Things I Like To Whisper About

Would You Hear Me Whispering

اشي بجلط




اول ما رجعت من دبي سمعت من اهلي عن بنت قريب النا الها فتره زعلانه ببيت اهلها, و ا ن هاي مش اول مره بيصير انها بتزعل, اتدايقت كتير عليها خصوصا ان اللي كان ظاهر انها كتير متفقه مع زوجها, تمنيت انها تكون زعله وتمشي خصوصا ان في عندها بنت و ولد بالمدرسه وفترة امتحانات و دعيت ربنا يصلح الحال.

شاءت الاقدار ان اهل البنت يجو عنا زياره ويفتحو الموضوع, الموضوع انفتح لان اهل البنت قراب كتير منا و حسب كلام الاب هو ما حكا اشي لحد و حابب يشكي لبابا, بشكي من اهله  كيف بتدخلو بالاصلاح و انهم مستهجنين ان البنت طولت ببيت والدها و طبعا المصيبه الكبرى كانت لما لمح الاب – الغير مقتنع بتلميحه – بموضوع الانفصال.

طلعت البنت من اول سنوات الزواج يعني قبل 10 سنين وهي تهان عند زوجها, اهانه بالضرب و بالكلام و اهانه بالتعامل واهانات معنويه, وكل مره البنت تروح عند اهلها ابوها يرجعها عاساس ان البنت ما الها غير زوجها, والزوج يفهم  الموضوع ضعف من اهل البنت و يزيد بالاهانه.

فالاب الذكي قرر يعاقب الزوج باخر زعله, فقرر ياخد البنت و يخليها تترك ولادها( ولد 8 سنوات وبنت  5 سنوات )لابوهم, البنت تدمرت نفسيا ببعدها عن الاولاد و الاب مش مقدّر هالشي, و بعد ما شاف البنت بتدوب قدامه راح جاب الاولاد, شرحتلي ام البنت الاهانات اللي بتتعرضلها البنت, المسبات و التهزيء بوجود ناس او بدون وجود ناس, الضرب  اه الضرب اللي صدمني ان في اب ممكن يرجع بنته بعد ما تضرب و يسكت عن حقه و حق بنته و يجبرها ترجع لهيك بني ادم, الضرب لدرجه ان البنت الها شهر عن اهلها و لسا امها كل ليله بتحطلها مراهم على اماكن ضربها بالحزام من زوجها, لدرجه ان البنت الها شهر ما طلعت من البيت ولا شافت حد لان الزراق و الانتفاخ اللي بوجهها لسا ما اختفى.

من ضمن الكلام انجاب سيره الطلاق و اكد الاب انه مستحيييييييييييييييييييييييييييييييييل تطلق, شو بدهم يحكو العيله و شو بده يحكي المجتمع و بلوم المجتمع اللي عايشين بينه وما بلوم حاله, انا ما قدرت اسكت حكيتله بدي احكيلك شغله اولا العالم لو بنتك مبسوطه ما حترضيها العالم اذا بدك تعيش بناء على رايهم تموت احسنلك ويا دوب تسلم, و هيني من هلا بحكيلك اذا بنتك رجعت و صارلها شي ماتت او انتحرت فانا بحكيلكم انتو التنين اني بحملكم مسؤوليتها, طبعا بابا وماما ما عجبهم تدخلو بس الله هداهم و اكتفو بالتشبير انه اسكتي.

بتحكيلي الام هو بصراحه البنت تعبت نفسيا و اخدتها على دكتور نفسي من شي سنتين و الدكتور حكالها انها مصابه بانهيار عصبي حاد و ان البنت عرضه لانها تعمل بحالها اي شي و ممكن تأذي حالها, والها سنتين عالادويه

كيف بهونلك تعمل هبك في بنتك, بديش احكي عن شبه الرجال اللي بضربها و اللي فاهم الرجوله بطريقه متخلفه, بدي اضل بالاهل, لما تجبر بنتك على هيك عيشه و لما بس بدك تساعدها تقرر تحرمها من اولادها اللي الشرع و الدين بعطيها هالحق , للاسف كتير اهل بحكو لبناتهم اللي ماكلين هوا بحياتهم تعالي انت و ارميله اولاده, عاساس انهم ولاد الجيران مش ولادها, بدك تكسر قلبها فوق الكسره اللي هي فيها, هاد طبعا في حال الاهل رضيو بموضوع الطلاق, كتير اهل الطلاق هاد غير وارد و الحل هو انك تموتي او هو يموت بس رجعه عندي ما في, كتير بنات ما بعرفو حقهم برفض هالواقع اللي بلزموهم فيه ازواجهم و اهاليهم.

اتقو الله يا جماعه في بناتكم, اتقو الله يا رجال في زوجاتكم



ملاحظه ع الهامش

اصدقائي و صديقاتي....في مشروع بشتغلو عليه زميلات مدونات النا و انا حابه اشاركهم فيه, هالمشروع بحكي عن حقوق المرأه و تعريفها بهالحقوق, حقها بالحياه, حقها بانها تحكي لأ و ما تسكت عن الظلم, اول خطوه في هالمشروع هي تجميع قصص عن العنف ضد المرأه و ياخدو رأي قانوني بالموضوع لتعرف الستات اللي ساكتين عن هالعنف شو العقوبه القانونيه للي بتعرضوله و انه الهم حق يرفعو صوتهم و يحكو لأ , بدي منكم اصدقائي تبعتولي اي قصه بتعرفوها عن الموضوع و تبعتولي اياها على ايميلي باسمكم او باسم مجهول واذا بتحبو بالتعليقات, يا ريت تشاركونا بكل القصص اللي بتعرفوها علشان اللي بتعرضو لهيك مواقف و بفكرو انو عادي الزلمه يضربها و عادي يهينها تعرف انه مش عادي بالمره و ان القانون برفض هالشي, كتير ستات عايشين بينا بفكرو ان جزء من واجباتها تجاه زوجها انها  تاكل القتله و هي ساكته و لااا كمان  تستسمحه و تطلب الغفران على شي ما عملته, بتمنى منكم تساعدونا.

10 التعليقات :

انتو مشروع تغريبي إمبريالي!

تتدخلوش!

ضرب الحبيب زبيب = شعار المرحلة منذ فجر الحرية
طيب ماشي خلص بلاش آكل اللي فيه النصيب!
------
بصراحة الموضوع مو مزح و لا مستاهل تنكيت
------
بريه عليكي ... تدخلك ممتاز
و إذا بصراحة بتقنعي البنت تجكي لأبوها وجه لوجه و بدون مقدمات عن كيف بيضربها و من متى و ببعض التفاصيل بكون مو غلط!

انتي حكيتي إنتو العائلتين قراب من بعض و بصراحة و مع إنو الافتراح مو ممتاز بس بالله شو أسوأ من هيك!
يعني الأولاد وضعهم منيح بهيك استمرار مثلًا! (إذا كان هذه هي الحجة في السكوت!)

أنا انقهرت! جد!!

 

الله لا يوفقه زوجها ... لك زوجتك أمانة .. عندك ... هي الرجولة بالضرب . استغفر الله العظيم ...
و أهلها كيف هاين عليه انو بنته تنضرب بحزام هيك.. خطيتها برقبتهم لأهلها .. ايش طلاق ما في .. بيحرموا الي ربنا حللوا ..ماشي الطلاق ابغض الحلال بس لما تصير لحياه مستحيلة بين الطرفين أكيد الطلاق هوة الحل الانسب...
هوة الناس و المجتمع الي عايشين مع بنت و حياتها...

جد اذا ابوك بيسمع منه ابو البنت يحكي انه يقدم معاملات طلاق .. شو ضل انه عند دكاترة نفسيين راحت .. اتقوا ربنا يا جماعة ..
مو عارفة شو أحكي .... الله يفرجها

 

"جد قشعر بدني "

أتمنى لو يرجع الرجل لأصل الخلق و لماذا خلق الله حواء وكيف استمرت البشرية وكيف عامل الأنبياء قدوتنا زوجاتهم ..

هؤلاء الذكور لا يستحقون أن يطلق عليهم لفظ رجال وشتان بين الذكورية والرجولة..

ملاحظة/
بالنسبة للمشروع الذي تهمون بإطلاقه أتمنى أن يأخذ الموضوع من كلا جانبيه أي يوعي المرأة بحقوقها و من جانب آخر يشرح للرجل كيفية التعامل مع المرأة وواجابته اتجاهها و ذكر سلوكيات ومواقف من حياة الرسول أو الصحابة في حق زوجاتهم لحفظ كرامتهن


أشكرك صديقتي ويسبر على هذا الطرح الطيب

 

زوجها تيس وابوها اتيس منه ...الله يكون في عونها ...

 

هيثم

المصيبه ان الاب بعرف و لسا بفمر يرجعها
والامر و الادها انه ما بدو يبين لبنته انه متدايق من زوجها ال بركي رجعو لبعض
عيله بتقهر يا زلمه :(

ياااا ريت العالم تقتنع ان الاولاد وضعهم اصعب حاليا من وضعهم بعد الانفصال

الموضوع ﺑﻘﻬﺮ

 

غير معرفه

بابا للاسف ما اخد موقف قوي لانه ما بدو ياثر على راي الاب ..لانه من العالم اللي بتحب تحمل الناس مسؤوليه قراراتهم و النا تجارب معهم قبل

بابا ما حب تدخلي بالموضوع اساسا :$

الله يهدي بالها البنت و يكتبلها الخير، شفتها قريب مسكينه كتير متغيره :(

الله يلهم الاب الصواب وما ياخد قرارات غلط تضيع البنت و ﺍﻭﻻﺩﻫﺎ

 

زينة الصبايا

للاسف هاد مجتمعنا بس بعرف بالدين اللي بفيد مصالحهم
بتحكيلو حقوق الزوجه بحكي مثنى و ثلاث و رباع ...
الله يهدينا و يهديهم
لسا اليوم كنت احكي بموضوع الرجوله المفقوده بمجتمعنا الا من رحم ربي

المشروع ماشي بالاتجاهين بس للاسف ما حد شارك باي قصه :(

شكرا على تواجدك يا ﻗﻤﺮ

 

نيسانة التدوين

مختصر مفيد صحيح 100%
اللهم ﺍﻣﻴﻴﻴﻴﻴﻦ

 

قسما بالله اشي برفع الضغط كان الاب او الزوج اثنين بقهرو وبعدين انا مش عارف كيف هيك انه بعتبرها رجوله يعني يمد ايده على مرته بالنسبه الي احتقر كل انسان بمد ايده على بنت اخت كانت او زوجلانه ليس من الرجوله في شيء

 

Mohammad al alawneh

للاسف لهلأ لساتها البنت معلقه و قلبها محروق عالاولاد اللي ضايعين بين الاب و بينها
و لهلأ والدها و بالرغم من كل الجعجعه و التحلّف مش ماخد قرار

الله يفرجها عالجميع
فعلا هالتصرف ابعد ما يكون عن الرجولة و للاسف كتير بثبتو رجولتهم بس بهالشي :$