![](https://blogger.googleusercontent.com/img/b/R29vZ2xl/AVvXsEjvCebrAb1nl9PIh1b93tpje10UcXS0B-XRDHW5oO5TxtFSMLbdyoV5LfiSvthgf-6s2e46qHCENKkYHkK-bg9ni0O7lA8DC1LkP9PSnc7QRmhAYooms7d6DrHm_viXQ_2PrmA1W0f6z1I/s400/11087683324549188191961473146166191121.jpg)
السنة ما تحسست باول الربيع مثل السنه الماضيه, و انبسطت كتير حكيت شكلي اخيرا طبت والحمد لله, الي اسبوع التحسس معوض الفترة الماضيه كلها, وشكله قلب رشح و انفلونزا قويه كتير, و اليوم صوتي خلص راح عالاخر, و حلقي مجرّح و وضعي صعب, وكله كوم و الحرارة كوم, بس يبدا المسا بتبدا الحرارة....شكله والله اعلم مش تحسس
و دوا التحسس مش انو بنعّس لأ....ببطل اركز بالمره بالمره
الاشي المنيح اللي بستفيدو اني رجعت انام منيح :) بنام العصر و بنام بالليل و بصحى كأني مش نايمه...بعرف النوم بجر نوم بس شو بدنا نعمل احسن من السهر والتفكير اللي بس بوجع القلب والعقل وما بنستفيد منه اشي :(
اليوم اكتشفت اشي جديد للتحسس, انا بوصل اخوي عشغلة القريب من البيت كتير كتير ما شاء الله اللهم لا حسد :$ المهم اخوي من وقت ما يركب السيارة لعند ما ينزل وهو برشرش عطر, فانتبهت اني اول ما ينزل من السيارة فورا دموعي بتبدا تنزل و ببدا التعطيس اللي بستمر معي ل 20 او 30 عطسه, وانا بسوق وحالتي حاله, حكيتله و وقفالمسكين شوي, بس حزنت عليه, بدوش يرش قدام الشغل و بدو يرش قبل ما ينزل بالزبط بدو اول ما يدخل الشغل العطر يكون "عفق" على رأيه :)
اليوم حكيتله لا تنسى العطر, انبسط و بدا يرش بحكيلي والله يا ام السوس انت لو في منك 10 كان الدنيا صارت غير, بحكيلو حتى 2 ما في مني, تخيل لو 2 كان برضه دمار, بحكيلي اي احنا بوحده و يا دوب ماشيين,لا يختي خليكي وحده بدنا نعيش :)
مش عارفه مدح ويلا ذم قصده
بس عالقليله الي تأثير :)
فاااا لكل المرضى و المتحسسين بحكيلهم سلامتكم وفترة و بتعدي ان شاء الله
و لميوش وميرا بحكيلهم الحمد لله على سلامتكم يا رب , امبارح رجعو عند بابا قويدر :)
اليوم الخميس والمعظم بعرف اني بحب الخميس
فاااا هاف أ نايس وييك اند يا جماعه