أخو امك يبقى....عمك !!!

لأ ما تتفاجئو ....بتصير صدقوني :)

هلأ بالعاده او الطبيعي ان اخو امك يبقى خالك, بس بابا اخو امه بكون عمّه....كيف؟؟؟ انا بحكيلكم

هلأ خلينا نعطي اسماء لنفهم الموضوع, انا شخصيا بابا رسمها رسم لافهمها :)

في اخين "علي" و "ابراهيم" ....علي متزوج من سميره و ابراهيم متزوج من هدى..

علي و سميره جابو ولد سموه "محمد"

ابراهيم و هدى جابو بنت سموها "عايشة"

سميره توفت....وبعدها بفتره ابراهيم توفى

فأصرّت العائله ان "علي" يتزوج "هدى" خصوصي ان هدى من مصر وكل اهلها موجودين هناك, صارو اهلها بدهم اياها ترجع عندهم وصار مشاكل على موضوع تاخد البنت معها او لا و طبعا اهل الزوج المتوفي بدهم بنتهم تتربى عندهم و حرام البنت تتربى بعيد عن امها - احداث حقيقيه .... ايون تيتت بابا من مصر .... علشان هيك خفة الدم طلعت زياده , خليط من خفّات الدم :)

المهم علي و هدى تزوجو و جابو ولاد و بنات... " ابراهيم" و "فاطمه" و "مريم" و "صالح" و هدول الاولاد و البنات صارو اخوان ل "محمد" واخوان و خوات ل "عايشة" ..... وسبحان الله بس كبرو "محمد" و "عايشة" تزوجو :)

"محمد" و "عايشة" همه تيتا و سيدو :) و بهيك صار اخو ام بابا بكون ....عمّه :)

خالاته همه نفسهم عماته ...وخواله همه نفسهم عمامه :$

مش عارفه حلو ويلا مش حلو, سألت بابا بحكيلي "عادي" ...

و توتا توتا ...خلصت الحدوته :)

يلا فرفشو سنانكم و اطفو الضو و نامو....تصبحو على خير :)

بابا

انا اكيد بحب بابا كتير, لكن بعد ما اشتغلت و خصوصا بس ارجع عالبيت واكون كتييييييير تعبانه وما بكون نفسي حد يحكي معي, بحب بابا اكتر و اكتر, مرات بروّح عالبيت ما نفسي حتى اكل من كتر التعب و بس نفسي انام, كيف بابا كان يستحمل و يضل مبتسم و يضحك معنا و يضحكلنا.

و احنا صغار كل يوم بس بابا يروّح من الشغل, وكل يوم يعني كلّ يوم, و حتى فترة ما اشتغل بابا بمادبا و كان يجي وجهه احمر من الشوب, لازم انا و اخواني التنين نتخبّى و بابا يدور علينا بالبيت, طبعا كانت ماما تساعده بأنّه يلاقينا وبعديها فهمت ليش ماما كانت تترجانا كلنا نتخبى بنفس الغرفة, و كان يدور علينا و يعمل جو سسينس ليلاقينا , و "كأني شامم ريحه فلان هون".." كأني سامع صوت نفس" و بعد ما يلاقينا كلنا, لازم نصف و كل واحد يركض على بابا و بحكم ان بابا طويل ما شاء الله فلازم يحملنا و يرفعنا و يرمينا لفوق لنلمس السقف :) هالشي ياخد اقل شي ساعه و بعدها يغيّر و ناكل.

غير طبعا اللعب بالطابه و قعدات حكي القصص و الذكريات خصوصا بس تنقطع الكهربا, كلنا نتمدد على تخت بابا و ماما و يبدا بابا بحكيلنا عن مغامراته ايام زمان :)

و بتزكر لمّا كان بابا يسوق جوا نفق, ما بعرف اي نفق, كان طويل و شوي على دائري و فيه اضوية , كان لازم بابا يضل يزمر من اول ما ندخله لحتى نطلع منه و احنا " هاااااااااااااااااااااااااااااااااااااااااااااااي" كل مرّه كل مرّه نمشي فيه لازم يعمل هيك والعالم اشي يزمر معنا و اشي يزعل و يكشّر بفكر بابا بزمر اله, واشي يأشر و يشبر وبابا ولا عنده مشكله مدام احنا مبسوطين

حاليا هالشي عملته مع فرّوحه, حبيبتي طلعت زينا, او يمكن زي كل الصغار بتحب الانفاق, صرت ازمر و ما عندي اي مشكله, و اخوي بحكيلي انه بس يرّوح من الشغل لازم تنط عليه فروحه و يرفعها لتلمس السقف, واخوي التاني بحكي انه اول مايدخل البيت عبود بصير يركض ليتخبى و هو يدورعليه و كل ما طول ليلاقيه كل ما عبود فرح اكتر

سبحان الله كيف الدنيا بتلف وكيف مشاعر و اشياء ما كنّا نقدرها ولا نفهم معناها بس نوصل لعمر معين او وضع معين بنفهمها و بنقدّرها

كان بابا يحكي لاخواني" بس تصير اب بتفهم "و ماما تحكيلي " بس تصيري ام بتفهمي" و طبعا بوقتها كنّا نحس انها نصائح و مبالغ فيها,لكن سبحان الله هلأ بس خواني جربو يصيرو اباء الحمد لله بحكولي انه شعور غريب غير عن كل المشاعر اللي حسّو فيها بحياتهم.

الله يخليلنا اباءانا و امهاتنا ويقوينا لنكون و نضل مرضيين يا رب ...والله لا يحرم حد من الاولاد

مساكم و صباحكم ورد وياسمين :)