Things I Like To Whisper About

Would You Hear Me Whispering

فيروزيات 3...




كبرت وهي حاسة في بعد وجفا بينها وبيت والدها و والدتها, ممكن فرق العمر الكبير بما انها كانت "غلطه" اخر العمر زي ما بحكو دائما ويلا بسبب الاخوه و الاخوات الكتار بالعيله الاب و الام بطلو يفرحو بالمولود الجديد!!! ما بتعرف بس هالجفا مرات بعجبها و مرات اكتر بدايقها.

باوقات بتحب انها تكون شبه خفيه, شبح بمشي بهالبيت ماحد يحكي معها ولا حد يلومها او يعاتبها, او حتى يطلب منها اي طلب, خصوصا انها اخر العنقود, اللي الكل شارك بتربيته و الكل اعتمد عليه لقضاء حوايجه, جيبي...خدي...ودي...هاتي...نادي...كل شي هي اسهل شي يطلبو منه.

و باوقات اكتر كانت تكره هالجفا, بوقت كان نفسها تحس ان والدتها الها, الها وبس, مش لدقايق باليوم ,دائما بتحكي مع والدتها و هي معطيتها ظهرها, ما بتتذكر انها عمرها حكت مع والدتها وجها لوجه, وجها للغاز...للغساله...للثلاجه...عالماكينه..دائما بتشوف ظهر والدتها.

كبرت هالبنت وصارت صبيه, حسّت انها بحاجه لوالدتها اكتر, بس والدتها ست كبيره وما راح تفهم مشاعرها بهالسن, كل شي راح يكون غلط من وجهة نظرها , زي لمّا تحكي لخواتها و كل وحده تتدخل بطريقتها و تحلل على مزاجها و بتطلع بالاخر بسبب جديد يمسكوه خواتها عليها لتشتغل شغلهم بالبيت.

كبرت اكتر وصارت عروس, يوم عرسها شافت والدتها واقفه جنب شجره كبيره بالحديقة الي عندهم , نفس الشجره اللي كانت هالصبيه تقعد تحتها كل ما تدايقت من حد بالعيله, راحت لوالدتها تسألها و تشوف مالها, مسكتها والدتها و ضمتها و شمتها و صارت تبكي اكتر و اكتر, بهالضمه تذكرت الصبيه كل الاوقات الحلوه اللي قضّتها مع امها, من ريحة والدتها تذكرت كل الضمّات و كل القبلات اللي باستها اياهم والدتها, سألت حالها ولامت حالها كيف بكل هالسنين غشاوه التملّك لوالدتها خلتها ما تحس بحبها و حنانها طول الفتره الماضيه, كيف نسيت كل هالمواقف, حطّت راسها على حضن والدتها وصارت والدتها تلعب بشعرها ...." بتتذكري شو كنت اغنيلك وانت صغيره يا بنتي" ... غمّضت عنيها و تذكرت حالها وهي صغيره و تحت هالشجره و والدتها بتلعبلها بشعرها و بتغنيلها



6 التعليقات :

I relate ..

jameel el post ktheer ..

:)

 

بكيت أنا؟
مالني؟

وك مالني؟ حدن يجي يسفقني كف خماسي الأبعاد

استني امسح الدمعه

لا شكلهن دموعات

وك خلص,,,

بوست مش حلو وزنخ وممل وبعيد عن الواقع وبحركش أي مشاعر

وين رايح الفاين,وين المحارم
:(

تباً

 

بوست يحرك المشاعر والاحاسيس
جميل اوى يا ويسبر ومالك دعوه بكلام ام عمر هههههههههه هى كده تحب تهزر
سلامى لاحلى ويسبر

 

هبوشه كوني محضر خير
البوست مببكيش من مره ولا أله دخل بالواقع وممل وطويل ع الفاضي

صفي معي هالمره بس أرزوكي :((

 

الله يسامحك بكيتيني عالصبح.. بنتي عمرها 3 سنين وبضل اغنيلها "كبرت البنوت كبرت ست الكل" وبسرح وبدمع من هلأ :)

 

شكرا جزيلا لدعمكم المعنوي :)

القصه مختلطه واقع مع خيال مع محاولة لربط القصه بالاغنيه...حسيت حالي بالغت بالشخبطه شويتين :)

مسائكم فل و ياسمين :)