Things I Like To Whisper About

Would You Hear Me Whispering

سوريا....ثورة حتى النصر



كل ما حاولت اكتب شي عن الموضوع بتخذلني الكلمات, بخذلني الشعور بالضعف باني ما بملك غير الكلمات , كلمات ما بتغير ولا بتأثر, كلمات ما بتحمي ولا بتهدي من روع طفل او اخت او ام.

عنّا بالشغل كل السوريين بعبرو عن تضامنهم مع بشار الاسد, و انا متأكده ان 75% منهم ضدّه بس بخافو يحكو, الخوف السبب الاساسي لسكوت معظم الشعوب عن الظلم اللي عايشين فيه, مين فينا بقدر يعبّر بكل حريه عن رأيه عن الظلم اللي عايش فيه, ظلم من اشخاص المفروض يحموه و ما ينامو الا ليتطمنو ان كل الشعب نام وهو قرير العين.

اول ما بدت الاحداث بسوريا و كنت انسأل عن رأيي, انا اللي وبكل بساطه ما بفهم بالسياسه و التحليل للوقائع و ربطها بالتاريخ, كنت اجاوب و بكل بساطه ان اذا الحاكم اللي المفروض يحكي شعبه مش قادر يحميه و عم يتقتل هيك اذا هو مش بالمكان المناسب, ينسحب و خلي غيره من يستحق الموقع و قادر على القيام بواجباته ياخده.

اكثر واحد وطني سوري عنا بالشغل, مفهومه للوطنيه هو الجعجعه الفاضيه بمناسبة و بغير مناسبه, رنّة "احنا رجالك يا بشار" و ذكر مقدار فخره بانه علوي و راح ينتصر الجيش و بشار الاسد و سوريا, كل شهر بنزل على سوريا بشتري بيوت و اراضي, لان الوضع بالنسبه اله فرصه, والاسعار صارت بالارض, الوطني اللي بحلف مين يمين اذا بشار الاسد سقط ليمشي بالشوارع و يقتّل كل شخص سنّي, المواطن الصالح الوطني بستغل ضعف اهل بلده و وضعف اقتصاد البلد و بتاجر , ولمّا واجهته برأيي بعد شرح مطوّل عن ان العنصرية الطائفيه انزرعت بالعقول ولا وجود لها, واني ما بهمني من اي طائفه او ملّه هو لحتى احكم عليه, ولن وطن و اخوان الك بتقتلّو, منهم اصحابك و ناس اكلت و شرب معهم, بكل وقاحه حكا انه مستعد يقتل كل صاحب اله و حتى لو كان اخوه اذا كان "خائن" للوطن, و بنظره بدل ما الغريب يشتري و يبيع بالبلد هو اولى, حوار عقيم مع ناس عقلها و قلبها صخور و دبش.


المناظر اللي شفتها و الفيديوهات اللي حضرتها فوق الخيال, مش بني ادمين و لا بشر اللي بعملو هيك باخوانهم, مش بني ادميين ولا بشر اللي بنتهكو حرمات نساء و حرمات جثث, مش بشر ولا بني ادميين اللي بمثلو بجثث اخوانهم واهاليهم.



اللهم فرّج عن اهلنا في سوريا

اللهم الطف بأهل سوريا .. اللهم احفظهم بحفظك واكلأهم برعايتك

ربِ انصر إخواننا وأهلنا في سوريا و لا تنصر عليهم، ربِ ثبت أقدامهم وارحمهم..

ربِ رد كيد كل من أراد بهم السوء يا عزيز يا جبار..

اللهم تول أهل سوريا برعايتك..اللهم احقن دمائهم ...اللهم ول عليهم خيارهم

اللهم احقن دماءهم واحفظ أعراضهم و ذراريهم و أموالهم.

9 التعليقات :

ما اتوقع اي انسان عنده ذمه وضمير بتضامن مع بشار. الأمور سيئه جدا وراح تصير اسوء بكثير. النظام البعثي السوري لسه اسوء بكثير من البعثي العراقي. ان شاء الله راح اكتب شو كانوا يسوا بس الواحد حاليا قلبه مشغول على الشعب المغلوب على امره. فعلا انه احنا امه غريبه اخوانا بيموتوا واحنا ولا على بالنا.

 

الواحد بخجل من نفسه....عايش ببيته و حياته ماشيه طبيعيه وما بايده يعمل شي...لايمتا بدنا نضل نقبل بتغيير اضعف الايمان

قبل فتره سألني واحد اجنبي بالشغل اذا عنا مثل سوريا...حكيتله لأ الحمد لله

ليلتها ما نمت من تأنيب الضمير....الحمد لله على كل حال طبعا بس كأنه الموضوع ما بخصنا

 

مش بس خجلان!
و الله إشي بيقهر :(

 

والله يا ويسبر نفس الاحساس بالخجل وانا بكتب
لكن ليس بيدى الا الكلام والله المستعان
اما زميلك فبما انه علوى فبالتكيد يؤيد بشار لانه ينصر العلويين فى بلاده
هذا منافق خداع ينتهز الفرص
اعان الله شعب سوريا ونصرا قريب باذن الله

 

الله يلطف فيهم ويحققلهم النصر قريبا آميين
أنا كمان متلك السوريين اللي بعرفهم هون كلهم مع بشار 100% ومن الواضح جدا انهم خايفين مشان هيك ساكتين !!

 

انا ما عندي تعليق أقوله ..
صمتي أو/و كلماتي لا وزن لها ..

بس حبيت أقول على الدعاوي اللي بالآخر ..
آمين

 

للاسف ...كلنا نفس الوضع وما بايدنا شي نعمله غير الدعاء....الله يفرجها عليهم عن قريب يا رب

 

مع انها متاخرة كتييييييييير
بصراحة احنا بزمن طائفي بامتياز
الله يختار الخير لسوريا
بجد الوضع متازم
و الفكر كمان

 

Thank you for your wonderful topics :)