Happy Birthday to AbduAllah :)

كل عام و حبيبي عبودة ابن اختي الغاليه سوزان بالف خير

العمر كله يا عبودة تقضيه بحياة حلوه

كلها ابتسامات و نجاحات

و ان شاء الله بنشوفك بروب التخرج

و بعديها بنشوفك ببدلة العرس يا احلى عريس

كل عام وانت و عائلتك بالف خير عبوده :)

عبودنا بعشق اشي اسمه توماس

ان شاء الله يكون عبودة بحبه كمان :)

اخر اخباري :)

الصوره بس علشان بعض ناس ما عندهم فيسبوك :)

مسائكم سعيد

اول شي بدنا نبارك لصديقكم هيثم الشيشاني على قبول البعثه و بدنا نبارك لصديقنا جعفر اللي خلّص ترجمه الكتاب و بنحكيله الله يعطيك العافيه

ثاني شي اخباري

الحمد لله يوم عن يوم عم بتأقلم شوي شوي...هو اي نعم امبارح حكيت مع ماما و ضلينا طول المكالمه نبكي بس اللي هون الموضوع ان ماما ان شاء الله قريب بدها تيجي و بالسكن بصير ماما تنام عندي :) فصرنا من هلأ نتقاتل انا واخوي وين بدها تنام عندي ويلا عنده :)

بالنسبة للسكن فانا كنت طالبه من قبل ما اجي غرفة مستقله و كان كل شي تمام و بس اجيت حكولي بدك تستنى ليتوفر و المفروض هاليومين يردولي خبر, كتبتلهم 10000000 ايميل و قززتهم لاني تقريبا ما بنام :( انا البنت الوحيده و طول عمري لحالي بالغرفه ومش متعوده حد ينام معي و غير ان نومي خفيف جدا فكل ما تحركت المسكينه بصحى :( و غير ان وقت دوامها غير عني فبرضه بضل اصحى و هي ماشاء الله بس تكون نايمه لو اشغّل الدنيا كلها ما بتتحرك, المهم رحت قبل كم يوم لواحد من المسؤولين الكبار و حكيتله عن الوضع فاخد رقمي الوظيفي و وعدني خير ان شاء الله :)

امبارح اجت بنت ثالثه عالبيت , جزائرية عايشه بفرنسا وما بتعرف تحكي غير فرنسي و انجليزي مكسر - هيثم اقعد قاعد - بسرعة انسجمنا و اليوم قضينا الثلاثه مع بعض يوم كتير حلو الحمد لله

بالنسبة للشغل فحاليا كله تدريب و امتحانات, علامة النجاح بكل امتحان 80% وما بصير تنتقلي للتدريب اللي بعده الا بس تنجحي و محسوبتكم ماخده الموضوع جد ونازله نحت :)

الشغل ممتع و اشي جديد, اه صحيح انا ما حكيتلكم اني بشتغل اشي مش تخصصي :), مش انو مش تخصصي لا اشي ولااااااااااااا اله دخل بس خبره جميله جدا , موضوع كنت انا جاهله فيه تماما و حاليا عم بتعلم تفاصيله :) قدمت للشركه على شغل مبرمجه و بعتولي حكولي انه ما في وظيفه حاليا و نصحوني اقدم لوظيفتي الحاليه و حكولي ان سياسة الشركه ان بعد سنه بكون الي الاولويه اقدم على اي وظيفة تانيه ولو عندي الحد الادنى من الخبره و الحد الادنى من الدورات فألي الاولويه بشرط ان تقييمي يكون ممتاز وهاد اللي انا شغاله عليه, اشتغلي منيح بكون تقييمك ممتاز لا واسطه ولا استنصاد ولا اشي زي عنا بالزبط :$ وتغيير الشغل هو اللي راح اعمله ان شاء الله بس اخلّص السنه, المسؤولين بس عرفو اني برمجه حكولي انهم راح يستغلو فتره وجودي :) .... الوضع اجمالا حلو , جنسيات مختلفه و انجليزي طول الوقت, لانه اساسا منوع تحكي خلال فتره الشغل غير انجليزي , لهيك قررت اعمل صفحه و اصير اكتب فيها بالانجليزي و انتو تصيرو تصلحولي الاخطاء و تعطوني كلمات جديده بديله للكلمات اللي مش كتير رسميه عندي :)

اهدافي لهالسنه ان شاء الله هي كالتالي

اني اخد غرفه لحالي, اني اغير الوظيفه بعد سنه, اني اخد الرخصه , واني اشتري سياره لان العيشه بدبي بدون سياره خنقه من الاخر, في عنّا مواصلات خصوصي للشغل وفي مواصلات بساعات معينه تودينا عالمولات و لكن برضه مش دايما وقتهم مناسب النا.

ايش كمان....اه محسوبتكم صارت حرّيفة طبيخ و حلويات :) في عنّا بريك للغدا بس كل المتوفر فاست فود و الوضع هاد ما بمشي معي, بفطر الصبح قبل ما اطلع , عال 6 الباص بطلع فبصحى عال 4:30 بصلي الفجر و بجهز حالي, و بشرب نسكافيه بالشغل و برجع بتغدى بالبيت, الا اذا الجوع كان عامل عمايله فيي فبشتري و لكن اني اكل برجر كنج و هالقصص يومي فهاد دمار شامل للدايت اولا و للجسم بشكل عام

الجو هون حريقة والكل بحكيلنا لسا ما شفتو الشوب استنو لشهر 8, الرطوبه خنقه و الحراره بتوصل ل 49 زي مرحبا , و بننتقل من كونديشن لشوب لنركب الباص و لكندشن مره تانيه الله يستر من مرضه لان كل اللي معي مرضو :(

وبس :)

ملاحظه ع الهامش

صديقي كعكي ان شاء الله يكون هالبوست كفّا و وفّى و استناني في بوست عن الصدمه الحضاريه اللي صابتني هون بدبي :)

حكي بدون سبب

كتير بستغرب كيف بعض الناس بتفكر مرات

يعني كيف بتوقعو ان المشاعر و الاحاسيس عبارة عن كبسة زر؟؟؟

او شي مؤقت بعد فتره بنعمللهم ريسيت و كأنهم ما كانو اساسا؟؟؟

كيف بقدرو انهم ينتقلو من دور لدور بمنتهى البساطه؟؟؟

مش عارفه هو انا و اللي غير و يلا هالعالم اللي غير, انت بس تجرح بني ادم الوقت ما بشفي ابدا, ممكن استمرار الحياة بلهي و لكن الانسان بعمره ما بنسى جرح, بعمره ما بنسى ان هالانسان اذاه...ان هالانسان اخد منه اشي كتير مهم , اي لحظه بحياة انسان اي مشاعر ثقه اي مشاعر تقدير او اعجاب هاي كلها بنظري اشي كتير عزيز عالانسان وما بعطيها لاي شخص و بتروى كتير و بدور كتير ليعطي هالمشاعر و يوجهها لحد ولما يكون هالانسان مش على مستوى الثقه اللي بتعطيه اياها بانه يقدر هالمشاعر و يحافظ عليك و عليها فهو انسان صعب انك تتعامل معه

انا انسانه مشاعري كتير غاليه علي و حافظت عليها وما وزّعتها هون و هون و بنظري اذا حد وصلني لمرحله اني اثق فيه و اتعامل معه بكل حرّيه و ادخله حياتي و احكيله ادق ادق التفاصيل وما احترم هالشي فانا هالانسان بعتبره خان الامانه اللي توقعته انه بستاهل يتحملها, ما بنكر اني انا كمان بتحمل جزء كبير من المسؤوليه بالوقوع دائما بنفس المطب و هو الثقه بالناس اللي مش اهل الها و لكن برضه ما بتهون علي نفسي انه حد يأذيها ولو بنفخه هوا

بدعي ربنا يبعد عنّي و عنكم مثل هالناس ..... وبدعي لكل شخص انقرص قبل انه ما يوقع بنفس المطب مرّه تانيه

ربيع وادي السير

من ضمن فعاليات النادي اللي كنت اروح عليه في رحله تحت شعار " افلا تتفكرون..." و كانت لمنطقة بوادي السير قريبه من عراق الامير, هي زي حديقه لو الاهتمام فيها كان اكبر كان طلعت بتجنن, مي و خضار و لكن قلّة نظافه كبيره, او يمكن مقصوده لتصير مكان للطحالب و الضفادع !!!! مش عارفه المهم انّه كان يوم حلو كتير قضيته مع مميتي و مع خالتي وبنت خالتي رفيقات النادي :)

بداية كانت بصلاة الضحى قبل الانطلاق

هاي ملبسة وزعوها علينا و حكولنا انها من "الضفة"

على زنجبيل وانا بحب اي شي من الضفة و اي شي على زنجبيل :)

كل شي كان بجنن و الحمد لله, الفطور و الغدا كان مشاركه, كل وحده بتجيب طبق و بنحط كل الاطباق و الكل بياكل من كل شي

مميتي كانت عامله كبة بالصينيه

وانا جبت حلو من عند عرافات " قراقيش"

و كل شي كان تمام

لعند ما اجت الاخت و ما لقت غير تقعد جنبي و تعكنن علي :(

هالسحسيله الكبيره من يوم يومها بتلفت نظري و نفسي لو انها كانت على وقتنا

و بما انه ما حد كان موجود حواليها غير انا و بنت خالتي و ولدين صغار

فااااااا

استغليت الموقف :)

صورة من فوق للتذكير :)

صوت الضفادع كان كتير قريب ومش عارفه من وين

طلعو الاخين عم يتشمسو وراي بالزبط :$

لنكتب عن "اسباب تأخر سن الزواج....مع ام ضد " في شهر ايار

هلا ما في خلاف ابدا على ان الزواج نصيب و شي مكتوب من الله سبحانه وتعالى و ما في شي ممكن يغير هالواقع, يعني لا تلحلحي ولا تزبطّي ولا تجملي واللي بالعربي بتعني اكذبي و نفس الشي للرجال برضه, هو نصيب

انا عمري 34 سنة ومش متزوجه و هالشي يعتبر طبعا تأخر في سن الزواج ...ماشي تأخر كتيير في سن الزواج من وجهة نظر بعض الناس ....و قد يصل الى مصيبه من وجهة نظر بعض الناس التانيين مثل عمّاتي مثلا :)

هلأ من تجربة شخصيه, انا ما عندي مشكله والحمد لله, انا انسانه ما بعمري عملت علاقات و طول عمري ماشية صح و اعتقد ان من ابسط حقوقي اني اتزوج شخص انا مقتنعه فيه 100% و مع اني اقتنعت باشخاص و بعدين اكتشفت انهم سيئين وهالشي كان ضمن حدود الارتباط و علم الاهل, لكني لسا مصممه على انتظار الشخص المناسب اذا في نصيب.

بعرف ان ظروف الحياة صعبه وهاد سبب رئيسي من اسباب تأخر الزواج و الحياة بهالايام قليلا ما تقدر عيله تعتمد على راتب شخص بالعاده في جزء كبير من الشباب بفضلو الزوجه اللي بتشتغل و بشغل ثابت و افضل المرشحات بكونو المدرسات و من بعدهم موظفات الحكومه, موظفة الحكومه دوام قصير و اجازات سنويه و اجازات امومه و اجازات مرضيه و المدرسات بزيد عن هالشي الاجازه الفصليه و الاهم الدروس الخصوصيه اللي ممكن تكون دخل جديد للاسرة, طبعا هاي طريقة تفكير ناس معينين وما بنقدر نعمم ولكنها موجوده و بكثره, و لكن هلأ التأخر عم وشمل الكل, حتى المدرسات و موظفات الحكومه , ما بعرف هو الوعي زاد بمعنى تكوين اسرة و التفكير بكل التفاصيل؟؟؟ و يلا المهور غليت؟؟ و يلا الكل بدور و ببحبش على نصه التاني بمنطقيه اكثر من قبل؟؟؟ ويلا الشباب و البنات صارو يحسو الالتزام صعب و مقيّد للحريه؟؟؟؟ ويلا تأثير اللي بنادو بحريّة المرأه و رفضها للوقوع تحت تأثير "سلطه " الرجل؟؟؟؟ شباب عاملين عمايلهم و مش قادرين يقتنعو ان في بنات مناح؟؟؟ اسباب كتيره كل وحده بدها ادراج لحاله.

اللي بعرفه من تجربتي اني مش مع التأخر بالزواج لعدة اسباب, منها ان التأخر بالزواج بعني ان المعايير تغيّرت صحيح و لكنها برضه بتصير مهمه و الها اولويه والتنازل عنها شبه مستحيل, و بتصير فرصه انه "بكره بتغيّر" معروفة انها مستحيله مع قناعتي التامه بانه ما بصير اي وحده او واحد يتزوجو على امل تغيّر الاشي او العاده الغير محببه في الطرف التاني, المفروض الموافقه على الارتباط بشخص انها تكون كامله و بظروفة و عاداته و شكله الحالي و بدون اي وعود شخصيه للنفس بتغيير اللي قدامي ليصير يعجبني.

اشي تاني و هو الاولاد...التأخر بالنسبة للبنت و للشب الكتير بعني انك راح تخسر وقت مع اولادك, الاعمار بيد الله اكيد و القصد مش انتهاء العمر لا سمح الله, القصد هو انك تلعب مع ابنك و انت بال 30 غير عن ال 40 و غير عن ال 50 و انك تحاول تقرب من ابنك بكل فتره من عمره لازم الفجوه العمرية اللي بينكم ما تكون قريبه لحتى يتأكد انك ما عم بتجاريه وانك صح حاسس فيه, مع ضرورة لفت النظر هون لان مش كل الناس هيك, في ناس مهما كبر عمرها روحها بتضلها صغيره و بتقدر تتأقلم مع اللي حواليها بغض النظر عن عمرهم, زي ما في ناس بالعشرينات و الثلاثينات و بتكون نفسيتهم زي اللي بالثمانينات و التسعينات

و اكيد في امور تانيه يا ريت تشاركونا فيها انتو كمان و تحكولي رأيكم بوجهة نظري :)

ملا حيظ على الهامش

هذا الموضوع مشاركه في لنكتب عن "اسباب تأخر سن الزواج....مع ام ضد " في شهر ايار يلا كل واحد و وحده يكتبو عن الموضوع , ما بدنا نوقف هالفكره ...لسا بكير لنتكاسل عنها ويلا شو رأيكم ؟؟ :)

الموضوع جهزّته من فتره و هلأ لان في نت قدرت انشره....الحمد لله

انا اسفة على التأخر بالردود و على التأخر بقراءة ادراجاتكم, ان شاء الله خلال العطله هاي راح امر عليهم كلهم و بدي احكيلكم عن اخر اخباري :)

شكرا لكل اللي لسا بزورو مدونتي بالرغم من غيابي , العداد و بالرغم ان ما في شي جديد من فتره ما نزل عن ال 70 زائر يوميا :) شكرا الكم