طلعنا فوق الخط....

في خبر بجريده الغد بعنوان اكثر من 100 ضريبه تستنزف دخول الاردنيين

ما بدي احكي عن الضرايب اللي بياخدوها و وين بتروح ولا بدي اجيب سيره رواتب وزراء ونواب, حكينا لشبعنا و قربنا نروح بداهيه من هالحكي فما بدي احكي.

ولا بدي احكي انه طلعت الاردن تاني اعلى دوله عربيه بضرائب الخلوي, لا ما بدي اجيب سيره هالشي.
وما بدي احكي عن الضغط والفعص اللي بعاني منه المواطنين, ولا الطبقيه اللي صارت عنا, ولا ان الناس مش لاقيه تاكل.

ولا بدي احكي عن سيارت الشرطه و المخالفات اللي نازلين فيها, ولا بدي احكي عن المخالفات اللي ما الها معنى و انك بس تروح عالترخيص بتلاقيلك عالقليله 3 مخالفات ما بتعرف عنهم اشي, لااا ما بدي احكي عن هالاشياء.

اللي بدي احكيه ان انا كنت بفكر حالي فقيره و مسكينه و راتبي يا دوب مكفيني, طلعت فوق خط الفقر, وبمسافات كمان.
حتى انت , اه انت اكيد فوق خط الفقر.

همه ( ما بعرف مين همه فما تسألوني) لقو كل شي مرتفع وكل شي غالي , فمراعاه للشعب المسكين حكو نخفض اشي, فخفضو خط الفقر, علشان الشعب يكون مرتاح نفسيا حطو خط الفقر 42 دينار اردني D:

يعني لو انت راتبك 42.009 ازا انت فوق خط الفقر, مش مهم من وين تجيب الاجار و تدفع الفواتير ,والاكل والشرب مش مهم .

هيهم خفضو نسبه الناس اللي تحت خط الفقر ل 13.2% و الراتب الشهري 42 دينار, وايش بتحكو عنهم مش مناح.

الله يسامحكم....

Finally :D

اخيرا بعد نق والحاح رحنا عالعقبه
القرار كان انا نروح ونرجع بنفس اليوم
وبما اني موعوده برحله قريبه للعقبه مع مبيت فوافقت :)

رحت انا وماما وبنات خالتي و خالتي, يعني رحله ستات وبالباص طلع كل اللي معانا ستات :)

كلهم من نفس العيله برضه مرتبين رحله ستات
ما كان في رجال الا السائق و المرافق اللي ما شفنا وجهه ولا سمعنا صوته الا نادرا
كتير كتير انبسطنا والحمد لله
صح كتير تعب بس الانبساط ضيع كل اشي
اترككم مع الصور

aqaba by Omar alabdullat

Fandalism Free MP3 Hosting

صح ويلا غلط؟؟؟

مش عارفه هي حسنه ويلا سيئهه فيي....انا ما بقدر اسكت عالغلط و بحكي للاعور اعور بعينه زي ما بحكو
ما بقدر استحمل الكزب و ما بقدر استحمل ان حد يستغبيني...ممكن امشي اشاياء كتيره بس هالاشيين ما بقدر اسكت وامشي الموضوع, حاولت اغير هالصفه لانها بتسببلي كتير مشاكل مع اللي بتعامل معهم, بس حسيت اني بحاول اغير من افكاري ومعتقداتي, اني بغش حالي قبل ما اغش اللي حولي.

اليوم مثلا , صار موقف بالشغل مع مديري العزيز, السيد مديري الفهيم طلبو منه ينسب اسماء لتشتغل بلجنه معينه عنا بالشغل, و هو بعرف ان قبل فتره المسؤولين عن هاللجنه اجتمعو معي ومع مبرمجه تانيه وطلبو نعمللهم برنامج بلغه اوراكل يسهل عليهم شغلهم, و انا وقت ما حكولي حددي انت مين منكم يكمل معنا باللجنه حكيتلهم اني بفضل يشركونا كمديريه كامله, لانه الشغل بلجنه معينه بترتب عليه مكافأه ماديه, انا حبيت ان الكل يستفيد وخصوصا ان الكل راح يشتغل من قسم الشبكات بتجهيز الاجهزه و قسم البرمجه اللي هو احنا بتجهيز البرنامج وتدريب الموظفين عليه, وحطيت المدير بالصوره واتفقنا ان اي لجنه تيجي نكون كلنا فيها.

المهم اليوم وبالصدفه عرفنا ان مديري الشاطر منسب اسم موظف جديد ما بعرف اساسا يبرمج!!!
مديري العنصري بفضل الشباب عالبنات, بعتبرنا احنا البنات مش خرج شغل, وسبحان الله بالشغل العادي بنكون خرج شغل بس بالشغل اللي فيه من وراه مكافأه او تميز او حتى استفاده بسيطه متل انك تتعرف على ناس جداد بشركات مهمه بالبلد لااااا ما بنفعو البنات, واكتر من مره سمعنا كلام معناه انا احنا البنات ما بصير نشتغل لانا ماخدين موقع المفروض شب يستفيد منه, وان الشباب بدهم يفتحو بيوت واحنا ما في ورانا مسؤوليات, والحمد لله ان مديري ما عندو بنات لانهم كانو انتحرو من زمان.

المهم نرجع للموضوع, انا بس عرفت انه منسب اسم الموظف الجديد انقهرت كتير, ناديت الشب وحكيتله اللي صار و حكيتله ان المطلوب منه برمجه, حكال انه ما بدو اللجنه لانه بس راح ينحط بموقف محرج بس ما يكون قد الشغل, فهمته اني انا مش معترضه عليه شخصيا بس معترضه على اسلوب المدير, وان المدير لو انه عنده اداره صح كان تصرف بطريقه تانيه, وان انا طلب ان كل المديريه تشترك بهاللجنه, وان انا ازا بكره اشي بالدنيا بكره الكزب والكزابين, انا بحكي بمكتبي و المدير قاعد بالمكتب اللي جنبي وسامع كل كلمه, طبعا الشب خف عقله وصار يأشرلي ان المدير بمكتبه, انا بهيك مواقف ما بعرف شو بصرلي, هي جرئه هو قهر مش عارفه بس ما بقدر اسكت, بحكيلي الموظف طيب خلينا نروح نحكي مع المدير, حكيتله انا هيك ناس ما بقدر اتعامل معهم , ما بقدر انافق و اضلي عاديه معهم....

فجأه طلع المدير من مكتبه و راسه بالارض وما حكا معنا ولا كلمه وماعرفنا وين راح, انا صرت افكر , معقول انا اسلوبي غلط!! معقول لازم اغير من حالي و اصير انسنه ب 100 وجه!!! معقول لازم اصير منافقه علشان اخد حقي!!! معقول لازم اصير اعمل تصرفات بكرها من الناس علشان اوصل للي بدي اياه واللي هو المفروض يكون الي اساسا!!! معقول...معقول....

شوي بتتصل فيي وحده من اللجنه بتحكيلي صاير عندكم اشي؟؟؟ بسألها اشي زي ايش؟؟ حكتلي ان مديرنا رايح عندها وطالب الكتاب اللي نسب فيه اسم الموظف و معطيها بداله كتاب منسب فيه اسماء كل اللي بالمديريه!!!
وحاكيلها اي لجنه من اليوم بدي كل الموظفين يكونو فيها.


شو يعني؟؟؟ اللي بعمله صح؟؟؟ ويلا هو فكر لقى ان هاد الاشي اللي لازم يصير؟؟؟
انبسطت بالبدايه, بعدين انقهرت...
انا مش شخصيه عدائيه بطبيعتي, بس مديري بضطرني اتعامل بطريقه انا ما بحبها, ليش لازم دايما احارب علشان اخد حقي, ليش لازم تنشد اعصابي , ليش لازم ينسم بدني, ليش ......

كيف تشوه هوليوود صورة العرب ؟؟

فيلم وثائقي جريء للأمريكي " جاك شيهان "

يستعرض فيه الصور السلبيه التي تبثها هوليوود في افلامها عن العرب و المسلمين, وذلك من خلال مراجعه 1000 فيلم امريكي.

و قد تحدث "جاك" عن درايه كامله بالموضوع حيث انه كان مستشارا في شؤون الشرق الاوسط لقنوات تلفزيونية عملاقة من حجم " سي بي إس"، اضافة الى تعامله كمستشار فني مع شركات انتاج امريكية كبرى، واهتمامه بهذا الموضوع مدة زمنية تفوق ثلاثين سنه.

و ذكر في الفيلم الوثائقي بان العربي في السينما الامريكية رديف لكل معاني العجز، البلادة والغباء، والكبت...و دائما ما يرتبط وجود العرب بالفيلم بوجود الحيوانات من حولهم من جمال و ماعز و دجاج, وبان الانسان العربي خال من المشاعر الانسانية والقيم النبيلة،مختطفون وارهابيون ودائما ما يتعاملون بالاسلحه.

و ذكر ايضا ان بعض الافلام تعرض مشاهد مسيئه للعرب حتى وان كانت قصه الفيلم لا علاقه له بالشرق الاوسط, ولكن فقط لذكر العر ب و الاساءه لهم وتصويرهم باحقر الصور والصفات.

ولم يخلو الفيلم من ذكر كيف يتم بالافلام الامريكيه تشويه صوره الفلسطينيين و عرضهم كارهابيين , عديمي الانسانيه, اشرار ولا يستحقون اي تعاطف, وقد اعزى "جاك" ذلك الى ان منتجي معظم تلك الافلام هم اسرائليين.

الخلاصه العامة للفيلم : العرب هم الشعب الاسوأ ظهورا في انتاجات هولييود عبر تاريخ الانتاج السينمائي الامريكي عامة ...

يمكنكم قرأه المقاله كامله هنا

رعبه عمري :"(

اليوم ارتعبت رعبه حياتي :"(

اليوم طلعنا انا وماما و قريبه النا على سيتي مول, لفينا شوي بعدين تزكرت ماما ان في ناس حكولها ان في من الجلايات الصغار اللي بتدور عليهم ماما من مده بكارفور.
طبعا ما لاقينا منها و لفينا شوي و اشترينا اشياء ما الها لازمه كالعاده :) و روحنا.

و احنا مروحين تزكرت ماما انهم حكولها عن محل بخلدا ممكن يكون عندهم من هالجلايات وكان الوقت المغرب بالزبط, رحنا هناك و ما لقينا مكان نصف فيه السياره, حكيت لماما خلص انتو روحو وانا بستنا بالسياره, ماما ما رضيت وحكت ما بتركك بالسياره لحالك, حكيتلها شو بده يصيرلي يعني وهي الدنيا عامره.

المهم بعد اقناع نزلت ماما و قريبتنا وانا ضليت لحالي بالسياره, سكرت الشبابيك و سكرت البواب, و ضويت الفلشر, و شغلت الراديو .

ما بنكر اني شوي خفت و كل ما سياره توقف يصير قلبي يدق, بعدين حكيت لحالي شو هالهبل دعيت شوي :$ و هديت

فجأه شب ماشي جنب السياره,وقف و دقلي عالشباك, انا هون مش خفت لاااا انصرعت حطيت ايد عالزامور و ايد عمفتاح السياره بدي اشغلها.

ال يا اختي بس افتحي الشباك اشرحلك وضعي, اشرتله بايدي انه الله يبعتلك,عاساس انه انا عادي ومش انو قلبي بدو يوقف , فجأه سمعت صوت ماما, طلع الشب الشحط اللي طول الحيطه ال بشحد, لو سمحتي بس تعطيني دينارين بدي اروح عضاحيه الامير حسن.....مش عارفه شو حكتله ماما- لاني بمنتهى البساطه ما سمعت من صوت الونّه اللي صار براسي- المهم مشي الشب وركبت ماما و قريبتنا السياره, ماما بتطلع على وجهي انا سويت اني عادي ولا متت رعبه ولا نشف دمي, و سألتها شو لقيتو اللي بدكم اياه , و برضه ما سمعت الجواب لاني ضليت اركز ان قلبي يهدي الدق شوي و يرجع مكانه بعد ما صار برجلي :$

بالبيت بحكي لماما اني متت رعبه بس ما حبيت ابين, بتحكيلي ماما مهو كان واضح من وجهك الاصفر و صوتك اللي برج.

بس جد عمري بحياتي ما خفت لهدرجه :"( اخر مره بضل بالسياره لحالي....قرار نهائي