلا حكت "ابراكدابرا" - حاضرة النسخه المصريه منها وما بعرفش عنجليزي - اكيد فهمتو قصدي...المفروض يكون في كلمة سر او حركة معينه لحتى ينتج عنها الاشي الخارق.

بس كبرنا تعلمنا انه هالكلام كلّه قصص كارتون و لعب ولاد صغار, ليصير شي خارق ولتحقق هدفك و لتوصل لنتيجه معينه بدك تشتغل, وبدك تتعب , و انعجئنا كلنا كل واحد بطريقه ليوصل للهدف.
مرات بكون عند الشخص اكتر من هدف واحد و هالشي مش غلط و لا عيب , بل بالعكس ممكن يكون اشي كتير منيح و لكن برضه تعلمنا انك لتحقق الاهداف الاكبر و الاكثر بدك تضاعف جهدك اضعاف و اضعاف, بدك تتعب اكتر و اكتر لتوصل للنتيجه.

و بس كبرنا اكتر - اه بحكي عن حالي هون ...35!!! لهلأ مش مصدقه....يلا ما علينا هلأ, المهم بس كبرنا فهمنا انّا مقسمين لفئتين, فئه بتمووووووت و هي بتجتهد و بتضل مكانها, وفئه بتعرف تحسبها صح, بمفهوم الصح الخاص فيهم و اللي بمفهوم الفئه اللي واقفه مكانها اشي غلط, و بتوصل و بتحقق هدفها, و هالفئه التانيه بتصير اهدافها اكبر و اكتر و لكن هالمره مفهوم كتره الاهداف بكون عباره عن طمع و....اممممم بدي احكي كلمة ما فيها اساءه مثل وقاحة و قلّة ادب علشان ما نسيء لحد رجاءا, خلينا على كلمة طمع افضل, و طبيعي هيك اهداف بدهاش تعب و لا جهد, بدها شوية "فهلوة" و "تبادل مصالح".

ممكن اللي فوق كلّه كلام مش مفهوم, بس في شي بلف و بدور حوله ومش عارفه امشي بطريق مباشر اله ولكن.....الكلام كلّة مقدمة للسؤال اللي يطرح نفسه ارضا.....كم ملف المفروض اجيب و كم مرّه لازم افتح و اسكر الملف و وين المفروض ارمي الملفات المغلقه لحتى يتغير لون جواز سفري؟؟؟؟

اغتيال شخصيتو O_o...ده انجليزي ده يا مرسي




"كل من أشاع أو عزا أو نسب دون وجه حق إلى أحد الأشخاص أو ساهم في ذلك بأي وسيلة علنية كانت أياً من أفعال الفساد المنصوص عليها في المادة 5 من هذا القانون أدى إلى الإساءة لسمعته أو المس بكرامته أو اغتيال شخصيته عوقب بغرامة لا تقل عن ثلاثين ألف دينار ولا تزيد على ستين ألف دينار".


دون وجه حق و فهمناها
يعني اذا انت مسكين وعلى قدّك و ما في اسم وراك يدعم موقفك القانوني و يثبت صحّة كلامك و اذا انت موظف غلبان و شفت الكبار بسرقو قدّام عيونك و سمعت و عرفت و شهدت واقعه الفساد
بتضلك ساكت و ما تتخنفس

اساءة لسمعته و المس بكرامته
برضه بمشيها بالرغم من اقتناعي ان اي شخص فاسد بتكون
"كرامه "و "سمعه"
عباره عن كلمات ذات معنى مبهم و احيانا مضحك بالنسبه الهم
يعني جيب اي "فاسد" -بدون ذكر اسماء لسا ما حوشنا اشي لندفع غرامات - و احكيله كرامه بوقع عالارض من الضحك!!!

نيجي هلأ للكلام الكبير

يغتال شخصيته .....أن أن أأأأأأأأأأأأأأأأأأن


ما بدي احكي عن الخبر ولا كيف بدهم يخلو الانسان اللي بفش قلبه و بفش قلب اللي حواليه بشوية كم كلمه يعبّر فيهم قبل ما ينجلط ويموت و تموت الكلمه بحلقه و على اطراف قلمه....ما بدي احكي على رأي اخوي مش عارفه قبل كم سنه يوم مباره كرة السله بين سوريا و الاردن و الحكم المصري
" مبيوعه...مبيوعه"

ولا بدي احكي كيف الكل اكل هوا بس لانه ذكر اسم اللي ما يتسمى هداك اللي سافر يتعالج برّه و طلع معالي فلان و علّان و الراس الكبيره علتان موافقين و راضيين و متراضيين مسبقا

اه ..اه ولا راح احط اسم

المهم ...لا ما بدي احكي عن كل هاد

اللي بدي احكيه

ان مهما فكرنا انّا صرنا ملمين بلغتنا العربيه سبحان الله نوّابنا , قصدي معالي و عطوفات و معاطيف و اعطاف و سياده و ....اي مصطلح هز ذنب , بتحفونا بكل ما هو جديد و بنمّو قدراتنا اللغويه و بزيدو من مورود اللغّه و بخدرو ادمغتنا باجمل العبارات

الله يسامحكم.... دائما ظالمينهم
هيهم بدل ما تنحبس منك اله خلوك تدفع اللي فوقك و تحتك و تموت بين افراد عائلتك .

اه اللي فوقك و تحتك لانه اي شخص يحتكم يدفع مبلغ 30000- 60000 غرامه هو فاسد اساسا :)

مع اعتذاري المسبق لاي شخص "اغتلت شخصيتو "

و سلامتكم