Things I Like To Whisper About

Would You Hear Me Whispering

مقهورة :(




الاسبوع هاد كلّه عندي دورة  DBA  وADF اشياء بمجال شغلي,  من ال 12 لل5 , يعني بروح عالدورة من الشغل و خلال هال 3 ساعات وشوي بالشغل المدير بكون بدو يستغل كل دقيقه, و سبحان الله كل شي بنستناه من ردود و اجتماعات  و لجان  صار و بدو يصير بهالاسبوع, الدورة بدها تركيز وبرمجه و اشياء جديده , و المدرب الله يسعده بحاول يعطينا كل شي علشان مصلحتنا بس احنا بنكون مش مركزين بالاخر و في شباب بصيرو يغفّو, بعرف ان في ناس بداومو لل 6 و لل 7 يمكن , بس اكيد في بريك غدا و ما في تركيز لاخر لحظه, غير ان اللي متعود يرّوح عال 3 بتفرق معه ان يصير يحسب انه لو ما في دورة كان انا هلأ بالبيت :(

الدورة بالرابية و كالعاده بتلفي 100 مرّه لتلاقي مصف, صفيت السيارة بالمكان الوحيد الفاضي وعلى ترابيه ورا العمارة اللي فيها دورة, وانا مروحه لقيت سيارة مسنترة صفتها ورا سيارتي بالزبط و ما بقدر اروح ولا يمين ولا شمال وخصوصي ان قدام سيارتي في جبل تراب وانا ريتني ما ابلى باخلاصي ملزقه فيه علشان ال ما اسكر الشارع وراي, قام الاخ \الاخت لقوها مناسبو واحسن مكان للصف.

الدنيا طبعا اليوم مش برد الا شوي و قريب المغرب عادي بتصير صقيع, زمرت و لفيت عالمحلات اللي بالشارع, ولا بيّن صاحب هالسيارة, دورت عالنت على رقم شرطة السير لاني بعرف انك بتعطيهم رقم السياره بطلعو رقم موبايله من النظام و بتصلو فيه , الموظف اللي رد اخد كل المعلومات و حكالي هلأ بنحكي معه , مر ربع ساعه ولا في اي حركه و انا البرد بتخلل بعظامي من جوا, رجعت حكيت مع ادارة السير اول ما بديت بالحكي الموظف بحكيلي بخصوص السيارة النيسان حكيتله اه, حكالي هينا متابعينها , مر كمان عشر دقايق و لا في حد تحرك, صرت ازمر لحتى حد يطل يتحرك, بيّن واحد من عمارة من العمارات نزلت و سألته اذا بعرف صاحب السياره حكالي انها مو لموظف بس بدو يسأل بركي لضيف عندهم, رجعت عالسياره وانا برجف من البرد, شغلت التدفئة ولكن لان السياره بارده و واقفه ما دفيت بالمره.


 كمان 10 دقايق شرّف واحد و بدو يركب السياره, نزلت من سيارتي و حكيتلو " يعني لا الادب ولا الاخلاق ولا الدين بحكو ان صح تسكر على سيارات العالم نص ساعه وتتركهم يموتو من البرد"
بحكيلي انا هاي مو سيارتي و انا خدمة مني "الك " رحت جبت مفتاحها من صاحبها واذا بتضلك تحكي برجع المفتاح و خليكي تستني للصبح !!!!
انا طبعا بما اني بردانه فعقلي اساسا طاير ومع جملته هاي ما تبقى من فتيفتات عقل طارو كمان, وهبو طلع مني كلّي, و بديت وصلة الردح الشرقي الادبي طبعا

حكيتله ليش هي الدنيا سايبه, انا هلأ بدي احكي مع الشرطه تيجي, و بعدين انت ليش بتحملني جميله؟؟ جميلتك على اللي نزلت بداله او بدالها و بما انك انت تبرعت تيجي فبدك تسمع كل اللي عندي, و اللي صف هالسياره لا بفهم بالادب ولا بالاخلاق و لا عنده ذرة احساس و بدل ما تعتذرو كمان بتطلعو بالعالي
بحكيلي اجينا ما لقينا صفّه شو نعمل !!
حكيتله ولا شي بتقررو تصفوها ورا سيارات العالم و تروحو و لا تتركو خبر عند حد ولا تتركو رقم تلفون
بحكيلي انا حكيتلك هاي السياره مو الي و انا بس بدي احركها علشانك

حكيتله روح نادي صاحب السياره انا هلأ بدي احكي معه 
صار يحكيلي انت شو بدك مش بدك السياره تتحرك خلص هلأ بحركها
وفعلا ركب السياره و حركها وانا ركبت سيارتي و صفيتها جنب الرصيف و نزلت و حكيتله هلأ بدي اشوف صاحب السياره, مش انت بتحكيلي مو سيارتك وما بدك احكي معك, بدي اشوف صاحب السياره و احكيله الحكي اللي عندي
طبعا اختكم بالله صوتها بس تنفعل ما بعلى لأ بصير يرجرج و بصير رفيع و حاد - اشي محرج :$ 

الشب وقف عالباب و حكالي خلص يا اختي مش حركتي سيارتك

انا مسكت الموبايل و اتصلت عادراة السير قدامه, حكيتلهم الحوار وكيف بحكيلي بخليكي للصبح , الموظف الله يسعده و يرضى عليه اللي رد علي, حكالي يا اختي هاد بحكي من بيئته و مستواه شو بدك تعملي مع هيك ناس و شكلهم شدّو عليه بس حكو معه ليحرك السياره, حكيتله بس هاي علطته ما بتخمل مسؤوليتها , حكالي معك حق
حكيتله انا بعرف ان يمكن مو انت اللي بتحللي هالمشكله بس انا مقهورة كتيرو الدنيا برد كتير  :(
وبدي تساعدني و تحكيلي شو اعمل, اعطاني فرصه احكي كل اللي بدي اياه و اشكي و هو يأيدني  لهديت شوي و بعدين اعتذرتله لان ممكن المشكله مو مشكلته ولا مسؤوليته بحكيلي "المهم فشّيتي قلبك  وانا هلأ بحول الشكوى لادارة السير و همه برجعو بحكو معه و بفشّو قلبك منيح"  حكيتله منيح :)

حسبي الله و نعم الوكيل بهيك ناس ما بتفكر غير بحالها, و كمان لا ادب ولا اخلاق و بفكرو بس يطلعو بالعالي الناس بدها تخاف وتتراجع, انا لولا ان الدنيا صارت عتمه ويلا ما بتحرك قبل ما يجي شرطي سير و يتصرف مع هالعالم و توصل محل ما توصل, بس اهلي برنو من جهه و اخوي برن من جهه و انا حرفيا صرت ارجف من البرد لدرجة اني صفيت السياره بنص الطريق و شغلت التدفئة عاعلى شي و وجهت كل المراوح علي و لزقت فيهم و ضليت شي خمس دقايق لوقفت رج :(

دعيت ربنا ان صاحب السياره ان شاء الله ما ينأذي بس يصير معه موقف مشابه  ويتذكر اللي عمله فيي اليوم :"(



ملاحظه ع الهامش

الصورة من موضوع مشابة لست سكرت باب كراج عمارة قامو الشباب قررو يردو على فعلتها بتلزيق هالعبارات على سيارتها ...للاسف ما لقيت الفيديو :$

16 التعليقات :

فعلا موقف سيء جدا.
ان شاءالله ما بتصير معك مره ثانيه بس ان حصلت صوري السياره مع النمره واكتبي كل الكلام اللي كنت حابه تحكبله ياه على الانترنت. انت بتكتبي باسم مستعار ولذلك ما اتوقع في مشاكل.
في صفحه على الفيس بوك اسمها
Douche Bags in Jordan
https://www.facebook.com/DoucheBagsInJordan
بحطوا صور سيارات زي ما عمل الأخ.
على العموم لا جديد على الساحه الأردنيه. في امور ابتلينا بها وما اتوقع راح تتغير بحياتنا.

 

اللهم امين

انا صورت السيارة و صورت النمرة من قهري وكنت نازية احط الصورة عالبوست بس غيرت رأيي


اول مره بسمع عن هالصفحه...كتير عجبتني وراح احط الصورة واحط لينك للتدوينه فيها :)

اللي بقهر اكتر من الحركه ردود الفعل الغريبه....كيف مقتنع انه حقّه مو عارفه وكيف بطلع بالعالي مو فاهمه

الله يهدينا و يهديهم

 

احكيلك قصة؟

مرة واحد كان طالع يشتري اغراض، وما لقى صفّة قدام المحل اللي بدو يشتري منو، راح صف مزدوج وسكر على سيارة ونزل يشتري، وهو عم يشتري سمع زامور... طلع تفرج لقي اللي مسكر عليه بدو يطلع... راح تكركب وركض عالسيارة وهو عم يعتذر وشغل السيارة واعطى مجال للي مسكر عليه يطلع... زوجتو كانت عم تراقبو من المحل باندهاش وذهول... واول ما خلصت اغراض اجت عالسيارة وركبت محل السائق وراحت بجوزها عالمستشفى، عملولو ادخال وحطولو drip وقاحة بالوريد طول الليل، وتاني يوم طلع بعدما رجع معدل الوقاحة بدمو طبيعي وشفي.

هاد احنا.

انا صرت كل ما بدي اصف محل اخلي السيارة بعيدة شوي عن الرصيف، او ازا بدي اصف عرضي بخلي بوز السيارة طالع شوي عالشارع مشان ما حدا يسكر علي. ولما اصف ما بلز عالسيارات وبترك مسافة احتياطا احسن ما ييجي واحد جهبذ من جهابذتنا الكتار ويلزق بسيارتي وابطل قادرة اتحرك. واحياناً بتمنى لو معي قنوة متل اللي بتكهرب (زي تبعت المارينز) مشان اشوف مين بدو يسكر عسيارتي بعديها.

احكيلك نكست تايم شو تسوي؟

اذا حد سكر عليكي نفسيلو العجال واتركيلو ملاحظة احكيلو فيها "هاد شكر على ذوقك العالي"

احكيلك؟

خلي معك مسدس وطخي :-)

بحيرة البجع

 

العنوان خوفني
سنحك
وسنح اللي ما يسنحك

ع كلن كل ما تمر عليّ نكتة الشب اللي حاشر سياره وهل يجوز قتله بتزكرك ههههههههههههههه

إنفعالك كان مبالغ
بس فعلن لو أنا مكانك كان زعبرته وعملته البحر طحينه

بالعاده انا كمان بلاقي حالي مستعده أصف اخر الدنيا عشان ما اسكر ع حدن
وبنفسسسسسسسس الوقت أكتر حدن بنحشر أنا :(


يخوفي أشوف صورة سماهر بالصفحة :(

 

بجد موقف بعصب لا اخلاق و لا ادب للاسف و الاغلبية بطلوا يحترموا بعض
بتصير مواقف زي هاي باي مكان مثلا واحد حابب ينزل اولاده و يوصلهم على باب المدرسة و يبوسهم بحنان بتلاقيه صف بنص الشارع و نزل و العالم تنفلق
مرة واحد عصبي اكتر مما بتتصوري دعملو السيارة و طلعلو اياها عالرصيف :) و علقت بين الشباب الطيبة
المفروض هيك عالم تشهري فيهم لانهم بستاهلوا اكتر
المهم صحتك يا بنتي
بالمناسبة عجبتني فكرة الورقة على السيارة نهفة

 

موقف مؤسف للغاية

 

testahali

ma 3inna banat/nanaNAT y7daro dawrat.. mosh bkaffy sho3'3ol o sam7eenlkon!

"miss me much?"

:D

I don`t know what`s wrong -jad ba7ki!- but I`m not getting notifications of new posts from u!

I saw the latest post just b4 this one "which the comments r closed for btw!" and thought that was the 1st post from couple of months for u, only to find a few ones that I`ve missed on :(

----------

I think it was good that u gave him a piece of yr whispry mind, only bkoz he said what he did while attempting to move the car.

lel sabr 7dood!

--------

swan lake`s comment is scary, no matter what the causes / justifications ,, it IS scary
:D

thank God I`m a 5aroof driver

:)

 

ما بعرف ليش الهوتميل و البلوج اعتبرو تعليقاتك كلها سبام ولحالهم حطوها بالتعليقات الغير مرغوبة ...خطايا :)


وين هالغيبة هاي... يعني حاولت الف و ادور بس جد اشتاقولك الجماعه هون :)

ربنا رحمه ان الدنيا ليل كان تعامل مع العقل الويسبري الحقيقي...

طمنا عنك و عن العائلة اكيد هيوم و انوس ماشاء الله كبرو...خبرنا عن انوس و انتقاماته منك :)

 

السلام عليكم ورحمة الله وبركاته

صديقتي المميزة ويسبر
كيف أحوالك؟ يارب دايما تمام التمام

وكأن اشتقت للاردن كله ^^

عدت مؤقتا للتدوين
لكني خلال الفترة الماضية كنت أمر عليك
لقراءتك أول بأول
وهذه المرة أراك طولت شوي
إن شاء الله خير صديقتي

يوما طيبا
ككل الايام القادمة

 

اختي الغاليه وعروستنا الحلوه لطيفه
تشتاق لك الجنه حبيبتي وانا والله اشتقتلك و اشتقت لهالعالم
ان شاء الله بنرجع قريبا
ربنا يهدي البال يا رب :)

 

حتي انتو عندكم كده وانا كنت بقول الازمه السودانيه قي ذوق السواقه كويس انك اعطيتيه درس وبلغتي الشرطه فةره الورق ظريفه مرات بفكر اعمل ةروت لصاحبي السواقه المتهوره فيها ردحي عن عدم الاحترام تحياتي ومرحبا بعوده التدوين

 

lissa maghoorah?

blogging can help btw
:D

 

shklk rj3ti 3ala dubai la2anno
:P

 

طال الغياب .. وشغلتينا عليكي

ارجو أن يكون المانع خيراً

سلامي

 

saba7el5air....Haitham....Mohammad

صباح ومسا الخير
اسفة كتير عالتأخر بالرد
اعتزال غريب للمدونه و للايميل كان مش عارفه ليش

شكرا صديقي محمد على السؤال انا والحمد لله بخير وان شاء الله راجعه للتدوين :)

 

ههههههههههههه مضحك جدا