Happy 3rd birthday to my 2esas 6arma AKA hamsati

طولت الغيبه و اشتقتلكم كتير, احداث كتيره و تطورات جوهريه اولها سفرتي القصيرة السريعه للاردن و اخرها انتقالي للاستوديو الجديد , بحكيلكم التفاضيل قريبا ان شاء الله, للتشويق و لحتى الزم نفسي بتدوينه تانيه قريبه :)

ولكن الحدث الاهم لليوم وهو عيد ميلاد مدونتي الثالث :)

بعد 3 سنين من توجيع راسكم ما زلنا مستمرين بالعطاء المتقطّع احيانا او غالبا بعالفتره ولكن نعدكم بالاستمرار القريب باذن الله

3 سنين تعرفت فيها على احلى و اغلى ناس, 3 سنين تعلّمت فيهم دروس قيمّه و مفيده, 3 سنين تشّرفت بمعرفة ناس اثرو فيي كتير و ساعدو بصقل جزء من شخصيتي بكتشفه جديد و انا معاهم

3 سنين و عائلتي و اصدقائي بكترو و لله الحمد

680 تدوينه...139 متابع .....57 متابع من الفيس بوك...9985 تعليق....196,560 زائر :)

بدي اشكركم فردا فردا على تواجدكم معي دائما و لكن بخاف انسى حد لهيك ...لكل شخص شرفني بمروره ما بين هالصفحات و لكل شخص اسعدني بتعليقاته ولكل شخص ساعدني باني امشي خطوه للامام .... نصحني...ضحكني ورسم البسمه على وجهي..... دفعني للتفكير ...دفعني لمراجعه اعمالي و افكار.....ايدني...خالفني..

شكرا جزيلا على تواجدكم بحياتي و شكرا لدعمكم المستمر شكرا انكم خليتوني اكتشف نفسي من جديد

و بدي تسمحولي اخص بالشكر Qwaider Planet اللي عن طريقة عرفتوني و تعرفت على مدونين و مدونات بعتز بمعرفتهم

كل عام و انتو بالف خير.... وكل عام و مدونتي الغاليه على قلبي جدا بالف خير :)

متى ما عشّر دشّر

مسائكم فل و ياسمين...و صباحكم بما انه الدنيا الصبح هلأ :)

اشتقتلكم كتير و فعلا على رأي صديقنا يوسف, رمضان معكم احلى , بس الي فتره بعيده عن النت بشكل عام, بفتح شوي عالموبايل بوقت البريك بقرأ شو بتكتبو و بتابع اخباركم بصمت.

بدي احكي لنيسان عظّم الله اجركم حبيبتي و ربنا يصبركم على فقدان الوالد, و ان شاء الله ربنا يتقبله و يدخله فسيح جنانه.

بدي احكي للبؤتنا القمر و لصديقنا ابو زينه....تقبل الله طاعاتكم و دعواتكم و عمره مباركه, ان شاء الله ربنا يستجيب لدعواتكم اللي الكم واللي النا, وابو زينه, حتى لو دعيت باسم ويسبر ان شاء الله بتوصل الدعوات :)

بدي احكي لام عمر الف سلامة يا قمر....وموضوع الدوخه هاد تاني مره بتحكي عنه و ما بنسكت عليه, يا بتروحي عالدكتور يا بتضطريني اجي عالاردن و اخدك بنفسي.....ديري بالك صاير راسي ايبس من قبل و بعملها :)

صرنا 11 رمضان كانت مميتي الله يسهل عليها تحكيلنا متى ما عشّر دشّر و فعلا حاسة رمضان بركض ركض السنه :(

ما في شي جديد , من البيت للشغل و من الشغل للبيت و ايام الاجازه بقضيهم مع اخواني و اطافيلهم, مبسوطه كتير بس من غير شر غياب بابا و ماما اله تأثير قوي, اكتشفت اني من اول ما اجيت عالامارات و انا بحوّش رصيد مجاني بالموبايل و بخلص ب 15 الشهر فخصصت تلفون يومي لا يقل عن نص ساعه دردشة وحكي مع بابا و ماما بالبريك تبعي بالشغل, بنحكي بكل شي وعن كل شي شو طابخين و شو صار ومين اجا و مين راح , الحمد لله الموضوع خفف عني كتير.

بالنسبة للصيام و الشغل في الصباحي بوصل البيت مع اذان المغرب, وبالمسائي بوصل الشغل قبل اذان المغرب و بنفطر بالشغل , كل شفت shift اله طريقه بالفطور بالنسبة النا المسؤول بجيب فطور كل يوم للجميع, و اللي بدو يجيب اشي من البيت يجيب و الجميع بتشارك, بخصصو غرفتين وحده للستات و وحده للرجال و الحمد لله هالشي طلع بس بالشفت بتعنا و الباقيين مع بعض باكلو :$ كلنا مبسوطين انا لحالنا, احنا البوانيت 5 المسلمين بالشفت , 2 اوزباكستانيات و وحده باكستانيه و مواطنه وانا, و كل وحده بتجيب شي و بندوق بعض اكلاتنا , و اكتشفت اشي اسمه الهريس الاماراتي و حبيته كتير :) لكن ما قدرت اكل اكتر من معلقه لانه دسم كتير, بس نخلّص اكل بيجي مراسل بمسك كل الاكل بخبي جزء منه للسحور لباقي المراسلين و الجزء التاني بلف على كل الاقسام يوزع على المراسلين الغير مسلمين علشان ياكلو منه, و عالسحور برضه بعطونا بريك.....ايون بطون وقت السحور بالشغل :) فالحمد لله ما في اكل بنكب و الكل باكل و بشبع, انا عملت معكرونه بالباشميل و عملت صينيه خضار باللحمه و مش انعجئت ولا اني حكيت مع ماما 5000 مره - هي مرّه بس علشان التهويل :) - غير ان كل الاردن وكل دبي عرفو اني طبخت, فرصه نطلع صيت حلو يعني

عم بستغل فترة تواجدي بالباص و بقرأ قرأن ايام الدوام و بفتره الاجازه كمان و الحمد لله ماشيه منيح, كنت خايفة ما يصحلّي فرصه و اقصّر, وصلت للجزء ال 18 :) ان شاء الله اقدر اختمه اكثر من مره

بالنسبة لصلاة التراويح بالمسجد, اول ما اجيت عند اخوي قررت اروح و شفت العجايب, مستحيييييييييييييييييييل الوضع, مش ان كل ام جاي و جايبه معها الكبير والصغير و المئمّط بالسرير - ستي الحجه ويسبر اليوم مع الامثال :) - من اول الصلاه لاخرها غير اللي بلعب و بنط و بتطاوش و بلحق في 5 ببكو بنغمات مختلفة و بدرجات مختلفه, اشي بنرفز من الاخر, غير اني حسيت حالي مش بس ما خشعت ولا ركزت لا حسيت حالي كسبت اثام قد ما حكيت عن الامهات بيني وبين حالي, اذا في ولد ملبسته الست الوالده صندل من اللي بزمرو و سارح الاخ بين الصفوف و توت توت توت توت, وقف مكان السجود قدامي صرت ادعي ربنا يزيج, بدي اسجد يا جماعه و الحمد لله ربنا هداه و تحرك, و شوي وقع و بدا بكا و خلصنا الركعتين و ما حد اجاله و بدينا بالركعتين التانيين و لسا الولد ببكي و بنصهم قامت وحده من اااااااااااااااااااااخر المسجد حملته, حكيت عليها بيني و بين حالي لقلت بس .....و انا بنص الصلاه :( يعني الله اعلم كم السيئات اللي اخذتها, فااااا قررت ما اروح لاني عرفت من مرة اخوي ان كل المساجد هيك وضعها, و قررت اضل على صلاة التراويح بالبيت احسن و افضل و بخشع براحتي.

هاي اهم واخر اخباري, ان شاء الله تكونو كلكم بالف خير و ما اكون وجعتلكم راسكم بكتر الحكي....الليله اجا عبالي اكتب شو اعمللكم ....سامحونا :) ولا تنسوني من الدعاء

رمضان كريييييييييييييييييييييييييييييييم

اول شي كل رمضان و انت بالف خير يا رب و ان شاء الله ربنا يتقبل منا صيامه و قيامه و يقدرنا ما نقصّر باي عباده و خصوصا المفهوم الرئيسي لشهر رمضان, ما بدنا طبايخ كتير وما بدنا نضيّع وقتنا بالطبيخ و العزايم, نزيد من نوافلنا و نزيد من دعائنا و تقربنا من ربنا و ان شاء الله ما ينتهي هالشهر الفضيل الا و ربنا مكرمنا بيعتق رقابنا اجمعينمن النار.....اللهم امين.

رمضان السنه غير بالنسبة الي, بس بدي اتفائل و ما اكتئب, هو اي نعم ما في "اهلا اهلا يا رمضان اهلا وسهلا يا رمضان" زي كل سنه , ما في بوسة ايد بابا و ماما الله يخليلي اياهم يا رب و سماع رضاهم بمناسبة اعلان رمضان, وما في صلاة تراويح بالمسجد من اول اعلان لرمضان و شوفة الجيران و الاصحاب و اصدقاء المسجد زي كل سنه, ما في قيام ليل و احياء العشر الاواخر في المسجد زي كل سنه, بس الحمد لله ربنا اكرمني بان خواني يكونو معي و ما اضل لحالي بكل ما تعنيه و تحمله الكلمه من معنى موحش :)

اشي تاني وهو انّا لازم نبدا هالشهر بصفحه جديده و قلب جديد صافييييييييييييي ابيض , لا فيه حقد و لا غل و لا كره لاي شخص بهالدنيا, و قبل ما نطلب هالشي من الناس المفروض نكون مطبقينه....فااااااااااااااا من موقعي هذا بدي اعترف ان في اشخاص بحياتي مش قادره اسامحهم :( اه الاعتراف بالذنب فضيله, في اشخاص مش قادر قلبي يسامحهم و كتير بقعد اتحاور مع نفسي ان ليش هيك وان ربنا راح يعوضني خير و يجازيني على مسامحتهم بس مش قادره :( الله يقدرني على الوصول لهالدرجه من شفافيه القلب و قوة الايمان لاقدر اسامح كل الناس.

بعيدا عن العيله اللي فوق - اه هي عيله كامله علشان تعرفو قديش قلبي اسود- فاااااااا من موقعي هذا اعلن اني مسامحه كل شخص اذاني و كل شخص استغابني و كل شخص ذكرني او ظن بي السؤ, مسامحتهم دنيا و اخره, مثلا لمّا زرت ام عمر و حكينا عن كل مدون و مدونه بالخير طبعا و على سيرة الكعك ذكرنا عمو صال صال و حكيتلها مش فاهمه هو عمو و يلا مش عمو ؟؟؟ يعني كبير؟؟؟ حكتلي اه كتير اكبر منا , بحكيلها كم يعني , بتحكيلي 34 او 35!؟!؟!؟ و انا بهديك اللحظه كنت 34 O_O فلكم ان تتخيلو مشاعيري اللي تبعثرت, كرهتها ...ليش الكزب كرهتها لفواني معدوده بس انفش قلبي بس سمعتها كم كلمه عن انو بالله عليكي و شو قصدك والله يسامحك :(, هذا على سبيل المثال لا الحصر, فااااا ام عمر...الله يسامحك :)

اشي ثالث, هلأ ظروفنا مش متشابهه في اللي ظروفه بتسمحله يصلي كل صلاه بالمسجد و اللي بتسمحله يقوم كل ليله, عفكره قيام الليل مش معناته ما ينام الواحد , قيام الليل حسب ظروف الشخص ما بين صلاة العشا لصلاة الفجر, خلينا كل واحد قد ما يقدر يحاول يقوم ولو جزء بسيط من الليل ندعي لانفسنا و ندعي لغيرنا و ندعي ربنا يفرجّها على الجميع ولا يمكن انكم تتخيلو قوّة الدعاء و اثره على حياتنا, لانه حتى لو ما صار الشي اللي بندعي اله عالقليله بنعرف ان ربنا الذي لا يرد الدعاء مخبيلنا اشي احسن و ممكن اللي بندعي بحدوثه يكون بظهره خير النا و لكن باطنه سيء فربنا بتقبّل دعائنا بانه يكتبنا الخير ولكن في وقته.

كل رمضان و انتو بالف خير....سامحوني جد اي شخص اسأت اله و اكيد ما كان قصدي فبتمنى انه يسامحني و اللي حامل بقلبه علي فيبعتلي تعليق وما راح انشره و انا بعتذر منه مقدما :) .....و لا تنسوني من دعائكم قبل الافطار, كتير مهمه هاي, ادعوووووللللليييي باي شي بتدعوه لانفسكم علشان ما تتغلبو بالتفكير و انا راح ادعيلكم اكيد :)

عالم غريبه

اشي كتير شفته و مر علي هون بدبي و كتير استغربته, التصريح بانك كفتاه مسلمه بتشربي و بتروحي على Night club و بتعملي علاقات كامله غير مشروعه مع الشباب و انك ما بتصلي و"اعوذ بالله " ما بتصومي - حرفيا انحكت قدامي- شي بتتفاخري بانك تذكرية بكل جلسه و شي ما بدفعك لانك تستحي على دمك, بنمشيها و بنحكي ان العالم حرّه بحالها و قحه مش وقحه مش مشكلتنا .

لكن انك تيجي وتحكيلي " الله يعينك ما بتسهري " و بتعتذري مني انك بتسهري وبتيجي تحكي عن مغامراتك وان انا قاعده بالبيت , فمن الطبيعي اني افهمك وجهة نظري فيكي و افهمك ان القعده بالبيت و عدم السهر مش الحجاب اللي بفرضه علي لا انا اللي بختاره, انا بختار اكون غاليه بنظر نفسي و نظر الناس و ان كل بنت بامكانها تبيع حالها و بامكانها تكون رخيصه بس هي اللي بتختار مكانها بالزبط و انا مكاني فوق ...فوق كتير وما حد بسترجي يتطلع علي مش اني اكون لعبته.

و بس تحكيلي اطلع معك مع باقي الشلّه, فبرضه بحكيلك اني ما بشرفني انشاف معك و لا بشرفني لقب صديقة فلانه

حوار طويل عريض مختصره ان الاخت مفكرتني "كبيره" و "يأسانه" و انو "اكيد لسا الا ما تلاقي حد يعجب فيكي بس انت تلحلحي شوي" و بعدين وصلت ل " لا تكوني معقده و متزمته و هالشي ما راح ينفعك" فاضريت احط النقط عالحروف ...المشكله انها لساتها مصرّه تضلها تحكي معي O_o

لنكتب عن....انعدام الحوار و رفض الرأي الاخر/ شهر تموز

اختلاف الرأي يفسد كل قضيّة

من واحنا صغار علمونا اهلنا ان عيب الواحد يتدخل باللي ما بعنيه, واللي بعنيه برضه بما انه عيب تضلك تسأل و عيب تناقش اللي اكبر منك, كبرنا و ضلّينا نعاني من نفس الشي لانه دائما في "الاكبر" منا....دخلنا المدرسة تعلمنا انّا ما اناقش المعلمه و لا المديره, اللي بحكوه هو الصح لانهم اعلم منّا بكل شي, , كبرنا اكتر وبكل سنه كبرنا فيها لقينا الشخص اللي بعرف بكل شي و ممنوع تناقشيه لحد ما صار عند بعضنا عقدّه خلته يصير بس يحكي يسمع صوت حاله بما انه ما حد بحب يسمع صوته, حتى مع نقاشاته مع التانيين برضه بس بسمع صوته, جزء تاني المشكله و العقده عنده تأثيرها اكبر ,صار عنده مشكلة تفسير رد اي حد بخالفه الرأي انه اهانه شخصية اله, وصار خلاف الرأي يفسد كل قضيه و بقلب الدنيا رأس على عقب.

تعلمنا نسكت و ما تعلمنا نسمع , نسكت بالغصب و مرات ما نضل مركزين سبب اسكاتنا لانّا بنسرح في عالم المناقشة مع الذات بسبب التجبر و الظلم اللي واقع علينا من كل الاتجاهات, فراحت علينا, لا تعلمنا نعرف الاسباب و لا تعودنا نسمع, و المشكله الاكبر ان اللي حوالينا برضه تعودو على صمتنا لهيد اذا لا سمح الله حاولت تحكي و لا قدّر الله انسجمت شوي و خالفتهم الرأي فراحت عليك, الكل مقتنع انه اعلم واحد و اعرف واحد, كل واحد فينا في محلل سياسي و معلق رياضي و قارئ و كاتب و راقص باليه في شخصه, فهو رأية الصواب و اي رأي تاني فهو غلط.

نوع جديد تعرّفت عليه هوّن علي كل الاصناف السابقه, هالنوع اللي بحب بس تسمعله, حتى لو كنت مؤيد للي بحكيه ما بعجبه, بدك تكون محاور صامت, بس تبدي ايماءات و اصوات ايحائية باعجابك باللي بحكيه و حتى بهاي ما تبالغ لانه برضه ما بعجبه و بعتبره نوع من انواع المقاطعه.

مش عارفه وين اساس المشكله....ان اهلنا عودونا نسكت مش نسمع؟؟؟ ويلا لانّ في كل مرحلة كان في كبير لازم ما اناقشه؟؟؟ ويلا لانّا انقمعنا صرنا نمارس نفس وسيلة القمع اللي عشنا فيها؟؟؟ويلا العيب فينا اللي سكتنا دهور لحتى صرنا بس نحكي ما حد يسمع صوتنا لانهم تعودو علينا ما نتخنفس؟؟؟