Things I Like To Whisper About

Would You Hear Me Whispering

وييييييييييييييييي




افـتح الصندوق ^^.
طلـّع المقص =)).
قـِص منخارك .،.
رجـع المقص ?.
خـذ الوردة وشمهـاا !!!.
كييف شميت الورده و انتا ما عندك منخااااار 

قبل كم يوم نشرت عالفيس بوك عن هالعبه اللي معظمنا لعبها بطفولته 
وكان تعليقي انو  يا باااااااااااااااااااااااااي ما ازنخنا كاينين :)



الحقيقه انّا ما كنا زنخين...و زي ما علّق واحد من الاصدقاء
"بس أحلى إشي والواحد صغير راحة البال ! إشي ما بيرجع للأسف :( "

تذكرت ايام زمان و احلى الاوقات و طريقة تفكيرنا و العابنا اكيد في العاب كتير مشتركة بطفولتنا كلنا, الطابة و السبع حجار...الجلول....عالي واطي...طماية \استغمايه.....وايش اسمها هديك اللعبة اللي كان واحد ينط على رجل وحده و يلحق الباقيين؟؟؟ 
اكيد بتختلف الاسماء بس المبدأ كان واحد.

امبارح اخوي ودّى  سيارته عالصيانه الشهرية و طلعنا كلنا بسيارتي, مرة اخوي و بناته قعدو بالمقعد الخلفي لانه ما في مقاعد السيارة و بدها تسيطر عليهم, حطتلهم الحزام و مشينا, و احنا ماشيين كل ما نيجي على لفّة يحكو بنات اخوي "ويييييييييييييييييييييييي" و يميلو على بعض :) حششنا ضحك انا و اخوي تذكرنا ايام زمان لمّا كنا نعملها لهالحركه وكيف نصير نحسبها لوين بدنا نلف و نجتمع على الجهه التانيه و بس يلف بابا كلنا "وييييييييييييييييي" ويا ويله اللي عالطرف.

قبل هالمره حكينا لمرة اخوي عن هالشي و طلعو همه كمان كاينين يلعبوها :)

ايام حلوه كتيركانت, كل ما كبرنا كل ما خضنا تجارب جديده و واجهنا مشاكل اكبر بتزيد و بتكبّر بهمومنا و بتزيد افكارنا, و احنا صغار يمكن كان عنّا مشاكل و هموم ,على قدنا اكيد ,ولكن برضه بضل هم و كنّا نواجه مخاوف و مشاكل,بس الفرق انّا كنّا ابسط و كنّا ننسى بسرعه, كانت مشاكلنا تنحل اما احنا نحلها او اهلنا يحلولنا اياها بابتسامه او بضمه و احيانا بمحاضره و مرات قرصة دان, كنّا ما نوصل الغرفه الا واحنا ناسيين كل اللي صار, هلأ مش عارفه قلوبنا قسيت ولا ذاكرتنا قويت, بطلنا ننسى و صرنا نراكم و نراكم, بطلنا نسامح و صار السواد يكبر بقلوبنا, مش عارفه مشكلتنا بالحياة واللي بنواجهه ويلا مشكلتنا احنا وطريقة تفكيرنا؟؟؟
 كل شي بنوقف عنده و بهزنا كتير و بكسر ظهرنا فورا, بنبالغ بردود افعالنا ويلا مصايب الحياة بطلت تنحمل؟؟؟

كتير افكار ببالي هالايام و كتير براجع مواقف هزتني و غيرتني, اكيد راح نتغير, بنكبر و عقلنا بنضج و تحليلنا للامور بصير اعمق و بزياده بنغوص فيه مرات, بس مشكلتنا او مشكلتي اني بوقف, و بفقد اجزاء من نفسي مع كل وقفه و بعدين بكمل, قبل هالمره حكيت عن النصيحه اللي انحكتلي بان الانسان الا ما يفقد اشي من نفسه بكل مرحله و المفروض بدل ما نوقف وندور على الاشي اللي خسرناه و نحاول نرجعه, نفكر باللي لسا باقي و نستمر و نحافظ عليه, قررت اعمل هيك بوقتها و اكيد القرار اسهل من التنفيذ, بس هلأ اجا وقت التنفيذ, خلص بكفي كلام و بدي امشي و بدي احافظ عاللي عندي و اكتشف اشياء جديده عندي و اشتغل عليها و اخليها تطفو عالوجه و امشي فيها لقدام وما اتفرج لورا ابدا ابدا اطلاقا مطلقا ان شاء الله.

كالعاده ببدا بمكان و بنتهي بمكان ما اله دخل بس هاد اللي اجاكم :)
مساكم ورد وفل اصدقائي

10 التعليقات :

معظم الناس ذكريات الطفوله عندهم اجمل شيء وانا واحد منهم. ايام جميله جدا وخصوصا لما نتذكرها مع اخوانا او اصدقائنا.ـ

 

معك حق...حلو تتذكرها مع حد عشت معه هاللحظات اللي ما بتتعوض

والاحلى بس تشوف الاجيال الجديده بتكررها بكل برائة كأنك بتتفرج عحالك و قديش كنت مبسوط :)

 

فعلاً
كلاك حكم يا حكيمة ..
ايه ايام زمان والطفولة اللي كانت ذاكرتنا ساعتها
على قد اعمارنا لاتسع لغير المغامرات والشغب واللحظات الحلوة..
وهلا كأننا بنعاقب انفسنا ونحسدها على السعادة
لأنه ما ان نبطل نعمل في انفسنا عمايل
اكيد مافيش حد تاني يقدر يرجعنا لوراء
او يشقينا ف حياتنا.
هيك مثلك صديقتي على طول باقول لنفسي
هو في الاول صعب وصعب جداً
لكن لابد من التذكير طوال الوقت
والاصرار على السير فيما ادركتيه .

شكراً الك جداً
عشان ضحكت وادخلتي البسمة لنفسي
ع الصبح
لاني كنت جاية الشغل مليانة ع الآخر

 

ربنا يديم الابتسامه على وجهك دائما يا اغلى اخت بالدنيا

حكيمه؟؟ انا؟؟
الله يسعدك يا رب كبرتيلي راسي :)

انت الاصل يا قمر وجد بحكي...بقرأ ادراجاتك وما بطلع معي كلام للتعليق كتير مرات كأنك بتحكي بلسان حالي

ان شاء الله نقدر نفعل وما نضل نقول و نقرر بس

مسائك فل و ياسمين و مليان ابتسامات يا رب

 

منو العوض و عليه العوض!

متصابية حضرتك! إسقاطات بلوغرية تنم عن تنفيسات "مين تنفيسات!؟" عميقة اللغوصة و التعقيد النفسي اللا شعوري

----
تمت
---
:P

**أنا مني و علي لساتني صغير كثير و ما عندي حنين و لا هوس لهالأشياءات

و اللعبة هديك اسمها الديك الأعرج

و تعالي هون "خدلك، هاي إجت جد!" - لويش إنتي كاينة بتلعبي 7 حجار! ما عنا بنات يلعبوا 7 حجار
التار و لا العار

*طراخ طراااخ*
بانغ بانغ

 

هو ف احلى من ايام الطفولة لاهم ولا نكد ويييييي كنا نلعبها احنا كمان
الذكريات بتصير زي السكر ف هالايام والانشغال

 

متصابيه؟!؟!؟!؟!
اصلاطن انا صبيه و حضلي صبيه طول عمري

رد نابع من مرض نفسي لاشعوري سطحي متشدد اكبر من الغوص اللي فوق

الديك الاعرج؟؟؟ لأ

كنّا نسميها البومه :) سألت اخوي

هلأ الذكريات لا تمنع انّا لساتنا بنلعب هالالعاب
لسا قبل كم يوم لعبنا ورده مفتحه ورده مغمضه انا و اخوي و مرته و بناته ...خرج تصوير كنّا :)

سبع حجار و جلول...بنت بين 3 اولاد شو بتتوقع العب؟؟؟
المسدسات كانت عشقي لعمر ال 6 سنوات , انتبهتلي ماما و بدينا بالباربي و هالقصص ...بس هاد لم يمنع اني اسمي اول لعبه "علاء" :)

 

سوزان

ههههههههههه كلنا شكله كنّا نلعبها...لعبه طفوليه فطريه بدون تخطيط و تقليد

ايام بتجنن...الحمد لله انّا عشناها

 

الشعب يريد معرفة علاء!
لووول
---
ما إسمهاش البومة! البومة بكون الواحد مشبك إيديه ما عدا أصبع السبابة و بيلحق بال"شعب" و اللي بينزقط بيظل ياكل شلاليت تا يوصل ال"بيت" - هيهيييي

اللي برجل وحدة و بيلحق ال"شعب" = الديك الأعرج

بس أخوك مخرفن شويتين
:فليلة:

---

مسدسات = بس هسا ما في منو هالحكي، صح!

:يبلع ريقه:

---

متصاااااااااااااابية
متصااااااااا
متصااا

:صدى:

 

اه...بنعمل هيك بالاصبع و بنط على رجل وحده و اذا نزل رجله بضل ياكل شلاويط وفي مقوله اخرى شلاليط لحتى يرجع عبيته...بس اهل الزرقا ما بحبو التحدي و كسولين فكانو يلعبوها برجلتين :)

الحلو اني ما كنت اعرف حد اسمه علاء ومن وين جبت الاسم مش عارفه :)

لااا شو مسدسات...هلأ قنابل كلاشنكوف كبرنا على مسدسات

انا ما بسمع الصدا و اخر 4 سطور بالعاده ما بقرأهم...بزهق