Things I Like To Whisper About

Would You Hear Me Whispering

ما بعد الغربة (2)


بعد ما رجعت من دبي ارتحت  تقريبا شهر بالبيت و بعدين رجعت لشغلي القديم, المدير العام متغير و مديري المباشر متغير و الموظفين اللي بمديريتي نفسهم و زايد عليهم كم موظف و موظفه جداد منهم شخص منتقل من مديرية تانيه بقدر احكي و انا ضميري مرتاح تماما اني بكرهو, هاد لحاله اله قصه مخبرتكم عنها سابقا و راح اكتب بوست احط اللينك و اكمل القصه لاحقا - كيف بس التشويق لا رجعه بقوّة :)

المهم انا قبل كنت اعاني باني الوحيده اللي بتعرف اوراكل بالمديريه وشغلنا اساسي اوراكل و اكتشفت ان الوضع زي ما هو, البرامج اللي احتاجت لتعديل وقف الشغل عليها, رجعو للشغل اليدوي و الاوراق والتصوير, بدون مبالغه وانا من اللي كنت بالرغم اني اعاني مستحيل اتوقع اني بس اطلع يصير الوضع بهالسؤ بس الوضع تراجع كتير لدرجة انهم اضطرو يتعاقدو مع ناس من بره ليزبط الوضع شوي, وانا اللي كنت اعاني و اشكي ما حد تفرج فيي و لا قدّر شغلي وتعبي وهاد السبب الرئيسي اني طلعت اشتغل بره.

المهم من ضمن الشركات شركه انا بعرف موظفينها لاني كنت اخد عندهم كورسات و بعرفهم من ال 2004 يعني عشرة عمر, حافظينهم و حافظيني وركزو على هالنقطه, بعرفهم وبعرف عن عائلاتهم من كلامهم عنهم و همه بعرفو شخصيتي و طريقة تفكير و بعرفو معلومات عائلية و شخصيه بحدود طبعا العلاقة العمليه, اخواني بدبي , اني البنت الوحيده كلها معلومات في سياق الحديث او المواقف, زي مثلا الك اخت بتشتغل بشركه كذا كتير بتشبهك لا انا ما الي خوات, هيك يعني الكلام بخليك تفصح عن معلومات, المختصر -بعد كل هالحكي- انّا بنعرف بعض و مكونين فكرة عن بعض.

واحد من الموظفين لا اخفي اني كنت بفترتها معجبه باسلوبه بالشرح و شخصيته وخفة دمه, اكبر مني بالعمر ومتزوج و يحكيلنا عن بناته و كانت الكورسات عنده جدا ممتعه و اسلوبة بخلي الشخص مستحيل ينسى لانه كل شي مرتبط بموقف لطيف, طبعا ابدا ابدا ما عمري بينت اي شي من هالحكي لهالشخص و من 2004 ولغاية 2010 السنه اللي سافرت فيها كل تعاملنا كان عملي بحت, اتصالات دائمه بينا لكل عطل او مشكله بالداتا او السيرفر او سؤال او مساعده بامور الشغل وكل شي طبيعي.

لما رجعت من الامارات من اول اسبوع كان في اجتماع مع هالشركه بخصوص البرامج و المدير العام طلب اني احضره مع اني لسا ما بعرف شي عن طبيعه عالشغل بينا و بينهم, وفعلا حضرت و اجا هالموظف و مدير الشركه واتفاجأو بوجودي و رحبو فيي مع تعليقات المدير عن رجوعي للحكومه و يحكيلي اسبوع وراح تبدي تحكي "غلطه وندمان عليها" , الموظف متغير نحفان و مغير طريقه التمشيطه ومربي سكسوكه, من الاخر صار شكله افضل من قبل بقفزات, طول الوقت ساكت و يوزع ابتسامات انا ما فهمت منها اشي, خلص الاجتماع و ودعتهم و رجعت لمكتبي.

شوي وصلتني مسج من الموظف,بحكيلي انه سعيد جدا برجوعي وهلأ بقدرو يتعاملو مع حد بيفهم عليهم, رديت مسج شكر عاديه, تاني يوم الساعه 9 الصبح الموظف برن, كيفك و كيف حالك ونفس كلمات المسج, و وعدته اشوف البرامج ونضل عتواصل بخصوصه و سكرت الخط, بنفس اليوم الساعه 6 رجع اتصل فيي O.o وانا اساسا بخلص شغل عال 3 و بالصدفة كنت انا بره اخوي عازمني عالغدا, بسألني وينك حكيتله طبعا بره الشغل و اني باكل, بحكيلي الله يسامحه اخوكي لهلا مش مغديكي و الحكي خارج نطاق الشغل, سألته خير في شي ؟؟ بحكيلي لا بس حبيت امسي عليكي ....اعتذرت منه بلطف وحكيتله ان الاكل اجا و اذا في شي بخصوص الشغل يحكي معي وانا بالدوام.

بعدها بيوم اتصل عال 9 بسألني شربت قهوتي ويلا لسا و بحكيلي من الاخر انا لما شفتك بالاجتماع ما عرفت اركز ولا عرفت احكي, عن  فرحته بشوفتي و رجعتي وحكي غريب والشمس طلعه ملبتنجان,و هو يحكي وانا مصدومه,كيف بس تبطل تسمع و افكارك تروح فيك لمنطقة تانيه, مصدومه باني مستحيل يخطرلي انه هالشخص يكون من الناس اللي بتسلو و بخونو و بعملو علاقات, شخص كان كل مره يحكي عن عيلته وعن بناته, شخص انا بعرف زوجته لانها اجت عندي بمعامله وصرنا صحبه لفتره, وصل لموضوع انه بحب دائما يحكي معي وانه حس اني منزعجه بس حكا معي المسا, صحيت و بديت احكي, مسحت فيه الارض ادبيا لانه راح نضطر نشتغل مع بعض -وما زلنا بنشتغل و بنحكي مع بعض - و حكيتله اني ما بستقبل اي اتصال حتى لو كان من صاحبتي اذا بدها تحكي معي عن الشغل و انه ما يحكي معي الا بخصوص الشغل وخلال الدوام فقط و كان في اتفاق اني اخد دوره ريفرش لارجع اشتغل بسرعه عندهم هو اقترحها وبدون مقابل, حكيتله وبخصوص الدورة شكرا الكم انا بجيب كتب و هي النت عندي و البرامج و راح اتذكر لحالي .

تبرير الموقف من الجميع انه توقع اني تغيرت بسبب الغربه, توقع اني عقلي المسكر ما شاء الله ما شاء الله تفتح و ممكن اتجه لانحراف شوي, مع كم رأي بانها ممكن تكون ما يطلق عليه "مراهقه متأخره" ترافق سن ال 40 عند الرجال :$

ملاحظه ع الهامش
الموضوع مو ان ياي شو انا بجنن وكل العالم بتعجب فيي
الموضوع ان نفس الناس اللي بتعامل معها من 10 سنين وعارفتني وحافظه اسلوبي بالتعامل فكرو ان الغربه غيرت من اخلاقي واسلوب تفكيري وقناعاتي...وهالحادثه صارت مع اكتر من شخص بالشغل 


ما بعد الغربة (1)

عقلي ما بركب على عقلها



"ليش ما بتحبي فلانه؟"
"مش اني ما بحبها بس هيك عقلها ما بركب على عقلي"

جواب يختصر الكتير من الكلام و المواقف

لانها كل ما شافتني لازم تمقمق بوجهي لتلاقي الحبّة اللي حاطه عليها 10 كيلو ميك اب لاخفيها و تحكيلي " ييي ليش هيك وجهك؟؟؟من شو؟؟"

لانها كل ما انحفت تحكيلي  "ييي ليش هالقد نحفانه وجهك كتير متأثرمش حلو عليكي النحافة"

ولانها اذا زاد وزني نص كيلو بتحكيلي "شكلك ماخده راحتك بالاكل هالفتره!!" مع ضحكه مقززه

لانها لما نجتمع  بتحكيلي " احسن شي عملتيه انك مش متزوجه فعلا شو بدك بوجع الراس بلا زوج بلا هم بلا ولاد" وهيه مقعده بنتها بحضنها و بتلعب فيها و بتحكيلنا عن الموبايل اللي جابلها اياه زوجها على عيد ميلادها

لانها لما نجتمع بموقف تاني بتحكيلي " ليش لهلا ما تزوجتي؟؟؟ تعقدتي يعني؟؟؟ انت ليش ما بدك تتزوجي؟؟؟تلحلحيلك شوي"

لانها بس تشوفني لابسه لبس جديد بتحكيلي " يا عيني عالاحمر اللي بضوي شفته من بعد كيلو شكلك زي حبه البندوره " O.o

ولانها بس تشوفني لابسه لبس جديد بموقف تاني بتحكيلي " ليش لابسه هاللون مو لابقلك بالمره, منصحك....مسمرك....لون وجهك ابصر كيف..."


لانها كل ما شافت سيارتي بتحكيلي "لون سيارتك خطير مش طبيعي...اول مره بشوفوعلى سياره...ما بدك تغيري سيارتك؟؟"


ليش؟؟؟

اممم لان عقلي ما بركب على عقلها ....وبس  :)






عتمة القلوب



لما تتفرج على الضو و تلف وجهك, وانت مفتح و انت مغمض الضو بضل  معك و موجود قدام عيونك بس مع الوقت بخف الضو وليكون معك مره تانيه بتحتاج ترد تركز على نفس الضو ليرجع لنفس الاثر , مرات بعد ما تتفرج عالضو بيلفت نظرك ضو تاني وبس تطلع عليه بصير اثر التنين معك و لكن الاولاني بخف وجوده اسرع من التاني و بيختفي و التاني لسا موجود و حسب مين لفت نظرك اكتر بتقرر على مين ترد تتطلع, بس في ناس طماعين بكونو بدهم يتفرجو على كل الاضوية مع بعض, وهدول الناس بنعمي ضوهم حرفيا, وهمه مفتحين وهمه مغمضين النور اللي جاي من اكثر من بقعه بخليهم تايهين و بتحول لبقع سوده وعتمه وهمه مفتحين و همه مغمضين.

نفس الشي البشر, بحياتنا بنقابل كتير ناس و كتير شخصيات, منها اللي بيترك اثر بحياتنا و منهم اللي بمرو بدون ما يتركو اي شي بنفسنا, اللي بيتركو اثر مرات بكون اثر ايجابي  مرات سلبي, مرات بستمر معنا و بعطينا طاقة , سلبيه او ايجابيه ومرات مع الوقت بخف الاثر,بس في ناس معينين بكون اثرهم قوي لحد الابهار, اشخاص بكون الهم مكانه معينه بحياتنا و بقلبنا, تلقائي بنرجع نتفرج عليهم و نراقبهم, اشخاص معينين ببهروك بكل ما فيهم وما بتقدر تلف وجهك عنهم, هدول اللي بتحس بوجودهم معك وانت معهم و انت بعيد, بتفكر فيهم اكتر من مره باليوم و مع كل موقف الك ذكرى معينه معهم, و لما تطمع انك تجمع اكتر من شخصيه من هالنوع بحياتك طبيعي جدا ان كل شي فيك يتلخبط, مشاعرك و عواطفك, احساس الذنب و احساس السعاده بتداخلو, و بالاخر برضة  بنعمى ضوك وبتصير تتصرف من دون تفكير و بالاخر بتضل انت و السواد لحالكم.

ربنا خلقلنا عيون تنتين لنتفرج و ندقق و نتأكد و نتنقل بين الناس و نختار ونحكم, و خلقلنا قلب واحد ليكون لساكن واحد بس, و اول ما نحاول نجيب ساكن جديد ليستقر مع الموجود القلب بطرد التنين وبسكر, و بصير معتم و ما فيه حياه لانه فاضي, للاسف معظم البشر ما بتلحق حالها قبل ما يعتم قلبها, بتكون فخورة بالاضوية اللي بتجمعها.
هالايام كتير ناس حوالي طفو قلبهم وخلوه يسكر, مش لان ما في ناس مبهره حولهم, لا لانهم طمعو فخسرو كل شي وضلو لحالهم عايشين بالسواد اللي معبي عيونهم و قلوبهم.

دعاياتنا



كتير في افلام اجنبيه عن مصممين الدعايات, كيف بفكرو بكل جمله وكل كلمة وكيف التصميم ومين بدو يمثل و شو اللبس و الوضعيه, اساس حياتهم هو الفكرة الاساسية, وشركات بتربح وشركات بتخسر, موظفين بترقو و موظفين بخسرو وظائفهم بسبب هالكم دقيقة ومرات هالكم ثانية للاعلان, وما بننكر تأثير الاعلانات و كم الفلوس من وراها, مصاريف و مردود هائل, على شركة الاعلان وعلى اصحاب لمنتج.

بنيجي نطبق الموضوع على دعايات تلفزيوناتنا -وما راح احدد قناة معينه الكل فاهم عن مين بحكي - بتحس ان اللي فكر بالدعاية...لأ بتحس انه ما حد فكر اساسا, حرام ينحكى عن اللي بنشوفة فكرة اساسا, لا كلام زي العالم ولا صوت ولا وجه اعلاني, صراخ ورقص و صف كلام و طوش و بالاخر بتكتشف انها دعاية, بس لشو اكيد ما بتعرف لانك مصدوم بالمناظر, حتى بالدعايات بتطاوشو!!!
اذا اسمه زعل فطبيعي يتطاوشو o.O

لهيك الهدف الرئيسي من الدعايات  مش موجود عنّا,تعودنا على انها فقرة غير مرغوب فيها احيانا و فقرة اجت بوقتها احيانا اخرى, بالعاده  يا بنوطي التلفزيون يا بنعتبر فقرة الدعايات هي فرصه تتحرك من القعده, فرصة الزوج يتطلع بوجه زوجته, فرصة الام تحكي مع ابنها, فرصة تفك زنقة للي مزنوقين, فرصه تحكي تلفون او تشيك الفيسبوك - للي مش 24 ساعه شابكين - فرصة تلم كاسات الشاي او فناجين القهوه و تجليهم, فرصة  تصلي 4 ركعات العصر قبل ما يرجع المسلسل :$


سرقات




بالفترة الاخيرة كتر الكلام عن موضوع السرقات اللي بتصير ان كان بيوت او سيارات  او شنط, خالتي اللي عمرها بالثمانين بتحكيلنا انها بتعلق مفتاح البيت برقبتها لانه 2 من الجارات اللي بنفس العمر تقريبا و بياخدو معها درس الدين كل اسبوع  تعرضو لسرقة شنطهم و انسحبو عالارض و انضربو, فخوفا من انه يصير معها نفس الشي بتحكي عالقلقله اعرف ارجع عبيتي.

انا كنت احب المشي كتير وخصوصا ان مكان سكنّا مناسب للمشي نسبيا, ولكني فعلا صرت اخاف, كتير ناس بتهموني بالمبالغه و انه الدنيا امان, بس القصص اللي بنسمعها كتير بتخوف ومش مستعده اعرض نفسي لاي موقف لا سمح الله, ربنا يحمي الجميع وبعرف اللي ربنا كاتبله شي حيشوفو بس انا ماشيه على مبدأ اعقل وتوكل

من بين القصص الكثيره بخصوص السرقات اللي سمعتها في قصّه صدمتني كتير,حكاها موظف بشتغل مع قريبه الي عن اخته, مستأجره عند جماعه كويسين و علاقتها معهم ممتازة وبعتبروها زي بنتهم, اتصلت فيها الست صاحبة البيت بيوم و طلبت منها تنزل عندهم لتسشور شعر بنتهم الصغيره لانه عندها حفله , وفعلا نزلت و حطت مفتاح البيت على التسريحه قدامها وبدت تسشور شعر البنت, فجأه فقدت المفتاح ما لقته, دورت عليه بالغرفه ما اله اثر, قورا طلعت وراحت على شقتها و لقت الباب مفتوح و الصدمه الكبرى انها لقت الست صاحبة البيت حامله بايدها اشياء وطالعه من غرفة النوم, انصدمت المسكينه و صارت الست تترجاها ما تحكي لحد وخصوصا لزوها صاحب البيت, وصارت تحكيلها انه بخيل وما بصرف عليهم -عاساس حجه مقنعه للسرقه - و وعدتها انها راح ترجع الاشياء و راح تدفعلها حق اشياء سارقتها من قبل!!!  اخت الموظف كانت تفقد اشياء بس ما تفهم وين ممكن تروح وما حد بيدخل بيتها و غرفتها.

ما عرفت شو صار بعدها وشو قررت الست تعمل, بستنى اشوف قريبتي لاعرف منها :$
لو انا مكان هالست شو ممكن اتصرف, بسكت ويلا ببلغ عنها , ما قدر احدد بصراحه ....ربنا لا يبلينا بهيك قصص 




مش منطق :$


طبعا زي ما كلكم تقريبا بتعرفو- بما ان معظم اللي لسا بتابعو المدونه اصدقائي عالفيسبوك - انهم بدهنو عنّا و طبعا صرتو عارفين لون الطابق عنا كمان :) 
لمّا قررو يدهنو قررو يدهنو خلال الدوام مو فاهمه ليه, و طبعا تعطل الشغل و انعجقنا و اتشردنا من مكتب لمكتب نهاجر و الحمد لله بما انّا مش قسم خدماتي مباشر للمراجعين كان وضعنا احسن من غيرنا.

المهم - و هون راح يصير الموضوع مقرف نقطه لهيك اقتضى التنويه - احنا والحمد لله حاولنا نسيطر قد ما نقدر على التواليت - اجلكم الله - و نظافته ومين يدخل و هالقصص بانّا جبنا قفل اله نسختين مفتاح كل نسخه مع مكتب من مكاتب البنات, و عليه يافطه قد الحيط انه تواليت موظفات, و جهزناه باغراض على حسابنا الشخصي لانهم ما بزودونا بغير ديتول محطوط بقنينه مي ومن كتر ما همه ضايفين مي عليه لونه اشي غريب :$
 علشان الدهان العمال  طلبو نفتحه ليدهنوه, و للاسف فتحناه و لمّا اجينا نستخدمه قبل ما يوصلوله بالدهان انصدمنا باللي شفناه, المنظر يتعدى القرف بمراحل, مستحيل بني ادم عادي يترك هيك منظر وراه....مستحييييييييييييييييييييييل, انا حكيت شو فرق اللي عامل هالعمله عن الحيوانات....بس بعديها بكم يوم شفت منظر خلاني اغير رأيي.

كنت صافة قدام بيت خالتي بستنى ماما تطلع, اجت بسّه وقفت على الترابيه على طرف الشارع قدامي  - و من محبتي للبسس قررت اراقبها بلاش تصرعني فجأه والاقيها جنبي - المهم البسّه حفرت بالترابيه و قعدت عملت اللي بدها تعمله بعدين قامت و ضلت تحط تراب عليه لاختفى تماما مكان الاشي اللي عملته!!!
انا بعتذر و بتراجع عن المقوله ....في فرق كبير بين اللي عمل العمله فوق و بين الحيوانات حرام نظلم الحيوانات :(



ملاحظه ع الهامش

لكل اللي تقززو او انصدمو من موضوع التدوينه....اممممم sorry  :")

ما بعد الغربه (1)


كل غيبتي على بعضها لا تتجاوز السنتين, وخلال هالسنتين وبعد مرور اول ست شهور ممنوع الاجازات فيهم كنت تقريبا كل شهر اكون بالاردن الا الفترة اللي اهلي اجو همه فيها, بابا وماما اجو مره و ماما اجت مرتين لحالها, يعني لا تعتبر غربه كبيره و خاصه اني بدبي , صح ساكنه لحالي بسكن الشغل بس برضه اخواني التنين حولي همه وعائلاتهم, رغم كل هاد بتضل غربه و فيها ما فيها من وجع قلب و تساؤلات.

واحنا بالشغل بالاردن رحنا انا وموظفات المديريه واللي عددنا 6, لمكتب مدير بنته نجحت بالتوجيهي لنباركله بالنجاح و بنسأله عن خيارات الجامعات المطروحه,  تطرقو للغربه كواحد من الخيارات, وكانت نظرة الجميع و تعريفهم لغربة البنت هو "الحرية" و بمفهومها الغير سوي, حره بحالك بتتاخري بره بتروحي وبتيجي ...وغيره وغيره من تفسيرات ابعد ما تكون عن انها تكون تعريف للي عشته.

شرحتلهم شو هي الغربه اللي عشتها, و شو تأثيرها علي وعلى شخصيتي, كيف علمتني المسؤوليه واصدار القرارات وتحمل النتائج, كيف صقلت شخصيتي بالحلو و المر اللي واجهته, كيف انها علمتني الالتزام اكتر من قبل, كيف كنت اتحكم باوقاتي و استغلها, كيف بتعلمك تراقب نفسك اكثر و تعرف ان ما في حد راح يفهمك و يشرح تصرفاتك ويبررها زي لما تكون بين اهلك, كيف لازم دائما تبعث رسائل واضحه و صريحه لتوصل افكارك وخصوصا بين مجتمع من كل الجنسيات و الديانات والافكار والعادات والتقاليد, كيف بدي اتعامل بنفس اخلاقي و ديني مع زملائي الرومانيين و الروسيين و الاسبان و الاماراتيين والسوريين و المصريين و الفلبينيين و الهنود و و ...مختلف الخلفيات بدك توصللهم مين انت و شو انت, وكيف بدك تحكم على شخصياتهم و تتعرف على دواخلهم بنفسك وبدون مساعده من حد.

الغربه اشي كتير بشع و بوجع, اله نواحيه الحلوه و المره وال "حريّه"  بمفهومها الخطأ  ممكن تمارسها باي مكان حتى ببلدك لان مهما تغيرت اللي جوا من تربيه و اخلاق ودين المفروض انه ما بتغير ولا بختفي.

ملاحظه ع الهامش
بدي اكتب سلسله من المواقف و الاحداث و المحاضرات اللي سمعتها و شفتها و عشتها من وقت ما رجعت و بتخص موضوع الغربه ونظرة الناس الها...الله يعينكم علي ناوية ارجع و افش قلبي :)

إحباط...



من يوم ما رجعت عالشغل وانا ما بسمع غير شكاوي من الموظفات عن ازواجهم, وانا بطبعي تلقائيا و من الطبيعي اني اوقف بصف البنت, لكن من كتر الشكاوي بديت احاول اكون واقفه على الحياد و احاول اتفهم وجهة نظر الزوج, يعني خلينا واقعيين مش كل البنات ملائكه متلي , في النكد وفي الممل وفي الزنان, وفي مشاكل طبيعيه بالحياه وبكل بيت, في ضغط على الزوج و في وقت مناسب للنق وقت مناسب للهدوء و الصمت, لا انكر بما اني مش بموقعهم ما بقدر احكم بس برضه اشي ومنه.

 صار عندي كتير تردد باني اعرف الشخص منيح ويلا سيء من القصص اللي بسمعها, بتحكيلي البنت شكوى عن زوجها بعلملة كبيره و بتختمها بس ربنا الله هو منيح ما بدي تاخدي عنه فكرة سيئه, مرات بحكيلها لا يختي زوجك مو منيح ومرات اكتر بهدي النفوس غصب عني و باجي عحالي و بسكّت حالي بالعافيه..... بالزبط انا شو دخلني و ليش اخرب بينهم وهي ما عندها مشكله :)

الفترة هاي تغيرت الشكاوي, وماشاء الله تطورو الازواج وصارت اعمالهم على مستوى ماشاء الله ماشاء الله, حب وعلاقات و خيانات و زواج من تانيه وطلاق وقصص, الي فتره بسمع قصص بنصدم منها مش طبيعيين الازواج صايرين لاااا ما تحكو متحيزة و عنصريه الوضع غريب, قبل كم يوم دخلت صاحبتي المكتب الصبح و هي بتحكي تلفون و وجهها ما بتفسر, خفت يكون في مشاكل جديده عندها طلعت المشكله عند صاحبتها.

هاد يا اخوان صاحبتها  - وهي من جنسية عربيه غير اردنيه - اكتشفت علاقة بين زوجها و بين سلفتها, اه اه سلفتها اللي يعني مرة اخوه, يعني الاخ بخون اخوه عادي و بكل بساطه, ولما واجهته بالمسجات والمحادثات اللي قرأتها و اللي كلها مشاعر و حب و حكي زفت و بتبدا دائما ب "اخوي جنبك" -خوا ان شاء الله اللي يهفيك يا بعيد-  حكالها هاد حوار عادي وانت مكبره الموضوع, حكتله لو حكيت لاهلك عن هالشي شو بتتوقع تكون رده فعلهم, حكالها اصلا امي بتعرف.
الست ما كذبت خبر و حكت مع والدته و حكتلها عن اللي شافته و هو بس عرف عصب و ضربها و طلقها و طردها من البيت, هي بتتصل بصاحبتي تحكيلها انها ما الها حد هون و مش عارفه وين تروح و انها خايفه منه وبدها تروح عالمخفر تشكيه.

تخيلو انّا نوصل لزمن الاخ بخون اخوه, بعرف ان "الحمو الموت" وان دينا ما حكا عن الموضوع لولا انه كبير وممكن يحصل, بس انك تشوف واقع كتير الموضوع كبير, و من كثر العلاقات والفساد والخيانات و الكبائر اللي بتصير بتقرف الزواج كله و بتقرف الستات و بتقرف الرجال, اكيد ما بعمم وان خليت بليت بس المجاهرة وانتشار هالاشياء بخزي صار, قبل هالمره حكيت عن العلاقات بين الموظفين عنا بالشغل المتزوجين والمتزوجات وكأنه حقها او حقه للاخ والاخت يحبو و ينحبو و يعيشو هالمشاعر اللي المفروض تكون ساميه ومحصورة لاشخاص معينين و يوزعوها على اللي بستاهل وما بستاهل.

كتير الوضع مزري و كتير المشاكل منتشره, المشاكل الغريبه , بعرف البيوت اسرار وما في بيت بخلى من المشاكل بس اللي بسمعه هالايام اشي فوق العادي,  ظلم و افترى وتدني اخلاق و رمرمه جد اشي بحبط 


Pay peanuts get monkey



بتعرفو شعور بس اكون بموقف و يكون حد قاهرك بكلامه و انت ترد عليه و بس تروح عالبيت تضلك تفكر بالموقف و تفكر ب 100 رد اقوى ب 1000 مره من الرد اللي رديته و يصير القهر يكبر و يكبر جواتك اني لييييييش ما رديت عليه هيك؟؟؟ 
فما بالك بالشعور بس يكون ردك هو الصمت !!! تخيلو انا ...انا اصمت وما ارد على شخص قهرني :( الي 3 ايام حاسة حالي بدي انجلط


هاد يا جماعة الخير وزي ما كلكم بتعرفو انا بشتغل بمؤسسة حكومية خدماتيه, وانا كنت من ضمن مبرمجين احنا اللى عملنا كل البرامج الشغاله بالمؤسسة وعنا قاعدة بيانات محرزة شغاله من 2003 و كتير في تبادل معلومات بينا وبين مؤسسات تانية بالحكومه, وكتير مؤسسات حكومية بتطلب داتا من عنا لانها مفيدة لشغلها.

المهم الاربعاء وصلني كتاب من جهة حكومية طالبه تعاونا معهم بالداتا , اتصلت بالمسؤولين هناك و بعد جهد وصلت للشخص المعني بالمعلومات لاعرف شو اللي بدهم اياه و طبيعه شغلهم و هل تتوافق مع لغة البرمجه اللي بنتعامل معها و اتفقنا انه يجي تاني يوم لاناقش كل هالامور.

اجا الاخ و اللي طلع موظف في شركة خاصة جايبينه الجهة الحكوميه كخبير ليحل مشاكلهم, كنت انا و مجموعه من المبرمجات و مدير المديريه و هو اجا مع  مسؤولة من المؤسسة الحكوميه, الشب مفكر حاله فطحل زمانه و بما انه بتعامل مع جهة حكوميه فاشلة اتوقع انه احنا زيهم, اسلوب اسألته و نوعيتها و تناقضها استفزني و كرهت الشب, وانا اذا كرهت شخص انسى وجهي مستحيل مستحييييييييييل يفرد, المهم بنتقد  شي و بعدين بسألني عن نفس الشي اذا موجود او لأ, وانا احكيله ما انت قبل دقيقه سألتني عنه كيف بتتوقع انه مش موجود, حكاله مديرنا انه احنا اللي عاملين كل شي بالبرنامج من الالف الى الياء و انه احنا اللي متابعين السيرفرات و كل شغل ال DBA, بسألني انتو ماخدين دورات, بعرف الحكومه ما بتعطي دورات يمكن الدوره الوحيده الماخدينها ICDL مع نبرة و نظرة استهزاء, حكيتله هلأ ببتوقع انا عاملين برامج و بنتابع السيرفرات من ال 2003 بدورة ICDL ??? بعدين انت مش جاي عنا علشان تاخد داتا و هالداتا راح توفر عليك فلوس و جهد؟؟ حكالي اه, حكيتله كيف شركه كبيره متلكم بدها تعتمد على داتا بشغلها مشكوك فيها و مشكوك باللي عاملينها وشغالين عليها, المهم حكيت كم من شغله بطريقة قمة العدائية خلته يجلس وخصوصا بس حكالي ايمتا بتجهز الداتا حكيتله الاحد ان شاء الله بما انه صرنا بنص اليوم و الشغل على السيرفر هلأ راح يخلي فيه بطئ , بحكيلي طيب يا ريت تجهزي الداتا الاحد الصبح امر اخده قبل ما اروح عالشغل لاني اذا بوصل الشركه ما بطلع, حكيتله اه ان شاء الله باجي انا من الفجر لاجهز الشغل علشان انت عال 8 تاخده اهم شي انت ما تطلع من شغلك, وسألته " يا ريت تجاوبني بصدق, اي مؤسسه تعاملتو معها و طلبتو منها داتا بعد قديش حكولكم راح يجهزوها؟؟؟" جاوبني " بصراحه اقل مده 3 شهور" واكتفيت بنظره انو شو رأيك اذا تاكل هوا, و كل سؤال ارد عليه فورا بطريقة تسكته و كل مره مديري يصير يبتسم الابتسامه الهبله و يحاول يلطف الجو, مع العلم بان مديري هاد جديد و طبعا كاي مدير في مؤسسة حكوميه ما بعرف بطبيعه و شغل مديريته اللي هو مسؤول عنها وما بعرف برمجه و مش فاهم ولا مقدر شغلنا.

من حديث الى حديث انتقلنا لموضوع انه نسبة قليله من المؤسسات الحكوميه برامجهم همه اللي عاملينها و متجهين بشكل كبير لشراء برامج جاهزه - مثل المؤسسة اللي متعامله معه - و من وجهة نظرة انه طبيعي هيك بما ان راتب موظف الشركات الخاصه بالالاف و راتب موظف الحكومه لا يقارن معه,  و استشهد بمثل "pay peanuts get monkey" انا تلقائيا وبصوت عالي حكيتله "نعم؟؟؟؟" بحكيلي طبعا مع احترامي الشديد, حكيتله لا لا لا انت ما خليت فيها احترام و انا لسا بدي اكله تدخل مديري و صار يأكد على كلامه و انا احاول اقاطع مش عارفه و انتقل الحديث لشي تاني و انا بغلي و ما قدرت ارجع للموضوع و روحو وانا ما حكيت , ومن يوم الخميس لليوم والموضوع بكبر براسي و صار في راسين فوق راسي من كتر الافكار و الردود اللي كان ممكن اعملها و اقلها اني اقوم و ما اكمل الاجتماع, هلأ انا قمة الاخلاص بالشغل و جهز السكريبت و عملتله تشغيل اخر الدوام بالداتا اللي بدهم اياها , بس بدي انتقم بدون ما يكون علي مسؤوليه دينيه, ما بدي اكون بعمل اشي حرام بس ما بدي اعطيهم الداتا, بدي اشوفه و امسح فيه الارض, بدي اخد حقي ومش عارفه كيف, ماما حبيبتي قد ما هي شايفتني مقهورة بتهدي فيي و بتحكيلي اني مش قليله و الا ما الاقي فرصه مناسبة وخصوصا انهم ولمده بسيطه راح يضطرو ياخدو الداتا اسبوعيا لحتى نعمللهم access  على السيرفر عنا, بدي انتقم ومش عارفه كيف :(

مقهورة :(




الاسبوع هاد كلّه عندي دورة  DBA  وADF اشياء بمجال شغلي,  من ال 12 لل5 , يعني بروح عالدورة من الشغل و خلال هال 3 ساعات وشوي بالشغل المدير بكون بدو يستغل كل دقيقه, و سبحان الله كل شي بنستناه من ردود و اجتماعات  و لجان  صار و بدو يصير بهالاسبوع, الدورة بدها تركيز وبرمجه و اشياء جديده , و المدرب الله يسعده بحاول يعطينا كل شي علشان مصلحتنا بس احنا بنكون مش مركزين بالاخر و في شباب بصيرو يغفّو, بعرف ان في ناس بداومو لل 6 و لل 7 يمكن , بس اكيد في بريك غدا و ما في تركيز لاخر لحظه, غير ان اللي متعود يرّوح عال 3 بتفرق معه ان يصير يحسب انه لو ما في دورة كان انا هلأ بالبيت :(

الدورة بالرابية و كالعاده بتلفي 100 مرّه لتلاقي مصف, صفيت السيارة بالمكان الوحيد الفاضي وعلى ترابيه ورا العمارة اللي فيها دورة, وانا مروحه لقيت سيارة مسنترة صفتها ورا سيارتي بالزبط و ما بقدر اروح ولا يمين ولا شمال وخصوصي ان قدام سيارتي في جبل تراب وانا ريتني ما ابلى باخلاصي ملزقه فيه علشان ال ما اسكر الشارع وراي, قام الاخ \الاخت لقوها مناسبو واحسن مكان للصف.

الدنيا طبعا اليوم مش برد الا شوي و قريب المغرب عادي بتصير صقيع, زمرت و لفيت عالمحلات اللي بالشارع, ولا بيّن صاحب هالسيارة, دورت عالنت على رقم شرطة السير لاني بعرف انك بتعطيهم رقم السياره بطلعو رقم موبايله من النظام و بتصلو فيه , الموظف اللي رد اخد كل المعلومات و حكالي هلأ بنحكي معه , مر ربع ساعه ولا في اي حركه و انا البرد بتخلل بعظامي من جوا, رجعت حكيت مع ادارة السير اول ما بديت بالحكي الموظف بحكيلي بخصوص السيارة النيسان حكيتله اه, حكالي هينا متابعينها , مر كمان عشر دقايق و لا في حد تحرك, صرت ازمر لحتى حد يطل يتحرك, بيّن واحد من عمارة من العمارات نزلت و سألته اذا بعرف صاحب السياره حكالي انها مو لموظف بس بدو يسأل بركي لضيف عندهم, رجعت عالسياره وانا برجف من البرد, شغلت التدفئة ولكن لان السياره بارده و واقفه ما دفيت بالمره.


 كمان 10 دقايق شرّف واحد و بدو يركب السياره, نزلت من سيارتي و حكيتلو " يعني لا الادب ولا الاخلاق ولا الدين بحكو ان صح تسكر على سيارات العالم نص ساعه وتتركهم يموتو من البرد"
بحكيلي انا هاي مو سيارتي و انا خدمة مني "الك " رحت جبت مفتاحها من صاحبها واذا بتضلك تحكي برجع المفتاح و خليكي تستني للصبح !!!!
انا طبعا بما اني بردانه فعقلي اساسا طاير ومع جملته هاي ما تبقى من فتيفتات عقل طارو كمان, وهبو طلع مني كلّي, و بديت وصلة الردح الشرقي الادبي طبعا

حكيتله ليش هي الدنيا سايبه, انا هلأ بدي احكي مع الشرطه تيجي, و بعدين انت ليش بتحملني جميله؟؟ جميلتك على اللي نزلت بداله او بدالها و بما انك انت تبرعت تيجي فبدك تسمع كل اللي عندي, و اللي صف هالسياره لا بفهم بالادب ولا بالاخلاق و لا عنده ذرة احساس و بدل ما تعتذرو كمان بتطلعو بالعالي
بحكيلي اجينا ما لقينا صفّه شو نعمل !!
حكيتله ولا شي بتقررو تصفوها ورا سيارات العالم و تروحو و لا تتركو خبر عند حد ولا تتركو رقم تلفون
بحكيلي انا حكيتلك هاي السياره مو الي و انا بس بدي احركها علشانك

حكيتله روح نادي صاحب السياره انا هلأ بدي احكي معه 
صار يحكيلي انت شو بدك مش بدك السياره تتحرك خلص هلأ بحركها
وفعلا ركب السياره و حركها وانا ركبت سيارتي و صفيتها جنب الرصيف و نزلت و حكيتله هلأ بدي اشوف صاحب السياره, مش انت بتحكيلي مو سيارتك وما بدك احكي معك, بدي اشوف صاحب السياره و احكيله الحكي اللي عندي
طبعا اختكم بالله صوتها بس تنفعل ما بعلى لأ بصير يرجرج و بصير رفيع و حاد - اشي محرج :$ 

الشب وقف عالباب و حكالي خلص يا اختي مش حركتي سيارتك

انا مسكت الموبايل و اتصلت عادراة السير قدامه, حكيتلهم الحوار وكيف بحكيلي بخليكي للصبح , الموظف الله يسعده و يرضى عليه اللي رد علي, حكالي يا اختي هاد بحكي من بيئته و مستواه شو بدك تعملي مع هيك ناس و شكلهم شدّو عليه بس حكو معه ليحرك السياره, حكيتله بس هاي علطته ما بتخمل مسؤوليتها , حكالي معك حق
حكيتله انا بعرف ان يمكن مو انت اللي بتحللي هالمشكله بس انا مقهورة كتيرو الدنيا برد كتير  :(
وبدي تساعدني و تحكيلي شو اعمل, اعطاني فرصه احكي كل اللي بدي اياه و اشكي و هو يأيدني  لهديت شوي و بعدين اعتذرتله لان ممكن المشكله مو مشكلته ولا مسؤوليته بحكيلي "المهم فشّيتي قلبك  وانا هلأ بحول الشكوى لادارة السير و همه برجعو بحكو معه و بفشّو قلبك منيح"  حكيتله منيح :)

حسبي الله و نعم الوكيل بهيك ناس ما بتفكر غير بحالها, و كمان لا ادب ولا اخلاق و بفكرو بس يطلعو بالعالي الناس بدها تخاف وتتراجع, انا لولا ان الدنيا صارت عتمه ويلا ما بتحرك قبل ما يجي شرطي سير و يتصرف مع هالعالم و توصل محل ما توصل, بس اهلي برنو من جهه و اخوي برن من جهه و انا حرفيا صرت ارجف من البرد لدرجة اني صفيت السياره بنص الطريق و شغلت التدفئة عاعلى شي و وجهت كل المراوح علي و لزقت فيهم و ضليت شي خمس دقايق لوقفت رج :(

دعيت ربنا ان صاحب السياره ان شاء الله ما ينأذي بس يصير معه موقف مشابه  ويتذكر اللي عمله فيي اليوم :"(



ملاحظه ع الهامش

الصورة من موضوع مشابة لست سكرت باب كراج عمارة قامو الشباب قررو يردو على فعلتها بتلزيق هالعبارات على سيارتها ...للاسف ما لقيت الفيديو :$

عن الوطنية



الوطنيه افكار ومبادئ بتأمن فيها وبتطبقها
الوطنيه انك تحمل الوطن بقلبك و بمبادئك و بعقلك و بتصرفاتك.... انك تحمل مسؤوليه كلمه بتحكيها

الوطنيه مش شخبطه كلام وحط صوره اعلام او شخصيات انت بتعتبرها رمز للوطنية, مو حاله بتكتبها عالفيسبوك و بعدها بخمس دقايق بترجع بتتذمر من شي حياتي عادي و علشان تبين بقمه الانسجام بتقوم بتسب الرب او الدين, ولا انك تتفاخر والتخبر العالم بوصولك لقمة النشوه من كاس او سيجاره مشبوهه دخنتها بمكان غريب او من صورة مقززه مقرفة


الوطنيه حب مش كره....لما تكون بتحارب بتكون بتحارب لحب وطنك اكتر من كره عدوك
لما تكون بتناقش بتكون بتدافع بحب عن افكارك ما بتهاجم المختلف برأيه عن رأيك

الوطنيه حب كبير بخليك تعيش بعالم خاص وللعالم كلها مخلص مقدام وبدون انتظار اي رد من الناس...عندك هدف و بتسعى لتحقيقه ومو شايف غيره

الوطنيه قلب وبالقلب
قلب كبير بوسع كل الخير وما في مكان للشر
قلب كبير كله حب وما في مكان للكره
قلب كبير بكبر الوطن معبى كلام وذكريات وقصص
معبى افكار وعزيمه لتحقيقها وتنفيذها

الوطنيه مش مزايده ولا معايره ولا تملّك
الوطنيه مشاركه و مشاوره و تعاون

الوطنيه مو كلمه....الوطنيه تنفيذ وتضحيه


ملاحظه ع الهامش
ممكن يكون الكلام مو مترابط او ما اله داعي بس في اشياء بشوفها الي فتره دفعتني لاكتب هون و اعبر عن اللي ببالي.... وبدون تعميم ولا تلطيش...لا ليش الكذب في شوية تلطيش

ربحت...ربحت :)


اليوم و بعد قرون من مغادرة الحظ الجميل لمحيطي  ربحت جائزة :)
اي نعم 10 كيلو معكرونه بكافة انواعها وعاملين حساب انّي احبس بشاي مع حليب وراها بس يا جماعه ربحت...ربحت :)

كنا انا و ربى العسل بفطور مع مجموعه ستات و في مسابقات و سحب جوائز عارقام البطاقات, طبعا لفو ودارو حول ارقام بطاقاتنا لقالو بس, لكن انو يحكو الرقم ابدا, سألو سؤال و اللي بسأل الاسئلة كان قدامي جاوبت طلع صح و اخدت جائزه, انسو فرحتي و اني صرت ازقف زي الصغار بس جائزة يا جماعه, وانا اللي كنت فاقدة الامل تماما باني اربح اشي, زمان كنت كل ما اشارك بشي اربح, تجميع صور او مسابقة عالراديو, وفجأه مو عارفة ايمتا بالزبط سكرت معي.

اليوم تزكرت اخوي الكبير اللي كان وما زال موسوعه متحركه ماشاء الله عليه, من اعلام الدول لعملات لعواصم لاسماء حيوانات و اصواتهم, لاسماء, كيميا و فيزيا و جغرافيا ورياضيات,شو اسم ابن عم خالة الزرافة يجاوب, كم رمش لعيون النمله يجاوب, شو بطلع لو خلطنا ثاني اكسيد المنغنيز مع 10غم من الزئبق يجاوب, لكن عمرة ما شارك بمسابقه, و لا عمره حد وقفه يسأله سؤال عالهوا متل اللي بصير مع العالم الا مرّه وحده و هو بالامارات, وقفوه وعلشان حظه حلو كان السؤال
 " شو اسم المسرحية اللي غنت فيها فيروز اغنية هالسياره مش عم تمشي"  O.O

ايش؟؟؟مين؟؟؟فيروز؟؟؟ مسرحية؟؟؟ أن أن أن أأأأأأأأأأأأأأأأأأأأأأن
يا الله شو ضحكنا يومها على ردة فعله وعلى تعليقاته

نرجع لموضوعنا.....انا ويسبر بنت ابو الوسابر ربحت يا رجاله :)

ملاحظه ع الهامش
اشتقنالكم :)
ملاحظه 2 عالهامش
زي ما انتو ملاحظين بالصورة حتى كتكوتي البيبي متفاجأ :)