Things I Like To Whisper About

Would You Hear Me Whispering

الوان الرياح



لا ما راح احكي عن الرياح المغبرّه اللي مرضتنا قبل فتره و حنقتنا...ولا راح احكي عن الرياح الضبابيه اللي مشبّعه بالرطوبه اللي برضه خنقتنا و عم تخنقنا هالايام.

بدي احكي عن الرياح اللي بتهب على كل واحد فينا من فتره لفتره, حسب الوضع النفسي و الاحداث اللي بنواجهها و بنعيشها, واحنا بس اللي بنشوفها وبالوان مميزه خاصه فينا

عن الرياح الخضرا....زي النبته اللي بتنمو و بنرعاها و بندير بالنا عليها, لا يمكن تذبل ولا يمكن تصفّر لانها مزروعه بقلوبنا وجواتنا مخبينها وما حد بقدر يلمسها ولا يغير فيها ...رياح الشوق للوطن

الرياح السودا...اللي بتغطي على كل شي, مثل الغمامه بس تغطي على عيونا و عقولنا و بنبطل نستقبل و بنرسل اشارات غلط لان عقولنا سكرت... اسودت ....و غطت على كل شي تاني...رياح الغضب

رياح بيضا .....صاااااااااااااااافيه حليب وما في شي ممكن يعكرها....بيضا زي قلوبهم و زي محبتهم النا اللي ما في شي ممكن يغيرها و مثل حنيتهم ...رياح الشوق للاهل

رياح بنفسجي..... مثل اللافيندر ريحته بتعبي الدنيا و بتخلي كل شي فيه لمسه حلوه...بس نشم ريحته تلقائي بنصير نبتسم ...رياح الحب ( اه بنفسجي مش احمر )

رياح بني.... بريحه الخشب اللي بتحسسك بالدفىء ....بتحسسك بالألفه و الحميميه, بالراحه وكأنك رميت احمال كبيره عن اكتافك فجأه....رياح الحنين للبيت

رياح زرقا... لوني المفضل...البحر...السما...الهدوء و الروقان...الابتسامه بدون سبب...الصفنان و التأمل....الانتعاش و النفس العميق...رياح الشوق للنفس

6 التعليقات :

رياح سودا
كل اللي موجودة حاليا للأسف

الله يفرجها

 

زكرتيتي ببيت شعر كتير بحبو:
اذا هبت رياحك فاغتنمها.. فان لكل خافقة سكون
ولا تغفل عن الاحسان فيها.. فلا تدري السكون متى يكون

 

هي الرياح السودا اعوذ بالله منها بس تهب بتنشف كل شي بطريقها وما بيعود الواحد عارف يستمتع لا بالبيضاء ولا الخضرا ولا البمبي حتى

كأنوا هالرياح ضاربتنا جميعا هالايام من المحيط للخليج
!

 

ذكرتيني بريح بداية الصيف اللي بجيب معه شعور بالامان و الفرج :)

بس انا اعترض على اللافندر ... ممكن تشوفي شي بداله ؟ :)

تحياتي

 

LUNAR

صديقي ابو زينه
الله يبيّض كل ايامك يا رب
ان شاء الله يكون الوضع نوّر هالايام....توكل على الله و ما في غيره بنورها ان شاء الله

lily

زماااااااااان هالقمر ما بان :)
كيفك و كيف الحياه معك؟؟؟ ان شاء الله تكوني ملتهيه عنا بالهنا دائما

ساكنه ...ساكنه وجافه تماما من فتره....الحمد لله :)

 

نيسان


لااااا هي الحمد لله اشتغلت الاعراس و الافراح و تفشش القلب ....ممتااز

لازملي رجعه عالاردن على كم عرس برجع بفرفش يمكن :)


SAWA7

اهلا و سهلا فيك و شكرا على المتابعه :)

عرفتها...اللي بكون كل جسمك بغزغزك من الشوب و قجأه بتيجي بتنعش
طبعا ملغيه عنّا هون بدبي ....بتطلع برّه بضرب الهوا بصباحك بتبطل قادر تتنفس :$

لااا هو لافندر مش حيتغير :)