Things I Like To Whisper About

Would You Hear Me Whispering

انت ما احترمتيني



قبل كم يوم طلعنا انا و بنات خالتي عالمول نتغدا و نتسوق، و احنا بالمحل وعند الكاش وكاي عائله اردنيه وقفت كل وحده منا على كاش لحتى اللي بيجي دورها اول نلتم عندها و ندفع سوا.


وحده منهم صار قدامها بس ﺯﺑﻮﻧﻪ ﻓﻜﻠﻨﺎ وقفنا جنبها، وحده من بنات خالتي حكت للشب اللي واقف وراها " معلش بس احنا مع بعض" حكالها " لا مش معلش وانا شفتكم كنتو واقفين بالدور هناك،بدكم توقفو وقفو بس انا مش مسامحكم" بنات خالتي ما فرقت معهم و لكن انا ضميري انبني و حسيت كلمه مش مسامحكم كبيره.


خلصت الزبونه اللي قدامنا فانا طلبت من بنات خالتي انه نخلي الشب يحاسب قبلنا خصوصي انه ما حد وراه, لفيت وجهي و حكيتله اتفضل ، بحكيلي و بنفتره و عصبيه " لا شكرا ما بدي" بكل ادب واخلاق حكيتله لا خلص تفضل انت حاسب واحنا بنحاسب وراك, رد بنفس العصبيه " ما بدي خلص انتو ما احترمتوني واللي صار صار"


تلقائي حواجبي ضربو بالسقف وحكيتله " انت حر انا ضميري هلا مرتاح و هلا الموضوع صار مشكلتك انت مع نفسك و انا مسااااامحه نفسي" و لميت اغراضنا كلها و حطيتها قدام الكاشير 


انا مش حاسه حالي غلطت بالمره لا انا ولا بنات خالتي لانها حركه كل العالم بتعملها، خصوصي انهم فتحو كاش جديد و اللي ورانا راحو عليه وحاسبو واحنا واقفين و هو اجا بعدنا اساسا ، كلمه مش مسامحكم خلتني افكر الشب بفهم و معه حق  ولكن ردة فعله و طريقه كلامه بعدها حسستني انه " الله يعييييين مرته عليه :$ " اذا انا ولا بعرفني صار بده يعطيني محاضره و بتحترميني وما بتحترميني قدام الكاش فكيف المسكينه :$




37 التعليقات :

بس عجبني إصراره وإتناحة وتناحة راسه على موقفه
هههههههههه
ناقص تعطيه ورده " حمرا" صولحة


-------

ع دور الكاش إلا ما يصير هيك ,, و تلاقيلك كم واحد ماسك الإحترامات والأداب والأخلاق " من ذيلها" و واقف بستنى حدن يطاوشه

 

Um Ommar

بحكي لبنات خالتي حاسسته زوجي و ببهدلني بالشارع
وك من وين لوين بدك تعطيني محاضره "باحترامك" قدام العالم :$

ولو تشوفي قمه الادب اللي كنت فيها و قمّة الدفاشة اللي كان فيها

 

والله كنت بدي أحكيلك نفس الجملة بس خفت تزعلي
لووووووووووووووووووووووووووووول


خلص بدوون ظرب

مش مكفي إنه الصوره ملطوشه من عندي
سمايل إمعصبن وداقق الشر بين عيونه


"ياه ياه,, ماقدرت اضل ساكته وأليفه"
هههههههههههههههههههههههههههههه

 

ههههههههه لااا انا ما برضى يضل شي بنفسك ولو

احكي احكي كل اللي بدك اياه :)

 

عجبتني الصورة.. الموضوع.. مش عارفة يعني لو أنا انت أو هو بالجهتين راح أتضايق من الطرف التاني بس هو قلبها دراما بالآخر..

 

مهو يا اسولة انا حسيت بالذنب و حكيتله تفضل ...خلصنا مش ضروري هالفيلم الهندي

بعدين هالحركه صح بتجلط و غلط بس الكل بعملها :)

 

نحن لسنا انتقائيين لتلك الدرجة
ما أن نشعر باحترام الآخر لنا حتى يملكنا..
لكن لو جكر معنا فالتالي معروف..

كل الاحترام صديقتي ويسبر

 

أنا مظطر آسفًا إني أوقف مع الشب!

و لا حدا أنصفه! شليتو أمله يا لصبايا

:)))

(اللهم إلا إم عمر شوي أعطته برستيج بشلن.. بس ردت سحبتو منو بسرعة البرق! typical)

و منشان هيك و هيكا و لأنو إحنا من نفس (العلبة) بدي أصف معه :]
--------

بصراحة، إذا بالفعل قضية مبدأ و الإصرار عليه ف = okay!
بس ما بيمنع إنو زودها حبتين بطريقة إظهاره للمبدأ (إذا!!)
------
بالنهاية معلش .. مهو الزلام = أطفال كبار الحجم ، لا أكثر :-] o_e_
------
*حلوة قراءة التعليقات.. دائمًا حلوة قراءتها :)

** إحم .. بصفني خبير بعالم النساء ، و بالإذن من أشرف العزيز .. الموضوع أبسط من هيك

الشب بدو يلفت مطر بس مش عارف كيف.. هاااااااااااااااااظ هو مربط المعزاية - هههههههههههه

*** الصورة جد رهيبة :)
**** ملاك يمشي عالأرض = انتي ذوق و راسك حيتعبك .. بكفي over-analyzinZINg
:D

***** و هي = ممل!

 

خطرلي هالشي:
لو شخص جديد أو بقرأ لويسبر و ما إلو على الشلة شاف هالإدراج و قرأ التعليقات
= حيبطل ييجي لهون و يظل متعقد أسبوعين زمان من هالدنيا!

 

This is a new laptop. I still don't have Arabic stickers on the keyboard so I will write in English

I think he overreacted. You felt sorry and asked him to go in front of you he could either go or not be a drama queen. So, you did good.z

 

لويش عالإيميل ما بيوصلني التعليقات الجديدة! :(

تبًا و تبنين كمان!
-------

صديقنا مالك = عندي لابتوب جدييييييييييييييييييييييييد .. ناناناناناااااااا

ههههههههه

 

هيثم - يعني بتعرف لزوم العرط والفشخره :) لعاد كيف بدي ابين انو عندي كمبيوتر جديد :)

 

و كمان من النوع الجديد اللي بيكتب عربي بعد كم يوم!

مبروووووووووووووووووووووووووووووك :]

 

هذا التعليق لغابات البياخة + إتعابك في
accepting the comments

--------
each and every second I distract u; the world is a better, less evillish place.

 

هيثم

هههههههههههههههههههه
جد ضحكتني من قلبي :)

 

أنا كتبت غابات بدل غايات بس شايفلك برضه زابطة! هههههههههههههه

----------

من كل قلبي = شامم ريحة تهديد مبطن! :scared:
إذا أخذنا نطرية تأثير الفراشة فإن نوبات الضحك الحالية في عمان - الأردن سينتج عنها ----> اختفاء بعض المأكولات من الثلاجة المشتركة بمبنى المسخمطين في غلاسكو - أسكتلندا *يهرول لإنقاذ ما يمكن إنقاذه*

 

Rain

Shayfeh bellah 3alekee :$

لاتـــي

ههههههه بالزاااابط و هو مش عارف مع مين بورط المسكين :)

يسعد مساكي و جمعه مباركه يا رب

 

Haitham

وشهد شاهد من اهله...يعني وانت بتحاول اقصى ما عندك تصف معه اعترفت بطفولته المبالغ فيها و عالغرباء كمان...يعني اهله بستحملوه العالم مش مضطره

والله يا صديقي الصوره بعد ما لطشتها من ام عمر انتشرت عالفيسبوك طلعت لاطشتها هي كمان :$
فاااا لطش حلااااال طلع

اذا فعلا لفت نظر فالشب فاهم الموضوع جدا غلط...يعني لفت النظر بكون بمعامله لطيفة مش بدرس اخلاقي عالملأ :$

في حد كابس ممل :( كنت بدي اغير الخيارات ل
جميل...حميل جدا...بعقد...رااااائع
بعدين فكرت فيها حكيت العالم مخنوقة من كل شي خليييي هالعالم تفش قلبها هون فااااا خليتها :)

بالنسبة لعلب الحمص و الفول بالثلاجه...شو فرصة انك تحط عليهم alarm اول ما حد يلمسهم يضرب شت كهربا و بهيك تمسكه بالجرم المشهود :)

ملاحظه ع الهامش

امبارح جابو على ناشونال جيوغرافيك عن غلاسكو طلع عندكم مافيات و قصص و عاملين لقاء مع واحد دانه مقطوعه في حد عاضضله اياها
انا بقول ياكلو الحمص ولا يبدو يقرقشو فيك :$

 

Jaraad

اولا مبروك اللاب توب الجديد تهرية بالبوستات الحلوه دائما :)
بخره و اقرأ عليه قرأن ترا في ناس عم يضربو بالعين اذا انت ملاحظ

انا لمت حالي بالبداية و على سمعه حكيت لبنت خالتي ضميري بأنبني بس هو غريب كان فااا اضطريت اريح ضميري تماما

زودها الله يسامحه

 

عصابات = أي نعم! (قال العضو الجديد في المافيا الشيشانية الأوروبية) "يا حسرة"
-------------
المتهمين = كلهم أجانب! ما حدا native بيضل بعد ال 4 مساء.. ما إلهم مصلحة .. فيه أشياء أهم
-------
بالنسبة للشب، لفت النظر = ما زبط .. فا اتكهربت الأسلاك عندو و صار يخبص :)
------

ناشونا جيوغرافيك من متى بيجيبوا هيك أشياء؟ :جاهل سمايلي:
---------
فكرة الكهربا ممكن تطبيقها على كبيسة الممل و كزا و هيكا! هههههههههه
----------
انتي و أم عمر و من لف لفيفكما (للأسف الضحايا كثار) عصابة غوغائية

يحب الحجر عليكنّ و نفيكنّ لما بعد الغلاف الجوي الرابع و لكن تجري الكعكات بما لا تشتهي الأسنان ُ (سين! أوووبس ,, قصدي نوووووووووووون)

 

بما انها القناة المفضله لبابا لما يحب يريح من قنوات الاخبار و الرياضه و ال يعني علشان حرام احنا نحضر اشي فااا نضطر حضرتنا للمتابعه :$
الصبح حضرنا برنامج عن البوم و النسور اذا يتحب بلخصلك اياه :(

مهو انا شاكه بناس بس قلبي الضعيف لا يتحمل يتكهربو :$
خليهم يتفششو يا زلمه شو ورانا

سين و نووون...حسن و نعيمه :)

 

بلا أخبار بلا بطيخ! إلغوها الأخبار..
--------
بمين شاكة؟ بالله تحكيلنا مشان = مشروع صديق أكيد .. و عندو ذوق :-]
-------
شو قصدك ب (بومة)؟ إسفين + استخدام مصطلحات إم عمرية :(

انتي ما احترمتيني و أنا مش مسامحك - خخخخخخخخخخ
------
سين و نووون = حسن و نعيمه
كنت بدي أكذب و أقول فهمت بس عتبك على اللي لقى الرابط العجيب! و اللا ما فيه رابط و بتخففي دم؟ (6)
-------
* (6) = devils sign in chat ayyam l loloo >> و لهذا اقتضى التنويه

 

طيب ، تعودت في حياتي على إحترام المرأه ، مرة زمان في الأردن كنت بدخل على محل تجاري صغير ، بس كان مكتوب على الباب ،مول ، ما علينا كما يقول محمد عمر ، بدي أفتح الباب شعرت في وراي حداً إلا في امرأتين، مسكت ييد الباب سمحت لهم في الدخول ، إلا الناصحة بتقول يلا روح ، إنت في الأول . رحت شعرت ، زي .... ، روحت على الدار بتسألني زوجتي كيف نهارك ، حكتلها good

 

يااا صباح الورد صديقي ابو زينه

انا زمااان كنت اكتر شي احترم الدور, و بالعاده بعمل طوش بالعقل مع اللي بخرب الدور و الحل انه يرجع يوقف مكانه.

بس للاسف بالاردن اذا بدك تحترم الدور راح تحاسب اخر واحد, الكل وبكل مكان دور محل ويلا بنك ويلا مؤسسة حكوميه اذا ما كان صف واحد بتوزعو على الادوار و اللي بوصل اول بتجمعو عنده

غير اللي بوقفو زواجهم -و اضن انه واحد منهم - و بضلو الستات رايحين جايين يجيبولهم اغراض, يعني برضه حجز مكان

هلأ حسيت بالذنب اه و المفروض اعطيته الحل, مش ضروري يعطيني دروس ولا يعصب خلص الموضوع خلص, بتوقف مكانك وانتهينا ولكن رده فعله المبالغ فيها و الجمله اللي استخدمها حسسني انه بس بحب المشاكل فااااا ضميري فورا ارتاح :)

 

أدعي عليك أيييه وفيك كل العبر؟

مبتغدرش تتركني بحالي بدون ما تنكش الشر؟؟
وبحكولي ليش هجوميه؟؟

صدقني لإصير أليفه وأطنشك وأطنش طوشك وأسافينك

وأخليلك النت تتهاوش فيه مع طريبش اللئيم

 

Hamede

والله اني حكيتله و بقمّة الادب و ابتسامة خجل على وجهي " خلص تفضل انت حاسب" و لما حكا "لا خلص تفضلو انتو" برضه بادب حكاها, رجعت اصريت و بدينا نتحرك لنروح وراه قام بدا درس الاخلاق :$

انا بس اكون طالعه من مكان وحد يجي يدخل وحتى لو شب بضل ماسكه الباب ذوقا ومرات بمر الشب او البنت و بحسسوني اني البيه البواب ولا بتطلعو علي :)


Um Omar

اوووووعك تسكتيله
اديله مترحميهووووش

بس طربش مش لئيم ...طربش صديقنا :)

 

هو غلط ليش نلف و ندور :(
بس ياااا هو صرخ علي و انا اعترفت بغلطي بس هو زودها برد الفعل شو اعمل يعني

كلكم بتكرهوووووننننييييي
كيف هلا اهون الوضع؟؟؟
بعدين ضنختك يا محمد تخليش الاعداء يشمتو فينا

 

"صدقني لإصير أليفه وأطنشك وأطنش طوشك وأسافينك " = بتوقع صار فينا نعلن جائزة أحلى نكتة ل 2013 و نخلص المسابقة

قال أليفة قال!

أي طربش زعيم النكد بحد ذاته = ضحك!

 

أبو زينة = أشكرك .. و بعنف

 

علشان هيك لما بدي أروح أشتري أي غرض بروح بكير ، على 9:30 و المحل لسه بفتح و أغلب الشعب الأردني لسه نايم ، علشان أخلص من موضوع الدور العجيب .....
الحق عليكم و بعدين عليكم و بعدين عليه بس يعني مش كثير عليه الحق عليكم أكثر ، كيف بدي أكتبها مرات بدقر مع الشب ، بصير زي مالناس بتحكي صعيدي ، خليلي و ماشابهم في الدول الأخرى

 

وائل

كتير مرات بطلع من المحل و ببطل اشتري بس من موضوع الدور

انا بسجل اعترافي باني بديت الموضوع غلط, و اني بما اني بطلب من الناس احترام الدور المفروض اكون اول المطبقين و لكن الاعتراف بالذنب فضيله و احنا اعترفنا بالذنب بس الاخ تنحت معه و شكله زي ما حكيت اشتغل العقل المنيح شو اعمل انا :$

هيثم

بس حبيت الفت نظرك انه في 2 ممل صار فااااا واضح ان الاشخاص المشكوك بامرهم عم بزيدو :$
شوووو فاتح اكاونت جديد شكلك :(

 

بدك الصح والا ابن عمه :)
اللي عملتوه غلط يا ويسبر ومن حقه يعصب

 

و الله ما هو أنا!

و طربش أبعملهاش.. بس بحاول أجلرجره بالكلام

--------

:صرخة في الظلام:

ياااااااااااااااا صاحب الممل #2 .. اظهر و بان

بدي أصاحبك إلى أبد الزمان

هههههههههههههههههه
-------
جد صار بدي أعرف مين هوه!

 

طول عمرك حقانية و عادلة يا سوزان

الحل برأيي إنو تعزمنا ويسبر على ما طاب طعمه و غلا ثمنه نكفيرًا عن الذنب و الشب مش مهم يوصلو شي.. بكفي نخسّر ويسبر و بكون حقه وصله

 

ويسبر اول شي خطر ببالي
انو نحنا شعوب ممكن نتخانق على صف
او دور بجمعية او مخبز بس لما يجي الوقت اللي محتاجين فيه لموقف حازم
بنتراجع
الصورة بتدل على ثقافة مجتمع فيه كتير احترام
احنا ثقافة مجتمعنا بتدل على شو ؟

 

ههههه
هاد الطبيعي ....بنتشطر و بنستقوي على بعض بس :)

بتدل على انّا شعب كرامته ما بتنئح عليه الا بالمواقف اللي بدون معنى ..يمكن :$