Things I Like To Whisper About

Would You Hear Me Whispering

ما بعد الغربه (1)


كل غيبتي على بعضها لا تتجاوز السنتين, وخلال هالسنتين وبعد مرور اول ست شهور ممنوع الاجازات فيهم كنت تقريبا كل شهر اكون بالاردن الا الفترة اللي اهلي اجو همه فيها, بابا وماما اجو مره و ماما اجت مرتين لحالها, يعني لا تعتبر غربه كبيره و خاصه اني بدبي , صح ساكنه لحالي بسكن الشغل بس برضه اخواني التنين حولي همه وعائلاتهم, رغم كل هاد بتضل غربه و فيها ما فيها من وجع قلب و تساؤلات.

واحنا بالشغل بالاردن رحنا انا وموظفات المديريه واللي عددنا 6, لمكتب مدير بنته نجحت بالتوجيهي لنباركله بالنجاح و بنسأله عن خيارات الجامعات المطروحه,  تطرقو للغربه كواحد من الخيارات, وكانت نظرة الجميع و تعريفهم لغربة البنت هو "الحرية" و بمفهومها الغير سوي, حره بحالك بتتاخري بره بتروحي وبتيجي ...وغيره وغيره من تفسيرات ابعد ما تكون عن انها تكون تعريف للي عشته.

شرحتلهم شو هي الغربه اللي عشتها, و شو تأثيرها علي وعلى شخصيتي, كيف علمتني المسؤوليه واصدار القرارات وتحمل النتائج, كيف صقلت شخصيتي بالحلو و المر اللي واجهته, كيف انها علمتني الالتزام اكتر من قبل, كيف كنت اتحكم باوقاتي و استغلها, كيف بتعلمك تراقب نفسك اكثر و تعرف ان ما في حد راح يفهمك و يشرح تصرفاتك ويبررها زي لما تكون بين اهلك, كيف لازم دائما تبعث رسائل واضحه و صريحه لتوصل افكارك وخصوصا بين مجتمع من كل الجنسيات و الديانات والافكار والعادات والتقاليد, كيف بدي اتعامل بنفس اخلاقي و ديني مع زملائي الرومانيين و الروسيين و الاسبان و الاماراتيين والسوريين و المصريين و الفلبينيين و الهنود و و ...مختلف الخلفيات بدك توصللهم مين انت و شو انت, وكيف بدك تحكم على شخصياتهم و تتعرف على دواخلهم بنفسك وبدون مساعده من حد.

الغربه اشي كتير بشع و بوجع, اله نواحيه الحلوه و المره وال "حريّه"  بمفهومها الخطأ  ممكن تمارسها باي مكان حتى ببلدك لان مهما تغيرت اللي جوا من تربيه و اخلاق ودين المفروض انه ما بتغير ولا بختفي.

ملاحظه ع الهامش
بدي اكتب سلسله من المواقف و الاحداث و المحاضرات اللي سمعتها و شفتها و عشتها من وقت ما رجعت و بتخص موضوع الغربه ونظرة الناس الها...الله يعينكم علي ناوية ارجع و افش قلبي :)

5 التعليقات :

اطحشي و لايهمك..

النظرة السيئة لغربة البنت خفت كتير بس عمرها ما حتتغير !

وهاد طبعا سببو الفئة القليلة اللي بتخرب سمعة الكل...بالزبط زي ما بيصير بحالة اداء موظفي الحكومة.
الله يسعده النشيط و يارب يديم علينا هالنعمة.

 

سلسلسه راح تكون بالتأكيد جميله وشيقه.
صعب انه الانسان يقتنع بوضعه. المغترب يحلم بالرجوع الى بلده والغير مغترب يحلم بالسفر.
قابلت ناس بالأردن تعتبر امريكا جنة الله على الارض وقابلت عرب في امريكا يعتبرونها جحيما ويودون الرجوع الى بلادهم ولكن الحروب في بلادهم منعتهم والدول العربية الأخرى لن تستقبلهم.
مفهوم السعاده يختلف من انسان الى اخر. بعضنا سعادته في العيش بقرب والديه. اخرون بالبعد عنهم. واخرون بجمع المال في البنك دون الاستمتاع بصرفه.

 

@نيسانة التدوين

بس ما اخليكم تندمو بعدين :$

خفّت كتير بس الناس اللي رافضينها كلامهم بكون صادم مرات

اسأليني انا عن موظفين الحكومه, في عنا موظفين بدهم طخ من قلة الذمة والضمير اللي عندهم و التجبر بالعالم

هيني متنشطه...مش عارفه لايمتا بس بستغل النشاط اللي انا فيه :)

مش ناوي تتنشط انت كمان يا حلو :)

 

@مالك

ان شاء الله تكون جميله, بطلت زي زمان الكلام لحاله يجي و القصص ممتعه,انا لحتى يجي اليوم اللي تترجوني اسكت فيه راح احاول اضل اكتب :)

كل شخص بشوف بحياه الناس التانيه حلمه اللي مو راضي يتحقق

بجانب قصص رفض غربة البنت في ناس كتير لامتني على الرجعه وما استوعبت اسبابي و وجهة نظري ومش من باب محبه, في ناس من محبتهم نصحوني ولكن جزء كبير مصلحتي اخر همهم و لكن من باب الانتقاد فقط

فالافضل الواحد يعمل اللي بريحه لان الناس دائما مو مرتاحه